VIII b o b
1
Zelixon televizorni jahl bilan mushtlagan mahalda Asadbek o‘z uyida a’yonlari qurshovida o‘tirar edi. U ham muxbirning gaplaridan g‘ijinib, so‘kindi. Kesakpolvon e’tiborsiz holda, Chuvrindi esa jag‘ini mushtiga tirab, diqqat bilan quloq tutardi. Muxbirning so‘zlari tugab, Maskovdagi Oliy kengash sessiyasi ulandi. Farg‘onaga kelib ketgan rahbar deputatlar talabi bilan so‘zga chiqib tushuntirish bera boshladi. «Janjal qulupnoydan chiqdi», deb ishontirmoqchi bo‘lganida Asadbek uning yetti pushtini o‘qib tashladi.
— Mahmud,— dedi u,— hozir shu televizorni qancha odam ko‘rib turibdi?
— Bir-ikki yuz million bordir? — deb javob berdi Chuvrindi, diqqatini bo‘lmagan holda.
— Bir o‘zi shuncha odamni ahmoq qila olaman, deb o‘ylayaptimi?
— Gapiga ishonmayapsanmi? — dedi Kesakpolvon suhbatga qo‘shilib.
— Sen ishondingmi?
— Ishondim nimayu ishonmadim nima?
— Ha senga baribir. Sen ishqi yo‘q eshak, dardi yo‘q kesaksan.
— Sal pastroq tush,— dedi Kesakpolvon sal ranjigannamo ohangda.
— Pastga tushsam, tushmasam, shunaqasan. Kecha deputatga qo‘shib seni jo‘natsam bo‘larkan.
— Qayoqqa?
— Farg‘onaga?
— Ketdimi? — dedi Chuvrindi, televizordan ko‘z uzib.
— O‘chirib qo‘ya qol,— dedi Asadbek. Chuvrindi buyruqni bajargach, kechagi voqeani aytib berdi: — Kechga yaqin telefon qilib qoldi. «Aka, ahvol chatoq, men bilan Farg‘onaga borib kelmasangiz bo‘lmaydi», deydi hovliqib. «Nima gap?» desam, «yo‘lda tushuntirib beraman, aeroportga kelavering», deydi. Ahmoq bo‘lib boribman. «Siz u tomonlarda ko‘p odamlarni taniysiz. Meni o‘sha yerdan saylashgan bo‘lsa ham hech kimni tanimayman, yonimda yuring», deydi. Qip-qizil ahmoq, o‘sha deputating. Onasini uchqo‘rg‘ondan ko‘rsatmoqchi bo‘ldimu, joyi emas, dedim.