Poytaxtimizdagi "Markaziy harbiy sport klubi" stadionida 2 iyun kuni "O'zbekistonda xizmat ko'rsatgan sport ustasi", O'zbekiston milliy va olimpiya terma jamoalarining katta murabbiysi Mirjalol Qosimovning katta futbol bilan xayrlashuv kechasi bo'lib o'tdi.
Mahalliy axborot agentliklari xabar berishicha, o'nlab xorijiy mamlakatlardan sport delegatsiyalari, taniqli sportchilar, minglab futbol muxlislari, mutaxassislar, ustozlar, yosh sportchilar, san'at ustalari ishtirok etgan tadbirni O'zbekiston futbol federatsiyasi prezidenti M.Usmonov ochdi. Tadbirda davlatimiz rahbari Islom Karimov rahnamoligida mamlakatimizda sportni, jumladan, futbolni rivojlantirish, yetuk sportchilarni tarbiyalash va voyaga yetkazish, sog'lom turmush tarzini keng targ'ib etishga alohida e'tibor qaratilayotgani ta'kidlandi.
Ko'rsatilayotgan ana shunday doimiy e'tibor va g'amxo'rlikning samarasi o'laroq mamlakatimizdan ko'plab jahon, olimpiya, qit'a chempionlari, boshqa xalqaro turnirlarning g'oliblari yetishib chiqmoqda.
Shaxmat bo'yicha jahon chempioni Rustam Qosimjonov, boks bo'yicha jahon va Olimpiada chempioni Muhammadqodir Abdullayev, professional boksning WVA yo'nalishi bo'yicha o'ta og'ir vazndagi jahon chempioni Ruslan Chagayev, tennis bo'yicha qizlar va o'smirlar o'rtasida mashhur Uimbldon turniri g'olibasi Iroda To'laganova, yunon-rum kurashi bo'yicha jahon chempioni Dilshod Oripov kabi sportchilarimiz shular jumlasidandir.
M.Qosimov o'zbekistonlik charm to'p ustalari o'rtasida nufuzli sovrinlarni eng ko'p qo'lga kiritgan futbolchilardandir. U o'smirlar o'rtasida jahon va Yevropa chempioni, kattalar o'rtasida Osiyo o'yinlari, O'zbekiston va Rossiya chempioni, O'zbekiston kubogi sohibidir.
Bundan tashqari, milliy chempionatimiz va ko'plab xalqaro musobaqalarda "Yilning eng yaxshi futbolchisi", "Eng yaxshi o'yinchi", "Eng yaxshi to'purar" kabi nominatsiyalar bo'yicha juda ko'p bor g'olib, deb topilgan.
...Qo'shoq aka o'g'lini Respublika oliy sport mahorati maktabiga yetaklab kelganida Mirjalol o'n yoshda edi. Otasi uni bolalar futboli murabbiysi Yuriy Gospodarchukga topshirdi. Har bir futbolsevar bolakay kabi "Paxtakor"da o'ynashni orzu qilgan Mirjalol yillar davomida o'z mahoratini oshira bordi. 17 yoshida "Paxtakor" jamoasiga qabul qilindi.
Shundan buyon yigirma yil o'tdi. Bu davr mobaynida Mirjalol o'zbek futbolining eng yorqin yulduzlaridan biriga aylandi. 1992-2005 yillari u O'zbekiston milliy terma jamoasi safida eng ko'p — 67 uchrashuv o'tkazib, raqiblar darvozasiga 30 ta gol urgan haqiqiy sardordir. Bu ikki ko'rsatkich o'zbek futboli uchun rekord natijadir. Ayniqsa, Mirjalol tepgan burchak va jarima to'plarining darvoza to'ridan joy olishi millionlab muxlislar hayratiga sazovor bo'lgan.
Uning nomi jarima to'plaridan gol urish bo'yicha dunyoga dong'i ketgan fransiyalik Zinedin Zidan, braziliyalik Ronaldinyo va Roberto Karlos, angliyalik Devid Bekxem kabi jahon futboli yulduzlari bilan bir qatorda qayd etiladi. Bu o'zbek farzandi hech kimdan kam emasligini va hech qachon kam bo'lmasligining yana bir isbotidir.
M.Qosimov faoliyati davomida o'zining sevimli jamoasi — "Paxtakor"dan tashqari, Rossiyaning "Alaniya" /Vladikavkaz/, "Krilya Sovetov" /Samara/, Belarusning "Dinamo" /Minsk/, Birlashgan Arab Amirliklarining "Ash-Shabab" /Dubay/ kabi taniqli klublarida to'p surdi.
— Men Mirjalol Qosimov bilan bir jamoada ishlaganimdan faxrlanaman, — deydi rossiyalik mashhur futbol murabbiysi Valeriy Gazzayev. — "Alaniya"ning 1995 yili Rossiya chempionligini qo'lga kiritishida Mirjalolning xizmatlari beqiyos bo'lganligini barcha yaxshi biladi. Agar u 1996 yili jiddiy jarohat olmaganida, "Alaniya" jamoasi chempionlikni yana o'zida saqlab qolgan bo'lardi. Mirjalol nafaqat O'zbekiston, balki Rossiya futboli taraqqiyotiga ham ulkan hissa qo'shgan futbolchidir.
— Biz, futbolchilar, Mirjalol Qosimovni jamoaning yuragi, yetakchisi, deb bilamiz, — deydi Rossiya terma jamoasi o'yinchisi Andrey Karyaka. — Futbolchilarning ba'zilari jamoaviy o'yinga, boshqalari individual mahoratiga tayanib to'p suradi. Haqiqiy charm to'p ustasi hisoblangan Mirjalolda esa ushbu ikki xususiyat ham uyg'unlashgani uni to'p surgan jamoalarida yetakchiga aylantiradi.
Yurtimizda jismoniy tarbiya va sportni rivojlantirishga, sog'lom turmush tarzini targ'ib etishga qo'shgan ulkan hissasi va jahon sport maydonlarida O'zbekiston sharafini munosib himoya qilgani uchun M.Qosimov Vatanimizning yuksak mukofotlari bilan taqdirlangan.
O'zbekiston Respublikasi Prezidenti Islom Karimov yaqinda imzo chekkan farmonga binoan o'zbek futbolining shuhratini jahonga tanitish, xalqaro maydonda uning nufuzini yuksaltirishda ibrat va namuna ko'rsatgani, milliy futbol maktabini rivojlantirish ishiga qo'shgan munosib hissasi uchun O'zbekiston milliy va olimpiya terma jamoalari katta ustozi Mirjalol Qosimov "Mehnat shuhrati" ordeni bilan taqdirlandi.
Mamlakatimizda ommaviy sportni, xususan, futbolni targ'ib qilish yo'lidagi jonkuyarligi, yosh avlodni Vatanga muhabbat ruhida tarbiyalash, ularni har tomonlama barkamol etib voyaga yetkazishdagi xizmatlari, xalqaro musobaqalarda yurtimiz sha'nini munosib himoya qilishga qodir bo'lgan yuksak malakali futbolchilarni tayyorlashga qo'shgan salmoqli hissasi va ko'p yillik samarali faoliyati uchun Farg'onaning "Neftchi" futbol jamoasi bosh ustozi Yuriy Sarkisyan ham "Mehnat shuhrati" ordeni bilan mukofotlandi.
O'zbekiston Respublikasi Bosh vaziri SH.Mirziyoyev Vatanimizning ushbu yuksak mukofotlarini ularga tantanali ravishda topshirdi.
O'zbekiston terma jamoasi hamda "Yevropa va Osiyo futbol yulduzlari" terma jamoasining bellashuvi chiroyli to'p uzatishlar va ajoyib gollarga boy bo'ldi. Uchrashuvda M.Qosimov o'zining katta futboldagi eng so'nggi golini kiritdi. So'ng uning o'g'illari Mirkamol va Mirjamol maydonga tushdi. M.Qosimov katta futbol bilan xayrlashgani bilan sportni tark etgani yo'q.
— Hayotimda nimaga erishgan bo'lsam, barchasini mamlakatimizda Prezidentimiz Islom Karimov rahnamoligida sportni rivojlantirishga, sportchilarni har tomonlama qo'llab-quvvatlashga berilayotgan ulkan e'tibor va g'amxo'rlikning samarasidan, deb bilaman, — deydi Mirjalol Qosimov. — Endi men sport maydonlarida orttirgan mahoratim va tajribamni yurtimiz sharafini xalqaro maydonlarda munosib himoya qiladigan yosh futbolchilarni tarbiyalashga qarataman.