Muallif Mavzu: Behzod Fazliddin she'rlaridan  ( 20350 marta o'qilgan)

0 Foydalanuvchilar va 1 Mehmon ushbu mavzuni kuzatishmoqda.

shoir

  • Moderator
  • Mega Member
  • *****
  • Rahmat
  • -aytdi: 2814
  • -oldi: 761
  • Xabarlar: 10773
  • Shoiru she'ru shuur
Behzod Fazliddin she'rlaridan
« : 23 Sentyabr 2007, 17:19:51 »
                                                 
Behzod FAZLIDDIN
                       
                      ***
Tirikmasman, o‘lganga ham o‘xshamayman,
Najot so‘rab kelganga ham o‘xshamayman.
Yuragimni ajin bosdi — qarib ketdim,
Yigirmaga to‘lganga ham o‘xshamayman.

O‘zim uchun qo‘ygan bari shartim og‘ir,
Tushgan joyin quritadi — gardim og‘ir.
Men ertaga qayta tura olamanmi,
Jon olmasa ketmaydigan Dardim og‘ir.

Nurlarimni tunlar uchun zarba qildim,
Ko‘nglim uyin kimlar uchun Ka’ba qildim.
Suyaklarim zirqiradi — lazzatlanib
Tavba qildim, tavba qildim, tavba qildim.

Yana cho‘llab yotganimni bilarmikin,
Daryolarim ko‘kdan qaytib kelarmikin?
She’rlarimni elchi qilsam, dargohida
Eng odil Shoh meni qabul qilarmikin?

Tirikmasman, o‘lganga ham o‘xshamayman...       

shoir

  • Moderator
  • Mega Member
  • *****
  • Rahmat
  • -aytdi: 2814
  • -oldi: 761
  • Xabarlar: 10773
  • Shoiru she'ru shuur
Re: Behzod Fazliddin she'rlaridan
« Javob #1 : 23 Sentyabr 2007, 17:20:01 »
              ***       

Havolarga ishonmay qo‘ydim,
Har lahzada ketish xavfi bor.
Men hech kimni tushunmay qo‘ydim,
Yuragimning kimga nafi bor?

Yashay dedim — kunim o‘tmadi,
Charchamadim ro‘shnolik so‘rab.
Ko‘zlarimdan itlar ketmadi,
Yig‘layverdim Quyoshga qarab.

Hali sendan ko‘nglim o‘lmagan,
Ber o‘zimga o‘zimdan najot.
Boradigan joyim qolmagan,
Meni boshqa haydama, Hayot!

shoir

  • Moderator
  • Mega Member
  • *****
  • Rahmat
  • -aytdi: 2814
  • -oldi: 761
  • Xabarlar: 10773
  • Shoiru she'ru shuur
Re: Behzod Fazliddin she'rlaridan
« Javob #2 : 23 Sentyabr 2007, 17:20:26 »
YASHASHGA JOY BORMI?

Lahzaga tengma-teng o‘chib boraman,
O‘zimdan, so‘zimdan cho‘chib boraman,
Zavol bilmaydigan manzilni ko‘rsat,
Tomirlarim bilan ko‘chib boraman.

shoir

  • Moderator
  • Mega Member
  • *****
  • Rahmat
  • -aytdi: 2814
  • -oldi: 761
  • Xabarlar: 10773
  • Shoiru she'ru shuur
Re: Behzod Fazliddin she'rlaridan
« Javob #3 : 23 Sentyabr 2007, 17:20:39 »
O‘ZIGA

Chaqirsang, hech qaerga chekinmasdan keldim-ku,
Tog‘larning orqasiga bekinmasdan keldim-ku.
Qarg‘alarning tiliga insof tilab yashadim,
O‘zimdan boshqasiga teginmasdan keldim-ku.
Endi holimni so‘ra.

Qachongacha armonlar kulbasiga qo‘noqman,
Men dunyoning ortidan chopayotgan cho‘loqman.
Yillar aro so‘zlarim manziliga yetmaydi,
Yuragimni tilimga ko‘chirgani no‘noqman.
Endi ko‘nglimga qara.

Sovib qolsam, jonimni qaysi o‘tlarga tutay,
Nurlaringning bag‘rida  kirlarimni yo‘qotay.
Bo‘shab qolgan ko‘zlarim, o‘zim bedor bo‘lmasam,
Ko‘ksimdagi qushchani qanday qilib uyg‘otay?!
Endi holimni so‘ra.

Men bu yerga sen uchun egilgani kelganman,
Lolalarning ko‘ziga tikilgani kelganman.
Ishontirsang, shartingni bajarmasdan ketmayman,
Hammayoqni gullatib, to‘kilgani kelganman.
Endi ko‘nglimga qara,
Endi o‘zimga qara...

shoir

  • Moderator
  • Mega Member
  • *****
  • Rahmat
  • -aytdi: 2814
  • -oldi: 761
  • Xabarlar: 10773
  • Shoiru she'ru shuur
Re: Behzod Fazliddin she'rlaridan
« Javob #4 : 23 Sentyabr 2007, 17:20:56 »
MENING UMRIM

Bir lahzada osmon meniki,
Bir lahzada yashab olaman.
Bir lahzada bosar g‘am yuki,
Bir lahzada... bo‘shab qolaman.

shoir

  • Moderator
  • Mega Member
  • *****
  • Rahmat
  • -aytdi: 2814
  • -oldi: 761
  • Xabarlar: 10773
  • Shoiru she'ru shuur
Re: Behzod Fazliddin she'rlaridan
« Javob #5 : 23 Sentyabr 2007, 17:21:12 »
SO‘Z

Men Undan uyaldim, men Undan qo‘rqdim,
Ko‘nglimni tarjima qilolmadi U.
Oyog‘idan qirqdim, boshidan qirqdim,
Baribir, meniki bo‘lolmadi U.

Undan ketolmayman, Undan qolmayman,
Taqdirim U bilan sherik-ku, Ona.
Unga yetolmayman, lekin tolmayman,
Bu dunyo So‘z bilan tirik-ku, Ona!

shoir

  • Moderator
  • Mega Member
  • *****
  • Rahmat
  • -aytdi: 2814
  • -oldi: 761
  • Xabarlar: 10773
  • Shoiru she'ru shuur
Re: Behzod Fazliddin she'rlaridan
« Javob #6 : 23 Sentyabr 2007, 17:21:26 »
                  ***

Nahot, she’rlarimga kuningiz qoldi,
Ona, aylanishdan to‘xtamoqda Yer.
Ko‘zingizga boqib, tilim yo‘qoldi,
Axir poyingiz — she’r, qadamingiz— she’r.

Qachon zardoblarim topadi barham,
Men qachon to‘kilib beraman Sizga?
Jonimdan tovonlar to‘lab borsam ham,
Umrim arzimaydi dardlaringizga.

Ilhom parilari cho‘ringizmidi,
Bir nazar solsangiz, qoshingizda jam.
Umrim bu — eng mahzun she’ringizmidi,
Mening shoir Onam, shoira Onam?

Dunyo so‘z so‘raydi mendan, jo‘rttaga,
Shamollar ustimdan kulgan bo‘ladi.
Bugun chidab turay, Ona, ertaga
Meni g‘amlaringiz Shoir qiladi.

shoir

  • Moderator
  • Mega Member
  • *****
  • Rahmat
  • -aytdi: 2814
  • -oldi: 761
  • Xabarlar: 10773
  • Shoiru she'ru shuur
Re: Behzod Fazliddin she'rlaridan
« Javob #7 : 23 Sentyabr 2007, 17:21:41 »
JONIM

O‘t ichida yashash osonmi, Jonim,
Nechuksiz? Joningiz omonmi, Jonim?
Ayirib qo‘yishdi yo‘llarimizni,
Odamlar shunchalik yomonmi, Jonim?

Ko‘ngilning yurtidan ketib bo‘lmaydi.
Sinovsiz manzilga yetib bo‘lmaydi.
Axir, muhabbatning ko‘chalaridan
Yurakka tosh solib o‘tib bo‘lmaydi.

Yer, Samo biz bilan, qisinmaydilar,
O‘tkinchi kuchlarga bo‘ysunmaydilar.
Tushunib turibdi Xudoyim bizni,
Nega bandalari tushunmaydilar?!

Odamlar shunchalik yomonmi, Jonim...

shoir

  • Moderator
  • Mega Member
  • *****
  • Rahmat
  • -aytdi: 2814
  • -oldi: 761
  • Xabarlar: 10773
  • Shoiru she'ru shuur
Re: Behzod Fazliddin she'rlaridan
« Javob #8 : 23 Sentyabr 2007, 17:21:54 »
SIZGA SAVOL

Ko‘zingizda turgan dardmi, armonmi,
Sevilish osonmi, sevish osonmi?
Sizsiz yasholmayman, deb charchamaysiz,
Jonim, hayotingiz shuncha arzonmi?!

shoir

  • Moderator
  • Mega Member
  • *****
  • Rahmat
  • -aytdi: 2814
  • -oldi: 761
  • Xabarlar: 10773
  • Shoiru she'ru shuur
Re: Behzod Fazliddin she'rlaridan
« Javob #9 : 23 Sentyabr 2007, 17:22:11 »
KERAKLI ODAMGA

Keragidan ortiq yig‘laysiz —
                                         Keragidan ortiq qiynayman.
Xayolimga arqon bog‘laysiz —
                                         Keragidan ortiq o‘ylayman.
Azoblarim mening bari — sir,
                                         Siz uxlaysiz, Siz bedaraksiz.
Jonim, hozir menga, baribir,
                                          Keragidan ortiq keraksiz.

shoir

  • Moderator
  • Mega Member
  • *****
  • Rahmat
  • -aytdi: 2814
  • -oldi: 761
  • Xabarlar: 10773
  • Shoiru she'ru shuur
Re: Behzod Fazliddin she'rlaridan
« Javob #10 : 23 Sentyabr 2007, 17:22:25 »
XULOSA

Hali tong keladi tunlarni otib,
O‘limni kuzatib qo‘yay yurtiga.
Bugunimga nima yozgansan, Kotib,
Kimning yuragiga boray ertaga?

Yillar g‘alvirida qancha elandim,
Bosib ketaverdi qorlar izimni.
Tomirlarimgacha Ishqqa ulandim,
Yuragimga surgun qildim o‘zimni.

Hali yellar bilan chopsa bo‘ladi,
Uzaytirish mumkin Baxtning umrini.
Hayotning ko‘nglini topsa bo‘ladi,
Kutib o‘tirmayman Vaqtning amrini.

Ajal ham zerikdi, shekilli, rosa,
Endi chaqirmasam, qaytib kelmaydi.
Milyonta dardimdan bitta xulosa:
O‘lib ko‘rmay turib yashab bo‘lmaydi.

shoir

  • Moderator
  • Mega Member
  • *****
  • Rahmat
  • -aytdi: 2814
  • -oldi: 761
  • Xabarlar: 10773
  • Shoiru she'ru shuur
Re: Behzod Fazliddin she'rlaridan
« Javob #11 : 23 Sentyabr 2007, 17:22:41 »
O‘ZIMNI BER!

Xudoyim, o‘zimni o‘zimga bergin,
O‘zimdan boshqani sog‘inganim yo‘q.
Bulut to‘lib qolgan ko‘zimni ko‘rgin,
Yashash tugul hali tug‘ilganim yo‘q.

Yomg‘irlar Hayotdan bergaymi darak,
Hademay chaqmoq ham o‘tib ketadi.
Dunyoga bir Inson ovozi kerak,
Qachon yuragimni to‘lg‘oq tutadi?!                 

shoir

  • Moderator
  • Mega Member
  • *****
  • Rahmat
  • -aytdi: 2814
  • -oldi: 761
  • Xabarlar: 10773
  • Shoiru she'ru shuur
Re: Behzod Fazliddin she'rlaridan
« Javob #12 : 23 Sentyabr 2007, 17:22:51 »
                   ***

Tomoqlarim qurib ketdi — cho‘llayapman,
O‘zi dilni qay ko‘lmakda ho‘llayapman.
Men bu galgi bahorni lol etmoqchiydim,
Ona, bugun sochingizda gullayapman.

Ishongandim, ko‘zlar meni sotib ketdi.
Ayamadi — so‘zlar meni otib ketdi.
Dardim bor-ku, nega buncha duduqlandim,
Zabonimni to‘tiqushlar yutib ketdi.

Yuzlarimda muhabbatning so‘qmoqlari,
Dunyolarni yoqmaydimi chaqmoqlarim?
Tuproq edim, tuproqlarga botib ketdim,
Gunohlarim o‘sayapti, gunohlarim.

Tutab-tutab ko‘k bag‘rini tig‘layapman,
Yuragimdan boshqa joyga sig‘mayapman.
Ko‘ksimdagi og‘riqlarim yolg‘onmidi,
Osmonlarni yig‘latolmay yig‘layapman.

Ona, menga nima bo‘ldi?!

shoir

  • Moderator
  • Mega Member
  • *****
  • Rahmat
  • -aytdi: 2814
  • -oldi: 761
  • Xabarlar: 10773
  • Shoiru she'ru shuur
Re: Behzod Fazliddin she'rlaridan
« Javob #13 : 23 Sentyabr 2007, 17:23:05 »
SO‘ROQ

Dilni dilga yo‘llamay,
Yo‘lni yo‘lga ulamay.
Hech yo‘qsa, bir gullamay,
So‘lib ketaveraymi?

Tanda bor cho‘g‘im shu, deb,
Bandalik chog‘im shu, deb.
Mening bor-yo‘g‘im shu, deb,
Nolib ketaveraymi?

Ko‘klamlar nafasida.
Gullash arafasida
Toshlarning orasida
Qolib ketaveraymi?

Qanday kunga ko‘ndim-ay,
Ich-ichimdan sindim-ay.
Yoningizda indamay
O‘lib ketaveraymi,
Nega jimsiz?!

shoir

  • Moderator
  • Mega Member
  • *****
  • Rahmat
  • -aytdi: 2814
  • -oldi: 761
  • Xabarlar: 10773
  • Shoiru she'ru shuur
Re: Behzod Fazliddin she'rlaridan
« Javob #14 : 23 Sentyabr 2007, 17:23:17 »
               ***
So‘zingni manzilga yetkazganim yo‘q,
Qachon ko‘ngillarni she’rga o‘rayman?
Tunlarimni halol o‘tkazganim yo‘q,
Tonglarning yuziga qanday qarayman?

Poklanib olgani Nur kerak menga,
Shaytonning qo‘lida chirmanda qilma.
Xudoyim, eng go‘zal she’r kerak menga,
Tonglarning oldida sharmanda qilma!

 

Behzod Fazliddin. Sen qachon gullaysan

Muallif AbdulAzizBo'lim Zamonaviy o'zbek she'riyati

Javoblar: 1
Ko'rilgan: 17177
So'nggi javob 09 Aprel 2010, 12:53:38
muallifi Ansora
Guljamol Asqarova she'rlaridan

Muallif shoirBo'lim She'riyat

Javoblar: 51
Ko'rilgan: 36129
So'nggi javob 19 Noyabr 2007, 13:38:24
muallifi Muslimа
Mahmud Yo’ldoshev she'rlaridan

Muallif shoirBo'lim She'riyat

Javoblar: 91
Ko'rilgan: 29889
So'nggi javob 13 Mart 2008, 10:46:49
muallifi shoir
Muhammad Shohmurodzoda, Fazliddin Karomarulloh. Taomlanish odobi

Muallif HanafiyBo'lim Islomiy kitoblar

Javoblar: 92
Ko'rilgan: 25811
So'nggi javob 16 Aprel 2009, 16:29:14
muallifi Hanafiy
Jo'rabek Ramazonov she'rlaridan

Muallif MuhandisBo'lim Ma'rifat

Javoblar: 6
Ko'rilgan: 4411
So'nggi javob 30 Iyun 2013, 12:00:11
muallifi Muhandis