To‘g‘ri kelmas sening aql toshingga,
Har kimning o‘zicha o‘lchov toshi bor.
Yengil kelsang, u-ku kular ustingdan,
Og‘ir kelsang - yog‘ar qabog‘idan qor...

Ibraim Yusupov

Koshki tinch joy topib ketib bo'lsaydi,
Yo bu uzoq yo'lini o'tib bo'lsaydi.
Yuz ming yildan keyin orzu-umidlar
Tuproqdan ko'katdek unib kulsaydi.
Umar Xayyom

Qazo chavgonida koptokdek nuqul,
Chapu o'ng yumala, dema: noma'qul,
Seni yumalashga solgan kim bo'lsa,
U bilgay, u bilgay, u bilgay: ha, ul 

KAMTARONA...

Hayot dehqonga yer etibdi ato,
Temirchiga - bosqon, chumoliga - xas.
Men yurmog‘im uchun yayrab el aro
Qalam ko‘targudek quvvat bersa bas.

Husniddin Sharipov

Uchma ko‘p ham choy-chaqalarga,
Kun qolmasin ko‘r baqalarga.
Uzoq umr ko‘raman, deb sen
Havas etma toshbaqalarga!

Normurod Narzullayev

Otangga cho‘p otsang, bolang tosh otar,
Tosh tegsa boshingga, jonni qaqshatar.
 Hisobli dunyo bu qadim-qadimdan,
So‘nggi pushaymondan ko‘zda yosh qotar!

Normurod Narzullayev

Senga ko'rsatsalar,yasog'lik olam
Sen sevma, sevmaydi aqlli odam.
Sendeklar bir talay keldiyu ketdi,
Seni olmay turib, olib qol sen ham...

Gapirsin qalbing, ko‘zing,
Zinhor yolg‘on so‘zlama!
Bo‘lsa ham ikki yuzing,
Bo‘lma ikki yuzlama!

Normurod Narzullayev

O'zni dono bilgan u uch-to'rt nodon,
 Eshak tabiatin qilur namoyon.
 Bular suhbatida sen ham eshak bo'l,
 Bo'lmasa "kofir" deb qilishar e'lon.  

 Umar Xayyom

Falakning ustidan kim topdi zafar,
Yer qachon odam yeb to'yibdi magar-
Meni yemadi, deb kekkaya ko'rma,
Shoshmay tur, ko'p o'tmay navbating yetar.

Umar Xayyom