Savol: Qurbonlik so‘yilgandan keyin butunlay talaf (yo‘q bo‘lib ketsa) qurbonlik majburiyati ketadimi?

Javob: Ha, bu holatda qurbonlik so‘yish majburiyati qolmaydi.

Savol: Uy yoki mashinaning hashamatli va qimmatbaholiligi qurbonlik nisobiga kiradimi?

Javob: Yo‘q, uy va mashina asliy ehtiyojlardan bo‘lganligi uchun har qanday holatda ham ular qurbonlik nisobiga kirmaydi. Lekin musulmon har doim dabdaba va isrofdan saqlanishi kerak.

Savol: Bir kishi ruxsatsiz xotini yoki to‘ng‘ich o‘g‘li nomidan qurbonlik so‘yishi joizmi?

Javob: Yo‘q, bu holda xotini yoki katta o‘g‘li nomidan qurbonlik so‘yishi joiz emas. Biroq Imom Abu Yusufga ko‘ra kishi xotini yoki qaramog‘ida bo‘lgan to‘ng‘ich o‘g‘li nomidan istisno tarzida qurbonlik so‘yishi joizdir.

Savol: Bir odam ruxsatsiz o‘rtog‘ining sotib olgan qurbonligini so‘ysa, egasidan soqit bo‘ladimi?

Javob: Ha, egasidan soqit bo‘ladi.

Savol: Ikki kishi sahvan (adashib) bir-birlarining qurbonliklarini almashtirib so‘yishsa, qurbonliklari o‘tadimi?

Javob: Ha, har ikkisining qurbonligi o‘tadi. Har biri so‘yilgan shaklida o‘zining qurbonligini oladi.

Savol: Boy bo‘lgan bir odam birdan ko‘p qo‘ylarni qurbonlik qilsa, hammasi vojib qurbonlik o‘rniga o‘tadimi?

Javob: Yo‘q, bu vaziyatda bir donasi vojib o‘rniga, qolgani nafl qurbonlik o‘rniga o‘tadi.

Savol: Boy bir odam o‘zi uchun bir qoramol qurbonlik qilsa, yettidan biri vojib qurbonlik hisobiga o‘tadimi yoki butunimi?

Javob: Bu holda butun qoramol vojib qurbonlik hisobiga o‘tadi.

Savol: Boy bir odam Qurbon hayitda o‘nta qurbonlik so‘yishga nazr qilsa, hammasini so‘yishi kerakmi?

Javob: Ha, sahih qarashga ko‘ra nazr qilingan miqdorning hammasini so‘yishi kerak. Lekin ba’zi olimlarga ko‘ra ikkita so‘yish yetarlidir.

Savol: Uy hayvoni bilan yovvoyi hayvonning qo‘shilishidan tug‘ilgan bir hayvon qurbonlik qilinishi mumkinmi?

Javob: Bu holda u hayvonning onasiga e’tibor qilinadi. Onasi xonaki bo‘lsa, bolasi ham xonaki hisoblanadi va qurbonlik qilinishi mumkin. Onasi yovvoyi bo‘lsa, bolasi ham yovvoyi hisoblanib, qurbonlik qilinmaydi.

Savol: Xonakilashgan yovvoyi hayvon qurbonlik qilinishi mumkinmi?

Javob: Yo‘q, xonakilashgan yovvoyi hayvon qurbonlik qilinishi mumkin emas. Biroq yovvoyilashgan xonaki hayvon qurbonlik qilinishi mumkin.