Savol: Qurbonlikning qabul bo‘lishi uchun hayvon kishining mulkida (qo‘l ostida, tasarrufida) bo‘lishi kerakmi?

Javob: Ha, qurbonlik qabul bo‘lishi uchun hayvon kishining mulkida bo‘lishi kerak. Masalan, kishi yonida omonat bo‘lib turgan bir hayvonni o‘zining nomidan qurbonlik qila olmaydi.

Savol: Bir odam boshqasiga «Mening nomimdan bir jonliq sotib ol va qurbonlik qilib so‘y» desa, u kishining o‘z mulkida bo‘lgan bir hayvonni uning nomiga qurbonlik qilib so‘yishi joizmi?

Javob: Yo‘q, joiz emas. Chunki bir shaxs ham oluvchi, ham sotuvchi bo‘la olmasligidan hayvon bunday holatda nomidan qurbon so‘yiladigan kishining mulkiga o‘tmagan hisoblanadi.

Savol: Nasiyaga yoki kreditga qurbonlik olib so‘yish joizmi?

Javob: Ha, qurbonlik vojib bo‘lgan kishi bu holda qurbonlik sotib olishi joizdir. Chunki nasiyaga yoki kreditga olingan qurbonlik ham avvaldan olingan qurbonlik kabi kishining mulki hisoblangan bo‘ladi.

Savol: Qishlik va yozlik uyi bo‘lgan, lekin nisob miqdoriga yetadigan moli bo‘lmagan odamning qurbonlik so‘yishi vojib bo‘ladimi?

Javob: Yo‘q, bu vaziyatdagi bir odamning qurbonlik so‘yishi vojib emas.

Savol: O’n kishi birgalikda o‘nta hayvonni olib har biri bittadan qurbonlik qilishi joizmi?

Javob: Ha, bu holda go‘shtlari tarozi bilan taqsimlanadi.

Savol: Voris o‘lgan shaxs (marhumning) vasiyat qilmasdan qoldirgan molidan uning uchun qurbonlik qilsa, o‘zi ham yeyishi mumkinmi?

Javob: Vasiyati bo‘lmagan holda voris so‘ygan qurbonligidan yeyishda biror zarar yo‘q.

Savol: Kambag‘al bir odam qurbonlik niyati bilan tovuq yoki xo‘roz so‘yishi mumkinmi?

Javob: Yo‘q, kambag‘al bir odamning qurbonlik niyati bilan tovuq yoki xo‘roz so‘yishi tahriman makruhdir. Chunki bunda majusiylarga o‘xshashlik bordir.

Savol: Qurbonlik qabul bo‘lishi uchun niyat qilish shartmi?

Javob: Ha, qurbonlik qabul bo‘lishi uchun niyat qilish shart. Chunki hayvon ibodat niyati bilan ham, faqat go‘shti uchun ham so‘yilishi mumkin.

Savol: Biror zotni kutib olish uchun so‘yilgan qurbonlikning go‘shti yeyiladimi?

Javob: Alloh rizosi bo‘lmasdan faqat biror zotning kelishini qutlash niyati bilan so‘yilgan qurbonlikning go‘shti, hatto «bismilloh» aytilgan bo‘lsa ham yeyilmaydi. Biroq u odamga yoki boshqalarga ikrom qilish niyati bilan so‘yilsa joizdir va go‘shti yeyiladi.

Savol: O’lik nomiga (marhum uchun) Arafa kuni qurbonlik so‘yilishi mumkinmi?

Javob: Agar qurbonlikni niyat qilsa, Arafa kuni so‘yish mumkin emas. Chunki qurbonlik faqat hayit kunlarida so‘yiladi. Biroq sadaqa niyati bilan so‘yishni xohlasa Arafa kuni ham so‘yishi mumkin.