61. Qaysi birlaringda jahlu g’azab qo’zisa, darhol u sukut saqlashga o’tsin.

62. Qaysi birlaringda jahlu g’azab tik turgan paytida kelsa, darhol u o’tirib olsin. Agar shunda ham g’azab ketmasa, yotib olsin.

63. Qachonki mo’minlar o’rtasida fitna fasod kuchaysa, yog’ochdan qilich qilib ol!<sup>12

12</sup> Shahar hokimiga aytilgan hadis.

64. Podshohlaringiz yaxshi, boylaringiz saxiy va ishlaringiz bamaslahat bo’lsa, sizlar uchun yerning ostidan ko’ra usti afzaldir. Aks holda yerning ustidan osti afzaldir.

65. Agar uch kishi bo’lsangizlar, ikkitalaringiz alohida uchinchi shaxsga eshittirmay pichirlab gaplashmanglar, chunki bu uni ranjitadi.

66. Qaysi birlaringiz o’zingizdan boyroq yoki axloqliroq odamni ko’rib qolsangiz, darhol o’zingizdan kambag’alroq va axloqsizroq odamlar ham borligini eslang.

67. Dunyodan o’tib ketganlarning faqat yaxshi sifatlarini yod etinglar. Yomon sifatlaridan tilingizni tiyinglar.

68. To’rt toifa odamlarni Tangri yomon ko’radi: qasamxo’r savdogarni, takabbur kambag’alni, zinokor keksani va zolim podshohni.

69. Tishlaringizni misvok¹³ bilan tozalab yuringlar va tozalikka odat qilinglar. Takror-takror qilinadigan maxsus ishlarni toq bajaringlar, zero Tangrining o’zi toq, toq ishlarni yaxshi ko’radi.

¹³ Tish tozalagich

70. O’lim kelmasidan burun tayyorgarligingizni ko’rib qo’ying.

71. Odamlarga yaxshilik qilish va qarindoshlar bilan yaqin aloqada bo’lib hol-ahvol so’rashib turish — bu savobi tez tegadigan xayrli ishlardandir. Zulm va qarindoshlardan uzilib ketishlik esa jazosi tez bilinadigan yomon ishlardandir.

72. Hamma ishlaringizda to’g’ri bo’ling, odamlarga muomalada xulqingiz chiroyli bo’lsin!

73. Odamlarga keng qalbli bo’linglar, shunda odamlar ham sizlarga shunday bo’lurlar.

74. Garchi sizlarga qora mayiz kabi qop-qora boshli habash qul boshliq qilib saylangan bo’lsa ham, unga quloq solinglar va itoat qilinglar.

75. Bu dunyoda odamlarga qattiq azob beradigan kishilarni Tangri qiyomat kuni qattiq azoblaydi.

76. Odamlarga shukur qiliuvchilar Tangriga ham shukur qiluvchilardir.

77. Ahmoqdan uzoqlashing.

78. Besh xil xislatga kafil bo’linglar, toki men sizlar uchun jannatga kafil bo’lay: 1. Meroslaringizni taqsimlashda bir-birlaringizga xiyonat va zulm qilmanglar. 2. Odamlarga o’zlaringizcha insof qilinglar. 3. O’lja taqsimotida xiyonat qilmanglar. 5. Zulm qiluvchilardan mazlumlar haqini undirib beringlar!

79. Odamlarga taom yediringlar va shirin so’z bo’linglar.

80. Ochlarga ovqat bering, bemorlarni borib ko’ring va hojatmandning hojatini chiqaring.

81. Garchi Xitoyda bo’lsa ham ilmga intilinglar, chunki ilm olishga harakat qilish har bir mo’minga farzdir.

82. Kasbning eng yaxshisi kishining o’z qo’li bilan bajaradigan ishi va halol savdodir.

83. Uyquga ketishdan oldin chiroqlarni o’chirib, darvozalarni berkitib, suv idishlari va oziq ovqatlarning ustini yopib qo’yinglar. Yopgani narsa topolmasanglar, idishlar ustiga biror cho’p bo’lsa ham tashlab qo’yinglar.

84. Yaxshilikni chehralari ochiq, xushro’y odamlardan kutinglar.

85. Uchrashganda qaysi birlaringiz birinchi bo’lib salom bersangiz, o’sha odam Tangriga ham itoatliroqdir.

86. Yerni turli nomlariga qarab tanib olish mumkin bo’lganidek, do’stni ham do’stiga qarab bilib olsa bo’ladi.

87. Zotu nasablaringizni (avlod va ajdodlaringizni) yaxshi tanib olinglar, toki qarindoshlar bilan aloqa yaxshi bo’lsin. O’zi yaqin turgani bilan o’zaro muruvvati¹⁴  bo’lmasa, uning yaqinidan foyda yo’q. O’zi uzoq turgani bilan bir-biriga muruvvati yaxshi bo’lsa, uzoqligining zarari yo’q.

¹⁴ Arabchasi: silai rahm

88. Xotinlarning barakalirog’i — sarf-xarajatni kamroq talab qiladiganidir.

89. Odamlar ichida xotin kishiga nisbatan haqlirog’i uning eridir. Erkak kishiga nisbatan odamlarning haqlirog’i — bu uning onasidir.

90. Beshta narsadan oldin beshta narsani g’animat biling: o’limdan oldin tiriklikni, betoblikdan oldin salomatlikni, bandlikdan oldin bo’sh vaqtni, keksalikdan oldin yoshlikni, faqirlikdan oldin boylikni g’animat biling.