Assalomu alaykum va rahmatullohi taolo va barokatuhu!
Barcha olamlar robbi Olloh subhonahu va taologa cheksiz hamdu sanolar, payg'ambarimiz Muhammadga(SAV) u zotning ahli-oilalariga, sahobai-kiromlariga cheksiz salovotu salomlar bo'lsin, Omin!


Mehribon va rahmli Olloh nomi bilan!

Rasululoh(SAV) dedilar:

1. Ilmning ofati - esdan chiqarmoqlik va ilmga rag'bati bo'lmagan kishilarga o'rgatib, uni zoye ketkazmoqlikdir.

2. Qizlarni turmushga chiqarish to'g'risida onalari bilan maslahatlashinglar.

3. Munofiqlik belgisi uchtadir: yolg'on so'zlash, va'dasining ustidan chiqmaslik va omonatga xiyonat qilish.

4. Chaqirilgan joygagina boring.

5. Nafaqa¹ va sadaqa berishda avval o'zingdan boshla. Agar biror narsa ortsa, ahli ayolingga² ber. Yana  biror narsa ortib qolsa, qarindoshlaringga ber. Ulardan ham ortsa boshqalarga ber.

6. Halol va ruxsat etilgan narsalar ichida Tangriga xush kelmaydigani - taloqdir.

¹ Nafaqa - bu yerda moddiy yordam ma'nosida.
² Ahli ayol - oila a'zolari

7. Odamlar ichida Tangriga yoqimsizrog'i - ashaddiy dushmanlik qiluvchidir.

8. Bid'at-xurofotga berilgan odam to ularni tark etmaguncha, uning qilgan savobli ishlarini Tangri qabul qilmaydi.

9. Taomni sovitibroq iste'mol qilinglar, issiq-qaynoq taomda baraka bo'lmaydi.

10. Har bir qavmning qiz farzandidan tug'ilgan bola ham shu qavmga mansubdir³.

11. Qora tanli xalqlarni ham do'st tutaveringlar, zero ulardan uchtasi jannat ahlining ulug'laridan bo'lurlar: 1. Luqmoni Hakim. 2. Najoshiy⁴. 3. Muazzin Bilol Habashiy⁵.

12. Qalbing muloyim, hojating ravo bo'lishini xohlaysanmi? Xohlasang yetimlarga mehribon bo'l, ularning boshini sila, o'z taomingdan ularga yedir. Shunda diling yumshab, hojating ravo bo'lur.

³ Qadimiy arab qabilalarida qizdan tarqalgan farzandlarni qarindosh hisoblamaslik odat bo'lgan.

⁴ Najoshiy - qadimgi habashistonlik musulmon podshoh.

⁵ Bilol Habashiy - ozod etilgan habash qul, payg'ambarimiz Muhammadning(SAV) doimiy muazzinlari bo'lgan.

13. Qo'y boqinglar, chunki u barakadir.

14. Chaqimchilik nima, bilasizlarmi? U - odamlarning gaplarini (ularning o'zaro munosabatlarini buzish niyatida) bir-birlariga tashimoqlikdir.

15. Harom narsalardan saqlaning - odamlar ichida ibodatlirog'i bo'lasiz. Tangrining taqsim qilgan rizqiga rozi bo'ling - odamlarning boyrog'i bo'lasiz. Qo'shningizga yaxshilik qiling - tinch bo'lasiz. O'zingiz sevgan narsani odamlarga ham ravo ko'ring - salomat yurasiz. Ko'p kulmang. Ko'p kulish dilni o'ldiradi⁶.

⁶ Ya'ni susaytiradi.

16. Tangridan qo'rqing. Yaxshi va xayrli ishlarning birortasini kichik sanamang, suv so'ragan kishining idishiga chelakdan suv quyib berish bilan yoki birodaringizni ochiq yuz bilan qarshi olish bilan bo'lsada, ezgulik qiling. Kibr yuzasidan ishtonni uzaytirib kiyishlikdan saqlaning⁷. Tangri kibrni yomon ko'radi. Agar sizni biror kishi haqoratlasa va sizda yo'q ayblar bilan ayblasa, uni unda bor ayblar bilan ayblamang, uni qo'yavering, shunda gunohi unga, savobi sizga bo'lur. Hech kimni haqoratlamang!

17. Tangridan qo'rqinglar va farzandlaringizga bir xil mehrda bo'linglar! (Ularga kiyim va taomlarni barobar taqsimlanglar).

18. Ikki kishiga Tangri qiyomat kuni rahmat nazari bilan boqmaydi: 1. Qarindosh uryg'idan uzilib ketgan kishiga. 2. Yomon qo'shniga.

⁷ O'sha davrda kibrning asosiy belgilaridan biri lozimni haddan tashqari uzun kiyish bo'lgan.

19. Ikki kishi bir kishidan yaxshi, uch kishi ikki kishidan yaxshi, to'rt kishi uch kishidan yaxshi, ko'pchilik bilan birga bo'linglar. Tangri ummatlarimni faqat to'g'ri yo'lda borishlikka birlashtiradi.

20. Halokatga olib boruvchi yetti xil gunohdan saqlaninglar:
  1. Tangriga shirk keltirmoq⁸.
  2. Sehr ishlari bilan shug'ullanmoq.
  3. Birovni nohaq o'ldirmoq.
  4. Sudxo'rlik.
  5. Yetimlar molini yemoq.
  6. Vatan mudofaasi uchun bo'layotgan urushdan qochmoq.
  7. Erli, mo'mina, iffatli ayollarni fohisha deb haqoratlamoq.

21. Odamlarni yuziga urishdan saqlaninglar.

⁸ Tangrini birdan ortiq demoqlik va undan boshqalarda ham ilohiy kuch bor deb bilmoqlik.

22. Aroqdan saqlaninglar, chunki u barcha yomonliklarning kalitidir.

23. Tangri nazdida eng yaxshi gap - rost gapdir.

24. Tangri nazdida eng ma'qul jihod⁹ - zolim podshohga aytilgan haq so'zdir.

⁹ - Jang

25. Tangri nazdida bandalarning eng yaxshisi o'z ahli-ayoliga foydasi ko'p tegadigan kishidir.

26. Tangri nazdida uylarning yaxshirog'i - yetimlar izzat qilinadigan uydir.

27. O'zingga yoqqan narsani boshqalarga ham ravo ko'r!

28. Do'stingni yengilroq sevginki, kuni kelib dushman bo'lib qolishi ham mumkin. Dushmaningga ham yengilroq adovat qilginki, kuni kelib do'st bo'lib qolishi ham mumkin.

29. Dehqonchilik qilinglar, chunki dehqonchilik barakali ishdir. Dehqonchilikni qo'riqlovchi soqchilarni ko'paytiringlar!

30. Liboslaringizni chiroyli qilinglar, ot-ulovlaringizni yaroqli tutinglar! Yuzdagi xoldek odamlarga namuna bo'linglar!