Nima yetmay qoldi ikkovimizga, yor,
Dilda ne g'ubor?
Nahot shu keng dunyo bugun bizga tor,
Qandoq qutqu bor!
Axir jahonga teng yurt-ku o'rtada,
Nahot bo'lishsak?
Nima yetmay qoldi, dil nedan zada,
Nahot urushsak!
Mayli, bo'lishaylik - bog'larni sen ol,
Cho'l menga qolsin.
Daryolarni sen ol, tog'larni sen ol,
Ko'l menga qolsin.
Agar ko'llarni ham olaman desang,
Soy menga qolsin.
Agar quyoshga qo'l solaman desang,
Oy menga qolsin.
Agar oy ham kerak deb ekansan, ol,
Yulduzdan qo'l tort.
Oq tunlar ayshini surgin bemalol,
Kunduzdan qo'l tort.
Sharob senga bo'lsin, choy menga qolsin,
Yoki ayroni.
Saroy senga, chetroq joy menga qolsin,
Sayg'oq, jayroni...
Samarqandni sen ol, Turkiston menga,
Yo mayli, Sayram.
O'shaning o'zi ham bir jahon menga,
Bir to'y, bir bayram.
Olaver, olaver, barisini ol,
Oshiq indamas,
Barini olginu, menga-chi, Oyxol,
O'zing qolsang bas.
(Mirtemir)
