XXI asr she'riyati: Otabek Ismoilov  ( 4262 marta o'qilgan) Chop etish

1 B


shoir  01 Avgust 2008, 11:04:04

XXI asr she'riyati:

Otabek Ismoilov




BAHOR

Izg‘irinning  pasaydi zabti,
Hovuridan tushdi qahraton.
Tundmas bugun osmonning afti,
Tugadi qish — sovuq imtihon.

Uylar chekmay qo‘ydi. Ko‘rinmas
Mo‘rilarda endi tutunlar.
Boshlandi o‘n sakkiz yashar qiz —
Nafasiday yoqimli kunlar.

Bo‘rtayotgan kurtakka boqib,
Mo‘ltiraydi hayratda ko‘zlar.
Yer ostida omonligidan,
Darak berayotir ildizlar.

Bunday kezlar chor-atrofingga,
Bir sidra ko‘z tashlaganing choq.
Bu ne hikmat: juda ham oson,
Kim tirik, kim o‘lik - farqlamoq!

Qayd etilgan


shoir  01 Avgust 2008, 11:04:21

DANAK ARMONI

Metin yerni yorib
Chiqdim-u lekin
Bo‘y cho‘za olmadim ko‘kka
Oshiqlar?
Daraxt bo‘lardim,
Meva tutardim,
Qattiq toptamasa balki
Poshnalar.

* * *
     
Til gapirsa,
Yoqtirmas quloq.
Ko‘z ko‘rsatsa
Ters yurar oyoq,
Hammasiga
Burun jiyrilgan.
Bu holatga
Bor-e, deb
Bosh ham,
Ketib borar
O‘zi oqqan
Tomonga.

Qayd etilgan


shoir  01 Avgust 2008, 11:04:35

XUSHOMADGO‘Y

Yurar bulutlarga
Burni tekkuday.
Na keksa, na yoshni
Nazarga ilmas.
Mansabdor uchrasa
Qoshiga yelar,
oyog‘i tagida,
bo‘lar xoru xas.

 *  *  *
Bu sho‘rlikning
Boshiga.
Ne kaltaklar
Tushmagan...
Qolmagan hech
xom yeri,
bir og‘zi bor -
pishmagan.
 
*  *  *
Oldda qanday yo‘l kutar -
Peshonamdan ko‘raman.
Orqada qolgan yo‘llar
Ko‘rar ensam chuqurin.
O‘tmish-kelajak aro
Alanglaydi yuragim.

Qayd etilgan


shoir  01 Avgust 2008, 11:04:48

SEVGANIMNING TO‘YI

Demangiz, savdolar
Tushdi boshimga,
Bu bosh o‘zi
Savdolarga tushdi.
Qattiq sevgan ekan
Meni ayriliq,
Bugun u visolga
Butkul yetishdi.

Qayd etilgan


shoir  01 Avgust 2008, 11:05:00

YOLG‘ONDAN BO‘LSA HAM...

Yolg‘ondan bo‘lsa ham boraman deb ayt,
Yo‘ling qarayverib ko‘zim to‘rt bo‘lsin.
Yolg‘ondan bo‘lsa ham boraman deb ayt,
Ko‘rolmaslar kuyib ichi o‘t bo‘lsin.

Yolg‘ondan bo‘lsa ham o‘ldiraman, de,
Yaxshi ko‘rishingni mayli, bilsinlar.
Mening-ku sen uchun jon bermog‘im naqd,
Raqiblarim mendan burun o‘lsinlar.

Qayd etilgan


shoir  01 Avgust 2008, 11:05:20

QISH BERGAN IMTIYOZ

Qahraton,
sovqotib o‘ylayman:
Qachon kelar bahor - men suygan,
lekin yaxshi, ushbu kunlarda
ayollar hech rashk qilmay qo‘ygan.
Tashqarida izg‘irin shamol,
Uy-chi issiq, eh kirasolib,
quchoqlashing mumkin bemalol -
pechni? Xotin bir chetda qolib.

Qayd etilgan


shoir  01 Avgust 2008, 11:05:28

          *  *  *

Donishmand el ko‘p topib aytgan,
Hikmat o‘zi xalqning dil rozi.
Demishlarki hamma narsaning
Yaxshi erur ko‘pidan ozi.

Ozroq bo‘lsin mayli va’dalar,
Bajarolmay qolar baribir.
Lek qismasin bitta narsadan,
Ko‘proq bersin xudoyim sabr.

"Yoshlik" jurnalidan olindi.

Qayd etilgan