* * *
Achchiq xabar keldi: Usmon ibn Maz’un vafot etdi, deyishdi. Bu xabar Nabiyyi akram (s.a.v.) janobimizni nihoyatda qayg‘uga soldi. Samimiy bir musulmon edi. Uyiga bordilar. Peshonasidan o‘pdilar. Ko‘zlaridan oqqan muborak yoshlar Usmonning yuziga tomar edi.
Usmonga va oilasiga boshpana bergan Ummu Alo ismli xotin qayg‘uga botgan, yig‘lar edi.
— Ollohning rahmatini tilayman senga, ey Usmon. Hech shubha qilmaymanki, Olloh senga ikrom ko‘rsatgandir, derdi.
Janobimiz unga yuzlandilar:
— Qaerdan bilasan Ollohning unga ikromda bo‘lganini? — deb so‘radilar.
— Qurboningiz bo‘lay, ey Ollohning rasuli, bilmayman, ammo shunday umid qilaman. Bu so‘zlarni aytishimga sabab — Usmonning go‘zal ahloqidir.
— Usmon hozir haqiqiy olamga ketgan. Men uning haqida xayrli umid qilaman. Ammo garchi men Ollohning payg‘ambari bo‘lsamda, menga qanday muomala ko‘rsatilishini bilmayman.
Bu so‘zlar Ummu Aloga ta’sir etdi.
— Agar Usmon haqida bularni ayta olmasam, demak, boshqasi haqida hech bir narsa aytmayman, — dedi.
Usmonning jasadi hozirlanib, do‘stlarining yelkalarida oxirat safariga chiqdi. Hayoti davomida qilgan yaxshiyomon amallar unga hamroh edi. Bir ozdan keyin do‘stlari ortga qaytishga majbur bo‘lishadi, shunda u amallari ila yolg‘iz qoladi.
Usmon qabriga qo‘yildi. Ustiga tuproq tortib bo‘lingach, Janobi Rasululloh (s.a.v.) bir tosh keltirib, Usmonning bosh tarafiga qo‘ydilar.
Muhojirlardan Baqi’ qabristoniga ilk ko‘milgan erkak Usmon ibn Maz’un bo‘ldi.
Qabristonda Payg‘ambarimiz (a.s.) bir xotinni ko‘rdilar. Yoqasini yirtar, piypalanar, baqirachaqira yig‘lar edi. Yonidan o‘tastib unga:
— Ollohdan qo‘rk va sabr qil, — dedilar.
Xotin boshini ko‘tardi. Dardiga birovning aralashishini istamasligini bildiradigan bir ifoda ila:
— Bor, ishingni qil. Mening boshimga kelgan dard sening boshingga kelgan emas, — dedi. Bu so‘zlari bilan: «Sen nimani ham tushunar eding? Mening yonimga bolasi o‘lgan kelsin!» demoqchi bo‘lardi.
Holbuki, Rasululloh janobimiz Badrdan qaytganda qizlarining vafoti ustidan chiqqanlariga hali hech qancha bo‘lmagan edi. Qolaversa, hozir ko‘milgan Usmon ham u zotning emikdosh ukalari edi.
U yerdan mahzun qaytdilar, to‘g‘ri uylariga qarab ketdilar. Orqalaridan kelayotganlar u xotinga:
— Sen gaplashgan odam Sarvari koinot janobimiz edilar. Ollohning payg‘ambari edilar u kishi, — deyishdi.
Xotin alam ichida aytib yuborgan so‘zlariga pushaymon yedi. Yig‘idan to‘xtab, to‘g‘ri Janobi Rasulullohning uylariga bordi. Ichkari kirmoqchi edi, ammo izn so‘ragani bir odam topmadi. Xayolida Payg‘ambar bir saltanat sursa kerak, degan o‘y bor edi. Payg‘ambarimizning bittagina hujradan iborat uylari uni hayratlarga tushirdi. Ichkari kirdi.
— Bilmasdan bir qusurga yo‘l qo‘ydim, bolamni yo‘qotganimning iztirobidan shunday deb yuboribman. Uzr so‘rayman, — dedi.
Rasululloh (s.a.v.) javoban:
— Sabr faqat zarba ilk kelgan onida ko‘rsatiladi,— deyish bilan kifoyalandilar.
Janobi Payg‘ambarimiz uning yig‘lashini taqiqlamagan edilar. Chunki insonga toqati yetmaydigan narsani taklif etish Islom tabiatidan emasdi. Jigarporasi o‘lgan bir insonga xafa bo‘lmaslikni, yig‘lamaslikni tavsiya etish qiyin bo‘lgan ishga buyurish bilan barobar edi.
Inson farzandlari va yoxud otaonasigagina emas, balki yaqinlariga ham yig‘laydi. Ko‘zyoshlari to‘kishi mumkin. Darhaqiqat, Janobi Rasulullohning o‘zlari ham Usmon ibn Maz’un o‘limi sababli yig‘laganlar, ko‘zyoshlari Usmonning yuziga tomgan.
Janobimizning u xotindan talab qilganlari — yig‘layotganda haddan oshiradigan, Ollohning takdiriga norozilik ma’nosini tashiydigan so‘z va harakatlardan qochish, yoqa yirtib, kiyimlarini porapora etib, johillarning harakatlariga o‘xshab ketadigan ishlarni qilmaslik edi.
Ertasi kun Ummu Alo yana Payg‘ambari zishonning huzurlariga keldi.
— Yo Rasululloh, tushimda bir oqar suv ko‘rdim. Usmon ibn Maz’unga oid emish. Sharqirab oqardi, —dedi.
Janobimiz:
— Bu ko‘rganing Usmonning amallaridir, — deb javob qildilar.
Usmon haqida g‘oyat nekbin fikrda bo‘lgan xotin tushining bu shaklda ta’bir qilinganidan xursand bo‘lib ketdi. Uyiga jo‘narkan, xuzuri cheksiz edi.