195-BOB
MAVZU: RUKU’DA VA SAJDADA BELINI TO’KIS BUKMAGAN KISHI
264. Abu Mas’ud Al-Ansoriydan rivoyat qilindi; aytdi: «Rasululloh sallallohu alayhi va sallam bunday dedilar: «Namozda to‘liq tekislanmagan, ya’ni ruku’da va sajdada belini tekis bukmagan erkak kishining namozi durust emas!»
Bu bobda Ali ibn Shaybon, Anas, Abu Hurayra va Rifo’a Az-Zuroqiy (roziyallohu anhum)dan hadis rivoyat qilingan.
Abu Mas’udning hadisi hasan-sahih.
Payg‘ambar sallallohu alayhi va sallamning sahobalaridan ilm ahlining va ulardan keyingi olimlarning nazdida amal shu hadis asosidadir. Erkak kishi ruku’da va sajdada belini to‘liq tekis bukmog‘i kerak degan jihatga ega bo‘lganlar.
Shofi’iy, Ahmad va Ishoh, Payg‘ambar sallallohu alayhi va sallamning: «Namoz o‘qiyotib ruku’da va sajdada belini to‘liq tekis bukmagan erkak kishining namozi durust emas», degan hadislariga tayanib, ruku’da va sajdada to‘liq to‘g‘rilanmagan (tekislanmagan) kishining namozi durust emas, deb qabul qilishgan.
Bu imomlar fikricha, ta’dili arkon va ruknlarda mukammallik (to‘liq bajarishlik) - farz. Imomi Abu Hanifa va Imom Muhammadning fikrlaricha, bu vojib ekanligi bayon qilingan. Shuningdek, sunnat ekanligi ham bayon qilingan. Chunonchi, Taxoviyning so‘zidan ko‘proq vojib ekanligi anglashiladi. Hanafiylar, ta’dili arkon farz bo‘lmay, vojib ekanligiga doir keltirgan dalillaridan biri ushbudir: «Allohu taolo: «Ey iymon keltirganlar, ruku va sujud qilingizlar!» deb marhamat etgan. Oyati jalilada ruku va sajda qilmoqqa amr qilinmoqda. «Ruku’» va «sujud» ma’nolari ma’lum bo‘lgan xos atamalardir. Ruku’ning ma’nosi - egilmoq va sajdaning ma’nosi tie cho‘kmoqdir. Mazkur oyati jalilaning hukmiga ko‘ra qiyomdan mutloq tarzda egilmoq va qo‘lini yerga qo‘ymoq farzdir. Zero, xabari voqid bilan Qur’onning itloqini nasx etish (bekor qilish) joiz emas.
Abu Ma’marning ismi - Abdulloh ibn Sahbara.
Badrlik Abu Mas’ud Al-Ansoriyning ismi — Uqba ibn Amr.