25— Makru-hiyla

    Ularning so'zlari ko'rinishda siyosiy hamda makru hiylalar bilan to'lib-toshgan edi. Ular diniy taraf hokimlarni qimirlatmasligini, junbushga keltirmasligini juda yaxshi bilishardi. Hokimlar o'z siyosatlarida yahudiylarning diniy ishlariga aralashmasdilar, shuning uchun ham makkorlar so'zni siyosatga aralashtirdilar.

26— Muammo

    Ajnabiy mushrik hokimlar ishning haqiqatini tekshirishlari, yahudiylarning maqsadlari, Iysoga nisbatan dushmanlik sabablarini bilishlari qiyin edi. Chunki ular idora ishlari bilan mashg'ul edilar. Biroq, yahudiylarning tinimsiz talablari va ketma-ket murojaatlari ularni shaharda mish-mishlarga aylangan bu muammoni hal etishga majbur qildi.

27—  Iyso alayhissalom mahkamada

    Bu hodisa asrdan so'ng, shanbaga o'tar kechasi bo'lgan edi. Yahudiylar shanba kuni ish qilmas, balki, shanba ularning hordiq kuni edi. Shuning uchun ham, yahudiylar juma kuni Quyosh botishidan avval Iyso alayhissalom ustidan hukm chiqarilishini Iysodan qutilib, xotirjam uxlab, ertalab yaxshi kayfiyatda uyg'onishni xohlar edilar.

    Hokim bu muammodan siqildi. Chunki bu muammoda uning uchun xohish, xalqi uchun hech bir foyda yo'q edi. Yahudiylar hukmni eshitish uchun mahkama oldiga to'plandilar. Ular qichqirib, baqirishar edi. Hokim siqilgan, vaqt qisqa va quyosh esa botishga yaqin edi. Hokim Iyso alayhissalom ustidan dorga osib o'ldirish hukmini chiqardi.

28— U zamondagi jinoiy qonun

    U zamondagi jinoiy qonunga ko'ra mahbus o'zi osiladigan hochni ko'tarib olib borar edi. Rivojlangan mamlakatlarda bo'lgani kabi, dor tikiladigan er shaharning chetida edi. Odamlar ko'pligidan bir-birini ustidan bosib ketar, urdi-surdi bo'lardi. Tartib saqlash uchun hozir bo'lgan — ko'pchiligi ajnabiy millatlarga mansub — melisalarning bu muammoga qiziqishlari ham yo'q edi. Biroq, ish yuzasidan hozir bo'lishgan edi. Barcha ajnabiy xalqlar uchun boshqa ajnabiy xalqlar ko'rinishda farqsiz, bir xil  ko'ringandek, bu rimlik melisalar ko'zida ham yahudiylar bir otaning bolalaridek bir xil tuyulardi. Buning ustiga vaqt ham kech bo'lib, qorong'i tusha boshlagandi. Ba'zi yahudiy yoshlar Iyso alayhissalomga tashlanishar, uni haqorat qilishar, so'kishar va unga ozor berishga harakat qilishar edi.

29— Iyso alayhissalom ozorlarga chidadi

     Iyso alayhissalomning mahkamada tik turish, ko'tarib olgan dor yog'ochining og'irligi va boshqa qiyinchiliklar sababli tinkasi qurigan edi. Uning tez yurishga majoli yo'q edi.

30— Ilohiy tadbir

    Iyso alayhissalomning qiynalganini ko'rgan yasovul-melisa yahudiy yoshlardan birisiga dor yog'ochini ko'tarishga buyurdi. U yigit boshqalardan ko'ra ahmoqroq, Iyso alayhissalomga ko'proq ozor berar, haqoratlar va o'ziga yuklatilgan bu — hochni ko'tarib yurishdek —  mashaqqatdan tezroq qutulishni xohlar edi.

31 — Lekin ularga o'xshatib qo'yildi

    Olomon dorxonaning darvozasi oldiga etib keldilar. Dorxona yasovullari peshvoz chiqdilar va ishni yo'l bo'yi bajarib kelgan hamkasblaridan qabul qilib olishdi. Yasovullar dor yog'ochini ko'tarib olgan yigitni ko'rishdi, hamma yoq alg'ov-dalg'ov, baqir-chaqir bo'lib ketdi. Ular hoch ko'targan yigitni mahbus deb o'yladilar-da, uning qo'lidan ushladilar. U o'zining aybdor emasligi, hukm va dorga aloqasi yo'qligini, dor yog'ochini istehzo uchun ko'tarib olganini yolvorib tushuntirishga harakat qilar, biroq, yasovullar unga parvo qilishmas, — ular rumlik yunonlardan bo'lganlari bois — uning tilini tushunishmas edi.

32— Hukm ijrosi

    Har qanday jinoyatchi jinoyat qilmaganini aytadi, baqirib-chaqiradi. Yasovullar uni ushladilar va hukmni ijro etdilar. Yahudiylar bu mojarodan uzoqda turishar, hamma yoqni kecha zulmati qoplagandi. Ular osilgan odam Iyso ekanida shubha qilishmas edi.

33— Iyso alayhissalomning samoga ko'tarilishi

    Ammo  Iyso ibn Maryam alayhissalomni Alloh taolo yahudiylarning makridan qutqardi va uni hurmatlab, poklab O'z huzuriga ko'tardi.

34— Qur'on bu qissani bayon qiladi

    Alloh taoloning yahudiylar haqidagi so'zlari quyidagichadir:

    "Yana kofirliklari va Maryam xususida ulug' bo'hton qilganliklari sababli hamda Allohning payg'ambari bo'lgan al-Masih Iyso ibni Maryamni "bizlar o'ldirganmiz", degan so'zlari sababli (Biz ularni la'natladik). Holbuki, ular uni o'ldirganlari ham, osganlari ham yo'q. Faqat ular uchun (boshqa birov Iysoga) o'xshatib qo'yildi, xolos Albatta, Iyso haqida talashib-tortishgan kimsalar uning (o'ldirilgan-o'ldirilmagani) haqida shubhada qolganlar. U haqda faqat gumonlarga beriladilar, xolos. Uni o'ldirmaganlari aniqdir. Balki uni Alloh O'z huzuriga ko'targandir. Alloh qudrat va hikmat egasi bo'lgan zotdir." (Niso: 156-158)

    Iyso alayhissalom, barcha narsaga qodir bo'lgan Alloh taolo xohlaganidek Osmondadir. Zotan, uning tug'ulishi, hayoti va barcha ishlari avvalidan oxiriga qadar g'ayri tabiiy, hayratomuz va mutlaq ilohiy qudratning isbotidir.