XVIII. G’azab haqida

180. Rasululloh (s.a.v.) dedilar:
- Bellashganda zo‘r chiqadigan emas, g‘azabi kelganda o‘zini tuta oladigan odam kuchli bo‘ladi.

181. Rasululloh (s.a.v.) dedilar:
- Jahlingiz chiqqanda turgan bo‘lsangiz, o‘tirib oling, bosilsa bosildi, bosilmasa - yotib oling.

182. Rasululloh (s.a.v.) dedilar:
— g‘azab shaytondandir. Shayton olovdan yaralgan, olov esa suv bilan o‘chiriladi. Jaxlingiz chiqsa, tahorat oling.

XIX. G’iybat, bo‘hton haqida

183. Birovdan ayb qidirib josuslik qilmang! Bir-biringizni g‘iybat ham qilmang! o‘lgan birodaringizning go‘shtini yeyish yoqadimi ? (Axir) bundan hazar qilasiz-ku. («Xujurot», 12)

184. Iffatli, imonli, (ammo) g‘aflatda qolgan ayollar haqida bo‘hton gaplar tarqatganlarga bu dunyoda ham, u dunyoda ham la’nat bo‘ladi. Ularni qattiq azob kutadi («Nur»,23)

185. Iffatli ayollar haqida ularning sha’niga tegadigan gap gapirib, o‘sha gapini tasdiqlaydigan to‘rtta guvoh topa olmaganlarni sakson darra urib jazolang. Minba’d ularning guvohliklarini inobatga olmang, ular fosiqlardir. («Nur», 4)

186. Rasululloh (s.a.v.) dedilar:
— G’iybat nima, bilasizmi?
— Alloh va uning Rasuli bizdan yaxshi biladi.
— Birodaringiz ortidan unga yoqmaydigan gap gapirishingiz.
— Gapirgan gapimiz rost bo‘lsachi?
— Rost bo‘lsa g‘iybat bo‘ladi-da! Yolg‘on bo‘lsa bo‘hton bo‘ladi.

187. Rasululloh(s.a.v.) dedilar:
— G’alamislik nima, bilasizmi? g‘alamislik — gap tashib odamlar orasini buzish.

188. Rasululloh(s.a.v.) dedilar:
— Ig‘vogar g‘iybatchi jannatga kirmaydi.

XX. Shubha, gumon haqida

189. Ey, imon keltirganlar! Shubha-gumonlardan uzoqda bo‘ling, ba’zi shubha-gumonlar gunoh bo‘ladi. («Hujurot», 12)

190. Gumon hech qachon haqiqat o‘rnini bosa olmaydi. («Yunus», 36)

191. Rasululloh (s.a.v.) dedilar:
- Yaxshi gumon yaxshi bandada bo‘ladi.

XXI. Yolg‘on haqida

192. Rasululloh(s.a.v.):
- Odamlar, yolg‘on guvohlik Allohga shirk keltirish bilan teng, — deb, mana bu oyatni o‘qidilar: But-sanamlar razolatidan uzoqlashing, shuningdek, yolg‘on gapdan ham chetda bo‘lingsh
(«Haj», 30)

193. Rasululloh (s.a.v.) dedilar:
- Aldoqchi ham, minnatchi ham, xasis ham jannatga kirmaydi.

194. Oysha (r. a.) shunday degan:
— Yolg‘onchilikni Rasululloh inson sifatlarining eng jirkanchi deb bilardilar.

195. Bir kishi Rasulullohdan so‘radi:
— Jannatga nima olib boradi, Rasululloh?
— Rostgo‘ylik. Rostguy odam pok bo‘ladi, pok bo‘lsa imonli bo‘ladi, imon esa jannatga olib boradi.
— Do‘zaxgachi, Rasululloh?
— Yolg‘onchilik. Yolg‘on gapirgan kishi buzuq bo‘ladi, buzuqlik kofirlikka yetaklaydi. Kofirlik esa do‘zaxga olib boradi.

196. Rasululloh (s.a.v.)dan so‘radilar:
— Mo‘min qo‘rqoq bo‘lishi mumkinmi?
— Ha, mumkin, — dedilar.
— Mo‘min xasis bo‘lishi mumkinmi?
— Ha, mumkin.
— Mo‘min yolg‘onchi bo‘lishi mumkinmi?
— Yo‘q, mumkin emas, — dedilar Rasululloh (s.a.v.).

197. Rasululloh (s.a.v.) dedilar:
— Mo‘minda hamma xislatlar bo‘lishi mumkin, faqat xiyonatkorlik va yolg‘onchilik bo‘lmaydi

198. Rasululloh(s.a.v.) dedilar:
— Munofiqning uchta belgisi bor: yolg‘on gapiradi, va’dasiga vafo qilmaydi, omonatga xiyonat qiladi.

199. Rasululloh (s.a.v.) dedilar:
— Munofiq namoz o‘qib, ro‘za tutgani bilan, «musulmonman» deb da’vo qilgani bilan uch illati bo‘ladi: yolg‘on gapiradi, va’dasiga vafo qilmaydi, omonatga xiyonat qiladi.

200. Rasululloh (s.a.v.) dedilar:
— Unga bu yuzini, bunga u yuzini ko‘rsatadigan ikkiyuzlamachi odam qabih bo‘ladi

201. Rasululloh(s.a.v.) dedilar:
.— Banda yolg‘on gapirsa, farishta uning og‘zidan chiqayotgan sassikdan jirkanib, undan uzoqlashadi.

202. Rasululloh (s.a.v.) dedilar:
— Birodaring gapingga ishonayotganini bila turib, yolg‘on gapirsang, unga xiyonat qilgan bo‘lasan.

203. Rasululloh(s.a.v.) dedilar:
— Yolg‘onni jiddiy ham, hazillashib ham gapirib bo‘lmaydi. Yolg‘on va’dani hech kim o‘z bolasiga ham bermasin.

204. Rasululloh (s.a.v.) dedilar:
— Yosh bolaga bo‘lsa xam «Buyoqqa kel, mana buni ol», — deb, hech narsa bermagan yolg‘onchi bo‘ladi.

205. Rasululloh (s.a.v.) dedilar:
— Kishi bergan va’dasini bajarish niyatidabo‘lsa-yu, bajarolmasa, gunohkor bo‘lmaydi.

206. Rasululloh (s.a.v.) dedilar:
— Musulmonga qarshi asossiz guvoxlik bergan kishi do‘zax otashida yonishi muqarrar.

207. Rasululloh (s.a.v.) dedilar:
— Kishi uch holatdagina yolg‘on gapirishi mumkin: xotini bilan murosa qilish uchun; urush vaqtida (harbiy maqsadlarda); odamlarni murosaga keltirish uchun.

208. Rasululloh (s.a.v.) dedilar:
— Odamlarni murosaga keltirish uchun oshirib-toshirgan bilan, yaxshi gaplarni to‘qib gapirgan bilan kishi yolg‘onchi bo‘lib qolmaydi.