Assalamu alaykum!
Go'zal mavzu uchun tashakkur!
1. Maktabda 1 yoki 2-sinfda o'qirdim. Uydagilar bilan qo'shilib, ro'za tutardim-u, lekin namoz o'qimasdim. Bir kuni xolamlarnikiga bordim. Xolamning erlari men bilan gaplasharkan, "namoz ham o'qiyapsizmi?" - dedi. Men esa "Yo'q", - dedim. "Iye, nega o'qimayapsiz?" - dedilar. Men "Bilmayman" deb javob berdim. Keyin yosh bola holimga o'z yoshimga yarasha tushuntirdilar (ular shkaf, shefoner yasovchi usta edilar): "Mana shu shkaflarni ko'ryapsiz-a? Man agar yaxshilab yasasam, shunaqa shkaflardan 10 tasini yasay olaman: ya'ni uning hammasida eshik bo'lsin, oyoqlari bo'lsin, ilgichlari. Hammasi bo'lsin, lekin bir-biriga sira o'xshamasin. Shunaqadan 10 ta yasay olarman. Lekin Alloh dunyoda nechta odam yaratgan bo'lsa, ularning hammasiga bir xil a'zolar bergan-u, nega bir-biriga o'xshamaydi? Shunga shukr qilib namoz o'qimaysizmi? Anu negrlarni qarang (o'sha paytdagi tasavvurimda negrlar eng xunuk, qul tabaqa vakillario edi) o'shalar ham o'qiyapti. Amerikaliklar ham (O, Amerika deyilsa, umuman to'kis diyor tushunilardi) sajda qilyapti. Siz bir musulmon bo'lib nega namoz o'qimaysiz?.."
Bu gaplardan juda ta'sirlandim. Yana o'sha kishining gaplarini esladim: "Ertalab, kimdir eshingisizning tagiga katta ahlat uyumini to'ksa, albatta so'rasiz: kim to'kdi buni? O'z-o'zidan yaralib qolmaydi-ku. Endi bu darxtlarni qarang, gullarni qarang. Ularni yaratgan Alloh uchun namoz o'qimaysizmi?"
Uyga boriboq, namoz kitobni topib, o'rgana boshladim. Avvaliga kitobga qarab, qo'limda kitob bilan egilib namoz o'qidim. Asta-sekin yodlab oldim.
Avvalida namozga shunday mehr qo'ydim-ki, namoz vaqtini intiqlik ila kutar, ba'zan ikki-uch marta qayta namoz o'qirdim. Soat 12.00 bo'lgan. Man kirib peshinni o'qib bo'libman. Dadam so'radilar:
- Uyda nima qilib chiqdingiz?
- Peshinni o'qib chiqdim.
- Iya, hali peshin bo'lmadi-yu... Hali azon ham chaqirmadi.
- Eee, sog'inib ketdim-da...
2. Birinchi yodlagan suralarim - Fotiha, Ixlos va Kavsar suralari edi. Uni buvim o'rgatganlar. Har doim uyquga yotarkanmiz, buvim avvalo kalimai shahodat, so'ng ushbu suralarni albatta o'qib yotishimizni buyurar edilar va qaytarib hammamizga o'rgatardilar. Allohga shukrki, o'sha suralar bir dam esdan chiqmadi...
Alloh bizni hidoyat sari eltgan kishilardan rozi bo'lib, umrlarini uzoq qilsin!