SERIALLAR SEHRI
Hozirgi kunda mamlakatimiz telekanallarida namoyish etilayotgan seriallar har bir xonadonda o‘ziga xos o‘ringa ega bo‘ldi, desak yanglishmaymiz. Birgina yoshlarimiz suhbatlariga e’tibor berib qaraydigan bo‘lsak, "œYoshlar" va "œO‘zbekiston" telekanallarida berib borilayotgan Meksika va Koreya seriallaridagi qahramonlar nomi tillaridan tushmaydi. Yoshlar-ku mayli-ya, ammo kattalarga nima bo‘ldi? Axir, ular hayoti davomida ko‘pni ko‘rgan insonlar-ku! Ishdan kelgach, farzandlari bilan dasturxon atrofida yig‘ilishib, ibratli maslahatlar va hikoyatlar gapirish o‘rniga saviyasi past va yoshlar ongiga salbiy ta’sir qiluvchi seriallarni ko‘rishadi.
Rivojlangan davlatlar televidinielariga e’tibor qiladigan bo‘lsak, unda har bir beriladigan kinolar yoshlar va kattalarga mo‘l ishlanadi. Voyaga yetmaganlar uchun belgilangan ko‘rsatuv va kinolar namoyish qilinadigan bo‘lsa, ekranning pastki qismida kichikroq yashil rang paydo bo‘ladi. Ota-ona va farzandlar birgalikda tomosha qilishlari mumkin bo‘lgan kinolarda sariq rang, qizil rang esa faqat kattalar uchun mo‘ljallangan kinolarda paydo bo‘ladi. Bu belgilarning xorij televideniesida joriy etilishi yoshlarning ota-onalari tomonidan nazorat qilinishi uchun qo‘l keladi.
Endi o‘zimizga qaytadigan bo‘lsak, sevgi-muhabbat mavzusi birinchi o‘ringa chiqarilgan va hali yoshlarning ongiga to‘g‘ri yetib bormaydigan seriallarni ota-onalar farzandlarini atroflariga to‘plab, berilib tomosha qilishadi. Bunga misol qilib hozirgi kunda qaytadan namoyish etilayotgan "œYolg‘on asirasi" serialini ko‘rsatish mumkin. Nafaqat yoshlarimiz, balki ularning ota-onalari ham ma’lum ma’noda mazkur kinosiz hayotlarini tasavvur qila olishmaydi. Birgina "œO‘zbekiston" kanalida namoyish etilayotgan "œIshq ertagi" seriali qahramoni Demir o‘zining omadsiz muhabbati alamini ichkilikdan oladi. "œYolg‘on asirasi" haqida-ku izohning o‘zi ortiqcha. Yolg‘onga asir bo‘lgan Paulina emas, balki ekrandan ko‘z uzmay o‘tirgan tomoshabinlardir.
So‘ng so‘z o‘rnida shuni aytmoqchimanki, farzandlari kelajakda o‘z o‘rnini topib, or-nomus, andisha, iffat kabi xislatlardan yiroqlashmasligi uchun ota-onalar, bekorchilarga mo‘ljallangan va ma’naviy qashshoqlikni yuzaga keltirishga sabab bo‘ladigan seriallarni ular bilan birga tomosha qilish o‘rniga turli xil badiiy kitoblarni o‘qishni tavsiya qilsalar bo‘lmaydi-mi? Bu yoshlarning mustaqil hayotga tayyorlanish, nutqini rivojlantirib, ravon qilish, mantiqiy fikrlash va shuningdek, o‘zini munosib tutishga ko‘mak beradi.
Gulruxsor SAODATILLO qizi,
O‘zDJTU talabasi