Xo'ja Ma'oz maqbarasi.
Marg'ilon shahridagi eng qadimgi maqbaralardan biri bo'lgan Xo'ja Ma'oz maqbarasi IX asrga oid bo'lib, yaqin 5-6 yilda ham uning xom g'ishtdan qilingan gumbazlari saqlangan edi. Keyinchalik uni muhofaza qilish maqsadida atrofini shunday o'rab qo'yishibdi.
Bu mozor bizga Abdulla Qodiriyning "O'tkan kunlar" asaridan ma'lum. Otabek siqilgan paytlari shu mozorda tunab qoladi. Habibulla Qodiriy "Otam haqida" asarida yozishicha, Abdulla Qodiriyning o'zlari ham Marg'ilon safarlarida har doim shu mozorda, yonidagi masjidda doim bir kun tunab ketarkanlar.
Mahalliy rivoyatlarga ko'ra, bu yerga Mu'oz ibn Jabal r.a. ko'milgan ekan. Lekin buning tarixiy asosi yo'q. Mu'oz ibn Jabal r.a. Marg'ilonga kelmaganlar. Bu yerdagi maqbara esa u zotning avlodlaridan biriniki bo'lishi mumkin. Boshqa ma'lumotlarga ko'ra, maqbara mashhur faqih Burhoniddin Marg'iloniyning bobokalon ustozlaridan biriniki bo'lishi mumkin.
