Oylarning sultoni, marhabo!
Ko'zlarni quvontirib, qalblarni yashnatib, iymonlarimizni ziyoda qilib, o'n bir oylik dovondan o'tib, muborak Ramazon shahdam qadamlar bilan biz tomonga odimlab, tobora yaqinlashib kelmoqda. Bu oyning cheksiz rahmatlariga tashna ko'ngillar, orziqib kutilgan kunga yetib kelmoqda. Melodiy 2013-yil, xijriy 1434-yilning to'qqizinchi oyiga sanoqli kunlar qoldi. Tez kunda, moviy osmonimizda kulib turgan hilol, Ramazon kelganini ma'lum qilganini ko'rib, bir-birlarimizni tabriklaymiz! Yana shu kunlarga sog'-salomat yetib kelganimizga shukronalar aytamiz. Har galgidek, bu oy yurtimizga va xonadonlarimizga fayz-baraka, hotirjamlik, sokinlik olib kelsin! Shu kunlarda O'zbekiston Respublikasi diniy qo'mitasi tarafidan, qaysi sanadan Ramazon boshlanishi e'lon qilinib, ommaviy axborot vositalari orqali keng ommaga xabar tarqatiladi. Mana shu xabarni mushtoqlik bilan kutyapmiz.
Gunohlardan poklanib, nafsni o'ziga keltirib, iymonlarimizni nurlantiradigan vaqt keldi. Bu oyning fazilatlarini aytib tugatolmaymiz. Bu oyda o'qilgan bir rakat namoz, bo'shqa oyda o'qilgan yuz rakat namozdan afzaldir. Bu oyda o'qilgan ikki rakat nafl namozining savobi, boshqa oyda o'qilgan farz namozi bilan tengdir. Endi bu oyda o'qilgan farz namozining darajasiga so'z bilan ta'rif berolmaymiz. Boshqa oylarda qilingan bitta yaxshi amalga o'nta savob berilishi oyat bilan tasdiqlangan. Ramazon oyida esa, bitta yaxshilik uchun yetmishtadan yetti yuz barobargacha va undan ortiq savoblar yozilishi hadislarda vorid bo'lgan. Bu oyda aytilgan zikrlar, berilgan sadaqalar ham boshqa oyga nisbatan yuzlab barobar savoblar yoziladi. Bu oyda yer yuzida birorta ham shayton qolmaydi. Boshqa oylarda nafs va shayton ikkalasi bilan kurashardik. Bu oyda faqat nafs bilan, yakkama-yakka kurashamiz. Shayton aralashmasada, boshqa oylarda nafsni rosa shug'ullantirib, gunohlarga chiniqtirgan. Maqsadi aniq, rahmatlarga to'lgan oyni insonlar g'aflatda o'tkazib yuborishlarini xohlaydi. Ammo chuchvarani hom sanaydi. Qaysi aqlli inson mana shunday tengsiz fazilatlarni qo'ldan chiqaradi? Afsuski, aqlli bo'lib turib, g'aflatda o'tkazib yuboradiganlar ham ko'p. E'tibor bersak, ular begonalar emas. O'zimizni aka-ukalarimiz, qarindoshlarimiz, qo'shnilarimiz, do'st-u og'aynilarimiz. Demak chin dildan ularni haqqiga duo qilamiz. Axir bu oy duolar ijobat bo'ladigan oy. Biz jamiyat insonlarimiz, jamiyat uchun duo qilamiz. Yakka o'zim jannatga kirib olaman deganlar adashadi. Atrofdagilarni ham ezgulik yo'liga nasixat qilib, haqlariga duo qilib, yaxshilik yo'liga chorlaymiz. Ajdodlarimiz mana shu yo'lda ma'naviyat cho'qqilariga yetganlar. Yoki tarixda o'tgan buyuk vatandoshlarimizdan birortasini qasdan ro'za tutmaganini eshitganmisiz? Xalqimiz qachonki sof islomni mahkam tutganlarida, olamga muallim bo'lganlar. Mana hozir ham mustaqilligimiz sharofati bilan, yana ma'naviyat va ma'rifatga yuz tutmoqdalar. Kelajakda, yana olamga muallim bo'ladigan farzandlar dunyoga kelishidan umidvormiz. Mana shu maqsadlar uchun, bu oyda takror va takror duo qilib qolamiz.
<<Ey nafs, chetga o'tib tur! O'n bir oy senga xizmat qildik. Seni kasofatinga, goh gohida hatto Allohni unutib qo'ydik. Endi jazoyingni oladigan vaqting keldi. Yozning jazirama kunlarida, quyosh badaningni kuydirganida, chanqoqdan og'izlar qurib qolganida, sendan yuz o'girib, Allohga duo qilayotgan bo'lamiz! Faryodlaringa quloq tutmaymiz! Kunning ikkinchi yarmida, lazzatli ne'matlar ko'zlarni qamashtirganida, "yeb olaver, baribir odamlar ko'rmaydi" deb aldamoqchi bo'lganingda, iftorga yaqin sabrsizlik alanga olishni boshlaganida, yana sendan yuz o'girib, Allohdan gunohlarimizni kechirishini so'rayotgan bo'lamiz! Ey nafs, yaxshisi taslim bo'laqol, harakatlaring befoyda. Yoningda shayton borligida, juda o'zinga erk bergan eding. Endi ishonganing zanjirband qilindi. Ana ko'rdingmi, u sodiq do'st emas, qiyomatda ham u seni tarafingni ololmaydi. Sen bo'lsa, unga ishonib yuribsan. Kel yaxshisi kelishib olamiz. Bir-birimizni qiynamaymiz. Men ham har doimgidan kamroq va yengilroq mehnat qilaman. Salomatlikka e'tibor beraman. Saxarlikni to'kis ado qilaman, toki kunduzi qiynalmaysan. Iftorlikka eng yoqtirgan taomlaringdan olib qo'yaman. Menga qarshilik qilsang, ovora bo'lganing qoladi holos!>>
Yuqoridagi so'zlar bizni jismoniy va ruhiy holatimizni ro'zaga tayyorlaydi. Inson tanasidagi jarayonlar niyat bilan hamohangdir. Avvaldan, men ro'za tutaman, deb qat'iy niyat qilganlarning barcha organlari o'zini ro'za tutishga tayyorlaydi. Kuchim yetsa tutarman, deganlar ko'p qiynalishadi. Chunki ularning jismoniy holati tayyorlanmadi. Qat'iy ishonch bizga katta yordam beradi.
Aziz forumdoshlar, e'tibor bersak, o'tgan ramazonda bor bo'lgan ba'zi insonlar bugun oramizda yo'q. Atrofdagi insonlarga boqing, qancha insonlar vafot qilibdi. Ularga bu kunlar nasib qilmadi. Biz qancha shukrona qilsak shuncha oz. Bu ramazon ham yana kimlar uchun so'ngi ramazon ekanligi aniq. Ular oramizda yuribtilar. Balki mendir, balki sizdir. Alloh umrlarimizni uzoq qilsin. Nafaqat ramazon g'animat, insonlar ham bir-biriga g'animatdir! Agar bu sizni oxirgi ramazoningiz bo'lganida qanday amal qilardingiz? Hozir shunday qiling, har safar shunday amal qiling. Aniqki, qaysidir ramazon siz uchun so'ngisi bo'ladi. O'tgan allomalardan biri aytgan ekan:
- biz olti oy ro'zamiz qabul bo'lsin deb duo qilamiz, yana olti oy keyingi ramazonga yetkazgin deb duo qilamiz!
O'zbekistonimizga va bu oyni sog'inib kutganlarga, diydorlashuv onlari muborak bo'lsin!
