Armon.... Men hayotda eng yomon ko'rgan so'z. Armon nima o'zi? Ushalmagan orzu - niyatlarmi yoki aytilmagan so'zlar ummoni? Armon nima - u ? Ko'zlarda qotib qolgan azoblarmi yo izhor qilinmagan mehr-muhabbat? Armon- har kimning yetolmagan niyatlarimi yohud tutqich bermagan baxtimi?
Armonni har kim o'zicha tushunadi.Kimgadir boy bo'lolmagani armon, kimdir sevganiga erisholmaganidan armonda. Yana kimdir erta yetim qolganidan armonda,boshqasi esa farzandini yo'qotib armon yog'ida qovriladi. Mening armonim esa bulardan farq qiladi. Yuragimni 8 yildan beri cho'g' bo'lib kuydirgan armonim. Hech kimga ko'rsatolmagan ko'zim yoshlari. Hech kimga aytolmagan, to'g'risi aytishga so'z topolmagan armonlarim. Sizlarga bularni ochmoqchiman. Sizlarga yuragimni tub-tubida yotgan armonlarimni to'kib solmoqchiman. Chunki sizlar meni ko'rmaysiz. Aytishga oson bo'ladi. Agar yonimda bo'lganingizda bu armonlarim eshigini ochardimu, lekin sizni kirgizolmasdim. Sababi ko'zim yoshlari yana bu eshikni taqa-taq yopardi. Sizni ko'rmay turib aytish meng ancha oson. Shuning uchun bu armonlarimga sirdosh qilib sizni tanladim,aziz birodarim. Keling, mening armonlarim, mening dardlarimni tinglang. Zora, yuragimni tog'dek bosib turgan armonim biroz yengillashsa. Buni o'qib, buncha ham sabrsiz ekan, bu gunohku demang. Balki, Alloh taolo menga bergan sabri tufayli shuncha yillardan beri bularni yuragimda asragandirman. Agrda bularni sizga to'kib solayotganim uchun gunohkor bo'lsam, Alloh taolo men avf etar, Inshaalloh. Chunki bu dardlarimni O'zidan boshqa hech kim bilmaydi.
Bu turmush bo'sag'asida turgan qizlarimizga, ayniqsa yigitlarimizga foyda beradi, deb umid qilaman. Keling, mening sirlarimdan, armonu hasratlarimdan ogoh bo'ling.
(Bularni yozish men uchun juda og'ir. Shuning uchun har kuni oz-ozdan yozib boraman. Buning uchun sizlardan uzr so'rayman)