14-bob. Me’roj haqida
Molik ibn Sa’sa’a raziyallohu anhu rivoyat qiladilarki Rasululloh sallallohu alayhi va sallam sahobalarga o‘zlarini (Hazrat Jabroil) sayohat qildirgan kecha haqida so‘zlab beribdilar. Ul zot shunda bunday debdilar: «Men Hatiym (Ka’bani o‘rab turgan devorning bir qismi bo‘lib, Janob Rasululloh «Hijr» deb aytgan bo‘lishlari ham mumkin) ichkarisida yonboshlab yotgan erdim, bir kishi (ya’ni, Hazrat Jabroil) kelib, uzunasiga (ko‘ksimni) yordilar. (Roviy Qatoda: «Men Anasning «Mana bu yerdan bu yergacha yordilar» deb aytayotganlarini eshitdim», — deydilar. Roviy Sa’sa’a: «Bo‘g‘izlari ostidagi chuqurchadan to qovuqlarigacha yordilar», — deydilar). So‘ng, yuragimni chiqarib oldilar. Keyin, yonimga iymon to‘la bir oltin jom keltirildi. (Ma’lumki, Islom shariy’ati Oltin va kumush idishlardan foydalanmoqni harom qilgandur. Bu yerda oltin idishdan foydalanilganining boisi, ehtimol, bu voqeannng oltin va kumush idishlardan foydalanmoq harom kilinmasidan burun sodir bo‘lgani uchundur yoki bu hukmning faqat foniy dunyogagina taalluqli ekanligi uchundur? Chunki, jannat ahli bunday idishlardan bemalol foydalanurlar. Isro’ kechasi sodir bo‘lgan voqea ersa, g‘ayb hodisotlaridan biri bo‘lib, ohirat hukmlariga itoat etur). Keyin, yuragim (asli jannatdan bo‘lmish zamzam suvi birlan) yuvildi. So‘ng, (iymon va hikmat birlan) to‘ldirildi. Keyin, qaytib joyiga solib qo‘yildi, So‘ng, menga xachirdan pastroq, eshakdan balandroq bir oq ulov keltirildi. (Roviy: «Bu «Buroq» — chaqmoq kabi tez» ulov bo‘lib, oyoqlarini nihoyatda uzoqqa tashlab yugurar erdi», — deydilar). Men unga mindirildim. Keyin, Hazrat Jabroil men birlan birga yo‘lga tushib, osmonning eng yaqin (qavatiga chiqib) bordilar-da, (osmon eshigini) ochmoqlarini so‘radilar. Shunda: «Kim bu?» — deyildi. Hazrat Jabroil: «Bu men, Jabroilman», — dedilar. «Yoningizdagi kim?» — deyildi. Hazrat Jabroil: «Muhammad alayhissalom)», — dedilar. «Ul kishini (o‘zingiz birlan birga) osmonga olib chiqish uchun yuborilgaimi(dingiz)?» — deyildi. Hazrat Jabroil: «Ha». — dedilar. «Marhabo, xush kelibdilar, qadamlariga hasanot!» — deyildi. So‘ng, (osmon eshikboni eshikni) ochdi. Men ichkariga kirib, Odam alayhissalomni) ko‘rdim. (Hazrat Jabroil menga): «Bul otangiz Odam (alayhissalom) bo‘ladilar, ul kishiga salom beringiz!» — dedilar. (Chunki, o‘tib ketayotgan odam o‘ltirgan odamga salom bermog‘i kerak, agarchi u o‘ltirgan odamdan afzalroq bo‘lsa ham). Men ul kishiga salom berdim, salomimga alik oldilar. Keyin, (menga): «Marhabo, (ey) solih o‘g‘il va solih payg‘ambar!» — dsdilar. (Chunki, Rasululloh sallallohu alayhi va sallamdek bir ulug‘ zotga ota ekanliklaridan faxrlandilar). So‘ng, (Hazrat Jabroil) men birlan birga ko‘tarilib, ikkinchi osmonga (chiqib) bordilar-da, (osmon eshigini) ochmoqlarini so‘radilar. Shunda: «Bu kim?» — deyildi. Hazrat Jabroil: «Bu men, Jabroilman», — dedilar. «Yoningizdagi kim?» — deyildi. Hazrat Jabroil: «Muhammad. (alayhissalom)», — dedilar. «Ul kishini (osmonga olib chiqishingiz uchun) yuborilganmidingiz?» — deyildi. Hazrat Jabroil: «Ha», — dedilar. «Marhabo, xush kelibdilar, qadamlariga hasanot!» — deyildi. So‘ng, (osmon eshikboni eshikni) ochdi. Men ichkariga kirib, ikki xolavachcha Yahyo va Iso (alayhissalomni) ko‘rdim. Jabroil alayhissalom: «Bular Yahyo va Iso (alayhissalom) bo‘ladilar, ularga salom beringiz!» — dedilar. Men ularga salom berdim, ular salomimga alik olishdi. Sung, ular (menga): «Marhabo, (ey) solih birodar va solih payg‘ambar!» — deyishdi. So‘ng, (Hazrat Jabroil) men birlan birga uchinchi osmonga ko‘tarilib, (osmon eshigini) ochmoqlarini so‘radilar. Shunda: «Kim bu?» — deyildi. (Jabroil alayhissalom): «Bu men, Jabroilman», — dedilar. «Yoningizdagi kim?» — deyildi. (Hazrat Jabroil): «Muhammad (alayhissalom)», — dedilar. «Ul kishini osmonga olib chiqishingiz uchun yuborilganmidingiz?» — deyildi. (Hazrat Jabroil): «Ha», — dedilar. «Marhabo, xush kelibdilar, qadamlariga hasanot!» — deyildi. Keyin, (osmon eshikboni eshikni) ochdi. Men ichkariga kirib, Yusuf (alayhissalomni) ko‘rdim. (Hazrat Jabroil menga): «Bul Yusuf (alayhissalom) bo‘ladilar, ul kishiga salom beringiz!»— dedilar. Men ul kishiga salom berdim, salomimga alik oldilar. So‘ng, (menga): «Marhabo, (ey) solih birodar va solih payg‘ambar!» — dedilar. Keyin, (Hazrat Jabroil) men birlan birga ko‘tarilib, to‘rtinchi osmonga (chiqib) bordilar-da, (osmon eshigini) ochmoqlarini so‘radilar. Shunda: «Bu kim?» — deyildi. (Hazrat Jabroil): «Bu men, Jabroilman»,— dedilar. «Yoningizdagi kim?» — deyildi. (Hazrat Jabroil): «Muhammad (alayhissalom)», — dedilar. «Ul kishini (osmonga olib chiqmog‘ingiz uchun) yuborilganmidingiz?» — deyildi. (Hazrat Jabroil): «Ha», — dedilar. «Marhabo, xush kelibdilar, qadamlariga hasanot!» — deyildi. Sung, (osmon eshikboni eshikni) ochdi. Men ichkariga kirib, Idris (alayhissalomni) ko‘rdim. (Hazrat Jabroil menga): «Bul Idris (alayhissalom) bo‘ladilar, ul kishiga salom beringiz!» — dedilar. Men ul kishiga salom berdim, salomimga alik oldilar. Keyin, (menga): «Marhabo, (ey) solih birodar va solih payg‘ambar!» — dedilar. So‘ng, (Hazrat Jabroil) men birlan birga ko‘tarilib, beshinchi osmonga (chiqib) bordilar-da, (osmon eshigini) ochmoqlarini so‘radilar. Shunda: «Bu kim?» — deyildi. (Hazrat Jabroil): «Bu men, Jabroilman», — dedilar. «Yoningizdagi kim?» — deyildi. (Hazrat Jabroil): «Muhammad (alayhissalom)», — dedilar. «Ul kishini (osmonga olib chiqmog‘ingiz uchun) yuborilganmidingiz?» — deyildi. (Hazrat Jabroil): «Ha», — dedilar. «Marhabo, xush kelibdilar, qadamlariga hasanot!» — deyildi. So‘ng, (osmon eshikboni eshikni) ochdi. Men ichkariga kirib, Horun (alayhissalomni) ko‘rdim. (Hazrat Jabroil): «Bul Horun (alayhissalom bo‘ladilar), ul kishiga salom beringiz!» — dedilar. Men ul kishiga salom berdim, salomimga alik oldilar. Keyin, (menga): «Marhabo, (ey) solih birodar va solih payg‘ambar!» — dedilar. So‘ng, (Hazrat Jabroil) men birlan birga ko‘tarilib, oltinchi osmonga (chiqib) bordilar-da, (osmon eshigini) ochmoqlarini so‘radilar. Shunda: «Bu kim?» — deyildi. (Hazrat Jabroil): «Bu men, Jabroilman», — dedilar. «Yoningizdaga kim?» — deyildi. (Hazrat Jabroil): «Muhammad (alayhissalom)», — dedilar. «Ul kishini (osmonga olib chiqmog‘ingiz uchun) yuborilganmidingiz?» — deyildi. (Hazrat Jabroil): «Ha», — dedilar. «Marhabo, xush kelibdilar, qadamlariga hasanot!» — deyildi. Keyin, (osmon eshikboni eshikni) ochdi. Men ichkariga kirib, Muso (alayhissalomni) ko‘rdim. (Jabroil alayhissalom): «Bul Muso (alayhissalom bo‘ladilar), ul kishiga salom beringiz!» — dedilar. Men ul kishiga salom berdim, salomimga alik oldilar. So‘ng, (menga): «Marhabo, (ey) solih birodar va solih payg‘ambar!» — dedilar. Keyin, men Muso (alayhissalomning) yonlaridan o‘tib ketayotgan erdim, yig‘lab yubordilar. Shunda ul kishiga: «Nechun yig‘layotirsiz?» — deyildi: (Muso alayhissalom): «(Olloh taolo umrim davomida menga ato etmagan ne’matni) bir bolaga (ato etib), uni mendan keyin payg‘ambar qilib yuborgani hamda uning ummatidan jannatga kiradirganlari mening ummatimdan jannatga kiradirganlardan ko‘proq ekanligi boisidan (afsus chekib) yig‘layotirman», — dedilar. (Muso alayhissalom payg‘ambarimizni «bola» deganlarida ul zotdan yoshlari ulug‘roq ekanligini nazarda tutganlar). Keyin, (Hazrat Jabroil) men birlan birga yettinchi osmonga ko‘tarildilar-da, (osmon eshigini) ochmoqlarini so‘radilar. Shunda: «Bu kim?» — deyildi. (Hazrat Jabroil): «Bu men, Jabroilman», — dedilar. «Yoningizdagi kim?» — deyildi. (Hazrat Jabroil): «Muhammad (alayhissalom)», — dedilar. «Ul kishini (osmonga olib chiqmog‘ingiz uchun) yuborilganmidingiz?» — deyildi. (Hazrat Jabroil): «Ha», — dedilar. «Marhabo, xush kelibdilar, qadamlariga hasanot!» — deyildi. So‘ng, (osmon eshikboni eshikni) ochdi. Men ichkariga kirib, Ibrohim (alayhissalomni) ko‘rdim. (Jabroil alayhissalom menga): «Bul otangiz Ibrohim (alayhissalom) bo‘ladilar, ul kishiga salom beringiz!» — dedilar. Men ul kishiga salom berdim, salomimga alik olgach: «Marhabo, (ey) solih o‘g‘il va solih payg‘ambar!» — dedilar. Keyin, menga Sidrat al-Muntaho (Nilufar daraxti) namoyon qilindi. (Bu daraxt Yerdan osmonga chiqadirganlar uchun chegara bo‘lib, undan nariga o‘tkazilmaslar). Uning mevalari Hajar (o‘lkasida qilinadirgan ko‘zalardek va barglari fil qulog‘idek (katta) erkan. (Hazrat Jabroil menga): «Bu Sidrat al-Muntahodur», — dedilar (Qarasam, uning ildizlari ostidan) to‘rt daryo (oqib chiqayotir), Ikkisi (ko‘zga) yashirin va ikkisi (ko‘zga) zohir bo‘lib, men: «Ey (Hazrat) Jabroil, bu (botiniy) ikki daryo qanday daryo?» — dedim. (Ulamolarning aytishlaricha, Janob Rasululloh ko‘zga zohir ikki daryoni birinchi osmonda ko‘rganlar. Ko‘zga yashirin ikki daryoni ersa Sidrat al-Muntaho namoyon qilingan yettinchi osmonda ko‘rganlar. Shul boisdan boqiy ko‘z birlangina ko‘rib bo‘ladirgan ikki botiniy daryo xususida so‘radilar. Hazrat Jabroil bir yo‘la to‘rttala daryo haqida tushuntirdilar). Hazrat Jabroil: «(Foniy ko‘zga) yashirin (bu) ikki daryo jannatda (oqib turguvchi daryolar bo‘lib, biri — Salsabil va ikkinchisi— Kavsardur). Ammo, (foniy ko‘zga) zohir ikki daryo ersa, (biri) — Nil va (ikkinchisi) — Furotdur», — dedilar. So‘ng, menga Bayt al-Ma’mur (Odam alayhissalom Olloh taoloning amriga binoan qurgan Baytulloh bo‘lib, Nuh to‘foni vaqtida vayron bo‘lmasligi uchun farishtalar uni yettinchi osmonga olib chiqib qo‘yganlar. Har kuni uni yetmish ming farishta tavof qilib turgani boisidan «Baytul Ma’mur» — «Obod uy» deb atalur) namoyon qilindi. Unga har kuni yetmish ming farishta kirib, (tavof qilur erkan). Keyin, menga bir idishda (mast qilguvchi) ichimlik, bir idishda sut va bir idishda asal keltiriddi. Men sutni olib ichdim. Shunda (Hazrat Jabroil menga): «Bu (ya’ny, Olloh taolo harom qilgan ichimlikni yoxud dunyoviy nafsni qondirguvchi asalni olmay, inson bolasiga eng dastlab halol qilingan sutni olib ichganingiz) siz va sizning ummatingizga xos islomiy tabiatdur», — dedilar. So‘ng, menga (va mening ummatimga) har kuni (ya’ni, bir kecha-kunduzda) ellik vaqt namoz o‘qimoqlik farz qilindi. Keyin, men Muso (alayhissalomning) huzurlariga qaytib keldim. (Muso alayhissalom menga): «Nima qilmog‘ingiz amr qilindi?» — dedilar. «Menga (ummatimga) har kuni ellik vaqt namoz uqimoqlik amr qilindi», — dedim. (Muso alayhissalom): «Ummatingiz har kuni ellik vaqt namoz o‘qimoqlikka toqat qilolmaslar. Chunki men, Olloh taolo haqi, sizdan ilgari odamlarda (ya’ni, o‘z ummatimda) buni sinab ko‘rganman, Banu Isroilni (Olloh taolo ularga farz qilgan namozlarni kanda qilmay o‘qimoqlikka) ko‘p undaganman, (lekin bo‘lmagan). Rabbingiz qoshiga qaytib borib, ummatingizga yengillik tug‘dirmog‘ini unda iltimos qilingiz!»— dedilar. So‘ng, men (parvardigorim qarshiga) qaytib borib, (ummatimga yengillik tug‘dirmog‘ini undan iltimos qildim), u menga (va ummatimga farz qilingan ellik vaqt namozni) o‘ntaga kamaytirdi. Keyin, men Muso (alayhissalomning) qoshlariga qaytib keldim. Shunda ul kishi yana avvalgi gaplarini qaytardilar. Men (parvardigorimning huzuriga) qaytib borib, (yana kamaytirmog‘ini iltimos qildim), u (tag‘in) o‘ntaga kamaytirdi. So‘ng, men Muso (alayhissalomning) qoshlariga qaytib keldim. Ul kishi yana avvalgi gaplarini qaytardilar. Men (parvardigorimning qoshiga) qaytib bordim, u yana o‘ntaga kamaytirdi. So‘ng, men Muso (alayhissalomning) huzurlariga qaytib keldim. Ul kishi yana avvalgi gaplarini qaytardilar. Men (parvardigorimning) qoshiga qaytib bordim, u yana o‘ntaga kamaytirdi. Men (va ummatim) har kuni o‘n vaqt namoz o‘qimoqlikka buyurildim. Keyin, men Muso (alayhissalomning) qoshlariga qaytib keldim. Ul kishi yana avvalgi gaplarini qaytardilar. Men (parvardigorimning) huzuriga qaytib bordim, shunda men (va ummatim) har kuni besh vaqt namoz o‘qimoqlikka buyurildim. So‘ng, Muso (alayhissalomning) qoshlariga qaytib kelib erdim, ul kishi: «Nima qilmoqlikka buyurildingiz?» — dedilar. Men: «Men (va ummatim) har kuni besh vaqt namoz o‘qimoqlikka buyurildim», — dedim. Ul kishi: «Ummatingiz har kuni besh vaqt namoz o‘qimoqqa toqat qilolmas, chunki men sizdan ilgari odamlarda buni sinab ko‘rganman, Banu Isroilni (Olloh taolo farz qilgan namozlarni kanda qilmay o‘qimoqlikka) ko‘p undaganman. Parvardigoringiz qoshiga qaytib borib, ummatingizga yengillik tug‘dirmog‘ini iltimos qilingiz!» — dedilar. Shunda (men ul kishiga): «Parvardigorimdan hadeb iltimos qilaverib, uyalib ketdim. (Endi qayta iltimos qilmasman. Agar uning qoshiga yana iltimos qilib borsam, unda na uning irodasiga rozi bo‘lgan va na unga bo‘yinsungan bo‘laman), men uning (irodasiga) rozi bo‘lib, unga itoat eturman!»— dedim. So‘ng, (ul kishining qoshlaridan) nari ketayotganimda (hotifdan) menga: «Farzimni (besh vaqt qilib) tasdiqlab, bandalarimga yengillik tug‘dirdim» — deyildi».