13-bob. Zubayr ibn al-Avvom raziyallohu anhuning manoqiblari xususida
Ibn Abbos bunday deydilar: «Zubayr ibn al-Avvom Rasululloh sallallohu alayhi va sallamning havoriylari (yordamchilari)durlar. (Iso alayhissalomning sahobalari) kiyimlari oq bo‘lgani uchun «havoriylar» deb atalganlar», — deydilar». («Havoriy» — matoni oq rangga buyovchi yoki oq kiyim kiygan kishidur).
Marvon ibn alHakam rivoyat qiladilar: «Usmon ibn Affon raziyallohu anhu burunlaridan ko‘p qon ketaverganidan haj qilolmay qoldilar. Shunda ul kishi vasiyat qildilar. Keyin, Quraysh qabilasiga mansub bir kishi huzurlariga kirib: «Biror kishini o‘rningizga xalifa qilib qoldiringiz!» — dedi. Hazrat Usmon: «Falonchini xalifa qilib qoldirurman», — dedilar. Sahobalar: «Falonchinimi?» — deyishdi. Hazrat Usmon: «Ha», — dedilar. Keyin, Hazrat Usmon: «Xalifalikka undan ko‘ra kim loyiqroq?!» — dedilar-da, jim qoldilar. So‘ng, Hazrat Usmonning huzurlariga yana bir kishi, menimcha Al-Haras kirib keldi-da: «O’rningizga xalifa qoldiringiz!» — dedi. Hazrat Usmon: «Falonchini xalifa qilib qoldirurman», — dedilar. Sahobalar: «Falonchinimi?» — deyishdi. Hazrat Usmon: «Ha», — dedilar. Keyin, Hazrat Usmon: «Undan munosibroq kim?!» — dedilar-da, jim qoldilar. Sahobalar boya: «Falonchinimi?» — deyishganda, menimcha, «Zubayrnimi?» — deb aytishdi. Shunda Hazrat Usmon: «Ha», — dedilar-da, so‘ng: «Ammo, jonim qo‘lida bo‘lgan zot haqi, Zubayr Janob Rasulullohga eng suyukli kishi bo‘lganidan qat’iy nazar, mening bilishimcha, musulmonlarning eng yaxshisidur» — deb aytdilar».
Bu yerda yuqoridagi hadis takroran keltirilgan.