122-BOB
Erkaklarga ipak kiyim kiyish, ipak ko‘rpachada o‘tirish va ipak yostiqqa suyanishning haromligi hamda ayollarga ipak kiyim kiyishning joizligi haqida

802/1. Umar ibn Xattobdan (r.a.) rivoyat qilinadi. Rasululloh (s.a.v.) «Ipak libos kiymanglar. Kimki uni dunyo hayotida kiysa, oxiratda kiya olmaydi», dedilar. Imom Buxoriy va Muslim rivoyatlari.

803/2. Umar ibn Xattobdan (r.a.) rivoyat qilinadi. Rasululloh (s.a.v.) «Albatta, ipakni oxiratdan nasibasi yo‘qlar kiyadi», dedilar. Imom Buxoriy va Muslim rivoyatlari.
Imom Buxoriy rivoyatlarida: «oxiratdan nasibasi yo‘qlar kiyadi», bo‘lib kelgan.

804/3. Anasdan (r.a.) rivoyat qilinadi. Rasululloh (s.a.v.) «Kimki shu dunyoda ipak kiysa, oxiratda kiya olmaydi», dedilar. Imom Buxoriy va Muslim rivoyatlari.

805/4. Alidan (r.a.) rivoyat qilinadi. Rasululloh (s.a.v.) ipakni ushlab, o‘ng tomonlariga va tillani ushlab, chap tomonlariga qo‘ydilar-da, keyin: «Albatta, bu ikkovi ummatimning erkaklariga haromdir», dedilar. Abu Dovud rivoyatlari.

806/5. Abu Muso al-Ash’ariydan (r.a.) rivoyat qilinadi. Rasululloh (s.a.v.) «Ipak kiyim va tilla ummatimning erkaklariga harom, ayollariga esa halol qilindi», dedilar. Imom Termiziy rivoyatlari.

807/6. Huzayfadan (r.a.) rivoyat qilinadi. Rasululloh (s.a.v.) tilla va kumush idishlarda biror ichimlik ichishdan va ovqat tanovul etishdan hamda ipak, kimxob kiyishdan va uning ustida o‘tirishdan man qildilar. Imom Buxoriy rivoyatlari.

123-BOB
Badanida qichima kasali borlarga ipak kiyishning joizligi haqida

808/1. Anasdan (r.a.) rivoyat qilinadi. Rasululloh (s.a.v.) Zubayr va Abdurahmon ibn Avflarga badanida qichima kasali borligi sababli ipak kiyim kiyishlariga ruxsat etdilar. Imom Buxoriy va Muslim rivoyatlari.

124-BOB
Yo‘lbars terisidan ko‘rpacha qilishning va egar ustiga to‘shamoqning man etilgani haqida

809/1. Muoviyadan (r.a.) rivoyat qilinadi. Rasululloh (s.a.v.) «Ipak va yo‘lbars terisi to‘shalgan ulovni minmanglar», deb aytdilar. Abu Dovud va boshqalar rivoyatlari.

810/2. Abu Malih otalaridan qilgan rivoyatlarida, Rasululloh (s.a.v.) yirtqichlarning terisini ishlatishdan man qildilar. Abu Dovud, Termiziy va Nasaiylar rivoyatlari.

Termiziyning rivoyatlarida, Rasululloh (s.a.v.) «Yirtqichlarning terisini to‘shak qilishdan man qildilar», bo‘lib kelgan.

125-BOB
Yangi kiyim yoki poyafzal va shunga o‘xshash narsalar kiyganda aytiladigan narsalar to‘g‘risida

811/1. Abu Said al-Xudriydan (r.a.) rivoyat qilinadi: «Rasululloh (s.a.v.) yangi kiyim sallami, ko‘ylakmi yoki ridomi, kiysalar «Bismilloh»ni aytib, so‘ng quyidagi duoni o‘qir edilar: «Allohumma lakal hamdu anta kasavtaniyhi, as`aluka xoyrahu va xoyra ma suni’a lahu va a’uzu bika min sharrihi va sharri ma suni’a lahu». (Ma’nosi: Ey Rabbim, meni kiyintirganing uchun Senga hamd bo‘lsin. Sendan buning yaxshiligini va unga qilingan yaxshilikni so‘rayman. Va buning yomonligidan va unga qilingan yomonlikdan panoh tilayman.) Abu Dovud va Termiziy rivoyatlari

126-BOB
Kiyim kiyishni o‘ngdan boshlashning mahbubligi to‘g‘risida

Biz bu haqda yuqoridagi bobda ko‘plab sahih hadislar keltirdik.

127-BOB
Uxlash, yotish, turish, o‘tirish, birga o‘tirish va tush ko‘rish odoblari haqida

812/1. Barro ibn Ozib (r.a.) aytadilar: «Rasululloh alayhissalom menga: «Agar to‘shagingga kelsang, o‘ng tomoningga yonboshlab: «Allohumma aslamtu nafsiy ilayka va vajjahtu vajhiy ilayka va favvaztu amriy ilayka va alja`tu zohriy ilayka, rog‘batan va rohbatan ilayk, la malja`a va la manja minka illa ilayk, amantu bikitabikallaziy anzalta va nabiyyikallaziy arsalta», deb ayt», dedilar. (Ma’nosi: Allohim, nafsimni Senga taslim etdim. Va yuzimni senga qaratdim. Ishimni Senga topshirdim. Sening ne’matingga rag‘bat qilib, g‘azabingdan qo‘rqib, Senga suyandim. Sendan boshqa qochadiganim ham, najot topadiganim ham yo‘q. Nozil qilgan kitoblaringga va yuborgan payg‘ambarlaringga iymon keltirdim.) Imom Buxoriy mana shu lafz ila rivoyat qilganlar.

813/2. Barro ibn Ozib (r.a.) aytadilar: «Rasululloh alayhissalom menga: «Agar yotog‘ingga borsang, namozga tahorat qilganingdek tahorat qil, so‘ng o‘ng tomoningga yonboshlab: «Allohumma aslamtu nafsiy ilayka va favvaztu amriy ilayka va alja`tu zohriy ilayk, rog‘batan va rohbatan ilayk, la malja`a va la manja minka illa ilayk, amantu bikitabikallaziy anzalta va nabiyyikallaziy arsalta», deb ayt. Yotishdan oldin oxirgi aytadiganing shu bo‘lsin», dedilar. (Ma’nosi: Allohim, nafsimni Senga taslim etdim. Ishimni Senga topshirdim. Sening ne’matingga rag‘bat qilib, g‘azabingdan qo‘rqib, Senga suyandim. Sendan boshqa qochadiganim ham, najot topadiganim ham yo‘q. Nozil qilgan kitoblaringga va yuborgan payg‘ambarlaringga iymon keltirdim.) Imom Buxoriy va Muslim rivoyatlari

814/3. Oishadan (r.a.) rivoyat qilinadi. Rasululloh (s.a.v.) kechalari o‘n bir rakat namoz o‘qirdilar. Agar subh kirsa, ikki rakat yengil namoz o‘qib olardilar. Keyin muazzin kelib, jamoat jam bo‘ldi deb aytgunicha, o‘ng tomonlariga yonboshlab turardilar. Imom Buxoriy va Muslim rivoyatlari.

815/4. Huzayfadan (r.a.) rivoyat qilinadi. Rasululloh (s.a.v.) kechasi yotoqlariga yotsalar, qo‘llarini chakkalari ostiga qo‘yib «Allohumma bismika amutu va ahya», deb aytardilar. (Ma’nosi: Allohim, Sening isming bilan tirilaman va o‘laman.) Uyg‘onganlarida: «Alhamdu lillahillaziy ahyana ba’da ma amatana va ilayhin nushur», deb aytar edilar. (Ma’nosi: Bizni o‘ldirgandan keyin tiriltirgan Allohga hamd bo‘lsin. Va biz Ungagina qaytamiz.) Imom Buxoriy rivoyatlari

816/5. Ya’ish ibn Tixfa al-o‘iforiydan (r.a.) rivoyat qilinadi. Otam menga quyidagilarni aytib berdilar. Bir kuni men masjidda qornimni yerga qaratib yotgan edim, nogahon bir kishi kelib, oyog‘i bilan meni turtdi-da: «Albatta, bu yotish Allohning g‘azabini keltiradi», dedi. O’girilib qarasam, u gapirayotgan kishi Rasululloh (s.a.v.) ekanlar. Abu Dovud rivoyatlari.

Foyda: Qorinni yerga qaratib yotishdan qaytarilgan.

817/6. Abu Hurayradan (r.a.) rivoyat qilinadi. Rasululloh (s.a.v.) «Kim bir o‘ringa o‘tirsayu Allohni zikr qilmasa, u uchun Alloh tomonidan nuqson yetadi. Kim bir o‘ringa yonboshlasayu Allohni zikr etmasa, unga ham Alloh tomonidan nuqson yetadi», dedilar. Abu Dovud rivoyatlari.

Foyda: Har bir majlisda Allohni zikr qilib yurishga targ‘ib hamda Allohning zikridan g‘aflatda qolishdan ogohlantirish bor.

128-BOB
Chalqancha yotish va avrati ochilib qolishidan qo‘rqmasa, bir oyog‘ini
ikkinchisi ustiga qo‘yishning hamda chordona qurib hamda
cho‘kkalab o‘tirishning joizligi haqida

818/1. Abdulloh ibn Yaziddan (r.a.) rivoyat qilinadi. Bu zot: «Rasulullohning (s.a.v.) masjidda bir oyoqlarini ikkinchisi ustiga qo‘yib chalqancha yotganlarini ko‘rdim», dedilar. Imom Buxoriy va Muslim rivoyatlari.

819/2. Jobir ibn Samuradan (r.a.) rivoyat qilinadi. Rasululloh (s.a.v.) agar bomdod namozini o‘qib bo‘lsalar, quyosh batamom chiqqunicha o‘z o‘rinlarida chordona qurib o‘tirardilar. Abu Dovud rivoyatlari.

820/3. Ibn Umardan (r.a.) rivoyat qilinadi. «Rasulullohning (s.a.v.) Ka’ba hovlisida cho‘kkalab, ya’ni dumbalarini yerga qo‘yib, tizzalarini quchoqlab o‘tirganlarini ko‘rdim», dedilar. Imom Buxoriy rivoyatlari.

821/4. Qaylata binti Maxramadan (r.a.) rivoyat qilinadi. «Rasulullohning (s.a.v.) cho‘kkalab o‘tirganlarini ko‘rdim. Bas, u zotning nihoyatda xushu’ bilan o‘tirganlarini ko‘rib, qo‘rquvdan titrab ketdim». Abu Dovud va Termiziy rivoyatlari.

822/5. Sharid ibn Suvayddan (r.a.) rivoyat qilinadi. Men mana shundoq, ya’ni chap qo‘limni orqamga qo‘yib, o‘ng kaftimga suyanib o‘tirganimda, Rasululloh (s.a.v.) «Allohning g‘azabiga uchragan yahudiylar kabi o‘tirmagin», dedilar. Abu Dovud rivoyatlari.