forum.ziyouz.com

Kutubxona => O'zbek adabiyoti => O'zbek mumtoz adabiyoti => Mavzu boshlandi: AbdulAziz 09 Fevral 2010, 11:34:47

Nom: Ahmad Yassaviy. Devoni hikmat (turkiy yozuvida) خواجه احمد يسوى - ديوان حكمت
Yuborildi: AbdulAziz 09 Fevral 2010, 11:34:47
Devoni hikmat (eski o'zbek yozuvida)

(http://ziyouz.com/images/books/devoni_hikmat.jpg) (http://www.ziyouz.com/index.php?option=com_remository&Itemid=57&func=fileinfo&id=646)

Muallif: Xoja Ahmad Yassaviy
Hajmi: 830 Kb
Fayl tipi: pdf, zip
(http://www.ziyouz.com/components/com_remository/images/download_trans.gif) Saqlab olish (http://www.ziyouz.com/index.php?option=com_remository&Itemid=57&func=fileinfo&id=646)
Online o'qish (http://forum.ziyouz.com/index.php?topic=4359.0)


خواجه احمد يسوى

ديوان حكمت


بِسْمِ اللهِ الرَّحَنِ الرَّحِيمِ

الحمد لله ربّ العالمين والعاقبة للمتقين و الصلوة والسلام على رسوله محمّد وآله واصحابه اجمعين امّا بيلكيل کيم بو رسالهء قطب الاقطاب و سرور مشايخ سلطان الاوليا و برهان الاتقيا فرزند خوان حضرت سلطان الانبيا صلّى الله تليه و سلّم حضرت صلطان خواجه احمد يسوى آنداغ ايتيب دورلار کيم بيز دين صونكره آخر الزمان يقين بولغانده آنداغ مشايخ لار پيدا بولغاى کيم ابليس عليه اللعنة آلاردين سبق آلغاى وهمه خلق آلارغه محب بولغاى و مريدلارينى باشقه ره المغاى لار اول شيخ لار کيم مريدلاری دين طمع قيلغاى و جانينى كفر و ضلالت دين آرمغاى و اهل بدعت نى يخشى كوركاى و اهل سنت نى يمان كوركاى و علم شريعت برلان عمل قيلماغاى و نامحرم لاركا کوز سالغايلار و يمان ليغ پيشه قيليب الله تعالى ننك رحمتيدين اميد توتقاى و مشايخ لار ايشينى خار كوركاى مريدلارى رد بولغاى اوزلارى مرتد بولغاى و ينه خارليق زارليق برله مريدلارى ننك اشيكيده يوروكايلار اول حالده مريدلاردين نياز آلغايلار من بيزار من خدا بيزارديکايلار شيخ اولدور كيم نياز آلسه مستحق لارغه غريب بيچاره غه بيركايلار اكر آليب اوزى ييسه مردار ايت يمش ديك بولغاى اكر تون قيليب كيسه اول تون تورغونچه حق تعالى نماز روزه سينى قبول قيلماغای و اكر آلغان نيازيدين نان قيليب ييسه حق تعالى آنى دوزخ ده تورلوك عذاب غه كرفتار قيلغاى و اکر آنداغ شيخ غه هر کشی اعتقاد قيلسه كافر بولغاى آنداغ شيخ لار ملعون تورور آنينك فتنه سی دجال دين بدتر تورور اى طالب اکر حق نى طلب قيليب تبای ديسنك آنداغ پيركا قول بيرکيل کيم شريعت ده عارف بالله بولسه طريقت ده واقف اسرار بولسه حقيقت ده كامل مكمل بولسه معوفت ده درياى عمان بولسه آنداغ پيركا قول بيركيل كيم ايشينك سعادت بولغاى اكر مويد شريعت علمينى بيلمسه شريعت علمينى آنكا اوركاتكاى اکر طريقت ده واقع پيدا بولمسه طريقت علمى برلان يولغه سالغاى و حقيقت سريدين مريديكا يول كورساتكاى و اكر معرفت ده جذبهء حق پيدا قيلدورغاى شيخ ذوالنون مصرى رحمة الله عليه آنداغ ايتيب دورلار كيم مريد قرق ييل خذمت قيلماغونچه شيخ ليق و فقيرليق و درويش اورنى آنكا تعيّن بولمس و خرقه كيماكى آنكا روا ايرمس حضرت سلطان خواجه احمد يسوى آنداغ ايتب دورلار کيم هر كيم پيرليك و شيخ ليق دعواسين قيلور بولسه قرق ييل تا پيرنينك خذمتى ده يورمغونجه شيخ اورنى آنكا روا ايرمس اکر مريد آلسه رد تورور هر کيم درويش ليك دعواسين قيلسه اوّل حق امرينه بويون سنوب شريعت امرى برله يولغه يوركاى و باطل ايشلاردين و بدعت ايشلاردين پرهيز قيلغاى كيچه قيام بولمغونچه کوندوز خذمت قيلماغونچه شيخ ليق دعواسين قيلسه ايشى باطل تورور هر كيم شريعت امريدين چقسه مرتد تورور اکر توبه قيلمای دنيادين بارسه حق تعالى تموغ ده تورلوك عذاب غه گرفتار قيلغاى ای درويش اکر زاهد بولسه ريای عابد بولسه سوداى صوفى بولسه کدای درويش بولسه هر جای صوفى ليق لاری مردار ايشلاری فساد مريدلاری مرتد صوفى ليق لاری خودروى ليك درويش ليك لاری طمع ليك نيّت لاری فتنه ليك طريقه لارى اباحت سنت لارى بدعت فعل لاری قباحت نتيجه لارى شقاوت سرلاری خيانت و غسل لارى جنابت صوفى لارده رياضت يوق فقيرلارده قناعت يوق غنى لارده سخاوت يوق درويث رلارده وهم قيامت يوق ای درويش احواليمز نچوك بولغاى ای درويش بيلكيل و اکاه بولغيل كيم اوّل کليمهء شريعت ايكنچى کلمهء طريقت اوچونجى کلمهء معرفت تورتوچى کلمهء حقيقت نى بيلمك کيراك اکر صوفى بولوب بو کلمه لارنى بيلمسه صوفى ايمس کلمهء شريعت بو تورور لا اله الا الله کلمهء طريقت بو تورور لا اله الا الله صفا صفا محمد رسول الله کلمهء معرفت بو تورور لا اله الا الله عظمته محمد رسول الله خلقته کلمهء حقيقت بو تورور لا اله الا الله بقدرته محمد رسول الله رسالته اى درويش مشايخ ماتقدم نينك فقيرليغى نى قبول قيليب سوزلارکا پى روليغ قيليب احكام وارکان لارينى بيليب هوا و هوس نى ترك قيليب نفس نى مجاهده يايى برلان سيندوروب اوزيكا مطيع قيليب و قناعت نى پيشه قيليب قضاسينه راضى بولوب بلاسيغه صبر قيليب نعمتى کا شكر قيليب ايتكان رساله غه عمل قيليب خداى تعالى نينك امرينى بجاى کيلتورسه درويش ليك آتى آنكا مسلم بولور يوق ايرسه بولارنى بيلماى شيخ ليق دعواسين قيلسه قيامت کونى قرا يوزلوك بولوب شرمنده بولغاى نعوذ بالله من ذلك فقيرليق مرتبه سی مقام اعلا تورور هر کيم کا ميسر بولماس
Nom: Re: DEVONI HIKMAT (eski o'zbek yozuvida). Xoja Ahmad Yassaviy
Yuborildi: AbdulAziz 09 Fevral 2010, 11:36:08
***

قُدرت برلان حقدين سزكا فرمان بولدی
توبسيز تينکز ايچره يلغوز توشتوم دوستلار
اول تينکيزکا اوغان ايذیم فرمان قيلدی
بحمد الله صحت سلامت کچتيم دوستلار

ياشيم يتی، عمروم کيتی کوککا اوچتوم
بغريم تاشتی، عقليم شاشتی، يرکا توشتوم
نفس و شيطان خيلی برلان کوب اوروشتوم
صبر رضا مقاماتين آشتوم دوستلار

توقوزومده توکال توزدوم توکونمادوم
اون ياشيمده اونک يانيمغه اورکولماديم
اون بريمده اوز نفسيم کا ضابط بولدوم
فقر رضا مقامقتين کچتيم دوستلار

اون ايکيمده برچه ارواح کلام قيلدی
حورلار قارشو کيليب منکا سلام قيلدی
سر شربتين ساقی بولوب منکا سوندی
آنی آليب ادب برلان ايچتيم دوستلار

اون اوچومده غواص بولوب دريا چومدم
معرفت گوهرينی سردين تيرديم
شمعين کوروب پروانه دک اوزوم اوردوم
بيهوش بولوب عقليم کيتی شاشتيم دوستلار

اون تورتومده تفراق صفت خارليغ تارتيم
هو - هو تيو باشم برلان تون لار قاتيم
مينک آلتون ليغ قيمتی نی برکا ساتيم
آندين سونکرا قنات توتوم اوچتوم دوستلار

اون بيشمده درکاهينکا يانيب کيلديم
يازوق برلان هر اشی قيلديم خطا قيلديم
توبه قيليب حقه بويون سنوب کيلديم
توبه قيليب يازوق لاردين قاچديم دوستلار

جبرائيل واحی کيلتوردی حق رسول غه
آیت کيلدی ذکر ايتکين ديب جزء وکل غه
خضر بابام سالدی منی اوشبو يولغه
آندين صونکره دريا بولوب تاشتيم دوستلار

شريعت نينک یوستانيده جولان قيلديم
طريقت نينک کلزارينده سيران قيلديم
حقيقت دين قنات توتوب طيران قيلديم
معرفت نينک ايشيکينی آچتيم دوستلار

اَ لَسْتُ خمرين پير مغان تويا بردی
ايچا برديم مقداريمچه قويا بردی
قل خواجه احمد ايچيم تاشيم کويا بردی
طالب لرکا دُرّ و گوهر ساچتيم دوستلار
Nom: Re: DEVONI HIKMAT (eski o'zbek yozuvida). Xoja Ahmad Yassaviy
Yuborildi: AbdulAziz 09 Fevral 2010, 11:37:32
***

القصه بو مقام انبيالار و عارف لار و عاشق لارننك مقامى تورور خصوصا حضرت رسول اكرم صلى الله عليه و سلم نينك مقامى تورور يعنى الفقر فخرى ديديلار و فقيرنى يخشى كورمك ايمان دين تورور و فقيرنى خار توتماق كفر تورور نجوك كيم حضرت نبينا صلى الله عليه و سلم ايديلار حُبُّ الْفَقْرِ مِنَ الايمان وبغض الفقراء من الكفر اما فقيرليق مرتبه سی و حرمتى يتى قات آمساندين و يتى قات يردين اولوغ راغ تورور نجوك كيم حضرت رسول اکرم صلى الله عليه و سلم ايديلار حرمة الفقراء المؤمنين اعظم عند الله من سبع السموات و سبع الأرضين ديب ايديلار اى درويش هر کيم غنى لارنى اکرام قيلسه دنياسى اوچون ابد الآباد خداى تعالى نينك لعتى غه کرفتار بولور و اکر فقيرنى حقير کورسه و اهانت قيلسه خداى تعالى چندين عذاب غه كرفتار قيلغای بول فعل مؤمن لارده بولمس مکر منافق لارده بولغاى حضرت على رضى الله تعالی عنه روايت قيلورلار کيم درويش ليك مقامى قرق تورور اکر بيليب عمل قيلسه درويشليكی پاك تورور و اکر بيلمسه و اورکانمسه درويش ليك مقامى آنكا حرام تورور و جاهل تورور اول قرق مقام نينك اونى مقام شريعت ده تورور و اونى مقام طريقت ده تورور و اونى مقام معرفت ده تورور و اونى مقام حقيقت ده تورور اول اون مقام شريعت ده تورور (اوّل) ايمان کيلتورمك حق تعالی نينك بيرلكيكا و بارليقيغه و صفاتيغه و ذاتيغه (ايكنجى) نماز اوقومق تورور (اوچونچى) روزه توتماق تورور (تورتونچى) زكوة بيرمك تورور (بيشنچى) حج طواف قيلماق تورور (آلتنچى) ملازم سوزلامك تورور (يتنچى) علم اوگرانماك تورور (سكزنچى) حضرت رسول صلى الله تعالى عليه و سلم نى سنت لارينى بجاى كيلتورمك تورور (توقوزنچى) امر معروف نى بجاى كيلتورمك تورور (اونونچى) نهى منكر قيلماق تورور اون مقام طريقت ده تورور (اوّل) توبه تورور (ايكنچى) پيرکا قول برمك تورور (اوچونچى) خوف تورور (تورتونچى) رجا تورور يعنى حق تعالى دين اميدوار بولماق تورور (بيشنچى) ورد اوقات نى بجاى كيلتورمك تورور (بشنچى) لذات و شهوات نى ترك قيلماق تورور (آلتنچى) پيرنى خذمتيده بولماق تورور (يتنچى) پيرنى اجازتى برلان سوزلامك تورور (سكزنچى) نصيحت ايشيت مك تورور (توقوزنچى) تجريد بولماق تورور (اونونچى) تفريد بولماق تورور.
اون مقام معرفت ده تورور (اوّل ) فنا بولماق تورور (ايكنچى) درويش ليق نى قبوان قيلماق تورور (اوچونچى) هر ايش كا تحمل قيلماق تورور (تورتونچى) حلال طيب طلب قيلماق تورور (بيشنچى) معرفت قيلماق تورور (آلتنچى) شريعت نى و طريقت نى برپاى توتماق تورور (يتنچى) دنيانى ترك قيلماق تورور (سكرنچى) آخرتنى اختيار قيلماق تورور (توقوزنچى) وجود مقامينى بيلمك (اونونچى) حقيقت نى اسراريى بيلمك تورور.
اون مقام حقيقت ده تورور (اوّل) خاك راه بولماق تورور (ايكنچى) يخشى يمان نى تنيماق تورور و بورون لقمه کا قول سالمق بلكه فضله كا قناعت قيلماقدور اوزينى لقمه سينى سبيل راه قيلماق و كشينى آزار برمكاى و فقيرليق غه منكر بولماغاى و سير سلوك قيلماق هر كيم دين سرينى ساقلامق و شريعت و طريقت و حقيقت مقامينى بيلماك و عمل قيلماق شيخ حسن بصرى رحمة الله عليه روايت قيلورلار حضرت رسول صلى الله عليه و سلم دين حضرت على رضى الله عنه غه ايديلار معراج كيچه سی حق تعالى فرمان برلان حضرت جبرائيل عليه السلام بوراق كيلتوردى يتى قات آسماندين آشوردى تنكرى عزّ وجلّ قدرتى برلان عجايب لارنى كوردى حضرت زبّ العالمين سلام قيلدى حق تعالى حبيبى جواب سلام آلدى خطاب ربّ الارباب دين ندا كيلدى يا سيّد المرسلين يوقارى نظر قيل حضرت رسول اكرم صلى الله عليه و ملم نظر قيلدى ايرسه عجايب صورت لارنى كورورلاركه آنينك شرحى ير و كوك كا سيغمس آنده حيران بولديلار و بيهوش بولديلارينه هوشلاريكا کيلديلر ايديلار يازبّ اول نه صوزت ايردى كه کوردوم عقل هوشوم دين کيتيم حضرت ربّ العزت دين ندا کيلديکه اول صورت فقيرليت صورتى تورور اى محمد اکرمنى تيلاسنك فتر بول تجريد و تفريد بولغيل و اکر ديدار تيلاسنك رياضت تارتغيل تا منينك جماليم غه مشرّف بولغای سن و هر کيم ديدار تيلاسه غير حق آنکا حرام تورور فقيرليق صورتينى کورديلار امّا مشايخ لار اول صورت نى بيانيده مختلف سوزلاب تورورلار حضرت على زضى الله عنه ايديلار حضرت محمّد مصطفى صلى الله عليه و سلم اول کيچه معراج دين يانى کيلديلار مبازك يوزلازيده نورى كوردوم اون سكز مينك عالم اول نوردين منكا عيان بولدى آنده ايديم يا رسول الله بو کون يوزونكيزده نور کوردوم کونده کيدين زياده حضرت رسول صلى الله عليه و سلم ايديلار بول كيچه معراج ده ربّ العالمين حضرتيده فقيرليق صورتينى کوردوم عشق شرابيدين بير جرعه نوش قيلديم ديديلار ديديلار حضرت على رضى الله عنه ايديلار بو حالده من هم آرزو قيلديم حضرت رسول صلى الله عليه و سلم عشق شرابيدين بير جرعه منكا هم بيرديلار ايچتيم بيحال بولدوم و بيهوش بولدوم ينه هوشيم کا کيلديم هر نه حضرت کا معاينه و مشاهده ايردى منكا هم شونداغ معاينه و مشاهده بولدى حضرت رسول اکرم صلى الله عليه و سلم ايديلار يا على فقيرليق مقامينده اون مقام بار تورور و اون نور بار تورور و اون يول بار تورور و اون اورون بار تورور قرق مرتبه بار تورور (اول) اون مقام بار تورور کيم (اوّل) قناعت تورور چنانچه حضرت رسول اکرم صلى الله عليه و سلم ايديلار ألْقَنَاعَةُ کَنْزُ لاَ يَفْنَی يعنى قناعت کنجيدور كيم هركيز تاكانماس و مال نينك فايده سى يوقتور اولوم وقتيده منقطع بولور (ايكنچى) مقام فقر بلاغه تحمل قيلماقدور (اوچونچى) مقام فقر كرفتارليق تورور بنده ليكى کا (تورتونچى) مقام فقر عذاب تورور ايوب پيغببر ديك بولميش تورور (بشنچى) مقام فقر حيرت تورور (آلتنچى) مقام فقر رياضت تورور (يتنچى) مقام فقر آج ليق تورور (سكزنچى) مقام هلاكت تورور. (توقوزونچى) مقام دل خسته بولماق دور (اونونچى) مقام فقر حضرت ربّ العزّت ليك تورور
Nom: Re: DEVONI HIKMAT (eski o'zbek yozuvida). Xoja Ahmad Yassaviy
Yuborildi: AbdulAziz 09 Fevral 2010, 11:38:19
و اون نور فقر تورور (اوّل ) نور صدق (ايكنچى) نور صبر حضر رسول صلى الله عليه و سلم ايديلار الصّبر كَنْزُ مِنْ كَنُوزِ الْجَنَّةِ يعنى صبر بهشت نينك كنج لاريدين تورور (اوچونچى) نور شكر تورور (تورتونچى) نور فكر تورور (بيشنچى) نور ذكر تورور (آلتچى) نور نماز تورور (يتنچى) نور روزه تورور (سكزنچى) نور ايمان تورور (توقوزنچى) نور صدقه تورور (اونونچى) نور پاك جان تورور.
و اون يول فقر تورور (اوّل) توبه تورور (ايكنچى) يازوق لاردين قايتماق تورور (اوچونچى) پشيمان ليغ تورور (تورتونچى) حيرت تورور (بيشنحى) مقام خارليق و زارليق تورور (آلتنچى) حق تعالى دين يارى تيلاميك تورور (يتنچى) يمان يول لاردين يانماق تورور (سكزنچى) خداى تعالى نينك ذكرى برلان بولماق تورور (توتوزنچى) تفكر تورور (اونونچى) فنا بولماق تورور.
و اون اورون بار تورور فقر تورور حكمت تورور عدل تورور عقل تورور حلم تورور حيا تورور عزت تورور احسان تورور ستارليغ تورور امانت تورور تسليم تورور شيخ شهاب الدين قدس اللهسرّه ايديلار درويش ليك كا بول قرق شرايط نى بيلمك كيراك آنداغ کشينی صوفى ديكايلار سلطان احمد كبرا ايديلار يتمش اوچ ييل عمر كوردوم قرق ييل مسافرليق برله بولدوم يتى ييل حج قيلديم مينك مرتبه ختم قرآن قيلديم يتمش مرتبه حضرت رسول صلى الله عليه و سلم نى توشومده کوردوم مبارك يوزلارى كا قراب بول قرق مقام نى منكا ايديلار من عمل قيلماديم حضرت واجب تعالى غه يتيشماديم حضرت شيخ شهاب الدين رحمة الله عليه ايديلار كيم بول قرق مقام نينك اونى شريعت ده تورور و اون مقام طريقت ده تورور و اونى مقام حقيقت ده تورور و اونى مقام معرفت ده تورور هر صوفى هر درويش هر فقير کيم بول قرق مقام نى بيلمسه و عمل قيلمسه صوفى ليق شيخ ليق و فقيرليق دعواسين قيلسه يلغان تورور و اكر صوفى غه بو دنيانينك نعمتنى تمام برسه لار كافرلاركا اشارت قيلسه كيراك و اكر عقبى نعمتى نى و جنت نى تمام برسه لار مؤمن لاركا اشارت قيلسه كيراك محنت و رنج بلانى اوزيكا کورسه كيراك صوفى اکر خلوت ده بولسه حق تعالى نينك ذكرى برلان بولسه كيراك و اکر خلق آراسيده بولسه شريعت درکاهيكا صبر قيلسه كيراك و هر وقتى که درمانده بولسه آنينك درکاهيكا صبر قيلسه كيراك صوفى حلال يمك دين توبه قيلسه كيرك الا بقدر ضرورت تا شبهه کا توشمكاى و اكر صوفى دنيا نعمتى نى تيلاسه صوفى ايمس و اكر دعا و زارى بلان بلا و محنت قيلسه صوفى تورور و شيخ ليق مقام مجاهده تورور و اهل دنيا بلندنى تيلار و اهل عقبى پست لك نى تيلار خار زارليق نى تيلار و اكر صوفيكا بلا کيلسه آه و آه ديمس و صبر قيلور و اکر صوفى نين نفسى نعمت آرزو قيلسه نفس نى آرزوسينى بيرمكاى و اکر صوفى آچ بولسه و برهنه بولسه خوشنود بولغاى و صبردين اوزكانى اختيار قيلماغاى خوش تواضع ليق بولغاى بول اون مقام شريعت ده تورور و اون مقام طريقت ده تورور تسليم تورور يعنى اكر بلا و محنت باشيغه کيلسه اوزينى تسليم كا جان و دل برلان سالغاى ينه ايچمك دين و يمك دين کيمك دين خلق دين تيلامسون و كليم پاره سينى اطلس دين زياده كورسون کوندور روزه كيچه نمازده بولسون و تلاوة قوآن برله بولسون اوقوب قرآن تلاوة قيلمغيل ترك نظم ديسنك آخرده بولسون و اهل محبت دين اوزکانى ذكر قيلماسون و ينه اخلاص برله بولسون صوفى هر کيچه نماز تهجُّدنى ترك قيلماسون خوف و رجا ايچيده بولسون و اكر صوفى طاعتينى خلق غه ظاهر قيلسه ريا اوچون ايليك ييل ليق طاعتى نى ذرهء طعام كا ساتقاى تنكرى عز و جل كا شايسته بولماغاى ينه صوفى يولغه راست ليق برلان قدم قويسه کيراك و راست سوزلاسه کيراك زيراكه كونكل تيل كا خبر بيرورينه صوفى نفسينى كويدوروب فنا قيلسه کيراك دنيادين سوزلامسه کيراك حق تعالى نينك يادى برلان خوش وقت بولسه كيراك و ينه صوفى پست لقاى بولسه حق تعالى نى تابقاى اكر اوتقه باقسه حق نى كوركاى و اکر سوغه باقسه حق نى كوركاى و اكر يوقارى باقسه حق نى كوركاى و اکر قويى باقسه حق نى كوركاى و اكر ايلكارى باقسه حق نى كوركاى و اكر اولتورسه حق نى كوركاى مشاهده کوزی برلان و ينه صوفى عِلْم الْيَقِين و عَين الْيَقِين مقامينى تابقاى و اكر سر كوزى برلان يوقرى باقسه عرش نى كوركاى (و اکر) قويى باقسه يتى طبقهء زمين نى تا تحت الثّرا پشت کا و ماهينى كوراى و هيچ حجاب بولماغاى و اكر حق اليقين کوزى برلان باقسه مخلوقات و مصنوعات دين کچيب بى چون و بى چكونه حق نى کوركاى و معرفت ده برچه كونين عالمينى كوركاى تانيق تورور بى شك و بى شبهه ينه صوفى دنيا و آخرت ده آنينك همتى کا سيغمس برچه بهشت نينك نعمت لارى كوزيكا كورونمس ينه صوفى ديكان خدانينك شوقيده سودك بولوب ايريب آقسه كيراك كونكل نى حق نى رضاسيغه برسه كيراك فرزنديكا و ماليغا برمسه كيراك ينه صوفى ديكان نى كوريده تابمغاى لار و پل صراط ده هم تابماغاى لار و جنت ده هم تابمغايلار حضرت واجب تعالى نينك قُربيده تابقايلار اكر صوفى ايتسه. اى بار خدايا برچه عاصى لارنى منكا باغيشلاغيل ديسه آنينك سوزيى حق تعالى رد قيلماغاى و ينه صوفى تا حضرت حق تعالى دين ندا ايشيتمسه جانينى برمكاى منكر و نكيردين انديشه قيلماغاى قيامت نى انديشه قيلماغاى حور و قصوركا باقماغاى تا ملك غفارنى كورمكونچه ينه صوفى اول بولور كيم برچه ايشلاردين كونكلى ساوق بولسه نفس و شهوات دين صاف بولسه باطينى آفات دين صاف بولسه يوروشى صاف بولسه باطينى پوخته بولسه كوزى ايكى دنيادين دوخته بولسه سرى افروخته بولسه بول ايتلكان سكسان مقام بولدى اى درويش هر بير مقام بير پيغمبرننك مقامى تورور اوّل حضرت آدم عليه السّلام نينك و آخرى محمّد مصطفى صلى الله عليه و سلم نينك تورور سلطان المشايخ حضرت خواجه احمد يسوى رحمة الله عليه ايديلار كيم يتمش علم آداب نى بيلمكونچه يتمش مقام يولنى طى قيليب كيزمكونچه هر كيم شيخ ليق مقامى دعواسين قيلسه اول همان بت بولغاى شيخ سری سقطى رحمة الله عليه ايديلار فقر بير تاغ ايرور برچه کان لارنينك مكانى تورور شيخ المشايخ قدس الله تعالى ارواحه ايديلار فقر بر دريای تورور اول دريانى پايانى يوق آنينك پايانينى کشى کوركانى يوق بجز خضرت محمد مصطفى صلى الله عليه و آله و سلم سيد الطائفة حضرت جنيد بغدادی ايتورلار فقر بر پشته تورور احمد کبرا ايتور فقر نور خدا تورور هر کيم که اول نورنينك ضياسی تيكسه آنينك ضياسيدين كمال عشق تاپار شيخ احمد ايتور فقر بر تاج دولت تورور هر كيم باشيغه کيدی ايكى جهانده سلطان ابدى بولدى شيخ شقيق بلخى رحمة الله عليه ايتور فقر بر اوت تورور هر کيم نينك کونكليكا توشتى وجودى آلتون بولدى شيخ احمد جام ايتور فقر بر شراب تورور هر كشى جرعهء نوش قيلدى تا قيامت غاچه مست لقاى بولدی شيخ قطب الدين حيدر ايتور فقر جذبهء خداوند ايرور هر کيم کا تيكسه ايكى جهانده مرادى حاصل بولدى خواجه عبدالله حيدر ايتور فقر هدايت ربنا تورور هرکيم که يول تابتى جاودانه سلطان ليغى نى تابتى شيخ منصور حلاج ايتور فقر ديدار حق تعالى تورور هر كيم كوردی كورمدى لقمان سرخسى ايتور فقر شه باز همت تورور هر كيم کا قوندى اول کشی عرش کا پرواز قيلدى تا لامكانى سير قيلدى و مشايخ لار قولى مونداغ ايرور فقر حق تعالى نينك باغ وصليدين درختى تورور اول درخت نينك بوتاغی عقل تورور ريشه سى هدايت تورور ميوه سى خير و سخاوت تورور سايه سى قناعت تورور آنينك بويى شوق تورور آنينك بركى هر كيم کا تيكدى عمل صالح حاصل قيلدى هر کيم ميوه سيدين يدى حيات جاويدانه تابتى و اکر بوبى هر کيم کا تيكسه مست و حيران بولغاى و اکر سايه سيده اورون آلسه آفتاب حقيقت آنكا توشقاى اى درويش فقرنينك آلتى آداى با تورور اول يخشى يمان سوزكا سكوت قيلماق و پير آاديده خاموش بولماق و بى اجازت پير سوزلارممك وكشی برلان آچيغ بولماق و خاص عام نينك خذمتى نى قيلماق و نفسينى اولتورمك و هوا و هوس نى ترك قيلماق فقردين پاکيزه نرسه بولمس فقر غربت تورور آچ بولماق تورور و اکر آچ بولسه آنينك طهارتى و ذکرى كونكل دين کيتمس و اكر توق بولسه فسادلار پيدا بولور فقر مقامى سكز تورور (اوّل) توبه تورور عبادت تورور مصبر تورور شكر تورور رضا تورور زهد تورور عارف لق تورور (اوّلى) حضرت آدم عليه السّلام دين قالدى (عابدليق) حضرت ادريس عليه السّلام دين قالدى (شكر و محبّت) حضرت ابراهيم عليه السّلام دين قالدى (صابرليق) حضرت ايّوب عليه السّلام دين قالدى (راضى ليق) حضرت موسى عليه السّلام دين قالدى (زاهدليق) حضرت عيسى عليه السّلام دين قالدى (عارف ليق) حضرت محمّد مصطفى صلى الله عليه و سلم دين قالدى فقر مرتبه سى يتى تورور جوانمردليق تورور سپاهى ليق تورور خرقه تورور صبر تورور قناعت تورور شكر تورور توکل تورور جوان مردليق حضرت على دين قالدى سپاهى ليق حضرت سليمان عليه السّلام دين قالدى غربت ليق يحيى عليه السّلام دين قالدى صبرليق و رضاليق حضرت ايّوب عليه السّلام دين قالدى قناعت ليق حضرت محمّد مصطفى صلى الله عليه و سلم دين قالدى هر درويش که بول يتى مقام درويش ليك نى بيلمسه يا بيليب عمل قيلمسه شيخ ليق و مريد آلماق آنكا حرام تورور اى درويش بول فقرنامه ده هر وصيتى كه بتيلدى كلام ربانى و حديث نبوى دين و اجماع امت دين بتيلدى هر طالب كه بول وصيت لارکا عمل قيليب استقامت قيلسه دنيا و عقبى آنكا ميسر بولغاى و اکر علمه قيلمسه آخر دميده حاى نى كوروب پشيمان قيلغاى و شرمندهء آخرت بولغاى هر درويش بو قرق مقام نى بيلمسه و عمل قيلمسه آنينك شيخ ليغى شيطانى تورور اوّل مقام ملكوت ايكنچى مقام لاهوت اوچونچى مقام ناسوت تورتونچى مقام جبروت. مقام جبروت شريعت تورور مقام ملكوت طريقت تورور مقام لاهوت معرفت تورور مقام ناسوت حقيقت تورور.
Nom: Re: DEVONI HIKMAT (eski o'zbek yozuvida). Xoja Ahmad Yassaviy
Yuborildi: AbdulAziz 09 Fevral 2010, 11:39:02
(۱)
حکمت

بسم الله ديب بيان ايلای حکمت ايتيب
طالب لارکا دُرّ و گوهر ساچتيم منا
رياضت نی قاتيع تارتيب قانلار يوتوب
مين دفتری ثانی سؤزين آچتيم منا

سوزنی ايْديم هر کيم بولسه ديدار طلب
جان نی جانغه پيوند قيليب رکنی آولاب
غريب، يتيم فقيرلارنی کونکلين اولاب
کونکلی بوتون خلايقدين قاچتيم منا

قيده کورسنک کونکلی سنوق مرهم بولغيل
انداغ مظلوم يولده بولسه همدم بولغيل
روز نحشر درکاهی کا مَحْرم بولغيل
ما و من ليک خلايقدين قاچتيم منا

غريب فقير يتيم لارنی رسول سوردی
اوشال تونی معراج چيقيب ديدار کوردی
قايتيب توشوب غريب، فقير حالين سوردی
غريب لارنی ايزين ايزلاب توشتوم منا

امت بولسنک غاريب لارغه تابع بولغيل
آيت حديث هرکيم ايْتسه سامع بولغيل
رزق روزی هرنه بيرسه قانع بولغيل
قاتع بولوب شوق شرابين ايچتيم منا

مدينه کا رسول باريب بوبدی غريب
غريب ليغ ده محبت تارتيب بولدی حبيب
جفا تارتيب يراتقانغه بولدی قريب
غريب بولوب عقبه لاردين آشتيم منا

عاقل ايرسنک غريب لاردين کونکلين آوله
مصطفی دين ايل کيزيب يتيم کاوله
دنيا پرست ناجنس لاردين بولوب تاوله
بولوب تاولاب دريا بولوب تاشيم منا

عشق بابی نی موليم آچقاچ منکا تيکتی
تفراق قيليب حاضر بولديب بوينوم ايکدی
باران صفت ملامت نی اوقی تيکتی
پيکان آليب يوراک بغرم تيشتيم منا

کونکلوم قاتيع، تيليم اچيع، اوزوم ظالم
قرآن اوقوب علم قيلمای يالغان عالم
غريب جانيم صرف ايلايين يوقتور ماليم
حقدين قورقوب اوتقه توشمای پشتيم منا

آلتميش اوچکا ياشيم يتی اوتّوم غافل
حق امرينی محکم توتمای اوزوم جاهل
روزه - نماز قضا قيليب بولدوم کاهل
يمان ايزلاب يخشی لاردين کيچتيم منا

واه دريغا محبت نی جامين ايچمای
اهل — عيال خانماندين توکال کيچمای
جرم و عصيان کره لارين مونده چيچمای
شيطان غالب جان برارده شاشتيم منا

ايمانيما چتمال اوروب قيلدی غمناک
پير مغان حاضر بولديب ساچتی ترياک
شيطان لعين مندين قاچيب کيتی بی پان
بحمد الله نور ايمان آچتيم منا

پير مغان خذمتيده يوکوروب يوردوم
خذمت قيليب کوزوم يوممای حاضر توردوم
مدد قيلدی عزازيل نی قَوْلاب سوردوم
آندين سونکره قنات قاقيب اوچتيم منا

غريب فقير يتيم لارنی قيلکيل شادمان
حلقه لار قيليب عزيز جانينک ايلا قربان
طعم تابسنک جانينک بيله قيلکيل مهمان
جقدين ايشتيب بو سوزلارنی اَيْديم منا

غريب — فقير يتيم لارنی هر کم سورار
راضی بولور اول بنده دين پروردکار
ای بی خبر سن بير سبب اوزی اسرار
حق مصطفی پندين ايشيب ايديم منا

يتی ياشده ارسلان بابغه قيلديم سلام
حق مصطفی امانتين قيلينک انعام
اوشال وقتده مينک بير ذکرين قيلديم تمام
نفسيم اولوب لامکانغه آشتيم منا

خرما بيريب باشيم سلاب نظر قيلدی
بير فرصت ده عقبی سری سفر قيلدی
الوداع ديب بو عالمدين کذر قيلدی
مکتب باريب قَيْناب جوشوب تاشتيم منا

انا فتحنانی اوقوب معنی سوردوم
پرتو سالدی بيخود بولوب ديدار کوردوم
ملام اوروب "اسکت" ديدی باقيب توردوم
ياشيم ساچيب مضطر بولوب تورديم منا

ايا نادان معنی بولديب ايدی بيلديم
آنديد سونکره چول لار کزيب حقنی سوردوم
روزی قيلدی عزازيلنی توتوب مندين
لنکر توکوب بيلين باسيب يانچتيم منا

ذکرين تمام قيليب اوتوم ديوانه کا
حقدين اوزکا هيچ سوزلامای بيکانه کا
شمعين ايزلاب شاکرد کيرديم پروانه کا
اخکر بولوب کويوب يانين اوچتيم منا

نام — نشان هيچ قالمدی لالا بولدوم
الله يادين اَيْته — اَيْته الاّ بولدوم
خآلص بولوب مخلص بولوب لله بولدوم
فنا في الله" مقامی غه آشتيم منا"

سنت ايرميش کافر بولسه بيرمه آزار
کونکلی قاتيع دل آزاردين خدا بيزار
الله حقی آنداغ قل غه سجّين طيّار
دانالاردين ايشتيم بو سوز ايديم منا

سنت لارين محکم توتوب امّت بولدوم
ير آستيغه يالغوز کريب نورغه تولدوم
حق پرست لار مقامی غه محرم بولدوم
تيغ باطن برله نفس نی يانچتيم منا

نفسيم منيم يولدين اوروب خوار ايلادی
تيلمور توروب خلايق غه زار ايلادی
ذکر ايتّورمای شيطان برله يار ايلادی
حاضرسن ديب نفس باشنی سانچتيم منا

قل خواجه احمد غفلت بيله عمرونک اوتی
وا حسرتا کوزدين تيزدين قوّت کيتی
وا ويلتا ندامت نی وقتی يتی
عمل قيلمای کاروان بولوب کوچتيم منا
Nom: Re: DEVONI HIKMAT (eski o'zbek yozuvida). Xoja Ahmad Yassaviy
Yuborildi: AbdulAziz 09 Fevral 2010, 11:39:32
(۲)
حکمت

آيا دوستلار قولاق سالينگ ايدوغومغا
نه سببدين آلتميش اوچده کيرديم ييرگا
معراج اوزره حق مصطفی روحوم کوردی
اول سببدين آلتميش اوچده کيرديم ييركا

حق مصطفی جبرئيلدين قيلدی سؤال
بو نچوك روح تن غه کيرمای تابتی کمال
کوزی ياشليغ، حلقه باشليغ قدی هلال
اول سببدين آلتميش اوچده کيرديم ييركا

جبريل ايدی امت ايشی سزکا بر حق
کوککا چيقيب ملايك دين آلور سبق
نالشی کا ناله قيلور هفتم طبق
اول سببدين آلتميش اوچده کيرديم ييركا

فرزنديم ديب حق مصطفی قيلدی کلام
آندين سونکره برچه ارواح قيلدی سلام
رحمت دريا تولوب تاش ديب يتی پيام
اول سببدين آلتميش اوچده کيرديم ييركا

رحم ايچره پيدا بولدوم ندا کيلدی
ذکر ايت ديدی بدنلاريم جنبش قيلدی
فرزنديم ديب حق مصطفی اولوش بردی
اول سببدين آلتميش اوچده کيرديم ييركا

تورت يوزيلدين کين چيقيب امّت بولغای
نيچه ييل لار يوروب خلقه يول کورکوزکای
اون تورت مينك مجتهدلار خذمت قيلغای
اول سببدين آلتميش اوچده کيرديم ييركا

توقوز آی توقوز کونده ييرکا توشتوم
توقوز ساعت تور آلمديم کوککا اوچتوم
عرش-کورسی پايه سينی باريب قوچتوم
اول سببدين آلتميش اوچده کيرديم ييركا

عرش اوستيده نماز اوقوب تيزيم بولدوم
رازيم اَيْتيب حقه باقيب ياشيم توکتوم
يالغان عاشق، يالغان صوفی کوردوم سوکتوم
اول سببدين آلتميش اوچده کيرديم ييركا

جاندين کيچمای هو-هو ديکان باری يالغان
بو قلتاقدين سورمنك سؤال يولده قالغان
حقنی تابقان اوزی پنهان، سوزی پنهان
اول سببدين آلتميش اوچده کيرديم ييركا

بير ياشيمده ارواح منکا اولوش بيردی
ايکی ياشده پيغمبرلار کيليب کوردی
اوچ ياشيمده چلتن کيليب حاليم سوردی
اول سببدين آلتميش اوچده کيرديم ييركا

تورت ياشيمده حق مصطفی بيردی خرما
يول کورساتيم يولغه کيردی نيچه گمراه
قيده بارسم خضر بابام منکا همراه
اول سببدين آلتميش اوچده کيرديم ييركا

بيش ياشيمده بيليم باغلاب طاعت قيلديم
تطوع روزه توتوب عادت قيلديم
کيچه — کوندز ذکرين ايتيب عادت قيلديم
اول سببدين آلتميش اوچده کيرديم ييركا

آلتی ياشده تورمای قاچديم خلايقدين
کوککا چيقيب درس اورکانديم ملايك دين
دامين کيسيب همه اهل علايق دين
اول سببدين آلتميش اوچده کيرديم ييركا

يتی ياشده آرسلان بابام ايزلاب تابتی
هر سر کوروب پرده برله بوکوب يابتی
بحمد الله کوردوم ديدی ايزيم اوبتی
اول سببدين آلتميش اوچده کيرديم ييركا

قابض کيليب آرسلان بابام جانين آلدی
حورلار کيليب حرير توندين کفن قيلدی
يتمش منك فرشته لار يغيليب کيلدی
اول سببدين آلتميش اوچده کيرديم ييركا

جنازه سين اوقوب ييردن کوتارديلار
بير فرصتده اوچماخ ايچره ييتکورديلار
روحين آلوب عليين کا کيرکوزديلار
اول سببدين آلتميش اوچده کيرديم ييركا

الله الله يير آستيده وطن قيلدی
منکر-نکير «مَن ربّک» ديب سوروغ سوردی
آرسلان بابام اسلامی دين بيان قيلدی
اول سببدين آلتميش اوچده کيرديم ييركا

عاقل ايرسنك ايرانلارکا خذمت قيلغيل
امر معروف قيلغانلارنی عزّت قيلغيل
نهی منکر قيلغانلارنی حرمت قيلغيل
اول سببدين آلتميش اوچده کيرديم ييركا

سيکزمده سيکز ياندين يول آچيلدی
حکمت ايت ديب باشلاريمغه نور ساچيلدی
بحمد الله پير مُغان می ايچوردی
اول سببدين آلتميش اوچده کيرديم ييركا

پير مُغان حق مصطفی بيشك بيلينك
قيده بارسنك وصفين ايتيب تعظيم قيلنك
درود ايتيب مصطفی غه امت بولنك
اول سببدين آلتميش اوچده کيرديم ييركا

توقوزوم ده تولغانماديم توغری يولغه
تبرّك ديب آليب يوردی قولدين قولغه
قوانماديم بو سوزلارکا قاچتيم چول غه
اول سببدين آلتميش اوچده کيرديم ييركا

اون ياشينکده اوغلان بولدونک قول خواجه احمد
خواجه ليك کا بنا قويوب قيلمای طاعت
خواجه منديب يولده قالسنك وای نه حسرت
اول سببدين آلتميش اوچده کيرديم ييركا
Nom: Re: DEVONI HIKMAT (eski o'zbek yozuvida). Xoja Ahmad Yassaviy
Yuborildi: AbdulAziz 09 Fevral 2010, 11:39:53
(۳)
حکمت

هر صبحدم ندا کيلدی قولاقيم غه
ذکر ايت ديدی ذکرين ايتيب يوردوم منا
عشق سزلارنی کوردوم ايرسه يولده قالدی
اول سببدين عشق دوکانين قورديم منا

اون بيريمده رحمت دريا تولوب تاشتی
الله ديديم شيطان مندين يراق قاچتی
های وهوش، ما ومن ليک تورمای کوچتی
اون ايکيمده بو سرلارنی کوردوم منا

اون اوچومده نفس هوانی قولغه آلديم
نفس باشيغه يوز مينک بلا قارمابسالديم
تکبرنی آياغ آستيده باسيب آلديم
اون تورتومده تفراق صفت بولديم منا

اون بيشيمده حور و غلمان قرشو کيلدی
باشين اوروب قول قاوشوروب تعظيم قيلدی
فردوس آتليغ جنتی دين محضر کيلدی
ديدار اوچون برچه سينی قويديم منا

اون آلتيمده برچه ارواح اولوش بيردی
"هی - هی" سزکا مبارك ديب آدم کيلدی
فرزنديم ديب بوينوم قوچوب کونکلوم آلدی
اون يتيمده ترکستانده تورديم منا

اون سيکزده چلتن بيله شراب ايچتيم
ذکرين ايتيب حاضر توروب كوكسون تيشتيم
روزی قيلدی جنت کزيب حورلار قوچتيم
حق مصطفی جمال لارين کورديم منا

اون توقوزده ييتميش مقام ظاهر بولدی
ذکرين ايتيب ايچ و تاشيم طاهر بولدی
قايده بارسام خضر بابام حاضر بولدی
غوث الغياث می ايچوردی تويديم منا

ياشيم ييتی يکرمی کا اوتديم مقام
بحمد الله پير خذمتين قيلديم تمام
دنياده کی قورت قوشلار قيلدی سلام
اول سبب دين حقه ياوق بولديم منا

مؤمن ايرمس حکمت ايشتيب يغلامای دور
ايرانلارنی ايتغان سوزين تينکلامای دور
آيت حديث کويا قرآن آنکلامای دور
بول روايت عرش اوستيده کورديم منا

رويت نی کوروب حقه سوزلاشتيم من
يوز مينك تورلوك ملايك کا يوزلاشتيم من
اول سبب دين حقنی سوزلاب ايزلاشتيم من
جان ودليم انکا فدا قيلديم منا

قول خواجه احمد ياشينك ييتی يکرمی بر
نه قيلغای سين کناه لارينك تاغ دين آغر
قيامت کون غضب قيلسه ربم قادر
ايا دوستلار نچوك جواب ايغوم منا
Nom: Re: DEVONI HIKMAT (eski o'zbek yozuvida). Xoja Ahmad Yassaviy
Yuborildi: AbdulAziz 09 Fevral 2010, 11:40:15
(۴)
حکمت

خوش غايب دين قولاغيمغه الهام کيلدی
اول سببدين حقه سيغنيب کيلديم منا
جمله بزرك يغيليب منکا انعام بيردی
اول سببدين حقه سيغنيب کيلديم منا

من يکرمه ايکي ياشده فنا بولدوم
مرهم بولوب چين دردليك کا دوا بولدوم
يالغان عاشق چين عاشق غه کواه بولدوم
اول سببدين حقه سيغنيب کيلديم منا

ايا دوستلار ياشيم يتی ايکرمه اوج
يالغان دعوی طاعت لاريم برچه سی پوج
قيامت کون نه قيلغايمن برهنه لوج
اول سببدين حقه سيغنيب کيلديم منا

من يکرمی تورتقه کيرديم حقدين يراق
آخرتقه بارور بولسم بارمو يراق
اولکانيمده يغيليب اورونك يوز مينك تياق
اول سببدين حقه سيغنيب کيلديم منا

جنازم نی آرقاسيدين تاشلار آتينك
اياقيمدين توتوب سودراب کورکا ايلتينك
حقه قوللوق قيلمدينك ديب يانجيب تيغينك
اول سببدين حقه سيغنيب کيلديم منا

يازوق بيلان ياشيم يتی ايکرمه بيش
سبحان ايکام ذکر اورکاتيب کوکسوم نی تيش
کوکسومده کی کره لاريم سين اوزونك يش
اول سببدين حقه سيغنيب کيلديم منا

من ايکرمی آلتی ياشده سودا قيلديم
منضور صفت ديدار اوچون غوغا قيلديم
پيرسيز يوروب درد و حالت پيدا قيلديم
اول سببدين حقه سيغنيب کيلديم منا

من ايکرمی يتی ياشده پيرنی تاپتيم
هر سر کوردوم پرده برله بوکوب يافتيم
آستانه سين ياستانبان ايزين اوبتيم
اول سببدين حقه سيغنيب کيلديم منا

من ايکرمی سکيز ياشده عاشق بولدوم
کيچه ياتمای محبت تارتيب صادق بولدوم
آندين سونکره درکاهی کا لايق بولدوم
اول سببدين حقه سيغنيب کيلديم منا

بر کم اوتوز ياشقه کيرديم حاليم خراب
عشق اوتيده بولالمديم مثل تراب
حاليم خراب بغريم کباب کوزوم پر آب
اول سببدين حقه سيغنيب کيلديم منا

اوتوز ياشده اوتون قيليب کويدورديلار
جمله بزرك يغيليب دنيا قويدورديلار
اوروب سوکوب دنيآ عقبين قويدورديلار
اول سببدين حقه سيغنيب کيلديم منا

قول خواجه احمد دنيا قويسنك ايشينك بتار
کوکسونداکی چيقان آهينك عرشقه يتار
جان برارده حق مصطفی قولونك توتار
اول سببدين حقه سيغنيب کيلديم منا
Nom: Re: DEVONI HIKMAT (eski o'zbek yozuvida). Xoja Ahmad Yassaviy
Yuborildi: AbdulAziz 09 Fevral 2010, 11:40:44
(۵)
حکمت

يـــا الـهيــم حمديـنك برلـه حکمت ايــتيم
ذاتی اولوغ خواجم سيغينيب کيلديم سنکا
تـوبـه قيليب گنــاهيمديـن قورقوب قـايتيم
ذاتی اولوغ خواجم سيغينيب کيلديم سنکا

قرق بيريمده اخلاص قيلديم يول تاپای ديب
ايرانـلاردين هر سر کورسم من يـاپـای ديب
پـيـر مغـــان ايـزيـن آلـيـب من اوپــای ديب
ذاتی اولوغ خواجم سيغينيب کيلديم سنکا

قرق ايـکيمده طـالب بولوب يـولغه کيرديم
اخـلاص قيلـيب يـالغوز حقه کونکل بيرديم
عرشی-کرسی لوح دين اوتوب قلم کيزديم
ذاتی اولوغ خواجم سيغينيب کيلديم سنکا

قـرق تـــورتـيـمده محبت نی بـازارينده
يقــام تـوتـوب يـغلاب يـوردوم کلزارينده
منصور صفت باشيم بيريب عشق دارينده
ذاتی اولوغ خواجم سيغينيب کيلديم سنکا

قرق بيشيمده سندين حاجت تيلاب کيلديم
تـوبه قيلديم هر اشی قيلديم خطا قيلديم
يـــا الـهيــم رحمتــينکنی اولوغ بيلديم
ذاتی اولوغ خواجم سيغينيب کيلديم سنکا

قرق آلتيمده ذوق وشوقيم تولوب تاشتی
رحمتينکدين قطره تامدی شيطان قاچتی
حقدين الهـــام رفيق بـولوب بـابين آچتی
ذاتی اولوغ خواجم سيغينيب کيلديم سنکا

قرق يتيمده يــتی يــاقدين الهــام يتی
ساقی بولوب جام شراب خواجم توتی
شيطن کيليب نفس هوانی اوزی يوتّی
ذاتی اولوغ خواجم سيغينيب کيلديم سنکا

قرق سکزده عزيـز جـاندين بيزار بولدوم
کــنه دردی کسل قيلدی بيمــار بولدوم
اول سببدين حقدين قورقوب بيدار بولدوم
ذاتی اولوغ خواجم سيغينيب کيلديم سنکا

قرق توقزده عشقينك توشدی کويوب يانديم
مجنون صفت خيل خويشدين قـاجيب تانديم
تورلوك - تورلوك جفا تيکدی بويون سوندوم
ذاتی اولوغ خواجم سيغينيب کيلديم سنکا

ايـليکيمده ايرمن ديديـم فعليـم ضعيف
قان توکماديم کوزلاريمدين بغريم ايزيب
نفسيـم اوچون يورار ايرديم ايتدك کزيب
ذاتی اولوغ خواجم سيغينيب کيلديم سنکا

قول خواجه احمد اير بولمسنك اولکان يخشی
قزيـل يـوزونك قرا ييـرده شولغـان يخشی
توفراق صفت ييـر آستيده بولغـان يخشی
ذاتی اولوغ خواجم سيغينيب کيلديم سنکا
Nom: Re: DEVONI HIKMAT (eski o'zbek yozuvida). Xoja Ahmad Yassaviy
Yuborildi: AbdulAziz 09 Fevral 2010, 11:41:09
(۶)
حکمت

صبح صادق دوشنبه کون ييرکا کيرديم
مصطفى کا ماتم توتوب كيرديم منا
آلتيش اوجده سنت ديدى ايشتيب بيلديم
مصطفى غه ماتم توتوب كيرديم منا

يير اوستيده يارانلاريم ماتم توتى
عالم همه سلطانيم ديب نعره تارتى
حقنى تابقان چين صوفى لار قانلارى يوتى
مصطفی غه ماتم توتوب کيرديم منا

الوداع ديب يير آستيغه قدم قويدوم
ياروق دنيا حرام قيليب حقنى سويدوم
ذکرين ايتيب يالغوز اولوب يالغوزکويدوم
مصطفی غه ماتم توتوب کيرديم منا

طه اوقوب تون كيچه لار قايم بولدوم
كيجه نماز، کوندوزلارى صايم بولدوم
بو حال برله يير آستيده دايم بولدوم
مصطفى غه ماتم توتوب كيرديم منا

آلتميش كيچه، آلتميش كوندوز بير يول طعام
تانك آتقونچه نماز اوقوب بير يول سلام
آلتميش اوجده بولدى عمريم آخر تمام
مصطفى غه ماتم توتوب كيرديم منا

حق مصطفى روحى کيليب بولدى امام
جمله ملك يير آستيده بولدى غلام
کوب يغلاديم حق مصطفى بيردى انعام
مصطفى غه ماتم توتوب كيرديم منا

معراج تونى نورديدم فرزند ديدی
قولوم توتوب امتيم سين اميد ديدی
سنتيم نى محكم توتقيل دلبند ديدی
مصطفى غه ماتم توتوب كيرديم منا

قيامت ده يول آداشسنك يولغه سالاى
محمّد ديب تشنه بولسنك قولونك آلاى
فرزنديم ايلكينك توتوب جنّت كراى
مصطفى غه ماتم توتوب كيرديم منا

اى يارانلار بو سوز ايشتيب شوقيم آرتدى
امّت ديدى ايچ و تاشيم نورکا باتدى
پرتو ساليب ديدارينى حق كورساتدى
مصطفى غه ماتم توتوب كيرديم منا

ديدار كوروب روحرم اوجوب عرشقه قوندى
موسى صفت وجودلاريم كويوب ياندى
مجنون صفت خيل خويش دين قاجيب تاندى
مصطفى غه ماتم توتوب كيرديم منا

يير آستيده خوارليغ تارتيم كوب مشقت
توشك - ياستوق تاشدين قيليب چيكتيم محنت
اى يارانلار بو ذنياده يوق فراغت
مصطفى غه ماتم توتوب كيرديم منا

تا مشقت تارتماغونچه وصلى قيدا
خذمت قيلماى درد حالت بولمس پيدا
جان و دل نى تا قيلمسنك حقه شيدا
مصطفى غه ماتم توتوب كيرديم منا

يير آستيغه کيرديم ايرسه بيخود بولدوم
كوزوم آجيب مصطفى نى حاضر کوردوم
عاصى، جافى امّت لارنى حالين سوردوم
مصطفى غه ماتم توتوب كيرديم منا

ايا فرزند مندين سورسنك قنی امت
امت ديدی کوکسوم توله داغ حسرت
امت اوچن کوب تارته من حقدين کلفت
مصطفى غه ماتم توتوب كيرديم منا

امت لاريم يازوقلارين هر جمعه کيچ
آليب كيلكاى يا محمّد سن مونى جيج
تا كى يغلاب سجده ايلاى تنكريغه کيچ
مصطفى غه ماتم توتوب كيرديم منا

هر جمعه کيچ امت لارنى کناهى نى
آليب کيلكاى يا محمّد كورکيل مونى
امت لارينك نيلار قيلور احمد سنى
مصطفى غه ماتم توتوب كيرديم منا

من ملك دين شرم آلور من اى امتيم
يراتقاندين قورقمس موسين پست همتيم
كيچه ياتمای طاعت قيلسنك خوش دولتيم
مصطفى غه ماتم توتوب كيرديم منا

يير آستيغه کيرديم دوستلار بى اختيار
امين دينكلار آل اصحاب هم چهار يار
امت لارنى جرمين کيچکيل پروردگار
مصطفى غه ماتم توتوب كيرديم منا

قول خواجه احمد من دفترى ثانى ايتيم
ايكى عالم عشرتلارين مى كا ساتيم
اولماس بورون جان اجيغين زهرين تاتيم
مصطفى غه ماتم توتوب كيرديم منا
Nom: Re: DEVONI HIKMAT (eski o'zbek yozuvida). Xoja Ahmad Yassaviy
Yuborildi: AbdulAziz 09 Fevral 2010, 11:41:27
(۷)
حکمت

اول قادريم قدرت برلان نظر قيلدی
خرّم بولوب يير آستيغه کيرديم منا
غريب بنده نك بو دنيادين سفر قيلدی
محرم بولوب يير آستيغه کيرديم منا

ذاکر بولوب، شاکر بولوب حاقنی تاپتيم
دنيا عقبی حرام قيليب ينجيب تيغتيم
شيدا بولوب، رسوا بولوب جاندين اوتيم
بی غم بولوب يير آستيغه کيرديم منا

شوملوغوم دين تاغ-تاشلار سوکنی منی
فصيح تيلده سوکوب ايدی تحفنک قانی
عاشق بولسنك اوّل باريب حقنی تانی
مرهم بولوب يير آستيغه کيرديم منا

سيزنی، بيزنی حق يراتی طاعت اوچون
ای بوالعجب ايچمك-ايمك راحت اوچون
قالوا بلی ديدی روحوم محنت اوچون
مرهم بولوب يير آستيغه کيرديم منا

نفسيم منی کوب يوکورتی حقه باقمای
کيچه-کوندوز بی غم يوردوم ياشيم آقمای
هوا-هوس ما و من نی اوتقه ياقمای
پرغم بولوب يير آستيغه کيرديم منا

قولدی کورسم قولی بولوب خذمت قلسام
تفراق صفت يول اوستده يولی بولسام
عاشقلارنی کوروب اوجکان کولی بولسام
همدم بولوب يير آستيغه کيرديم منا

جاندين کيچيب محنت تارتيم بندم ديدی
قانلار يوتوب الله ديدیم رحم ايلادی
دوزخ ايچره قالمسون ديب غميم يدی
خرم بولوب يير آستيغه کيرديم منا

ياشيم يتی آلتميش اوچکا بر کونچه يوق
او دريغا حقني تابمای کونکلوم سنوق
يير اوستيده سلطان من ديب بوبدوم اولوق
شاکر بولوب يير آستيغه کيرديم منا

شيخ من ديبان دعوی قيليب يولده قالديم
فَشُ دستار پوجك پل غه ساتيب کيلديم
نفسيم منی هوا قيلدی يولده قالديم
بيدم بولوب يير آستيغه کيرديم منا

باشيم تفراق، اوزوم تفراق، جسميم تفراق
حق وصلی کايتار من ديب روحوم مشتاق
کويديم، يانديم، بولالماديم هرکز آفاق
شبنم شاکر بولوب يير آستيغه کيرديم منا

پير مُغان نظر قيلدی شراب ايچتيم
شبلی ينکليغ سماع اوروب جاندين کيچتيم
سرمست بولوب ايل خلقدين تانيب قاجتيم
زمزم بولوب يير آستيغه کيرديم منا

قول خواجه احمد ناصح بولسنك اوزونک کا بول
عاشق بولسنك جاندين کيچيب بر يولی اول
نادانلارکا ايتسنك سوزونك قيلمس قبول
محکم بولوب يير آستيغه کيرديم منا
Nom: Re: DEVONI HIKMAT (eski o'zbek yozuvida). Xoja Ahmad Yassaviy
Yuborildi: AbdulAziz 09 Fevral 2010, 11:41:54
(۸)
حکمت

بيشک بيلنك بو دنيا پرچه خلقدين اوتارا
اينانمکيل مالينکا بر کون قولدين کيتارا
آتا-آنا قرينداش قيان کيتی فکر قيل
تورت آياغليغ چوبين آط [آت] بر کون شنکا يتارا
دنيا اوچون غم يمه حقدين ديمه
کشی مالی نی ييمه صراط اوزره توتارا
اهل-عيال، قرينداش هيچکيم بولمايدور يولداش
مردانه بول غريب باش عمرينك يلديك اوتارا
قول خواجه احمد طاعت قيل عمرين بيلمام نچه ييل
اصينك بيلسنك آب - کل [گل] ينه کل کا کيتارا
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 09 Fevral 2010, 11:43:46
(۹)
حکمت

ايا دوستلار پاك عشقنی قولغه آلديم
بو دنيا نی دشمن توتوب يوردوم منا
يقام توتوب حضرتيغه سغنيب کيلديم
عشق بابی ده منصور صفت بولدوم منا

عشق يوليده عآشق بولوب منصور اوتی
بيلين باغلاب حق عشقی نی محکم توتی
ملامت لار، اهانت لار کوب ايشتی
ای مؤمنلار من هم منصور بولدوم منا

عاشق منصور انا الحق نی تيل کا آلدی
جبريل کيليب انا الحق نی بيرکا ايدی
جبريل کيليب باشينك بير ديب يولغه شالدی
دارکا آسيليب ديدارينی کوردوم منا

منصور کيلکاچ دار ايکيليب اوزی آلدی
باطن کوزی آجوقلاری حيران قالدی
پرتو ساليب الله اوزی نظر قيلدی
اوشوقا ديب ديدارينی کوردوم منا

ندا کيلدی اوشل دارغه کوب بوغماغيل
محکم تورغيل، هريان بافيب سن اغماغيل
تاشقه ايدی امريم توتوب سين تيکما کيل
لوح المحفوظ تخته سينه کوردوم منا

اوچ يوز ملا يغيليب بتی کوب روايت
شريعت دور من هم بتای بير روايت
طريفت ده، حقيقت ده حق حمايت
باشيم بيريب حق سرينی بيلديم منا

انا الحق نی معنی سنی بيلماس نادان
دنا کيراک بو يوللارده پاک مردان
عاقل قوللار حق يادينی ايدی جانان
جاندين کيچيب جانه نانی سويدوم منا

ايما قيلديم دانا بولسه معنی آلسون
قال علميدين بتيب ايديم نشان قالسون
دُرّ و کوهر شوزلايمنی ايچکا سالسون
حالدين ايتيب عاشقلارغه بيرديم منا

ايسيز منصور خوارليق برله بولدی ادا
بر سوز برله يارانلاردين بولدی جدا
حال دلين هيچکيم بيلمس تنکريم کواه
قانلار يوتوب من هم کواه بولدوم منا

شاه منصورنی انا الحق نی بيجا ايمس
يول نی تابقان بيزکا اوخشاش کمراه ايمس
هر نا جنس لار بو سوزلاردين اکاه ايمس
آکاه بولوب بوی خدا آلديم منا

بير تون سحر غريب منصور کوب يغلادی
پرتو ساليب الله اوزی رحم ايلادی
آندين سونکره چلتن باقب شراب بيردی
دانالار غه بو سوزلارنی ايديم منا

نادان لارکا ايسيز سوزوم حيق حکمت
آدم من ديب بيلين باغلار قانی همت
دنيا اوچون بر - بريغه قيلماس شفقت
ظالم لارکا اسيز بولوب اولديم منا

ظالم لارده حدنه بولغای بيزده کناه
درويش لارنی حلقی مردام اوتمس دعا
اول سبب دين پادشاه قيلور بيزکا جفا
آيت - حديث معنی سيدين ايديم منا

ظالم اکر جفا قيلسه الله ديکيل
ايلکينك آچيب دعا ايلاب بويون سونکيل
حق دادينك کا يتمس بولسه کله قيلکيل
حقدين ايشيتيب بو شوزلارنی ايديم منا

ظالم اکر ظالم ايلاسا منکا يغلا
ياشينك ساجيب منکا سغنيب بيلينك باغلا
حرام شبهه ترك ايتيبان يورك داغلا
ظالم لارکا يوز مينك بلا بيرديم منا

ظالم لارنی قربی نيدور من يراتقان
يراتقان نی منظور قيلمای سن اونوتقان
مندين کيچيب ظالم لارنی ايلکين توتقان
ظالم لارکا اوزوم رواج بيرديم منا

سنکا جزا يراتقانغه يالبار مادينك
الله ديبان تونلار توروب اينکرانمادينك
حقيقت دين سوزلار ايتيم ايشتمادينك
ظالم لارنی ايلکيلن اوزون قيلديم منا

ای بی خبر حقه کونکل يوکورتمادينك
دنيا حرام آندين کونکل ساووتمادينك
نفس دين کيچيب الله سری تولغانمادينك
بو نفس اوچون زار حيران بولديم منا

ظالم لارنی شکوه قيلمه ظالم اوزونك
خويونک ريا تأثير قيلسم خلقه سوزونك
دنيا مالين تولا بيرديم تويمس کوزونك
حريص لارنی سجين ايچره سالديم منا

لعل لبی جنبش قيليب ايدی سنی
جان دليم امت لاريم کوز روشنی
حقه قوللوق منکا امت بولغان قنی
چين امت نی سينه سينه قويديم منا

قول خواجه احمد حق سوزينی سوزلاب اونی
عين اليقين طريقت ده بوزلاب اوتی
علم اليقين شريعت نی سوزلاب اوتی
حق اليقين حقيقت دين ايديم منا
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 09 Fevral 2010, 11:44:31
(١٠)
حکمت

تعالی الله عاشق لارکا بيردی عشقين
شاکر بولوب اورتاب يانيب کويدوم منا
ايکی عالم کوزلاريمغه خشخاش دانه
کورونمدی يالغوز حفنی سويديم منا

جاندين کيچيب يالغوز حقنی جانغه قوشتوم
اندين سونکره دريا بولوب تولوب تاشتيم
لامکان نی سير ايتيبان مقام آشتيم
دنيا عقبين يوز مينك طلاق قويديم منا

حق آلديده عقل کامل دم اورالماس
عشق شدّتی طغيان قيلسه بير دم تورماس
پروانه ديك اخکر بولور اوزين بيلماس
بو سرلارنی جانانه دين توينيم منا

طريقت نی يوللارينی عقيبه سی کوب
پاك عشقی نی قولغه آلمادی بولماس يوروب
ديدارينی کورسه بولماس - تون کون اوتوب
هيچ اوخلامای ديدارينی کوردوم منا

طريقت نی يولی قاتيغ طرفه شاشتيم
باشيم قاتی پير مغان سری قاجتيم
پير ايتاکين توتوب باطن کوزين آجتيم
رسوا بولوب يول لار کزيب يوردوم منا

طريقت نی يول لاريدور قاتيغ عذاب
بو يوللارده نيچه عاشق بولدی تراب
عشق يولغه هرکيم کيرسه حالی خراب
ايرانلاردين يول نی سوراب يورديم منا

طريقت نی يول لاريدور طرفه اولوغ
روزی قيلکان بنده سيغه بولغای ياوغ
اوچقونی غه طالب قيلمس يتی تموغ
ای يارانلار عزيز جاندين تويديم منا

حقيحت نی معنی سی کا يتکان کشی
بيخود بولوب کويوب يانار ايچی - تاشی
قانلار آقار کوزلاريدين آقار ياشی
کوز ياشيم نی تحفه قيليب بارديم منا

شريعت دور عاشق لارنی افسانه سی
عارف عاشق طريقت نی دردانه سی
قيده بارسه جانانه سی همخانه سی
بو سرلارنی عرش اوستيده کوردوم منا

محبت نی باغين کيزمای عاشق بولمس
خوارليق - زارليق تارتماکونجه نفسينک اولمس
بير قطره غه قانغ بولمای اول دُر بولمس
قانغ بولوب خاص کوهرين آلديم منا

عشق اوتيغه کويکان عاشق رنکی اوجار
عقبی سری جدل قيليب موندين کوجار
مونده بولغان کره لارنی آنده آچار
رسول دتيا جيفه ديدی قويدوم منا

 حقيحت ليك عاشق لارنی رنکی سينوق
آيينه غه نظر قيلسه آندين تانوق
اوزی حيران، کونکلی ويران، کوزی ياشلوق
قدرتيغه حيران بولوب قالديم منا

الله ايدی کوب يغلاسنك کورکونك منی
زاری قيلسنك بندم ديبان ايغوم سنی
جاندين کيچيب منی استار عاشق قنی
الهام کيلدی چين قولاققه آلدی منا

چين کونکل ده کويکانلارکا ديدار عطا
يلغان عاشق يولغه کيرسه همه خطا
چين عاشق نی کوزی ياشليغ قدّی دوتا
دوتا بولوب يير آستيغه کيرديم منا

حقيقت ليغ چين عاشقغه تحفه بيرکوم
روز محشر نجوک سن ديب حالين سورکوم
شفيغ بولوب شفاعت نی اوزوم قيلغوم
رحمتينکدين اميد توتوب کيلديم منا

قول خواجه احمد حق يادينی آيغيل مدام
حقدين قورقوب تينمای يغلا علی الدوام
نماز اوقوب روزه توتوب هر صبح وشام
مونداغ قيليب مراديمغه يتيم منا
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 09 Fevral 2010, 11:45:47
(١١)
حکمت

رحيم موليم رحمی برله ياد ايلاسه
نه يوز برله حضرتی غه بارغوم منا
توبه قيليب ايکری يولدين راست غه قايتيب
نه يوز برله حضرتی غه بارغوم منا

حق بنده سين نامه لارين قولغه برسه
حق الَهيم رحمی برله رحمت قيلسه
پير مغان هادی بولوب يولغه سالسه
نه يوز برله حضرتی غه بارغوم منا

بر کون بولوب اجل وقتی ياوق يتسه
سنکا - منکا اصل وطن حکمين ايلسه
اولمای توروب جان اچيغين زهرين تاتسه
نه يوز برلان حضرتی غه بارغوم منا

سرداش بولغان همراه لارينک شاشيب کيتی
جدل قيليب عقبه لاردين آشيب کيتی
جار ضرب اوروب دريالاردين تاشيب کيتی
نه يوز برلان حضرتی غه بارغوم منا

او ويلتا کيچه کوندوز قيلمای طاعت
حق رسول امت اوچون يمای نعمت
ايچميش ييميش نعمت لاری قيغو محبت
نه يوز برلان حضرتی غه بارغوم منا

حق رسول دريا اوچون قيغورمدی
امت تيلاب اوزکا سوزکا دم اورمادی
دنيا ايچره لحظه آرام اول کورمادی
نه يوز برلان حضرتی غه بارغوم منا

وا دريغه محشر کونی ظاهر بولسه
تنکری اوزی قاضی بولوب ناظر بولسه
يمان ايشيم قيلميشلاريم حاضر بولسه
نه يوز برلان حضرتی غه بارغوم منا

کيچه کوندوز تينمای يغلا قول خواجه احمد
درود ايتيب حق رسول غه بولغيل امت
هادی بولوب امت ديسه خوش سعادت
نه يوز برلان حضرتی غه بارغوم منا
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 09 Fevral 2010, 11:48:06
۱٢
حکمت

خداوندا منی سالغيل اوز يولونك کا
نفس ايلکيده هارب ادا بولديم منا
فسق، فجور تولوب توشيب حندين آشتی
غرقاب بولوب عصايان ايچره قالديم منا

دنيا نجس طالب بولوب ايتديك يورديم
استاب آنی آرقاسيدين تون - کون قوديم
امرين توتمای حق يوليغه کوزم يومديم
قايده بارای ايا دوستلار نيتکوم منا

نفس شيطان اسير قيلدی آدم اوغلين
شترلايين باغلاب آلدی ايکی قولين
نه مشکل دور اونك وسول نی بيلمای يولين
وا دريغا حسرت بيلان بارغوم منا

يوق منينديك شوم بلا عالم ارا
هيچ بولمدی منديد رضا خلق خدا
ايمدی بولدی آخر منی يوزوم قرا
وا ويلتا اوّل ينکا بولديم منا

عطا قيلغان عز يز جان نى بيلماديم من
ظاهر، باطن، حاضر سن ديب تورمديم مز
قرا يوزوم درکاهينك کا سورمديم من
 يا ربنا هر نه قيلسانك کيلديم منا

طاقتم يوق اگر باقسم گناهيم كا
قيلا توبه قاجيب کيلديم پناهنك كا
رحمت برلان نظر قيلغيل خواجه احمدكا
هر نه قيلسانك من بينوا کيلديم منا
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 09 Fevral 2010, 11:48:46
١۳
حکمت

ايا دوست لار نادان برلان الفت بولوب
بغريم كويوب جاندين تويوب اولدوم منا
توغرى ايتسام ايكرى يولغه بوينين تولغار
قانلار يوتوب غم زهريغه تويدوم منا

نادان برله اوتكان عمرينك نار سقر
ناذان بارسه دوزخ اندين قيلغاى حذر
ناذان برله دوزخ سارى قيلمنك سفر
ناذان ايچره خزان ينكليغ سولدوم منا

دعا قيلنك نادانلارى يوزين کورماى
حق تعالى رفيق بولسه بردم تورمار
بيمار بولسه نادان لارنى حالين سورمار
نادانااردين يوز مينك جفا کوردوم منا

يير آستيغه قاجيب کيرديم نادانااردين
ايلكيم آجيب دعا تيلاب مردانلاردين
غريب جانيم يوز تصدق دانالاردين
دانا تابمای يير آستيغه كيرديم منا

نادانلارنى مندين سورمه کوکسوم جقه
 حقدين قورقوب ماتم قورسم کولار تهقه
آغزى آچوق نفسى اولوق مثل لقه
نادانلاردين قورقوب سنكا کيلديم منا

طمع قيلمه نادانلاردين قدرينك بيلمس
ظلمت ايچره يول اداشسنك يولغه سالمس
بوينونك قشيب زارى قيلسنك قولونك آلمس
نادانلارنى شكوه ايلاب كيلد.م منا

اول آخر خوبلار كيتى قالديم يالغوز
نادانلاردين ايشتماديم بير يخشى سوز
دانا كيتى نادان قالدى يديم افسوس
يولين تابماى حيران بولوب قالديم منا

داغ هجران ايزدى بغريم قاتى دردمند
دانا تفراق نادانلارنى كوكس بلند
آيت حديث بيان قيلسام قيلمس پشند
كوكسوم تيشينك درد و غم کا تولديم منا

درد و حالت طغيان قيلدى بارمو طبيب
عرض حاليم منكا ايتاى يالغوز حبيب
برچه طالب اولوش ر آلدى من بى نصيب
اولوش و استاب دوتا بولوب كيلديم منا

خانمانينك ترك ايلابان اولوش آلكيل
اى بى خبر دنيا ايشين آرقه سالكيل
الله سخى لطفين كوروب حيران قالكيل
كورار من ديب فنا بولوب كيلديم منا

من دفتری ثانى ايديم سزکا يادكار
ارواحيم دين مدد تيلاب اوقونك زينهار
دعا قيلاى واصل قيلسون پرواردگار
رحمن ايكام عرض ايتكالى کيلديم منا

حكمتيم ددن بهره آلغان کوزکا سورسون
 اخلاص برلان کوزکا سورتوب ديدار كورسون
 شرطى اولدور رياضت غه بويون سونسون
 جانلار چيقيب جانانه نى کورديم منا

ديدار اوچون كدا بولديم امين دينك لار
ای طالب لار حاليم کوروب غميم ينك لار
يولده قالغان قول احمدكا يول برينك لار
يولنى ايزلاب کدا بولوب کيلديم منا

قرل خراجه احمد کدا بولسنك حقه بولكيل
باشينك برله ايرانلارکا خذمت قيلكيل
نظر تابسنك حلقه قوروب صحبت قيلكيل
حلقه ايچره آکاه بولوب توردوم منا
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 09 Fevral 2010, 11:49:06
١۴
حکمت

کونكل كوزى ياروتماين طاعت قيلسه
دمگاهى کا مقبون ايمس بيلديم منا
حقيقت ده بو سوزلارنى پاك اوركانب
لامكانده حق دين سبق آلديم منا

بير و باريم سبق بيردى پرده آچيب
يير و كوکده تورالمادى شيطان قاچيب
عشرت قيليب وَحْدت مى دين تويا ايچيب
لامكانده حق دين سبق آلديم منا

مونده جغا چيكانلارغه ديدارى تخت
روز محشر عطا قيلكاى هم تخت بخت
يراتقانده قيلكان اوزى عاشقه عهد
لامكانده حق دين سبق آلديم منا

کو زلاريمدين قانلار توکوب ياد ايتمديم
يوزمينك تورلوك محنت سالدينك داد ايتمديم
سندين قورقروب خسته كونكلوم شادايتمديم
لامكانده حق دين سبق آلديم منا

الله دردی ساتقون ارمس ساتيب آلسنك
پير مغان خدمتيده خاك بولمسنك
حق يوليغه کيريب بولمس پاك بولمسنك
لامكانده حق دين سبق آلديم منا

عشق پادشاه عاشق فقير دم اورالمس
حق دين رخصت بولمكونجه سوزلايالمس
حق نندينى آلغان دنيا ايزلا يالمس
لامكانده حق دين سبق آلديم منا

قول خواجه احمد ييتى ياشده سبق آلديم
سيكزيمده دنيا عقبين طلاق قويديم
توقوزومده خدايم نى حاضر بيلديم
لامكانده حق دين سبق آلديم منا
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 09 Fevral 2010, 11:49:22
١۵
حکمت

رحمتينکدين نوميد قيلمه من غريب نى
آرام آلماى ييغلاب دعا قيلاى سنكا
كيچه لار بيدار بولوب تانك آتقونچه
يومماى کورنى ييغلاب دعا قيلاى سنكا

درگاهنك کا ايمدى كيليب بيليم باغلاب
جان کويدوروب يورك بغريم توتوب داغلاب
يقام توتوب اوتكان ايشكا چندان ييغلاب
اخلاص بيلان ييغلاب دعا قيلاى سنكا

کونكل باغى سبز ايكانده بيلماى يوردوم
عمريم کلی خزاان بولدى ايمدى تويدوم
دنيا تاشلاب دين يوليغه قدم قويدوم
هزار داستان ييغلاب دعا قيلاى سنكا

بو يول لارده جان نى اسراب بولمس ايرمش
جان اسراغان بو يول لارکا كيرمس ايرمش
سود و زيان بولغان نى بيلمس ايرمش
بو حال برلان ييغلاب دعا قيلاى سنكا

قول خواجه احبد نفس تاغى دين چيقيب آشتى
فنا فى الله مقامى غه ياوقلاشتى
يورك بغريم جوش اوروبان قيناب تاشتى
بو حال برلان ييغلاب دعا قيلاى سنكا
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 09 Fevral 2010, 11:49:46
١۶
حکمت

فاذکر الله كثيراً ديب آيت كيلدى
ذکرين ايتيب زارى قيليب يوردوم منا
ديدارينى ماشق لارکا وعده قيدى
عشق يوليده جانيم بيريب يوردوم منا

چين عاشق نى الله سويوب بندم ديدى
ارا يولده قالمسون ديب غميم ييدى
يالغانچى لار ديداريمنى کورمس ديدى
عشق بابيده محكم بولوب توردوم منا

عاتل ايرسنك كورستان دين خبر آلغيل
من هم شونداغ بولورمن ديب عبرت آلغيل
موتوا قبل ان تموتوا كا عمل قيلغيل
بو حديث نى فكر ايلابان اولديم منا

خبر بيرور فليضحکوا قليلاً ديب
ينه ايتور وليبكوا كثيراً ديب
بو آيت نی معنى سى کا عمل قيل ديب
بو دنياده هيچ كولمايين يوردوم منا

عمل سيزلار قهقه کولور، خرم يورور
فرمانى عه بويون سونغان پرغم يورور
کيچه - کوندوز ديده لارى پُرنم يورور
كوز ياشيم نى دريا قيليب يوردوم منا

نفس دين کيچوب چين عاشقلر الله ديدى
سحر تروب چهار ضرب اوروب كوزين اويدی
رحم ايلابان الله اوزى نظر سالدى
آندين سونكره دريا بولوب تاشتيم منا

ظالم نفسيم هيچ قويمايين اوتقه سالدى
وجودلاريم اوز اوزيدين كويوب ياندى
مشرقلارنى ايمانينى شيطان آلدى
اعوذ بالله، بسم الله ديب يورديم منا

منافق لار دوزخ ايچره كويوب يانغاى
ايمان ايلتكان خالص بولوب يانيب چيقای
ايمان سيزلار اوّل آخر کويوب يانغاى
اوغانيمدين ايمان تيلاب يورديم منا

نفسيم منی هوا قيلدى طرفه شاشتيم
باشيم آليب پر مغان سرى [ساری] قاجتيم
قرل خواجه احمد عقبه لاردين يليب آشتيم
اوچقان قوشديك لامكانغه آشتيم منا
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 09 Fevral 2010, 11:50:09
١۷
حکمت

وا دريغا نتوك قيلغوم غريب ليغ ده
غريب ليغ ده غريت ايچره قالديم منا
خراساان و شام و عراق نيت قيلوب
غريب ليغ نى كوب قدرينى بيلديم منا

وا دريغا نتوك قيلغوم غريب ليغ ده
غريب ليغ ده غريت ايچره قالديم منا
خراساان و شام و عراق نيت قيلوب
غريب ليغ نى كوب قدرينى بيلديم منا

نه كيلسه كورمك کيراك اول خدادين
يوسف نى آيرديلار اول کنعاندين
توغغان ييريم اول مبارك ترکستاندين
بغريمغه تاش نى اوروب کيلديم منا

غريت تيكدى مصطفى ديك ايرانلارغه
اوتوز اوچ مينك صحابه هم يارانلارغه
ابوبكر، عمر، عثمان، مرتضى غه
غريبتيکدى آلارکا ايغوم منا

غريب تيكسه پخته قيلوب کوب خام لارنى
دانا قيلور هم خاص قيلور کوب عام لارنى
كيار كيرتون تابسه ييور طعام لارنى
آنينك اوچون تركستانغه کيلديم منا

غريب ليقده يوز ييل تورسه ايرور مهمان
تخت و بخت بوستانلارى ايرور زندان
غريب ليقده قول بولدى اول محمود سلطان
اى يارانلار شريب ايچره کويديم منا

غريب ليغ ده آرسلان بابام ايزلاب تابتى
هر سر کوروب پرده برله بوكوب يابتى
بحمد الله كوردوم ديدر ايزيم اوبتى
اوشبو سرنی کوروب حيران قالديم منا

آرزوليق من قرينداشليغ ولايت غه
اولوغ بابام روضه سى آق تربت غه
بابام نى روحى سالدى بو عربت غه
هيچ بيلماسمن نچوك تقصير قيلديم منا

 قول خواجه احمد سوزلاكانى حق نى يادى
ايشيتماكان دوستلاريغه قالسرن پندى
غريب لانيب اوز شهريغه قيته ياندى
ترکستانده مزار بولوب قالديم منا
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 09 Fevral 2010, 11:50:28
١۸
حکمت

عمريم آخر بولغانده نه قيلغايمن خدايا
جان آلغوچى كيلكانده نه قيلغايمن خدايا
جان بيرمك نى وهمدين عزازيل نى زخمى دين
شفقت بولمسه سندين نه قيلغايمن خدايا

جان بيرمك ايشى ديشوارآسان قيلغيل يا جبّار
 سندين اوزكا يوق غمخوان نه قيلغايمن خدايا
جانيم جدا بولغانده تنيم مونده قالغانده
تخته اوزره آلغانده نه قيلغايمن خدايا

عاجز بولوب ياتقانده فرشته لان كيركانده
من ربك ديب سورکانده نه قيلغايمن خدايا
ايلتيب کوركا قويغانده يتى قدم يانغانده
سورغوچى كيركانده نه قيلغايمن خدايا

من ربّك ديب تورغانده قرا کوندور اوشنده
ربينك كمدور ديكانده نه قيلغايمن خدايا
قول خراجه احمد سن بنده نفسين ايلكيده شرمنده
محشر كونی بولغانده نه قيلغايمن خدايا
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 09 Fevral 2010, 11:50:45
۱۹
حکمت

الهى قادرا پروردكارا
رحم قيل بندنكا اى كردکارا
!سيغينديم حضرتيگ كا اى الهى
يراتقان جمله عالم نى پناهى

اجابت سندين و مندين مناجات
اى - اى ذوالجلال جمله حاجات
الهى حاجتيم نى سن روا قيل
كريم سن لطف ائله درديم دوا قيل

كرم بيرله كيچوركيل اى اريغ ذات
عذاب آخرت دين قيلغيل آزاد
الهى شر شيطاندين سن اسره
قموغ يازوقلاريم دين هم سن اسره

قموغ يازوقلاريم دين توبه قيلديم
كه مست ايرديم كه من آندين آييلديم
ديمايدور من بنى جاندين آييرمه
ولى آخرده ايماندين آييرمه

الهى برجه نى فرياديغه يئت
قموغ بيچاره لارنى داديغه يئت
قولون عاصى نى سن هر حاجتين بئر
بو درد بى دوام كا سن دوا بئر

الَهى سن كيچوركيل طاقتيم يوق
سنى آلدينكده لايق طاعتيم يوق
الهى ذات پاكينك حرمتيدين
آييركيل بيزنى شيطان زحمتيدين

الهى برجه نی قوللوقغه خاص ائت
من مندين آليب بير يول خلاص ائت
منكا توفيق سوييدين سن ايچورکيل
كرم بيرله گناهيم نى کيچورکيل

که بيلماس ده گناه بسيار قيلديم
كونكل لارنى بوزوب آزار قيلديم
كه هر عاصى ايرور رحمت كا لايق
كيل اى احد دعاغه بول موافق
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 09 Fevral 2010, 11:51:05
۲۰
حکمت

تينماى عاشق هو ديرلار خدايى غه يالباريب
يورور آنى تمشقيده كيچه - كوندوز سارغاييب
زار ييغلانيب عاشق نى عشق ايلكيده خدايم
عشق يوليده ملامت آنكا كورور مناسب

منصور بير كون ييغلادى ايرانلار رحم ايلادى
چلتن شربت ايچوردى منصورغه مهرين ساليب
منصور ايتور اناالحق ايرانلار ايشى بر حق
ملالار ايتور ناحق كونكلى كا يمان آليب

ايتماكيل انا الحق ديب كافر بولدونك منمور ديب
قرآن ايچره بولدور ديب اولدورديلار كوبلاشيب
بيلماديلار ملالار انا الحق نى معنى سين
قال احلى كا حال علمين حق كورمدى مناسب

روايت لار بيتيلدى حالين آنى بيلمادى
منصور ديك اوليانى قويديلار دارغه آسيب
افسانه دور شريعت فرزانه دور حقيقت
دردانه دور طريقت، تماشق لارغه مناسب

خلق عالم ييغيلدى منصور ديب فرياد قيلدی
منصورنى يارانلارى قالدى آنده ييغلاشيب
توبه قيلغيل خراجه احمد بولغای حقدين عنايت
يوز مينك ولى لار اوتى سرنى سرکا اولاشيب
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 09 Fevral 2010, 11:51:37
۲۱
حکمت

باشيمغه توشوب نعرهء سرداى محمّد
من آنى اوچون كوييده شيداى محمّد
كيم امتى دور حمد و ثنا تينماين ايتور
پاكا، صمدا، قيل منى رسواى محمّد

كونكلوم كا ساليب عشق محبت نى الهيم
قيلغيل منى سين عاشق يكتای محمّد
مانندهء مجنون كيچوروب ايكى جهاندين
ديوانه قيليب قيل منى رسواى محمّد

اولتوركيل، كويدوركيل، هر محنتى سالغيل
اول روز جزا قيل منى شيداى محمّد
دايم غم امت يئدى و يئمادى نعمت
کرامتى دور سن قانى غم های محمّد

امت ديبان كيعه - كوندوز يئدى حسرت
كوكسيدين چقارور پر خونى دلهاى محمّد
امت گناهينى تيلاب او شاهى شاهنشاهى
اول روزى جزا بولار اول دادخواهى محمّد

كيچكيل همه دين ايزله محمّدنى رضاسين
والله بولاسن لحظه ده كوياى محمّد
سندين تيلای كيم بولدورور اى خالق بيچون
سالغيل قولاغيمغه منى غوغاى محمّد

من اورگولايين خوش كرمينكدين سنى الله
بير قطره قاتورغيل منكا درياى محمّد
يول بيرگوچى رحمن، رحيم، غافر، ستار
قيلمه منى شرمندهء گمراهى محمّد

بير قطره مى اوّل جام الست دين منكاانعام
قيلغيل بولايين حمدينكا داناى محمّد
روى سيغك سور قدمى پير مغان غه
لطف ايتسه بئرور ديدهء بيناى محمّد

مقصوديمه تيكور منى اى خالق بيچون
من در طلب زلف سمن ساى محمّد
يوزدين كوتاريب پردهنى احمد سرى باقغيل
من بندهء اول موى سيه پاى محمّد
مسكين يسوى آرزوى روضهء حضرت
بولغايمو ميسريم خاك كف پاى محمّد
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 09 Fevral 2010, 11:51:54
۲۲
حکمت

الكذاب لا امتى دئدى بيلينك محمّد
يالغانچى لار قومى نى امّت ديمس محمّد
توغرى يوركان قولينى حقنى ايزلاب يولى نى
راست يوركان قولينى امت ديكاى محمّد

هركيم امّت من ديسه، رسول ايشين قويمسه
شفاعت كونى بولسه محروم قويمس محمّد
تنكرى تعالى سوزين رمول الله سنتين
اينانماكان امتين امت ديمس محمّد

امّت من ديب يورورسن، بويروغينی قيلمس سن
نچوك امد توتارسن آنده سورمس محمّد؟
مشكل دور عاصى بنده امت ديمسه آنده
رسوا بولور محشرده امّت ديمس محمّد

امّت ديكاى محمّد چين سوزلاسه قول احمد
تانكلا بولسه قيامت محروم قويمس محمّد
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 09 Fevral 2010, 11:52:12
۲۳
حکمت

اون سيكيز مينك عالمغه سرور بولغان محمّد
اوتوز اوچ مينك اصحاب غه رهبربولغان محمّد
يلانكاچ آچيلغه قناعت ليغ محمّد
عاصى، جافى امت غه شفاعت ليغ محمّد

تونلار ياتيب ايومس تلاوت ليغ محمّد
غريب بيرله يتيم غه مروّت ليغ محمّد
يولدين آزغان گمراه غه هدايت ليغ محمّد
مهم توشسه هر كيمكا كفايت ليغ محمّد

ابو جهل بولهب غه سياست ليغ محمّد
ملامت نى صابونى سلامت ليغ محمّد
نماز — روزه قيلغوچى عبادت ليغ محمّد
تينماى تسبيح ايتكوچى رياضت ليغ محمّد

ملعون لعين شيطانغه سياست ليغ محمّد
شريعت نى يوليغه عنايت ليغ محمّد
طريقت غه رهنما ارادت ليغ محمّد
حقيقت كا مقتدا اجازت ليغ محمّد

دعالارى مستجاب اجابت ليغ محمّد
يمانليغ غه يخشيليق كرامت ليغ محمّد
توفيق بيرکان ظالم كا جلالت ليغ محمّد
سجده قيلغان ايگيليب اطاعت ليغ محمّد

بيش وقت نماز يولغانده امامت ليغ محمّد
معراج آشيب بارغانده شهادت ليغ محمّد
عرش - کرسی بازاری عنايت ليغ محمّد
سيکيز بهشت ايکاسی ولايت ليغ محمّد

مسکين احمد قوليغه کتابت ليغ محمّد
يتيم، فقير، غريب غه سخاوت ليغ محمّد
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 09 Fevral 2010, 11:52:30
۲۴
حکمت

بيزدين درود بيار يا مصطغى محمّد!
تحيات بى شمار يا مصطفى محمّد!
يا سيد المرسلين يا خاتم النبيين
يا هادى المضلين يا مصطفى محمّد!

يا ايها المدّثّر حق ايدى قُم فَانْذِرْ
ورَبَّکَ فَكَبِّرْ يا مصطفى محمّد!
حضرتده سين معظم، قربتده سين مكرم
انبياغه مقدم يا مصطفى محمّد!

سين سين حبيب خالق حق درگاهى غه لايق
خلاصهء خلايوق يا مصطفى محمّد!
اصل وجوذ آدم مرسل نبى خاتم
زاز نهان غه مهرم يا مصطفى محمّد!

طوبی قاب قوسين قرمایّ باغ کونين
برچه غه قرّة عينين يا مصطفى محمّد!
عرشى كرسيدين آشقان، حضرتيكا اولاشقان
توقسان مينك راز ايتوشكان يا مصطفى محمّد!

يير-گوك ايرور مأمورينك صحابه لار منظورينك
جمله امت مغفورينك يا مصطفى محمّد!
هر كيم سنكا سيغينور تموغدين اول قوتولور
اوچماخ سرى اولانور يا مصطفى محمّد!

جانيم فداسى قيلسام، خوشنودلوقينى آلسام
ارمان يوق ايردی اولسام يا مصطفى محمّد!
کرچه كوبتور گناهيم، كيچوركاى سين الهيم
سين سين منى پناهيم يا مصطفى محمّد!

يارب نچوك قيلغايمن شفاعتين قولكاى من
امتى دين بولغامن يا مصطفى محمّد!
امتيدين بولغانلار شفاعتين قولغانلار
اهل بهشت بولغانلار يا مصطفى محمّد!

احمد مرادی سين سين! ذكرى ويادى سين سين!
ايشلار كشادى سين سين يا مصطفى محمّد!
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 09 Fevral 2010, 11:52:50
۲۵
حکمت

حق تعالى فضلى برلان فرمان قيلدى
ايشتيب اوقوب ييركا كيردى قول خواجه احمد
آلتميشر اوچده سنت لارين محكم توتوب
ايشتيب اوقوب ييركا كيردى قول خواجه احمد

يير اوستيده اولمس بورون تريك اولدوم
آلتميشر اوچده سنت ديدى ايشتيب بيلديم
يير آستيده جانيم بيله قوللوق قيلديم
ايشتيب اوقوب ييركا كيردى قول خواجه احمد

ايرانلاردين فيض و فتوح آلالماديم
يوز يكرمه بيش كا کيرديم بيلالماديم
حق تعالى طاعت لارين قيلالماديم
ايشتيب اوقوب ييركا كيردى قول خواجه احمد

بولغاى من مو محمّدنى خاص امتى
امت ديسه عاصى لارين خوش دولتى
بالدين تالتيغ ايرور منكا بو محنتى
ايشتيب اوقوب ييركا كيردى قول خواجه احمد

بيزلار اوچون جانلار چيكتى اول محمّد
امت بولسنك غم ييمس سين يالغان امت
کيچه-کندوز حاصل لارينك عيش عشرت
ايشتيب اوقوب ييركا كيردى قول خواجه احمد

ايليك ياشده ندا كيلدى اولمك آسان
شرطى اولدور سنده بولسه نور ايمان
تانكلا بارسنك ديداريغه قيلور مهمان
ايشتيب اوقوب ييركا كيردى قول خواجه احمد

اى مؤمن لار بو دنيانى پايانى يوق
چين اولورسين هرکز مونى يالغانى يوق
كيم بيلمسه والله آنى ايمانى يوق
ايشتيب اوقوب ييركا كيردى قول خواجه احمد

اصليم تفراق توپراق، نسليم تفراق، برجه دين خوار
باسيب اوتسنك مردار جسميم قيلغوسى عار
کيم عار ايتسه شيطان قومى هواسى بار
ايشتيب اوقوب ييركا كيردى قول خواجه احمد
چين ذاکرغه خدا اوزى قيلدى رحمت
تانكلا يارسة جنت ايچره بيرور خلعت
روز محشر ديدار كوروب سوركاى دولت
ايشتيب اوقوب ييركا كيردى قول خواجه احمد

بنده بولسنك محنت تارتغيل غافل آدم
عاقل ايرسنك غنيمت دور سنكا شول دم
امانت دور عزير جانينك يورمه بى غم
ايشتيب اوقوب ييركا كيردى ة ل حواجه احمد

آلتميشر اوچده سنت بولدى ييركا كيرمك
رسول اوچون ايكى عالم بر باد بيرمك
عاشق لارنى سنتى دور تريك اولمك
ايشتيب اوقوب ييركا كيردى قول خواجه احمد

امّت بولسنك اشتيب جانينك بيرمس موسن
مصطفى غه جانينك قربان قيلمس موسن
جان نه بولغاى ايمانيكنى بيرمس موسن
ايشتيب اوقوب ييركا كيردى قول خواجه احمد

قول خواجه احمد آلتميش اوچده غايب بولدی
ادب ساقلاب مصطفى غه نايب بولدى
سلطان بولدى، محنت تارتيب تايب بولدى
ايشتيب اوقوب ييركا كيردى قول خواجه احمد
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 09 Fevral 2010, 11:53:08
۲۶
حکمت

قهارآتليغ قهرينكدين قورقوب ييغلار خواجه احمد
رحمن آتليغ رحمينكدين اميد توتار خواجه احمد
گناهيم كوب الَهيم! كيچوركاى سن گناهيم
برجه قول لار ايچيده عاصى قول دور خواجه احمد

منافق لار يورارلار، فسق و فجور قيلورلار
حرام، شبهه ييورلار قورقوب ييغلاب خواجه احمد
طريقت نى بيلماديم، حقيقت غه كيرماديم
پير بويروغين توتمديم عذرى کوبتور خواجه احمد

آخر زمان بولغاندور، پادشاه ظالم بولغاندور
حرام، شبهه تولغاندور حيران بولور خواجه احمد
شرمنده عاصى قول من، عشق يوليده بلبل من
آرسلار باباکا قول من قولونك بولور خواحه احمد

قول خواحه احمد طاعت قيل، ييغلامقنى عادت قيل،
بلا کيلسه طاعت قيل! حقدين بولور خواحه احمد
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 09 Fevral 2010, 11:53:28
۲۷
حکمت

توبه قيليب حقه يانغان تاشق لارغا
اوچماخ ايچره تورت اريغ ده شربتى بار
توبه قيلماى حقه يانماکان غافل لارغه
تار لحدده قاتيغ عذاب حسرتى بار

اوچماخ ملكين اومان قول لار توبه قيلسون
توبه قيليب حضرتى غه ياوق بولسون
حور، قصور، غلمان، ولدان، خادم بولسون
الوان - الوان کيار تشريف خلعتى بار

توبه قيلغان عاشق لارغه نوری ايرور
تونى، كونى صايم بولسه كونكلى يارور
قچان اولوب كورکا کيرسه کورى کينكرور
اوغان ايذيم رحيم، رحمن رحمتى بار

توبه سيزلار بو دنيادين كيچماس بيلور
اولوب بارسه گور عذابين كورمس بيلور
قيامت كون تانك عرصات آتمس بيلور
هيهات هيهات نوحه فرياد کونلاری بار

نماز، روزه توبه اوزره بارغان لارغه
حة ق يوليغه کيريب قدم قويغان لارغه
اوشبو توبه برله آنده بارغان لارغه
يارلقاميش قول لار برلان صحبتی بار

نماز برله روزه لارى اوتن الار
عالم خلقى سويونوب انى حقدين تيلار
قيامت کون كوروب آنى آلار تينكلار
نه قول ايرميش بو سعادت نصرتی بار

اول اريغ لر كيمكا تورور بيلكيل آنى
توبه قيلغان عاشق لارغه ايچورور آنى
توبه سيزلار اول اريغ دين ايچمس ولى
انكا ايچورور زهر - زقوم شربتى بار

قيامت نى بيركونى ايليك مينك ييلچه بولور
بو دنيانى ساننچه ييل نيچه بولور
قيامت كون ييتميش مينك ييل اوتده قالور
توبه قيلكان قول لار كويمس مهلتى بار

هر كيم حقنى قولى بولسه حقه يانسون
حقه يانمس اوزين ديكان نارى بارسرن
قرل خواجه احمد نچوك مونده اورون تابسون
كيچه کوندوز قورقه تورور هيبتى بار
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 09 Fevral 2010, 11:53:45
۲۸
حکمت

بهشت دوزخ تلاشور تاياشمقده بيان بار
دوزخ ايتور من آرتوق منده فرعون، هامان بار
بهشت ايترر نه ديرسين؟ سؤزنى بيلمای ايتورسين
سينده فرعون بولسه منده يوسف کنعان بار

دوزخ ايتور من آرتوق بخيل قول لار منده بار
بخيل لارنى بوينى ده اوتلوغ زنجير كشان بار
بهشت ايتور من آرتوق پيغمبرلار منده بار
پيغمبرلار آلديده کوثر، حور وغلمان بار

دوزخ ايتور من آرتوق ترسا، جهود منده بار
جهود، ترسا آلديده تورلوك عذاب سوزان بار
بهشت ايتور من آرتوق مؤمن قول لار منده بار
مؤمن لارنى آلديده تولورك نعمت الوان بار

دوزخ ايتور من آرتوق ظالم قول لار منده بار
ظالم لارکا بيرورکا زهر - زقوم چندان بار
بهشت ايتور من آرتوق عالم قول لار منده بار
عالم لارنى كونكلى ده آيت حديث قرآن بار

دوزخ ايتور من آرتوق منافقلار منده بار
منافق لار بوينى ده اوتدين اشكل کشان بار
بهشت ايتور من آرتوق ذاکر قول لار منده بار
ذاکرلارنى تونكلی ده ذکر اللهى سبحان بار

دوزخ ايتور من آرتوق بى نمازلار منده بار
بى نمازلار بوينى ده ييلان بيلان چيان بار
بهشت ايتور من آرتوق ديدار كؤرمك منده بار
ديدارينى کورساتورغه رحيم آتليغ رحمن بار

دوزخ انده تيك توردى بهشت عذرينى ايدى
قول خواجه احمد نه بيلدى بيلدورکوچى يزدان بار
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 09 Fevral 2010, 11:54:10
۲۹
حکمت

ديدارينى طلب قيلسنك اى ذاکرلار
جاندين کيچيب خلقه ايچره کوزونك ديدار
شوقينك بيله الله ايتيب رامت كا قايتيب
تون اويقومسين حرام ايلاب بولكيل ديدار

بيدارلاركا حق رحمتى بولور ياوق
بيدارلارنى کونکلی سينوق، کوزى ياشليق
من من ليك نى جزاسينى بيرکاى تموق
تكبّرنی دوزخ ايچره حالى دشوار

سنديز بورون يارانلارينك قيان کيتى
بو دنياغه ميل قيلماى ييغلاب اوتى
عمرينك آخر بولدى نوبت سنكا يتى
کناهنك کا توبه قيلكيل اى بد کردار!

نفسينك سنى باقيب تورسنك نيلارديمس
زارى قيلسنك الله سرى بيون سونمس
قولغه آلسنك يبان قوشديك قولغه قونمس
قولغه آليب تون اويقوسين قيلكيل بيدار

نفس يوليغه کيركان کشى رسوا بولور
يولدين آزيب تايب توزوب گمراه بولور
ياتسه قوبسه شيطان بيله همراه بولور
نفسنى تبكيل نفسنى تبكيل ای بد كردار

نفسينك سنى آخر دمده گدا قيلكاى
دين اويى نى غارت قيليب ادا قيلكاى
اولار وقتده ايمانينكدين جدا قيلكاى
عاقل ايرسنك نفس بددين بولكيل بيزار

فرعون، قارون، شيطان سوزين محکم توتدى
بول سببدين يئر ياريلدى آنى يوتدى
مومى کليم ناصح بولوب سوزلار ايتدی
قولاق توتماى اول ايكى سى اولدى مردار

گناهنك كا توبه قيليب ييغلاب يورغيل
كيتار من ديب يول باشيغه باريب تورغيل
كيتكانلارنى كوروب سين هم عبرت آلغيل
عبرت آلسنك ياتميش ييرينك بولور گلزار

مؤمن قول لار درد حالت پيدا قيلدى
حق يوليده جان و دل نى شيدا قيلدى
دنيا تاشلاب آخرت نى سودا قيلدى
سودا قيلسنك حور وغلمان بارى طيّار

قول خواجه احمد نفس ايلکيدين قيلورمن داد
پير مغان بولغاى موکين انکا جلاّد
بيخبرلار ايشيتماسلار داد و فرياد
قان ييغلاغيل ايشيتسون اول پروردگار
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 09 Fevral 2010, 11:54:27
۳۰
حکمت

عشق يوليده فنا بولاى حق بير و بار
هر نه قيلسنك عاشق قيلغيل پروردکار
ايلكيم آچيب دعا قيلاى ايزيم جبار
هر نه قيلسنك عاشق قيلغيل پروردکار

عشقى تيكسه کويدور كوسى جان و تن نى
عشقى تيكسه ويران قيلور ما و من نى
عشق بولمسه تانيب بولمس موليم مولام  سنى
هر نه قيلسنك عاشق قيلغيل پروردکار

عشق دفتری سغماس دوستلار درکاهى کا
جمله عاشق ييغيليب بارکاى باركاهى کا
يتى دوزخ طاقت قيلمس بير آهى کا
هر نه قيلسنك عاشق قيلغيل پروردکار

خاص عشقينكنى کورسات منكا شاکر بولای
ارّه قويسه زکرياديك ذاکر بولاى
ايوب صفت بلاسيغه صابر بولاى
هر نه قيلسنك عاشق قيلغيل پروردکار

عشق دردينى طلب قيلديم درمانى يوق
عشق يوليده جان بيرکان نى ارمانى يوق
بو يول لارده جان بيرمسه امكانى يوق
هر نه قيلسنك عاشق قيلغيل پروردکار

قايدين تاپاى عشقينك توشتى قراريم يوق
عشق ثناسين تونى کونى قوياريم يوق
درکاهنکدين اوزكا ييرکا باراريم يوق
هر نه قيلسنك عاشق قيلغيل پروردکار

عشق بازارى، اولوغ بازار سودا حرام
عاشق لارکا سندين اوزكا غوغا حرام
عشق يوليغه كيرکانلاركا دنيا حرام
هر نه قيلسنك عاشق قيلغيل پروردکار

عاشق ليق نى دعوی قيليب يورالمديم
نفسدين کيچيب من امرى نى قيلالماديم
نادان ليقده حق امرينى بيلالماديم
هر نه قيلسنك عاشق قيلغيل پروردکار

قول خواجه احمد عشق دين قاتيغ بلا بولماس
مرهم سورمه عشق دريغه دوا بولماس
کوز ياشيدين اوزکا هيچ کيم گواه بولماس
هر نه قيلسنك عاشق قيلغيل پروردکار
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 09 Fevral 2010, 11:54:43
۳۱
حکمت

هر كشى كورسه جمالنك دنيا ايشيب برباد ايتار
كيچه كوندوز تنه بيلماس خداينى ياد ايتار
كيم آننك كوينده بولسه حق أننك كونكلنده دور
هر سارى بارسه اوشال يارى بيلان پرواز ايتار

كاشكى من دايم سنك يادنك بيلان بولغاى ايديم
باقشنك يوز مينك مننكداك بنده نى آزاد ايتار
معرفت ميدانى ايچره بو كونكلنى شاد ايتيب
دنياسين ترك ايلكانلار حق بيلان سودا ايتا

عارف اول دور بولسه عاشق حلقه ده جولان ايتيب
استعانتنى تيلاب اول پيرنى قالقان ايتار
خوش عجايب و غرايب بو خدانينك ايشلارى
بيرسين گويا قيلوبن بيرسين تركان ايتار

كورکل اوشبو دنيا ايچون كوب جفالار ايلسانك
آخرى هيچ اوشبو دنيا ييربيلان يكسان ايتار
كيچه - كوندوز آرزو قيلسانك آننك ديدارينى
صاف قيلغيل بو كونكلنى بير کونى دربار ايتار

اى قول احمد سين يرروب غمكين كونكلنى اولاغيل
اهل دل بولغان کشی غمكين كونكلنى شاد ايتار
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 09 Fevral 2010, 11:55:02
۳۲
حکمت

ناگهان توروريمده قموغ بزرك
حق عشقى نى كونكلوم ايچره سالدى دوستلار
خضر بابام حاضر توروب لطف ايلابان
مدد قيليب ايلكيم توتوب آلدى دوستلار

اوتوز بيرده خضر بابام مى ايچوردى
وجوديمدين عزازيل نى حق قاچوردى
سودا قيلديم، يازوقلاريم حق كيچوردى
آندين سونكره حق يوليغه صالدى دوستلار

اوتوز ايكى ياشده يتى حقدين فرمان
بنده ليك کا قبول قيلديم قيلمه ارمان
جان بيرورده بيركوم سنكا نور ايمان
غريب جانيم شادمان بولوب كولدى دوستلار

خالقيم دين خبر يتى شاکر بولدوم
هر کيم سوکتى بلكه تيبتى صابر بولدوم
بو عالمده هيچ اوخلاماى حاضر بولدوم
هاى - هوس، ما و من ليك کيتی دوستلار

اوتوز اوچده ساقى بولوب مى اولاشتيم
جام شراب قولغه آليب تويا ايچتيم
لشكر توزاب شيطان برله مين اوروشتيم
بحمد الله ايكى نفسيم اولدی دوستلار

اوتوز تورتده عالم بولوب دانا بولدوم
حكمت ايت ديب سبحان ايدى گويا بولدوم
چلتن برلان شراب ايچتيم همراه بولدوم
ايچ و تاشيم حق نوريغه تولدى دوستلار

اوتوز بيشده مسجد كيريب دوران سوردوم
طالب لاركا عشق دوكانين تولا قوردوم
ايكرى يولغه هركيم كيردى سوکتوم اوردوم
عاشق لاركا حق دين مژده يتى دوستلار

اوتوز ييتى ياشقه کيرديم اويغانماديم
انصاف قيليب الله سرى تولغانماديم
سحر وقت ده زارى قيليب اينكرانماديم
توبه قيلديم خواجم قبول قيلدى دوستلار

اوتوز سيكز ياشقه كيرديم عمروم اوتى
ييغلامايمو اولار وقتيم ياوق يتى
اجل كيليب پيمانه سين منكا توتى
بيلماى قالدوم عمروم آخر بولدى دوستلار

اوتوز توقوز ياشقه كيرديم قيلديم حسرت
وا دريغا اوتى عمروم قانى طاتت
طاعت ليك لار حق قاشيده خوش سعادت
قيزيل يوزوم طاعت قيلماى سولدی دوستلار

ساچ و سقاان خوب آقاردى کونكلوم قرا
روز محشر رحم ايتماسنك حاليم تباه
سنكا عيان عمل سيز من کوبتور گناه
جمله ملك يازوقلاريم بيلدى دوستلار

پير نغان جرعه سيدين قطره تاتيم
يول تاپايديب باشيم برله تونلار قاتيم
بحمد الله لطف ايلادى نورکا باتيم
کونكل قوشى لامكانغه يتى دوستلار

قيامت نى شدتى دين عقليم حيران
كونكلوم قورقغان، جانيم هورکان، خانه ويران
صراط آتليغ كوفروكى دين دليم لرزان
عقليم کيتيب بيهوش بولوب قالديم دوستلار

قول خواجه احمد قيرقغه كيردينك نفسينكى قيرق
مونده ييغلاب آخرتده بولكيل اريق
پوست ايمان شريعت دور مغزى طريق
طريق کيركان حقدين اولوش آلدى دوستلار
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 09 Fevral 2010, 11:55:19
۳۳
حکمت

ناگهان توروريمده قموغ بزرك
حق عشقى نى كونكلوم ايچره سالدى دوستلار
خضر بابام حاضر توروب لطف ايلابان
مدد قيليب ايلكيم توتوب آلدى دوستلار

اوتوز بيرده خضر بابام مى ايچوردى
وجوديمدين عزازيل نى حق قاچوردى
سودا قيلديم، يازوقلاريم حق كيچوردى
آندين سونكره حق يوليغه صالدى دوستلار

اوتوز ايكى ياشده يتى حقدين فرمان
بنده ليك کا قبول قيلديم قيلمه ارمان
جان بيرورده بيركوم سنكا نور ايمان
غريب جانيم شادمان بولوب كولدى دوستلار

خالقيم دين خبر يتى شاکر بولدوم
هر کيم سوکتى بلكه تيبتى صابر بولدوم
بو عالمده هيچ اوخلاماى حاضر بولدوم
هاى - هوس، ما و من ليك کيتی دوستلار

اوتوز اوچده ساقى بولوب مى اولاشتيم
جام شراب قولغه آليب تويا ايچتيم
لشكر توزاب شيطان برله مين اوروشتيم
بحمد الله ايكى نفسيم اولدی دوستلار

اوتوز تورتده عالم بولوب دانا بولدوم
حكمت ايت ديب سبحان ايدى گويا بولدوم
چلتن برلان شراب ايچتيم همراه بولدوم
ايچ و تاشيم حق نوريغه تولدى دوستلار

اوتوز بيشده مسجد كيريب دوران سوردوم
طالب لاركا عشق دوكانين تولا قوردوم
ايكرى يولغه هركيم كيردى سوکتوم اوردوم
عاشق لاركا حق دين مژده يتى دوستلار

اوتوز ييتى ياشقه کيرديم اويغانماديم
انصاف قيليب الله سرى تولغانماديم
سحر وقت ده زارى قيليب اينكرانماديم
توبه قيلديم خواجم قبول قيلدى دوستلار

اوتوز سيكز ياشقه كيرديم عمروم اوتى
ييغلامايمو اولار وقتيم ياوق يتى
اجل كيليب پيمانه سين منكا توتى
بيلماى قالدوم عمروم آخر بولدى دوستلار

اوتوز توقوز ياشقه كيرديم قيلديم حسرت
وا دريغا اوتى عمروم قانى طاتت
طاعت ليك لار حق قاشيده خوش سعادت
قيزيل يوزوم طاعت قيلماى سولدی دوستلار

ساچ و سقاان خوب آقاردى کونكلوم قرا
روز محشر رحم ايتماسنك حاليم تباه
سنكا عيان عمل سيز من کوبتور گناه
جمله ملك يازوقلاريم بيلدى دوستلار

پير نغان جرعه سيدين قطره تاتيم
يول تاپايديب باشيم برله تونلار قاتيم
بحمد الله لطف ايلادى نورکا باتيم
کونكل قوشى لامكانغه يتى دوستلار

قيامت نى شدتى دين عقليم حيران
كونكلوم قورقغان، جانيم هورکان، خانه ويران
صراط آتليغ كوفروكى دين دليم لرزان
عقليم کيتيب بيهوش بولوب قالديم دوستلار

قول خواجه احمد قيرقغه كيردينك نفسينكى قيرق
مونده ييغلاب آخرتده بولكيل اريق
پوست ايمان شريعت دور مغزى طريق
طريق کيركان حقدين اولوش آلدى دوستلار

اوليالار ايتكان وعده كيلدى بولغاى
قيامت نى کونى ياوق بولدى دوستلار
عاقل قول لار بولغانى نى ييلدى بولغاى
خلق ايل دين مهر شفقت كيتى دوستلار

اولوغ کيچيك يارانلاردين ادب كيتى
قين و ضعيف جوانلاردين حيا كيتى
الحياء من الايمان ديب رسول ايتى
حياسين قوم عجايب لار بولدى دوستلار

مسلمان مسلمان نى قيلدى قاتل
ناحق توتوب حق ايشلارين قيلدى باطل
مريد پيرغه قيلماديلار يوزى خاطر
عجب شوملوغ زمانه لار بولدى دوستلار

اهل دنيا خلقميزده سخاوت يوق
پادشاه لارده وزيرلارده عدالت يوق
درويشلارنى دعاسيده اجابت يوق
تورلوك بلا خلق اوستيغه ياغدى دوستلار

آخر زمان عالم لارى ظالم بولدى
خوش آمد ايتكوچى لار عالم بولدى
حقنى ايتكان درويش لاركا غنيم بولدى
عجب شوملوغ زمانه لار بولدى دوستلار

قيامت كون ياوق ييتى قالغانى يوق
قول احمدنى ايتكان سوزين يالغانى يوق
اوز اوزيغه بير نصيحت قيلغانى يوق
نصيحتين خلقه ايتيب كيتى دوستلار
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 09 Fevral 2010, 11:55:39
۳۴
حکمت

محبت نى جامين ايچكان ديوانه لار
قيامت کون اوت آغزيدين ساچار دوستلار
قدرت برله يراتيلكان ييتى تموغ
عاشق لارنى نعره سيدين قاچار دوستلار

دوزخ ييغلاب داد ايلاكاى خدايى کا
طاقتيم يوق عاشق لارنى بير آهى کا
قاچيب باركاى حق تعالى پناهى کا
عاشق لارنى ياشى برلان اوچار دوستلار

عاشت لارى عشق دوکانين بارسه قوروب
انشاء الله دوزخ قاچقاق آندين قورقوب
ياشين ساجيب کوکسين آجيب يوزين سوروب
ييتى آسمان طاقت قيلمای کوچار دوستلار

رحمن ايکام ساقى بولوب می ايچورسه
اهل عيال خانماندين پاك کيچورسه
وجوديمدين عزازيل نى حق قاچورسه
جرم عصيان کوره لارين آچار دوستلار

عشق بابی نی حق يوزيغه وا ايلاسه
خاص عشقى نى کونكل ايچره جا ايلاسه
لطف ايلاسه ايکی عالم شاه ايلاسه
عاشق لاری حق ساريغه اوچار دوستلار

سبحان ايكام بير قطره مى قيلسه انعام
ذکر سرنى ايته ايته قيلسام تمام
حور وغلمان جمله ملك انكا غلام
اوچماخ ايچره حرير تونلار بچار دوستلار

الله ديبان گوردين قوپسه عالم کويار
خاص بندم ديب رحمان ايکام يالغوز سويار
ياش اورنى غه قانين توکوب يوزنى بويار
حمدين ايتسه شيطان لعين قاچار دوستلار

مين ايتماديم الله اوزی وعده قيلدى
يولسيز ايديم لطف ايلابان يولغه سالدی
غريب بولوب ناله قيلديم، قولوم آلدی
انداغ عاشق شوق شرابين ايچار دوستلار

قول خواجه احمد عشق سيزلارنى ايشى دشوار
تانكلار بارسه حق كورساتمس انكا ديدار
عرش کرسى لوح قلم همه بيزار
عشق سيزلارکا دوزخ بابين آچار دوستلار
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 09 Fevral 2010, 11:56:02
۳۵
حکمت

کوزوم نمليك دليم غمليك جان الم ليك
نيچوك علاج ايتاريمنى بيلمام دوستلار
بو حسرتده ندامت ده ياشيم آقيب
قايو طرف کيتاريمنى بيلمام دوستلار

تورلوك تورلوك علامت لار بولدی پيدا
يوراکيمده جاحت لار بولدی پيدا
بو دنياده لحظه فارغ بولماغ پيدا
نيچوك علاج ايتاريمنى بيلمام دوستلار

الله اوچون فرزندلايم يتيم قيلسام
جاندين کيچيب مالدين کيچيب غريب یولسام
بيابانده يالغوز قاز ديك ناله قيلسام
نيچوك علاج ايتاريمنى بيلمام دوستلار

خاص قول لار ديك کيچه لارى قايم بولسام
مردانلار ديك کوندوزلارى صايم بولسام
کيچه لارى آرام آلماى ربّيم ديسام
نيچوك علاج ايتاريمنى بيلمام دوستلار

تخم عصيان بيحد ساچتيم طاعتيم آز
اوتى عمروم غفلت بيلان هم قيش و ياز
ياقين ترور جانم قوشى قيلسه پرواز
نيچوك علاج ايتاريمنى بيلمام دوستلار

قول خواجه احمد خذمتيده جان بيرمسه
دهقان ايرمس كيتمان چابيب نان بيرمسه
وا بولمغای کل غنجه سى نم بولمسه
نيچوك علاج ايتاريمنى بيلمام دوستلار
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 09 Fevral 2010, 11:56:20
۳۶
حکمت

عشق سرّينى بيان قيلسام عاشقلارکا
طاقت قيلمای باشين آليب کيتار دوستلار
تاغ [قه] تاشقه باشين اوروب بيخود بولوب
اهل عياليم خانماندين اوتار دوستلار

عشق شدتى باشقه توشسه عاشق تيلار
بيكانه لار تاشلار آتيب آنکا كولار
ديوانه ديب باشين ياريب قانغه بولار
شاكر بولوب حمد ثنا ايتار دوستلار

عشق سيزلارنى هم جانى يوق هم ايمانى
رسول الله سؤزين ايديم معنى کانى
نيچه ايتسام ايشيتكوچى بيلكان قانى
بيخبركا ايتسام كونكلى قاتار دوستلار

عشق گوهری توبسيز دريا ايچره پنهان
جاندين کيچيب گوهر آلغان بولدى جانان
بو لهوس لار عاشق مين ديب يولده قالغان
دين لارينى پوجك پل غه ساتار دوستلار

اوتقه كويدوم، جاندين تويدوم، حيران بولدوم
بو نچوك اوت؟ کويمای، يانمای، بر يان بولدوم
محبت نى آتين ايشيتيب کريان بولدوم
كوزى كريان مراديغه ينار دوستلار

زار ييغلابان زار اينكراکيل رحمى کيلسون
يول اداشسنك رحمى کيليب يولغه سالسون
آمين دينکلار پير مغان قولونك آلسون
خذمت قيلغان مراديغه يتار دوستلار

زمانه أخر بولدی خويونك کيتی
رسول الله وعده لاری ياوق ييتی
خاص قول لارنی يخشى سوزکا قولاق توتی
يمان قول لار کوندين کونکا بتر دوستلار

كل يوم بتر ديدی حق مصطفى
امت بولسنك قولاق سالغيل اهل وفا
يخشى لارنی اجرين بيرور بدکا جزا
قيامت کون جزالارين تارتار دوستلار

فاسق، فاجر هوا قيليب ييرنى باسماس
روزه، نماز قضا قيليب مسواك آسماس
رسول الله سنت لارين کوزکا آلماس
گناه لاری كوندين کونكا آرتار دوستلار

دنيادارلار مالين کوروب هوا قيلور
من - من ليك دين اول دعوی خدا قيلور
اولار وقتده ايمانيدين جدا قيلور
جان برارده حسرت برلان کيتار دوستلار

قموغ دنيا يقانلارنى والله کوردوم
اولار وقتده قلای سين ديب حالين سوردوم
شيطان ايدى ايمانى غه چنکال اوردوم
جان چيغارده ييغلاى ييغلاى كيتار دوستلار

قول خواجه احمد عاشق بولسنك جانينك كويسون
صدقينك برلان الله ديكيل تنكری بيلسون
دعا قيلغيل مؤمن قول لار دنيا قويسون
دنيا قويغان آخرتقه يتار دوستلار
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 09 Fevral 2010, 11:56:40
۳۷
حکمت

محبت نى شرابى دين ايچورمسه
جان، دليم حسرت بيلان كيتار دوستلار
الله يادين ورد ايلامای اولوب كيتسام
ايسز عمروم ارمان برله اوتار دوستلار

الله ديكان چين عاشق لار براق مندى
معشوقيدن محنت يتسه بويون سوندى
طريقت نى بازارينده جولان قيلدى
حقيقت نى درياسيدين اوتار دوستلار

حقيقت نى درياسيدين آلغان كشى
اوزى مونكلوغ، كونكلى سينوق، كوزده ياشی
خوارليق، زارليق، مشقت دور دايم ايشى
ديدارينی طلب قيليب تاپار دوستلار

حقيقت ليغ عاشق لارنى نفسى اولوك
اوچ يوز آلتميش، تورت يوز قرق تورت همه سلوك
سوزى شرين خلق خوشی يوز مينك تورلوك
بو دنيانى پوچك پل غه ساتار دوستلار

غارف، عاشق بولاى ديسنك الم تارتغيل
حق وصلى غه يتاى ديسنك تونلار قاتغيل
بو دنيانى عشرتى ني تاشلاب آتغيل
تاشلاب آتسنك ما و من ليك كيتار دوستلار

قيامت نى شدتى نى بيلماکانلار
قاتيغ عذاب تار لحددين قورقماغانلار
حق قهريدين قورقوب ياشين توكماكانايار
دوزخ ايچره يوز مينك عذاب تارتار دوستلار

وا دريغا اوتى عمرم بيلالماديم
جاندين کيچيب حضرت سری بارالماديم
نفسدين كيچيب حق امرينى قيلالمادوم
اولوب بارسام حسرت منكا يتار دوستلار

اوتى عمروم شريعت کا يتالماديم
شريعت سيز طريقت کا اوتالماديم
حقيقت سيز معرفت كا باتالماديم
قاتيغ يولدور پيرسيز نيچوك اوتار دوستلار

قول خواجه احمد نفسيم سالدی اوشبو يولغه
آنينك اوچون قاچتيم دوستلار چولدين چول غه
الله ديب هيچ باقماديم اونك سولغه
الله ديكان شوق شرابين ايچار دوستلار
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 09 Fevral 2010, 11:57:01
۳۸
حکمت

يراتقان بير و باريم يولين ايزلاب
شيطان لعين يول لارى دين قايتينك دوستلار
اخلاص برلان محبت نى جامين ايچيب
جان و دلده حیّ ذكرينى ايتينك دوستلار

حیّ ذكرين ايتيب ايچكان جام شراب
يول اوستيده عزيز باشى مثل تراب
الله اوچون حالى خراب، بغرى كباب
جان و دلده حیّ ذكرينى ايتينك دوستلار

آستانه غه باشيم قويوب زارى قيلسام
حلقه قوروب كيم ذکر ايتسه يارى بيرسام
ذكرين ايتيب اول صحبتده درلار تيرسام
جان و دلده حیّ ذكرينى ايتينك دوستلار

عمل قيلمان عالم علمين باسيب يورکاى
اولوب بارسة تار لحدده جانى کويکاى
الله رسول دينينك کيمديب هيبت قيلکاى
جان و دلده حیّ ذكرينى ايتينك دوستلار

منكر - نكير «من رَبُّك ديب سؤال قيلغاى
قال علميدين بير نكته سى كار قيلماغاى
وا حسرتا عمل سيزلار نيچوك قيلغاى
جان و دلده حیّ ذكرينى ايتينك دوستلار

الله ديكان قند و عسل پيدا قيلدى
آخرتده الله برله سودا قيلدى
عمل قيلغان چين عالم نى دانا قيلدى
جان و دلده حیّ ذكرينى ايتينك دوستلار

قالينك چراغ، حالينك پلته، ياغى ياشينك
نچه ايتسام بهره آلسم كونكلى تاشينك
يول اوستيده تفراق بولسون عزيز باشينك
جان و دلده حیّ ذكرينى ايتينك دوستلار

ايسز عالم عمل قيلماى يولده قالور
اوقوب - اوقماى دنيا مالين قولغه آلور
من - من ليكيدين ايسز عمرين ضايع قيلور
جان و دلده حیّ ذكرينى ايتينك دوستلار

ظاهر بوزوب باط ن توزه عالم بولسنك
روز محشر قولونك توتقاى تانكلار بارسنك
وا ويلتا ندامت ديب يولده قالسنك
جان و دلده حیّ ذكرينى ايتينك دوستلار

عالم اولدور، نماز اوقوب طاعت قيلسه
حقدين قورقوب آخرت نى غمين ييسه
قرآن اوقوب حقدين قورقوب زاراينكراسه
جان و دلده حیّ ذكرينى ايتينك دوستلار

آنداغ عالم ايكى گوزى گريان بولور
سحرلاری ايرته قوپوب نالان بولور
حق يوليده كويوب يانيب بريان بولور
جان و دلده حیّ ذكرينى ايتينك دوستلار

خرارليق تارتقيل كافر نفسينك باشى قاتسون
دايم مدام بو دنيادين ييغلاب اوتسون
تفراق بولغيل عالم سنى باسيب اوتسون
جان و دلده حیّ ذكرينى ايتينك دوستلار

خوارليق تارتيب حق مصطفى امت ديدى
عاصى جافى امت لارين غمين ييدى
آننك اوچون امت لارى قوّت آلدى
جان و دلده حیّ ذكرينى ايتينك دوستلار

امت اوچون بغريده يوق ذره بوتون
امت ديسه دماغى دين چقاى توتون
حق تعالى قيلغايمو ديب بيزنى اوتون
جان و دلده حیّ ذكرينى ايتينك دوستلار

قول خواجه احمد آلاى ديسنك حقدين اولوش
بايزيدديك نفسينك بيله تون كون اوروش
اى بيخبر امت ايرسنك بولدور روش
جان و دلده حیّ ذكرينى ايتينك دوستلار
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 09 Fevral 2010, 11:57:24
۳۹
حکمت

ديدار اوچون جان ني قربان قيلماکونچه
اسماعيل ديك ديدار آرزو قيلمنك دوستلار
جاندين کيچيب طريقت کيرماکونچه
عاشق منديب يالغان دعوى قيلمنك دوستلار

عاشق ليق اولوغ دعوی قيلسنك مونى
محنت برله سنار ايرميش موليم سينى
رنج محنت برله بولسنك تونی - کونى
معشوقينکدين کونکل اوزکا قيلمنك دوستلار

من ليک برله طريقت کا کيرمادی لار
جاندين کيچماى يولغه قدم قويمادی لار
نفس اولتورماى تسليم فنا بولمادى لار
خام طمع ليغ برله يولغه کيرمنك دوستلار

اوشبو عشق نى يولى تيليم بولمق ترور
مونده يغلاب آخرتده كولماق ترور
کل رنك لاری زعفران ديك سولماق ترور
مرنداغ بولمای عاشق منديب ايتمانك دوستلار

مرشدلارنى خذمتى نى قيل اختيار
اوزلوکوم دين يولغه کيرديم ديمه زنهار
يخشى بيلسنك طريقت نى خطری بار
قلاوزسيز اوشبو يولغه كيرمنك دوستلار

مرشدلارکا خذمت قيلسنك نفس كا آفت
تيکمه نادان بو يول لارده قيلمس طاقت
صادق قول لار بو يول لار نى بيلور راحت
تريك اولماى ديدار آرزو قيلمنك دوستلار

الكذاب لا امتى ديدى سيزکا
اول محمّد حق رسولى ديدى بيزکا
يالغانچى غه جنت يوقتور والله آنكا
يالغان سوزلاب ايمانسيزين كيتمنك دوستلار

خانمانين ترك ايتمايين کورمس ديدار
ديدار کوراى ديكان عاشق بولور بيدار
آنداغ عاشق آخر كورکاى آنده ديدار
ديدار كورماى سر دين خبر توبنمك دوستلار

سردين معنى تويماكانلار بيكانه دور
اول عاشق نى مكان لارى ويرانه دور
عشق يوليده جان بيركانلار جانانه دور
جاندين كيچمای جاندين خبر بيلمنك دوستلار

قول خراجه احمد اوزدين كيچمای دعوى قيلمه
خلق ايچيده عاشق من ديب تيلکا آلمه
عاشق ليغ اولوغ ايشدور غافل بولمه
غافل بولوب حق ديدارين کورمنك دوستلار
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 09 Fevral 2010, 11:57:42
۴۰
حکمت

محبت نى جامين ايچيب رقص ايلاكان
ديوانه ليغ مقامى غه كيردى دوستلار
آج و توقلوق سود و زيان هيچ بيلمكان
سرمست بولوب رقص سماع اوردى دوستلار

رقص سماع اوركانلاركا دنيا حرام
اهل عيال خانماندين کيچتی تمام
سحر وقتده حقه سيغنيب ييغلار مدام
آندين سونكره رقص سماع اوردى دوستلار

رقص سماع اوركان عاشق اوزين بيلماس
بيهوش يورار دنيا مالين قولغه الماس
يوز مينك آدم تقصير ديسه مغرور بولماس
دنيا تيغيب رقص سماع اوردى دوستلار

دنيا تيغماى رقص سماع اوركان جاهل
حق يادينى بر دم ايتماى يورور غافل
درويش من دير دنيا سرى کونكلى مايل
دنيا اوچون رقص سماع اوردى دوستلار

اوزدين کيتمای رقص سماع اورمق خطا
سبحان ايكان انكا قيلمس ايمان عطا
طاعت قيلسه دل لارينى قيلمس صفا
ريا قيليب رقص سماع اوردى دوستلار

وای اوشنداغ نادانلاردين اميد قيلمانك
فيض فتوح آلور من ديب يوکروب يلمنك
نفسى اولوغ شرعى بوزوغ ولى بيلمنك
شيطان لعين نوخته اورماى مندى دوستلار

اوزدين كيتماى رقص ايلاسه الله يزار
سماعيدين يير تبرانيب تارتقاى آزار
دعا قيلاى كورساتمسون انكا ديدار
دين دين کيچيب رقص سماع اوردی دوستلار

ديوانه ليغ غالب کيلماى سماع اورار
حق مصطفى چهار يار دين بيزار يورار
باشدين اياغ كناه لارى حاضر تورار
كناه تيلاب رقص سماع اوردی دوستلار

شبلى عاشق سماع اوردى پرتو کوروب
مصطفى نى حاضر كوروب سؤال سوروب
دنيا عقبين آرقه تاشلاب كوزين يوموب
انداغ قول لار رقص سماع اوردى دوستلار

شبلى عاشق ييغلاب ايدى ايا رسول
بيطاقت من سماع اورسام هم من ملول
رسول ايدى انشاء الله قيلكاى قبول
رخصت تيلاب رقص سماع اوردى دوستلار

قول خواجه احمد رقص سماع هركيمكا يوق
تقليد برله اورسه كيركاى تموق
بو روايت پنهان ايردى ايتسام قموق
حق نى تاپيب رقص سماع اوردى دوستلار
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 09 Fevral 2010, 11:58:01
۴۱
حکمت

شريعت نى شمرايطين بيلکان عاشق
طريقت نى مقامى نى بيلور دوستلار
طريقت نى اشلارينى ادا قيليب
حقيقت نی درياسيغه باتار دوستلار

ديدارينى کوروب بولمس تون - کون اويوب
پاك عشقى نى قولغه آلماى بولمس يوروب
حقيقت نى درياسى نى خطرى کوب
هيچ اوخلاماى ديدارينى کوردوم دوستلار

ايا عاشق بو دنياده محنت تارتقيل
تارتقان جور و جفالارنى راحت بيلكيل
هو صعبتين قورغان ييركا اوزونك اورغيل
اوركان عاشق مراديغه يتار دوستلار

بو يول لارنى غذاسی دور قيغو محنت
محنت تاريب جفا چيكان كورار راحت
سحرلارده زارى قيلغان خوش سعادت
هو - هو تيو بو دنيادين اوتار دوستلار

چين دل برله يغلاغانلار كوركار لقا
سبحان ايكام ديدارينى قيلغاى عطا
قلاوزسيز يولغه كيرمنك عين خطا
يولغه كيركان منزل لاردين اوزار دوستلار

وا دريغا اوتى عمروم بيلماى قيلديم
بو دنيا امبابى نى قولغه آلديم
دنيا ايزلاب دين ايشينى آرتقه سالديم
بيلالمس مين حاليم نيچوك بولور دوستلار

محبت نى شرابى دين تاتماغانلار
بايزيد ديك هر گون اوزين ساتماغانلار
بو دنيانى عزتى دين اوتماکانلار
حيوان ايرور بلكه آندين بتر دوستلار

عاشق بولسنك عسق يوليغه قويغيل قدم
دنيا عقبين طلاق قويغيل مثل ادهم
عاقل ايرسنك دنيا اوچون ييماكيل غم
قيامت گون جزالارين بيرار دوستلار

سر شرابين ايچکان عاشق اوزين بيلمس
بو دنيانى عزت لارين کوزکا ايلمس
يوز مينك دانا ناصح بولسه پندين آلمس
وا شوقا ديب اوزين بيلماى يورار دوستلار

روز الست خدا اوزى ندا قيلغان
قالوا بلى ديبان روح لار جواب بيرکان
حضرت تبا روح لار اوچوب قارشو کيلكان
آنداغ عاشق حق جمالين کورار دوستلار

قول خواجه احمد عاشق بولسنك دنيا قويغيل
آخرت نى عذابى دين قايغو ييكيل
ايرانلارنى قيلغانلارين سين هم قيلغيل
خذمت قيلغان آخر مراد تاپار دوستلار
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 09 Fevral 2010, 11:58:22
۴۲
حکمت

حقه يانيب مؤمن بولسنك طاعت قيلغيل
طاعت قيلغان حق ديدارين کورار دوستلار
يرز مينك بلا باشقه توشسه اينكرانمكيل
اندين سونكره عشق سرينى بيلان دوستلار

عاشق لارى زار ايكرابان يولغه كيردى
هر نه جفا تيكسه آنى حق دين بيلدى
راضى بولوب يير آستيغه حاضر بولدى
زار ييغلابان سحرلارده قوپار دوستلار

ايا دوستلار هيح بيلديم من يولوم نى
سعادتقه باغلامديم من بيليم نى
غيبت سوزدين هيچ ييغماديم من تيليم نى
نادانليقيم منى رسوا قيلدى دوستلار

کيچه - كوندوز بى غم يوردوم ذكرين ايتماى
جهد ايلابان تونى - كونى فکرين ايتماى
محبت نى بازارينده اوزنى ساتماى
نفسيم مني يوز مينك طعام تيلار دوستلار

نفسينكنى سن اوز رأيى كا قويمه زينهار
ييماى، ايچماى، طاعت برله بولغيل بيدار
آخر بير كون كورساتكوسى سنكا ديدار
بيدار بولغان انده ديدار كورار دوستلار

ايا غافل حق ذكرينى تيلدين قويمه
دنياليقدين بير ذرّه سين قولغه آلمه
ايرانلارنى آرقاسيدين هرکز قالمه
يولغه کيركان آخر مراد تاپار دوستلار

وا دريغا ارمان بيله عمريم كيچتى
نفسيم منى طغيان قيلدى حددين آشتى
جانيم قوشى پرواز قيلسه روحوم قاجتى
غافل يورکان عمرين ييل كا ساتار دوستلار

ديدار كوراى ديكان قول لار بيدار بولور
يورسه، قوبسه، ياتسه، تورسه، ذکرين ايتور
ايچى تاشى انداغ قولنى نورکا تولور
الله نورين انداغ قول غه ساچار دوستلار

عارف عاشق اوز جانينى اوتقه ياقمس
بى دردلارکا عشق چيقماقين ياقيب چيقسون
دنا کيليب جلوه قلسه قيا باقمس
عشق سيز کشی بها يمدين بتر دوستلار

قول خواجه احمد بنده بولسنك ييغلاب يورکيل
محبت نی مجلسی غا اوزونك اورغيل
قيامت نی شدتيدين ماتم قورغيل
ماتم قورغان سردين خبر آلور دوستلار
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 09 Fevral 2010, 11:58:43
۴۳
حکمت

روح قوشينى تترار بولسه بال پرى
پرواز قيليب عرشدين عرشقه قونار دوستلار

قول مين ديكان دايم تينماى ذكرين ايتار
عشق اوتى غه بغرى کويوب فرياد ايتار
بيخبرلار عمرين بيلمای ييل كا ساتار
غفلت برلان جهنم كا كيتار دوستلار

آخر زمان شيخى توزار صورتلارين
زهد تقوی قيلماى بوزار سيرتلارين
کرامت دير خواب غعلت رؤيت لارين
ريا برله خلقه اوزين ساتار دوستلار

ايا مثافل عمرينك سنى اوتار ييل ديك
کوز ياشينكنى آقوزدايم آب سيل ديك
سينى سويار درجاهيده مثل قول ديك
خواجه سويسه سينى آزاد ايتار دوستلار

غفلت برله عمرينك سنى اوتار بيلکيل
جانينك برله پير خذمتين توروب قيلکيل
اندين سونكره درکاهى کا لايق بولکيل
خذمت قيلكان مراديغه يتار دوستلار

قول خواجه احمد حكمت ايتيب ييغلا سحر
ايرانلارنى الفاظى دين آليب خبر
سوز اصلى نى بيلكانلارکا اصل گوهر
ظاهريغه باقغان قوروغ قالار دوستلار
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 10 Fevral 2010, 08:49:45
۴۴
حکمت

كيلينك دوستلار الله يادين دايم أيْتينك
الله يادى كونكل ملكين آچار دوستلار
استغفر استغفارنى تينماى أيْتينك
شيطان لعين تن ملكى دين قاجار دوستلار

شيطان لعين سينرکا دشمن حاضر بولونك
کيچه الله، کوندوز الله، ايتيب كويونك
تار لحدکا کرار وقتده نوركا تولونك
ملايك لار الله نورين ساجار دوستلار

الله نورى قبر ايچى نى روشن قيلكاى
ملايك لار تيكراسيده روزن قويكاق
مؤمن بنده كوروب آنى حيران قالکاى
بو عالم نى روشنيدين کيچار دوستلار

بارچه ارواح يغيليب كيلكاى مبارك کا
خلايق لار مشغول بولكاى تبارك کا
دعا قيليب يانغاندين سونك قالوريکا
جمله ارواح سويونوب بربر قوچار دوستلار

ييتى قدم قويغاندين سونك منكر نکير
هيبت برلان كيريب كيلكاى قيليب قهير
.ايكى کوزى اوتديك يانيب اوقراب تورير
نورين کوروب تعظيم قيليب قاچار دوستلار

منكر نکير سورماى چيقيب ناله قيلغاى
کوز ياشين آقوزوبان ژاله قيلغاى
حق يادينى أيْتيب اوزين واله قيلغاى
پرواز قيليب هوا سرى اوچار دوستلار

ندا كيلكاى الهيم دين نه ييغلادينك
خاص قولوم دين قبر ايچنده نه تينكلادينك
اى بى ادب قولاق ساليب نه آنكلادينك
منكر نكير اونك سونكى كا قاچار دوستلار

يورسه، تورمه، ياتسه، قوبسه مينى ياديم
خط برات قولغه آلغان اول آزاديم
انداغ قول نى صيدى دور من، اول صياديم
قيلميش، ايتميش كناه لارين كيچار دوستلار

كناه لارين حق باغيشلاب نظر قيلغاى
اونكده، سونكده ياتقانلارى شاکر بولغاى
انددن سونكره بارچه ارواح حاضر بولغاى
قبرستانغه حق رحمتين ساچار دوستلار

بحمد الله يخشى كيلدى بيز قوتولدوك
قبر ايچنده د عذابدين فارغ بولدوك
نيچه ييل لار مرده ايردوك باز تريلدوك
دعا قيليب حقه ايلكين آچار دوستلار

منكر نكير ييغلاب ايتورسين بيلورسين
ذاتينك اولوغ هر نه قيلسنك سين قيلور سين
لطف ايلاسنك يول سزلارکا يول بيرورسين
سجده ايلاب شاکر تيلين آچار دوستلار

لاَ إلَه إلاَّ الله غه شيدا بولغان
ديدار اوچون بو عالمده رسوا بولغان
دنيا قويوب آخرت نى سودا قيلغان
حوض كوثر شرابى دين ايچار دوستلار

روز ازل تقدير قيلسه حق جمالى
يوز مينك شيطان قصد ايلاسه يوقزوالى
كوندين كونكا زياد بولغاى قال و حالى
دانا بولوب حق يول لارين آچار دوستلار

محبت نى ميدانيده جولان قيلغان
حقيقت نى درياسيدين كوهر آلغان
معرفت نى مناعى نى ايچكا سالغان
يورسه، تورسه، دُرّ و گوهر ساچار دوستلار

عاشق اولدور حقه جانين قربان قيلسه
ذكرين ايتيب چهار ضرب اوروب سحر تورسه
ايرانلاردين فيض فتوح توله آلسه
سلطان بولوب دُرّ و گوهر ساچار دوستلار

حق تعالى بويين آلغان مونده تورمس
دعوى قيليب ايشانليق نى لافين اورمس
قايده بارسه فقير مسكين دوكان قورمس
غريب بولوب ويرانه غه كوجار دوستلار

قول خواجه احمد نفس دين اولوغ بلا بولمس
يير وكوكدين طعمه بيرسنك هركيز توبمس
تغراق اولوب ييوده ياتسنك كافر اولمس
نفسی اولكان حور غلمان قوجار دوستلار
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 10 Fevral 2010, 08:50:01
۴۶
حکمت

حكايتده بيلينك مونداغ كيلتورديلار
بابا ماچين اول سلطان نى ييتكورديلار
خراسانده تورت يوز ياشنى ياشاديلار
يكرمه تورت يغاچ هركون اوچار دوستلار

ايشتى بابا ماچين اول زمانده
احمد آتليغ بير شيخ چيقمش ترکستانده
صحبت قيلميش قيز و جوان برلان انده
منع ايتكالى تركستانغه كيلدى دوستلار

كيلدى ايرسه كورديلار اول مشايخ نى
سين شيخ موسين آزغورعوچى خلايق نى
اوشل آيغان كمراه دور من بيلكيل مونى
تيو حضرت آنكا جواب بيردى دوستلار

امر ايتى لار حكيم خواجه سليمان غه
اوشل صوف محمّدى دانشمندغه
باغلاب اورونك بيش يوز قمچى اون نادانغه
بر ستونغه محكم باغلاب قويدى دوستلار

يوز کشی کيلسه توتا بيلمس ايدى
ايكى کشی توتوب آنى هم باغلادى
اوشل دمده بيش يوز قمچى سيناب اوردى
نه آه ديدى، نه واه ديدى، بيلينك دوستلار

يلانكاچ قيليب آنى باغلاب قويدى
بيش يوزدين بير قمچى نى آرتوق اوردى
بير قمچى ده زار ييغلابان فرياد قيلدى
انا احمد ييشتوروبان قويدى دوستلار

اوشل دمده مريدلارى قيلدی سؤال
بيش يوز قمچى اورغانده يوق هيچ قيل و قال
بير قمچى نى اوردى ايرسه بولدی بيحال
سر نيدور ديب اصحاب انده سوردى دوستلار

اتا ايدى آرقاسيده ديو پرى
اورناب ايردي بيش يوز قمچى آنكا تيكدى
ديو پرى آرقاسيدين در حال کوجتى
بير قمچى سى آنكا تيكدى بيلينك دوستلار

بابا ماچين اولدوم ايدى وا احمدا
كيلمسم رسرا بولوب خلق لار آرا
اولا ايرديم اوشبو حالت برلان منا
زار ييغلابان عرض حالين ايتى دوستلار

اتانينك ايرليكى نى انده بيلدى
رياضت تارتقوزوبان يول كورساتى
اتا برله اوچ مرتبه خلوت كيردى
مراد مقصد پيردين ايرميش بيلينك دوستلار

مرشد بولماى هركز مراد تابماديلار
حذمت قيلماى حقه واصل بولماديلار
زار ييغلابان كيچه بيدار بولماديلار
زار ييغلاماى حق ديدارين كورمس دوستلار

ياد ايتالوك قول خواجه احمد اوليانى
مريدلارى بابا ماچين اول سلطان نى
قوللانغايمو عاصى يوسف بيضاوى نى
نظم ايلاديم بو حكايت بيلينك دوستلار
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 10 Fevral 2010, 08:50:27
۴۶
حکمت

خضر بابام سالدى مينى اوشبو يولغه
آندين سونكره دريا بولوب تاشتيم دوستلار

شريعت نينك بازارينى سيران قيلديم
معرفت نينك بوستانيدد جولان قيلديم
طريقت نينك پيشكاهند، طيران قيلديم
حقيقت نينك ايثيكينى آچتيم دوستلار

الست خمرين پير مُغان تويا بيردى
ايچار بيرديم مقداريم چه قويا بيردى
قول خواجه احمد ايج و تاشيم كويا بيردى
طالب لاركا دُرّ و گوهر ساجتيم دوستلار
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 10 Fevral 2010, 08:50:40
۴۷
حکمت

قايو مخلوق خالقيغه مطيع بولسه
عالم خلقى اوشل قول نى سويار دوستلار
يادين ايتيب بغرى پيشيب ايچى كويسه
دم اورسه سانسيز اوچقون اوچار دوستلار

تيلى كونکلى سرى برلان ذاكر بولوب
اوج يوز آلتميش تمورلارى قانغه تولوب
يازى قيشين بلبل لارين واله بولوب
سيرايو شاخدين شاخقه قونار دوستلار

بو کونكل بوستانيدور عجب بوستان
ايچنده سيراشورلار هزار دستان
کورونور هر شاخ اوزره تورلوك الوان
نعمت لارنى بيشكانينى کورار دوستلار

ظاهر نعمت شکرينی غافل بيلماس
باطن داغين قياس برله کورسه بولماس
ظاهر کوزی غفلت برله باقيب کورماس
ظاهر کوزی آچلسه اول کورار دوسنلار

باطن کوزی آچلسه جمله پرده
آجلور کيتار، قالماس حجاب سرده
جان نينك کوزی حيران بولور اوشل ييرده
باقيب ايمان نوری برله کورار دوسنلار

قول خواجه احمد يسوی نينك اوشبو سوزی
عجب ايرمسباقيب کورسه سردين کوزی
فناليق مقامينده اوزنينك اوزی
فناليق ايچره باقيب کورار دوسنلار
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 10 Fevral 2010, 08:50:56
۴۸
حکمت

خوش غايب دين ييتوشتى بر جماعه درويشلار
باطيده هو - ديلار سرى پنهان درويشلار
تينماى روان يورارلار تنسه تكبير ايتورلار
تابسه صحبت قورارلار خوش صحبت ليغ درويشلار

جنده لارى پر صلاح تب تصبيح لارى الاَّ الله
خذمت قيلور هر صباح بلا خوردور درويشلار
ژنده لارى کيرجفان كونكليده يوز مينك ارمان
اوشبو دنيا بى پايان کوزکا ايلمس درويشلار

ژنده لارى ايكنيده، عصالاری ايلکيده
ايزد يادى کونكليده الله ديور درويشلار
اصلى فقير بيلسه لار وجود شهرين کيزسه لار
ظاهر - باطن تورسه لار سعادلميغ درويشلار

مشمايخ لار سراسرار خذمتيده بول زنهان
پيغمبردين يادکار قالغان ترور درويشلار
قول خواجه احمدمسکين بول، مسکينلاردين معنی سور
درويشليکنی بيل خضور هو قوشيدور درويشلار
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 10 Fevral 2010, 08:51:10
۴۹
حکمت

يول استيده اولتوروب يول نى سورکان درويشلار
عقبيدين خبر ايشتيب يولغه کيرکان درويشلار
عصالارى ايلکينده همت قورى بيلينده
ايذيم يادى تيلينده الله ديكان درويشلار

خرقه لاری کيرچفان کونكليده يوز مينك عيان
بيلينكز ايکى جهان کوزکا ايلمس درويشلار
درويش حق ننك منظورى ذکرى تورور کلزاری
حق نى يادى اسرارى خوب ادبليغ درويشلار

يازوقرم کوب يولاتماس اسباب دارومسين تابماس
کوزده ياشين قوروتمس ياشى اققان درويشلار
سرى برلان سوزلارلار تيل کا حكمت توزارلار
عشق برلان جان كزارلار رنکى سريغ درويشلار

ايت نفسينى اولدورور قيزيل يوزين سولدورور
خواجه احمد قول بوترور ساتيب يسون درويشلار
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 10 Fevral 2010, 08:51:23
۵۰
حکمت

اون سيکز مينک عالمده حيران بولغان عاشقلار
تابمای معشوق چراعين سرسان بولغان عاشقلار
هردم باشی اورگوبوب کوزی حلقه تيلمروب
هو - هو تيو جور کولوب کريان بولغان عاشقلار

کويوب، يانوب، کل بولغان، عشقيده بلبل بولغان
کيمنى کورسه قول بولغان، مردان بولغان عاشقلار
يول اوستيده خاك بولغان سينه لارى چاك بولغان
ذكرين ايتيب پاك برلغان نالان بولغان عاشقلار

همّت قورين باغلاغان يورك بغرين داغلاغان
فرياد اوروب ييغلاغان کريان بولغان عاشقلار
كاهى يوزى سارغايب کاهى يوليده غريب
تسبيح لارى يا حبيب جولان بولغان عاشقلار

احمد سين هم عاشق بول صدقينك برله صادق بول
دركاهى كا لايق بول جانان بولغان عاشقلار
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 11 Fevral 2010, 10:18:34
۵۱
حکمت

غريب ليغ ده غريب بولكان غريب لار
غريب لار حالى نى بيلكان غريب لار
سبب برله يراق ييركا باريبان
قرينداش قدرينى بيلكان غريب لار

سوساكانده سوكا محتاج بولغان
تريكده زار اولوب اولكان غريب لار
کشى بيلمس غريب لار حالى نيدور
مكر بيلكاى غريب بولغان غريب لار

غريب ليغ قاتيغ ايشدور اى عزيزيم
كيم اول بى قدر اولار مسكين غريب لار
کيل ايمدى احمدا اوزونكا باقغيل
غريب سين سين غريب مسكين غريب لار
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 11 Fevral 2010, 10:18:47
۵۲
حکمت

حق قول لاری درويشررلار حقيتت نى بيلميش لار
حقه عاشق بولغانلار حق يوليغه کيرميشلار
حق يوليغه کرکانلار الله تيو يورکانلار
ايرانلار ايزين ايزلاب مملکتدن دين کيچميشلار

عالم فخری مصطفی انداغ ايدی مرحبا
معراج تونی ايتی فخر فقير يولی نی آلميشلار
کونکل بيرمای دنياغه شروع قيلمای حرام غه
حقنی سويکان عاشقلار حلايقدين کيچميشلار

دنيا منينك ديکانلار جهان مالين آلغانلار
کرکس قوشديك بولوبان اول حرامغه باتميشلار
ملا، مفتی بولغانلار ناحق دعوی قيلغانلار
آق نی قرا قيلغانلار اول تموغغه کيرميشلار

قاضى، امام بولغانلار نا حق دعوی قيلغانلار
اول حمارديك بولوبان يوك آستيده قالميشلار
حرام يكان حاكم لار رشوت آليب يكانلار
اوز بارماقين تيشلابان قورقوب توروب قالميشلار

تاتليغ - تالميغ يكانلار تورلو ك - تورلوك کيكانلار
آلتون تخت اولتوركانلار تفراق آستين قالميشلار
مؤمن قول لار صادق لار صدقى برله تورکانلار
دنيا لغين صرف ايتيب اوچماخ حورين قوچميشلار

قول خواجه احمدبيلميش سين حق يوليغه کيرميش سين
حق يوليغه کيرکانلار حق ديدارين کورميشلار
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 11 Fevral 2010, 10:19:00
۵۳
حکمت

هر حلقه سى قورولدی ای درويشلار کيلينك لار
حق مفره سى يايلدى آندين اولوش آلينك لار
قال علمنی اوقوبان حال علمی كا ييتيبان
يوقلوق ايچره ياتيبان بارليق لاردين آلينك لار

يرتيب شفقت پرده سين تيلاب ديدار وعدهسين
آچيب کونکل ديده سين مشاهده قيلينك لار
هو ارّه سين آايبان نفس باشيغه ساليبان
تونى - کونى طالب لار جان نى قربان قيلينك لار

حلقه ايچره هو دينکيز عشق اوتيغه يانينكيز
تن جان برلان طالب لار تكبير باشلاب ايتينك لار
هو - هو تيو زار اينکراب هو ديمکده معنى بار
ديدارين اميد وار رحمتيدين آلينك لار

قول خواجه احمد قول بولغان يول اوستيده کل بولغان
طالب لارغه مل بولغان اندين عبرت آلينك لار
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 11 Fevral 2010, 10:19:17
۵۴
حکمت

قد علمنا انت في کل امور
انت کافى، انت عافى، يا غفور
کافى فى الغيب هو من فى الحضور
انت کافى، انت عافى، يا غفور

مصطفى در حالت نزع ايرديلار
بير کروه نى عاصى ديب قايغورديلار
امتيم واى، امتيم ديب ايديلار
انت کافى، انت عافى، يا غفور

بيزنی سويدی اوز کانلارنی سويمدی
هم اتا انی سی هم سويمدی
يرلقاديم ديما گونچه قويمدی
انت کافى، انت عافى، يا غفور

حق تعالى دين ندا کيلدى آنکا
امتينك اشين حواله قيل منکا
جمله سين باغشلايين انده سنکا
انت کافى، انت عافى، يا غفور

ايدر مندين سونکره امت بولغوسى في
فرض و سنت نى قويوب فسق ايتكومى
اکثر امت دين ايمان کيتکوسى
انت کافى، انت عافى، يا غفور

امتيم امت لار ايچره صافى دور
نيلايين کوبراکى عاصى، جافى دور
قادريم اوز وعده سيغه وافى دور
انت کافى، انت عافى، يا غفور

مسکين احمد سين بو يازوق زهريدين
قوتولونك ايچسنك شراب مهريدين
کرچه کوب قورقوم الهيم قهريدين
انت کافى، انت عافى، يا غفور
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 11 Fevral 2010, 10:19:35
۵۵
حکمت

محمّدنی بيلينك ذاتى عرب دور
طريقت نی يولى کل ادب دور
حقيقت ييلمكان آدم ايمس دور
بيلينكز هيچ نيمه کا اوخشاماش دور

بيلينك نيچون ايرور هم بی چکونه
و بی شبهه ايرور هم بی نمونه
قهرلانسه قیلور يير برله يکسان
بولادور زلزله يير برله آسمان

رحمت قيلسه بيلينكيز رحمتی بار
بيرور بولسه توکانمس نعمتی بار
محمّدنى صغت قيلسم کمينه
آناسينى آتى بيلكيل امينه

اتاسى آتى عبدالله ايکان دور
آنادين توغمايين اولكان ايكاندور
محمّدنى باباسى ساقلاعاندور
يلانكاچ آچ لارنى يوقلاکاندور

باباسينى بيلسنکيز عبدالمطلب
کونكلده ساقلاكاى سيز يخشى بيليب
باباسينى اتاسى ايردى هاشيم
ايشيتكانده آقادور کوزده ياشيم

بيلينك تورتونچى سى دور عبد المناف
آلارنى بيلسه هر کيم کونكلى دور صاف
رسرل نى بيلسه هر کيم تورت پشتين
قيامتده كزار سيكز بهشتين

باباسى ييتى ياشيده اولوب دور
رمول نى عمّى سى کا بيريب دور
ابوطالب علی نی آته سی دور
قاموغ اعرابی لارنی کاته سی دور

ابو طالب بولادوز ايش باشيده
محمّد اولتورور دايم قاشيده
محمّدنى ياشى اون ييتى بولدی
که اول وقتده خديجه آنى کوردی

محمّدنى بيينك کيم مثل شونقار
خديجه آنى کوروب بولادور زار
خديجه کونکليده آنى سويادور
محمّد عشقيده ايچی کويادور

کيچه - کوندوز تيلار آنی خدادين
بيلينکيز عاقبت تابتی مرادين
کورونکيزلار خدانی شيوه سينی
محمّد باقغان ايکان تيوه سی نی

خديجه غه رسول چاكر بولوبتور
بو باعث برله بيل آنى آليب دور
خديجه نى خدا بختين آجيب دور
رسول نى باشيغه دُرلار ساجيب دور

رسول نى ياشلارى قرقه يتيب دور
كه اندين سونك خدادين وحی اينيب دور
كه آندين سونك محمّد بولدى پادشاه
رسول نى كونكليده يار بولدى الله

محمّدنى ايشين الله بيتوردی
خلايق بارجه سى ايمان کيتوردى
رسول نى باشيده بولدی عمامه
كمال تابتى اوتوز اوچ مينك صحابه

رسول غه بارجه سى خذمت قيلادور
ادب برلان يوروب عزت قيلادور
رسول آلديغه بير يتيم كيليب دور
غريب و مبتلا مين ديب ايتيب دور

رحم قيلدى رسول آنى حاليغه
تيلاكانين آنى بيردى قوليغه
رسول ايدى ايكامين هم يتيم مين
يتيم ليكده، غريب ليغ ده يتيب مين

محمّد ايديلار هر کيم يتيم دور
بيلينك لار اول مينی امتيم دور
يتيم نى كورسنكيز آعريتمنکيزلار
غريب نی كورسنكيز داغ ايتمنکيزلار

يتيم لار بو جهانده خوار ايكاندور
غريب لارنى ايشى دشوار ايكاندور
غريب لارنى ايشى دايم سلوك دور
تريك ايرمس غريب مثل اولوك دور

خدايى غه غريب لار بيلكولوك دور
غريب نى ايرته اخشام سوركولوك دور
صفت قيلسام على شير خدادور
که شمشير برله كافرنى قرادور

کافرلارنى قيلور ايمانغه دعوت
برادور هر زمان اسلام كا قوّت
که مؤمن بولغانين آليب كيلادور
قبول قيلماغانين چاپيب كيلادور

که شمشير قولغه آليب مينسه دلدل
توشادور قوم کافرلارغه غلغل
قوليده كى يراغى ذوالفقارى
چاپوشقانده اوزالور قرق قارى

على نى بار ايدى اون سيكز اوغلى
آنى هر قايسى سى دور كاته توغلى
على اسلام اوچون قانلار يوتادور
که اسلام توغى نى محكم توتادور

خواجه احمد بيل غريب ليك كا توشوب دور
رسول اولاديغه سوزلار قاتيب دور
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 11 Fevral 2010, 10:19:55
۵۶
حکمت

کوركان زمان اينانكان ابابكر صديق دور
اوستون يولوب تيانكان ابابكر صديق دور
مونكلاشقانده ييغلاكان قوللوقغه بيل باغلان
ايچ بغرى نى داغلان ابابكر صديق دور

بير قوليدين قيتماکان سرّين هر کز ايتماکان
غافل بولوب ياتماكان ابابكر صديق دور
جان جانانغه قاوشورکان قزين قولدين تابشورکان
قول قاوشوروب يالباركان ابابكر صديق دور

اينكان سوزيكا ييتكان نفس هوادين كيتكان
حق رسول نى برکيتكان ابابكر صديق دور
محمّدكا قين انا قيلكان ايمس هيچ خطا
بوينيغه سالغان پوطا ابابكر صديق دور

قول خواجه احمد قيل تصديق يار غارين قيل تفريق
عارف ليكده بيل صادق ابابكر صديق دور
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 11 Fevral 2010, 10:20:12
۵۷
حکمت

ايكنچى سى يار بولغان عدالت ليغ عمردور
مؤمن ليغ ده يار بولغان عدالت ليغ عمر دور
بلالغه اذان ايتورکان شريعت نى بيلدوركان
دين سوزينى اوقتورکان عدالت ليغ عمر دور

کعبه ايشيكين آچدركان بارجه بت نى سندورکان
رسول كونكلين تيندوركان عدالت ليغ عمر دور
شريعت نى باش توتقان طريقت نى راست توتقان
حقيقت نى خوب بيلكان عدالت ليغ عمر دور

اوغلين جرلاب كيلتورکان دره اوروب اوت اولتوركان
عدل قيليب يول سورکان عدالت ليغ عمر دور
چراغ بولوب اوجماکان دين يوليدين يانماکان
ناحق ايشنى ايتماكان عدالت ليغ عمر دور

مسکين احمد قيلغيل ياد قيلكيل عجزينکنى بنياد
شايد روحى شاد قيلكاى عدالت ليغ عمر دور
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 11 Fevral 2010, 10:20:27
۵۸
حکمت

اوچونجى دوستى يار بولغان عثمان با حيا دور
هر نفس ده يار بولغان عثمان با حيا دور
حق رسول نى دامادى دينميزنى آبادى
بنده لارنى آزادى عثمان با حيا دور

اوقوغانى شاطبى آيت حديث كاتبى
منبر اوزره خطيبى عثمان با حيا دور
مناجاتى کوه طور آلغانلارى ايكى نور
ايتكانلارى بارچه دُرّ عثمان با حيا دور

كوبلار كيليب پياده قويماديلار شهزاده
شهيد قيلديلار انده عثمان با حيا دور
توصيف قيلدينك عثمان نى خواجه احمد سين انى
يوقتور شك و كمانى عثمان با حيا دور
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 11 Fevral 2010, 10:20:43
۵۹
حکمت

تورتونچى سی يار بولغان شير خدا على دور
هم معراجده يار بولغان شير خدا على دور
ايتكان سوزى رحمانى كورسنك يوزى نورانى
کافرلارنى قرآنى شير خدا على دور

همت قورى بيليده موليم يادى تيليده
ذوالفقارى ايلكيده شير خدا على دور
منيب جيقسه دلدلغه ييركا توشار زلزله
كافرلارغه غلغله شير خدا على دور

دشمن لاركا مقابل بولدى كافرغه قاتل
زايل قيلكان باطل نى شير خدا على دور
رحمت قيلكاى بير وبارهرنه قيلسه ايركى بار
خواجه احمدكا مددكار شير خدا على دور
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 11 Fevral 2010, 10:20:59
۶۰
حکمت

حكمت برلان اول عدم دين بار ايلادى
اون سكيز مينك قاموغ عالم حيران ايرور
قالوا بلى ديكان قول لار اولوش آلدى
سكوت ايتكان قول لار دينى ويران ايرور

حق تعالى ايمان عطا قيلدى بيزكا
اول مصطفى رسولى ايدى بيزكا
درود ايتسك قوّت برور دينميزکا
يوق ايرسه قيلغانلاريم يالغان ايرور

اول ألَسْتُ بِرَبِّكُمْ ديدی خدا
قالوا بلی دييان روح لار قيلدى صدا
يغلاب کيلدوك ايشكينك کا جمله کدا
لطف ايلاسنك يوز مينك عاصی خندان ايرور

توبه قيلسام کيچارمو كين قادر اله
يوق ايرسه نيتكوم انده مين رو سياه
تانكلا بارسام ايليك آياغ بارچه كواه
حق قاشيده بارچه ايشلار آسان ايرور

ييغلامايمو اوتى عمروم ايا شاهيم
قبساب كيلدى قرانغولوق چيقيل ماهيم
سندين اوزكا يوق پناهيم، تکيه گاهيم
كيچه - كوندوز تيلاکانيم ايمان ايرور

امت اوچون رسولن دايم قايغو ييدی
تيلاب امت كناهى نى حقدين آلدی
كيچه - كوندوز قايم توردى تنكريم بيلدى
تيلده امت مين دير دلده يالغان ايرور

امت بولسنك مصطفى غه پى و بولغيل
ايغانلارين جان ردله سين هم قيلغيل
كيچه قايم كوندوزلارى صايم بولغيل
چين امت نى رنكى مثل سامان ايرور

سنت لارين محكم توتوب امت بولغيل
كيچه كوندوز درود ايتيب الفت بولغيل
نفس نى تيغيب محنت ييتسه راحت بيلكيل
انداغ عاشق ايكى كوزى كريان ايرور

قول خواجه احمد نفس دين مدام سرا بولغيل
كويوب پشيب دردى برلان ادا بولغيل
كيچه - كوندوز تينماى ييغلاب كدا بولغيل
دردين تارتسنك خواجه سيندين رضا ايرور
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 13 Fevral 2010, 13:30:18
۶۱
حکمت

اوشبو سزنى بيلماکان جاهل كشى
درويشلارنى قدرينى قاچان بيلور
تيل اوچيده امت مين ديب دعوى قيلور
مصطفى نى قدرينى قاچان بيلور

طريقت نى لذتى دين تاتقان كشى
دنياسنى دين يوليده ساتقان كشى
کيچه - کوندوز كوزده ياشى آققان كشى
بو دنيانى قدرينى قاچان بيلور

کيچه - کوندوز طاعت قيلسه اوشال عاشق
بو دنياده كناهى دين بولور فارق
درويشلارنى غيبت قيلغان اول منافق
معرفت نى قدرينى قاچان بيلور

دنيا مالين ييغيب يول نى يتورکانلار
ايسز عمرين کفر ايچينده كيچورکانلار
قلاوزسيز بياباندد يوروكانلار
معبت نى قدوينى قاچان بيلور

کوب كشيلار دعوى قيلور نفس كوزاتيب
ييب ايچيب حيوان کبى تونلار ياتيب
روزه توتمس زکوة بيرمس هم اوياتيب
حق تعالى قدرينى قاچان بيلور

کل متقى آل مين ديب ايدى رسول
ای قل احمد بو حديث نى قيلغيل قبول
سويرى خلقى قبول قيلمای بولدى ملول
جاهل خلقى پير قدرينى قاچان بيلور
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 13 Fevral 2010, 13:30:35
۶۲
حکمت

عارف عاشق جان ملكيده الم تارتسه
اون سيكز مينك قاموغ عالم غلغل بولور
کونكل قوشى شوق قناتين توقوب اوچسه
جمله وجود يادين سيرار بلبل بولور

محبت نى ميدانى غه اوزين سالسه
معرفت نى ميدانى غه اوزين اورسه
سرّ شرابين ايچيب عاشق روحى قانسه
مودّت نى كلزاريده خوش کل بولور

ايرانلار حق ياديدين غافل بولماس
رجال لا تلهيهم دير خالق الناس
ايران يولين توتقان هركز يولده قالماس
اول حضرتده سر اسرارى مقبول بولور

الست خمرين کيمکا بيرسه اوشال ساقى
بلا مدام ايچيب اسرو منكو باقى
تنين، جانين کويدوروب شوق احراقى
ايچيدين كويار ياقيلور هم كل بولور

ظاهرين آتی برلان بزه کانلار
باطن لارين آتی برله توزه کانلار
شوق اوتى نى ايج كونكل كا كيزاکانلار
ماسوى برلان قاچان مشغول بولور

طريقت دور بو يول آتين بيلسه درويش
معرفت نى متاعيدين آلسه درويش
اوزكا يول لار باد هوا سانسه درويش
حقيقت نى ميدانيده اير اول بولور

قاتيغ لانيب قول خواجه احمد يولغه كيرکيل
قولنى كورسنك قولى بولوب معنى سورکيل
يا الهيم روزى قيلسه معنى آلكيل
معنى سوراب معنى آلغان چين قول بولور
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 13 Fevral 2010, 13:30:52
۶۳
حکمت

سبحان ايذيم بنده سيغه لطف ايلاسه
ايچى ياروب تاشى کويوب بريان بولور
پير ايتاكين توتوب عاشق يولغه کيرسه
حقنى ايزلاب ايكى کوزی گريان بولور

جاندين کيچماى عشق سرينى بيلسه بولماس
مالدين كيچماى من - من ليكنى قويسه بولماس
سومى بولماى يالغوز اوزين سويسه بولماس
انداغ عاشق ايل كوزيدين پنهان بولور

جانينك قيناب زقوم چيناب عاشق بولكيل
ياشينك توكوب كوزونك سولاب صادق بولكيل
اندين کين دركاهى غه لايق بولكيل
جانينك بيرسنك رحم ايلاسه جانان بيلور

عشق يوليده کيچه - کوندوز ييغلاغانلار
جاندين كيچيب بيلين محكم باغلاغانلار
خذمت قيليب حق سرّينى آنكلاغانلار
تون اويقونى حرام قيليب نالان بولور

وا دريغا عشق يوليده جانم بيرماى
غوّاص بولوب دريا ايچره کوهر تيرماى
حقدين اوزکا غغلت لارنى يراق سالماى
تانكلا بارسه ندامت لار چندان بولور

عاشق بولسنك بايزيدديك اوزونك ساتقيل
والله، بالله دنيا حرام تاشلاب آتقيل
قانلار توکوب کوزلارينكدين تونلار قاتقيل
بير لحظه ده شيطان ملكى ويران بولور

تانك آتقونچه ذکريز ايتكيل جانينك برله
تاغ - چول نى بستان قيلكيل قانينك برله
تاشدين قاتيغ تاشقه ياتقيل يانينك برله
يولدين آزغان يوزمينك غافل مردان بولور

تاشدين قاتيغ تاشنى سوزکان بی خبرلار
عقبى ايشين آرقه تاشلاب دنيا ايزلار
آيت - حديث بيان قيلسام قاتيغ سوزلار
ظاهر آدم باطن لارى شيطان بولور

ذكرين آيغيل قانلار آقسون کوزلارينكدين
حكمت آيغيل، درلار تامسون سوزلارينكدين
كل لار اونسون هر بر باسقان ايزلارينكدين
كل کا باقسنك كل آچيليب بوستان بولور

سحرلارده ايرته توروب قانلار يوتكيل
پير مغان ايتاكى نى محكم توتكيل
حقه عاشق بولغان بولسنك جاندين اوتكيل
جاندين كيچكان چين عاشق لار عريان بولور

بو دنياده فقيرليق نى عادت قيلكان
خوارليق تارتيب مشقت نى راحت بيلكان
قول خواجه احمد يخشى لاركا خذمت قيلكان
قيامت کون انداغ كشى سلطان بولور
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 13 Fevral 2010, 13:31:10
۶۴
حکمت

تجلّى نى مقامى دور عجب مقام
اول مقامده عاشق قول لار جولان قيلور
قى کونكل کا تجلى سين پَرْتُوْ سالسه
بيخود بولوب اوزين بيلماى افغان قيلور

اول مقام نى يول لارينى رهزنى بار
قلاوزسيز يولغه كيرسه يولدين آزار
وسواس ايلاب شيطان لعين دينين بوزار
اون يوليغه ساليب آنى حيران قيلور

اول مقام بيلدوركالى رهبر کراك
طريقت نى بيشه سيده صفدر كراك
اوشبو يول نى ضبط ايلاكان سرور كراك
انداغ مرشد اوجماق ملكين طيران قيلور

اول مقام غه ييتكان عاشق شراب ايچار
خانمانين برباد بيريب جاندين كيچار
شوق قناتين حضرت تبا توقوب اوچار
عرش، کرسى، لوح، قلم طيران قيلور

ديدار تيلاب ترك ايلاسنك ماسوانى
اولماس بورون وجودينكنى ايلا فانى
وَاَنْهار مِنْ عَسَلٍ مُصَفَّانى
اوجماخنى خاص قولى غه احسان قيلور

اول مقام نى توحيد آلميغ درختى بار
سايه سيده عاشق قول لار براق سوار
هر بر شاخى مينك ييل چيليق يول نى توتار
هر قايسى سى اوز اوزيكا عنوان قيلور

اول درخت نی ميوه سيدين تاتقان قول لار
دنياسينى آخرت قه ساتقان قول لار
كور ايچنده آسايش ده ياتقان قول لار
سحرلارده كوز ياشينى عمان قيلور

همت قورين قول خواجه احمد بيل كا باغلا
محبت نى اوتى برله يورك داغلا
يقام توتوب تانك آتقونچه تينماى يغلا
شايد منكا رحم ايلابان جانان قيلور
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 13 Fevral 2010, 13:31:32
۶۵
حکمت

محبّت سيز خلايقدين هر كيم قاچسه
عارفلارنى صحبتيدين جولان قيلور
اورتاب کويوب عشق يوليده ياشين ساچسه
سبحان ايكام عرش اوستيده مهمان قيلور

بندم ديكاى كويكان لارنى سويوب الله
حق كورسانكاى ديدارينى والله، بالله
قايده بارسه تسبيح لارى شيئاً لله
هر نه تابسه حق يوليده احمان قيلور

ذاكر بولوب ذکرين ايتسه کيلکان ندا
شيطان لعين ييتميش فرسنك بولغاى جُدا
دردى بولسه حق درديغه بيرکاى دوا
انداغ قولنى اوزى ايزلاب جانان قيلور

تون سحرلار حق اويغاتيب قان ييغلانار
بيدار قيليب اوز عشقى غه بيل باغلانار
دواسى يوق دردنى بيريب زار اينكراتار
مونده ييغلاب انده بارسه سلطان قيلور

حقه عاشق بولغان قول لار دايم بيدار
رضوان ايماس مقصودلاری ايرور ديدار
اهل عيال خانماندين بولور بيزار
اسماعيل ديك عزيز جانين قربان قيلور

ديوانهء ژوليده مو حقنى تاپقان
شمشير حق قولغه آليب نفسنى چابقان
قايده بارسه کوزنى يوموب سرنى تابقان
انداغ سرنى تابقان کشی مردان بولور

شيخ مين تيو باش کوتارکان حقه رقيب
من ليك قيليب سبحانى غه بولماس حبيب
بيدار بولوب دردسيزلارکا بولغان طبيب
بو دنيانى مؤمن لار کا زندان قيلور

ای مؤمن لار طاعت قيليب طايانمنك لار
امانت دور عزيز جانغه اينانمنك لار
حرام حريش ييغميش مالغه اينانمنك لار
مال لارينكنى قريش آتليغ ييلان قيلور

بو دنياغه بنا قويغان قارون قانى
دعوی قيلكان فرعون بيله هامان قانى
وامق، عذرا، فرهاد، شيرين، مجنون قانى
قهر ايلاسه بير لحظه ده يكسان قيلور

هيچ بيلدينكمو آدم اولماى قالغلنی نی
بو دنيانى وفاسينی بيلکانی نی
دنيا طلب بوى خدا آلقانى نى
الله ديسنك كوز ياشينكنى باران قيلور

عشق درديغه دوا سورغان حاضر تيلبه
ظاهرده يوق باطن ايچره قيلور جلوه
مغز سرينك بغرينك ايچره قيلور غلبه
عشق درديغه دوا قيلسه رحمن قيلور

کيمن کورسنك بو يول لارده يالغان عاشق
ظاهر صوفى باطن ايچره ايرماس صادق
انينك اوچون معشوقيغه بولماس لايق
يالغانچى نى روز محشر سرسان قيلور

تن سوزلامس، جان سوزلامس ايمان سوزلار
جاندين كيچكان چين عاشق لار حقنى كوزلار
عارفلارکا خذمت قيليب يولين توزلار
اول عاشق نى خلايققه سلطان قيلور

عاشق بولسنك کيچه - كوندوز عشق استاکيل
طاعت قيلکيل کيچه قوپوب هيچ ياتماكيل
عاقل بولسنك نادانلاركا سن ايتماكيل
چين درويشلار طاعت لارين پنهان قيلور

درويش بولسنك طاعت قيلکيل قيلمه ريا
هر کوشه ده طاعت قيليل تنکر يم کواه
يالغان درويش قايده بارسه رزق و دعا
عادل پادشاه طاعت لارين عصيان قيلور

واى اوشنداغ درويش لاردين پناه بيركيل
اول نادانغه الفت قيلماى جانيم آلكيل
ايا محبوب يولده قالديم يولغه سالكيل
توبه ليقنى خواجم جاين بستان قيلور

درويش مين ديب طاعت قيلور خلق ايچنده
ريا قيليب يوکوروب يورار انده مونده
الله اوچون طاعت قيلكان درويش قنده
چين درويشلار تاغ - چول نى مكان قيلور

عاشق بولسنك عشق يوليده فنا بولكيل
ديدار ايزلاب حسرتيده ادا بولكيل
مرهم بولوب چين دردليك کا دوا بولكيل
خلق خوشنى جان آلورده آسان قيلور

عاشق لاری حقه باقيب نعره تارتار
محبت نى درياسيغه چوموپ باتار
کوهر آليب معشوقيغه رازين ايتار
قطره ياشى ييرکا تامسه عمان قيلور

عاشق لارکا بيردى مشقين کويدورکالى
زليخاديك قدين دوتا قيلدورکالى
رياضت رنك - رويين سولدورکالى
چين عاشق نى رنك - رويين سامان قيلور

عاشق لاری حق قهريدين قورقوب تترار
يير و كوکده ملايك لار ييغلاب تورار
کاهى قيزيل، كاهى سريغ بولوب يورار
ناله قيليب يير و كوكنى لرزان قيلور

عاشق لارنى خاص معشوقى سحر خيزلار
ندا قيلکاى يا عبدى ديب باطن كوزلار
عشق شدتى طغيان قيلسه دردى زورلار
قايده سينديب يورك بغرين بريان قيلور

قايده سينديب، قايده سين ديب عاشق ايتار
عاشق لارده حدنه بولغاى معشوق ايتار
آغزى ايتمس، تيلى ايتماس دلى ايتار
اوچ يوز التميش تمورلارى لرزان قيلور

عاشق لارنى قيامت کون حالين سورکاى
چين عاشق نى کوکسين ياريب داغين كوركای
پاك آغزيدين كفكى آقيب يوكروب يورکاى
کيمكا بيرسه پاك عشقى نى خيران قيلور

عاشق لارنى، طلب لارى جام شراب
معشوقيغه ييتماك اوچون بغرى کباب
روح لارينى غذاسى دور چنك، رباب
آهى چيقسه ييتى اقليم ويران قيلور

قدرت برله هرنه قيلسه ايرك ليك اوزى
قدرتيدين معلوم تورور قيش و يازى
اى نا انصاف الله بيله قيلمه بازی
قهار اكام جالنيغ لارنى بيجان قيلور

ييغلامقنى هر آدم غه بيرکان قانى
ييغلاماق ليغ آسان ايماس بغرقانى
كوز ياشينكنى ريا قيلمه حقنى تانى
حق تعالى سريكان لارنى كريان قيلور

قرل خواجه احمد بنده مين ديب اورمكيل لاف
ريا برلان قيلغان طاعت بارجه كذاب
شريعتده طريقتده كارينك خلاف
آخرتده كذابلارنى عريان قيلور
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 13 Fevral 2010, 13:31:51
۶۶
حکمت

محبت نى بوستانيده هزار داستان
بلبل لارى سيرار انده افغان قيلور
معرفت نى ميدانيده جولان قيلغان
کيچه - کوندوز کوز ياشينى عمان قيلور

اول بلبل نى آوازينى ايشتكان لار
تكبرنى تاغين كسيب اوشاتكانلار
بو دنيانى مزاسينى اونوتقانلار
فرياد اوروب ييغلاب کوزين کريان قيلور

عاشق قول لار بو دنيانى کوزکا ايلماس
دنيا عشقين زاهد قول لار تيل کا آلماس
کيچه - کوندوز مست و حيران اوزکا کيلماس
ديدار تيلاب كوکسين تيشيب نالان قيلور

وا دريغا کيچتی عمروم تويماى قالديم
راحله سيز يولغه کيريب هاريب قالديم
همت قورى بيل کا محكم چاليب آلديم
اوزى سويكان عاشق لارين سرسان قيلور

ايا عاشق كيچه - كوندوز تينماى ييغلا
کويوب پشيب يورك بغرينك ايزيب داغلا
اجل ييتسه مردانه وار بيلينك باغلا
مونداغ عاشق بارسه انده مهمان قيلور

شيخ منصور اوز باشينى دارده کوردى
پرتو سالدى حق ديدارين انده کوردى
بيخود بولوب اوزين بيلماى افغان قيلدى
واشوقا ديب اوزين بيلماى جولان قيلور

شيخ شبلى عاشق بولوب بيلماى اوتى
شيخ بايزيد ييتميش يولى اوزين ساتدى
بو دنيانى عزت لارين تاشلاب آتى
اوتكان ايشقه ندامت ديب افغان قيلور

انداغ ايلار صحبتى نى تابقان کيشى
مست و حيران بولوب يورار ياز و قشى
سحر لارده چار ضرب اورمق آنى ايشى
ظاهر خنده باطن لارين پنهان قيلور

مونداغ بولماى حق وصلى غه ييتيب بولماس
رسوا بولماى سردين معنى آليب بولماس
هو ذکرينى ايتيب دايم تيلدين قويماس
وهمى برلان دل لارينى لرزان قيلور

قول خواجه احمد بو حكمت نى كيمكا ايدينك
عارف مين ديب خلايقغه اوقوب يايدينك
تأثير قيلماس عالم لارغه ايغان پنمدينك
عارف اولدور تن ملكى نى ويران قيلور
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 13 Fevral 2010, 13:32:10
۶۷
حکمت

محبت نى درياسيده غواص بولوب
معرفت نى كوهرينى آلغوم كيلور
طريقت نى ميدانيده پرواز قيليب
اون طوبى درختى غه قونغوم کيلور

اول طوبى درختى نى ايكسه بتماس
الله ديكان عاشق قول دين تقصير كيلماس
چين عاشق ايران هركز يولده قالماس
عاشق بولوب الله يادين ايغوم كيلور

عاشق قول لار حق ياديدين خالى ايماس
حقيقت ليغ بو دنياغه ميل قيلماس
چين عاشق لار دنيا عقبين هركز آلماس
من تقى بو دنيانى قويغوم كيلور

تجلى نى نورى برلان عقلى شاشقان
آلله تيو كونكل باغلاب طورغه آشقان
محبت نى اوتى برلان قيناب تاشقان
من تقى الله تيو بارغوم كيلور

الله يادى كونك لارنى قيلدى خرم
بلخ ملكى نى تاشلاب كليم کيدى ادهم
كليم كيب هدايت كا اوردى قدم
هدايت كا انداغ قدم اورغوم كيلور

کليم كيكان اول عزيزلار حقه ياقار
جون سرلارى دوکان ايچره حقنى تاپار
آه لاريدين تليم تاغ لار سيزيب آقار
سليم بولوب اول كليم نى کيکوم کيلور

سليم بولوب صاف بولدى جنيد شبلى
نفسين تيغيب قهر قيلدى حسن بصرى
خلق نى قويوب فنا بولدى ذوالنون مصرى
عزيز لاركا متابعت قيلغوم كيلور

الله يادى تكبرنى اويين بوزدى
مشايخ لار بو حلقه نى كوركلوك توزدى
چون هو ديديم معصيت لار توزكا توزدى
من هم تقى اول حلقه ده بولغوم كيلور

شوق شرابين ايچتيم ايرسه قيلدی خراب
محبت نى اوتى برلان بغريم كباب
ديدارينى روزى قيلسه ايذيم وهاب
دارالإسلام سرايى غه كيركوم كيلور

قول خواجه احمد كوهرينکليغ حكمت ايدى
عزيزلارنى مدح برلان سوزين يايدى
اوزون تون نى كون کا اولاب قيام توردى
دعا اوقوب روان حكمت ايغوم كيلور
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 13 Fevral 2010, 13:32:33
۶۸
حکمت

قايو ييرده عزيزلارنى جمعى بولسه
اوشال ييرده حال علمينى ايغوم كيلور
آلارنى صعبتى نى خوشلاسم مين
اوزوم نى اوزلاريغه قاتقوم كيلور

خوش صحبت ليغ درويش لارکا جانيم بيرسام
هر بر باسقان ايزلارينى كوزكا سورسام
خذمت قيليب يخشيلاردين دعا آلسام
اندين سونكره شوق شرابين تاتقوم كيلور

شوق شرابين ايچكان قيلور دنيا طلاق
خضر بابام كيليب آنكا بيرور سباق
دنيا تيغيب قيليب يوركيل يوز مينك طلاق
شونداغ ايركا عزيز جانيم بير كوم كيلور

وا دريغا خوبلار همه ييغلاب اوتى
اناسيدين توغدى ايرسه ماتم توتى
کوزوم يوموب تا آچقونچه عمريم اوتى
بو دنيانى پوچك يلغه ساتقوم کيلور

تيلى برله امت مين ديب يالغان سوزلار
کيشى مالين آلماق اوچون هزيان سرزلار
حلالى نى مونده تاشلاب حرام كوزلار
نادانلارغه بو سوزلارنى ايغوم کيلور

زمانه آخر بولسه عاقل کيتكاى
آدم اوغلى بر - برينى توتوب ييكاى
دنيا اوچون ايمان اسلام دينين ساتغاى
عاقل لارغه بو سوزلارنى ايغوم كيلور

ملائك لار ييغليب بو كون صحبت قوردى
رقص سماع اورمق اوچون يوكوروب يوردى
معراج اوزره حق مصطفى مونى كوردى
ايمدى مين هم رقص سماع اورغوم كيلور

حق مصطفى بيخود بولوب اوزدين كيتى
جبريل كيليب حق مصطفى باشين توتى
سبحان ايكام قدرت بيلان ذکر اوركاتى
امت بولسام مين هم ذكرين ايغوم كيلور

عاشق بولسنك کوز ياشينكنى ساحيب يور کيل
بايزيدديك دنيا عقبين تيغيب يوركيل
ادهم صفت تخت بخت دين کيچيب يوركيل
همت بيرسنك دنيا عقبين تبكوم کيلور

قول خواجه احمد دنيا کورسنك زينهار قاچقيل
ذکرين ايتيب طريقت نی يولين آچقيل
آيت - حديث سوزی برله دينار ساچقيل
ايرانلاردين دُرّ و گوهر آلغوم کيبور
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 13 Fevral 2010, 13:32:50
۶۹
حکمت

محبت نى بوستانى غه بلبل كبى
سحرلارده ناله ايلاب قونغوم کيلور
اوشل وقت ده الهيم نى جمالى نى
معنى کوزى برله عيان کورکوم كيلور

مردان ايرور حق يولی نى باشرچى لارى
مريد برله خدا آرا ايلچى لارى
وحدانيت درياسينى يولچى لارى
آستانه ده باريب دربان بولغوم كيلور

حق وصالين تيلاکانلار تونى - كونى
تينمای جانى برله ايتور ذکر هو نى
حقدين الهام يتيب كيلور بيلسنك مونی
آخرت نى آزوقى نى آلغوم كيلور

مَوَدَّت نی عصاسينى الكا آليب
سعادتنی خرقه سينى تن کا ساليب
محبت نی يونكى برلان قناتلانيب
معرفت نى بوتاغى غه قونغوم كيلور

ايلانلار بارچه باروب بولدى مزار
قاتيغ لانيب اى دوستلاريم بولکيل بيدار
موسى صفت طور تاغيده كوروب ديدار
رَبَّ اُنْظُرْ اِلَيْكَ ديب ايغوم کيلور

وا دريغا ايسز عمروم بيرديم يل کا
عبمادتدين هيچ نيمه يوق باقسم قول کا
قوللوق قورين هيچ باغلاديم ايمدى بيل کا
همت قيليب پير خذمتين قيلغوم کيلور

قول خواجه احمد دون اهلى دين بيل ايرمس اول
رياضت سيز هيچ عالمين كور گوزمس اول
الله ديمك مؤمن قول غه عار ايمس اوار
حق ياديغه جانيم قربان قيلغوم کيلور
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 13 Fevral 2010, 13:33:50
۷۰
حکمت

ايا دوستلار عشق غواصى بولماکونچه
وحدانيت درياسيغه كيرسه بولماس
اول دريانى کوهريدور حق وصالى
جاندين كيچيب كيرمكونچه کورمه بولماس

همت قورين جان بيلى غه محكم چالمای
ماسوانى محبتين اوزدين سالماى
کوز ياشينى نياز ايلاب رازين ايتماى
اسرار يولين مردان لاردين بيلسه بولماس

يُحِبُّهُمْ شرابى نى ايچماكونچه
وَ يُيحِبُّونَهُ لباسينى كيماكونچه
رياضت نى پوته سينى بوغماغونچه
حق جمالين مرادينچه کورسه بولماس

لِي مَعَ اللهِ مقامى غه بارماكونچه
اَنْ تَمُوتُوا سرايغه کيرمكونچه
فَنَا فِي الله درياسيغه چومماغونچه
بقا بالله کوهريدين آلسه بولماس

شر يعت نى سلاحى نى كيماكونچه
طريقت نى براقى غه مينماكونچه
جذب جنون عالمى غه بارماکونچه
حقيقت نى ميدانى غه کيرسه بولماس

مردانلارنى مرادی دور حق ديدارى
حق ديدارى كيراك بولسه بول بيدارى
قول خواجه احمد سحر وقتيده قيلغيل زارى
بيدار بولماى حق جمالين كورسه بولماس
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 15 Fevral 2010, 16:07:28
۷۱
حکمت

ايا طالب جفا چيكيب يولغه كيرکيل
جفا چيكماى يولغه کيرسنك وفا بولماس
جفا چيكماى آخرتده يوقتور راحت
جفا چيكماى کوزوئك ياشی ضيا بولماس

کيمنى كورسنك قولى بولوب خدمت قيلكيل
رحم ايلابان غريب لاركا شفقت قيلکيل
عالم لار کيلسه توروب عزت قيلکيل
نا جنس لارده ذرّه هركز وفا بولماس

غريب لاركا رحيم قيلماق رسول ايشى
غريب لارنى كورکان ييرده آقار ياشی
غريب لاركا كويار دايم ايچى. تاشی
غريب لارنى دعاسيديك دعا بولماس

مدينه کا رسول باريب بولدى غريب
غريب بولوب حقه آخر بولدى قريب
رحمن ايكام ديدارينى قيلدى نصيب
چين دردليك كا غريب ليك ديك دوا بولماس

امت بولسنك حق رسولغه تابع بولکيل
اتى چيقسه درود ايتيب تعظيم قيلكيل
غريب بولوب غريب لاردين معنى آلكيل
غريب بولكيل غريب لارديك کدا بولماس

غريب لارنى كوركان ييرده آغرييتمنكيز
غريب لارغه آچيغ لانيب سوز قاتمنكيز
ضعيف کوروب غريب لارغه تاش اتمنكيز
بو دنياده غريب ليك ديك بلا بولماس

شام غه توشوب غريب بولدر حكيم اتا
ييغلاى - ييغلاى قدّى آنى بولدى دوتا
ايزيم قيلكاى جمله قول غه ايمان عطا
چين غريب نى قدّى هركز دوتا بولماس

تركستانده غريب بولدى قول خواجه احمد
آنينك اوچون حق رسول غه بولدى امّت
ايچميش، ييميش نعمت لارى قايغو محنت
تن پرست دين حق تعالى رضا بولماس
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 15 Fevral 2010, 16:07:57
۷۲
حکمت

عشق دعوى سين قيلكان عاشق كريان بولور
بو دنيانى غربتى دين اولسه بولماس
هوشى كيتيب بغرى آنى بريان بولور
حيا كيتيب پرده سينى ترسه بولماس

بو دنيانى عشرتى دين كيچكان كشی
بيخود يورار تينماى آقار کوزدين ياشی
واله بولوب حيران يورار ياز و قيشی
وحشى ينكليغ ايلدين چقار يورسه بولماس

کيچه - کوندوز کوزده ياشين ژاله قيلکان
فرياد اوروب سحرلارده واله بولکان
کوکسين تيشيب چار ضرب اوروب ناله قيلکان
مونداغ ايرنى درکاهيدين کيتسه بولماس

کيچه توروب يرماى تينماى ييغلاکانلار
عشق اوتى عه يورك بغرين داغلاکانلار
رسوا بولوب سردين معنى انکلاکانلار
خلق ايچيده رسوا بولوب يورسه بولماس

الله يادين ايتيب يوروب زارى قيلکان
کوزده ياشين آقوزوبان جارى قيلکان
سرسان بولوب قباب برله يوروش قيلکان
آنداغ ايردين جدا بولوب يورسه بولماس

عاشق لاری دايم مدام حقنى ايزلار
ظاهر يوزوب باطننده عرشنى کوزلار
طالب لارکا آيت حديث سوزين سوزلار
سر سوزينی نادانلارغه ايتسه بولماس

قايده بارسه عشق دوکانين انده قوردی
ليلى مجنون بو دنيانى دورين سوردى
شيخ منصور اناالحق ديب غوغا قيلدى
آنداغ عاشق بولدى کورونك بشر حافى
اير اول ترور وعده سيده بولسه وافى
وفا قيلکان ايرانلاردين يانسه بولماس

سردين معنى تويماکانلار بيكانه دور
اول عاشق لار مکانلارى ويرانه دور
قايده بارسه همخانه سى جانانه دور
تونلار قويماق عاشق مين ديب يورسه بولماس

غواص بولمای کوهر اوچون دريا چومماس
جاندين کيچمای جرمغونچه هرکز آلماس
بير قطره غه قانع بولمای اول در بولماس
قانع بولمای شوق شرابين ايچسه بولماس

قول خواجه احمد لاهوت ارا مقام توتماى
فَنَا فِي اللهِ مقاميدين ييليب اوتماى
پير مغان قطره سيدين جرعه يوتمای
لِي مَعَ الله مقامى غه ييتسه بولماس
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 15 Fevral 2010, 16:08:13
۷۳
حکمت

معرفت نى منبريغه مينماکونچه
شريعت نى ايشلارينی بيلسه بولماس
شريعت نى ايشلارينى ادا قيلمای
طريقت نى ميدانى غه کيرسه بولماس

طريقت ده تورلوك ادب بيلماکونچه
نفسى برله محاربه قيلماکونچه
عشق يوليغه اوزين لايق ايتماکونچه
حقيقت نى سرلارينى بيلسه بولماس

شريعت ده مراد اولدور يولغه کيرماك
طريقت ده مراد اولدور نفسدين کيچماك
حقيقت ده عزيز جان نى فدا قيلماك
جاندين کيچماى عشق شرابين ايچسه بولماس

بو ريا بولمای شيخ مين ديبان دعوی قيلکان
اوزی قيلماى خلق لار آرا وعظين ايغان
سوزى يالغان دنيا اوچون عمل قيلکان
دنيا قويماى حال علمى نى بيلسه بولماس

ايرانلار اوشبو يولغه قدم اوردى
مجاهده مونكى برله عمل قيلدى
مکاشفه باطن ايچره معلوم بولدى
مونداغ بولماى درکاهى غه ييتسه بولماس

نى عمل دور ايرمن تيو دعوی قيلماق
سجاده نى خلق لار آرا تورکا سالماق
اوزى بيلماى بو معنى کا نفسين اورماق
غواص بولماى در کوهرنى آلسه بولماس

وحدانيّت کيمه سينى سرّين بيلماى
عشق اسرار سوزلاريدين خبر آلماى
تجريد، تفريد ايشلارينى ادا قيلماى
او توحيدنى ميوه سيدين آلسه بولماس

قول خواجه احمد تجريد، تفريد اميد قيلغيل
مصطفى نى سورلاريغه عمل قيلغيل
توبه ديبان تونلار قوبوب زار اينكراكيل
زار ييغلاماى ديدارينى کورسه بولماس
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 15 Fevral 2010, 16:08:48
۷۴
حکمت

محبت نى درياسيغه جوماغونچه
ار دوستلاريم عشق کوهرين آلسه بولماس
تانك آتقونچه فرياد اوروب زار اينکرامای
صرّاف بولوب عشق دردينى بيلسه بولماس

عشق دردينى بيلكان کيشی دنيا تبار
ايرانلارنى ايزين آليب تينمای اوپار
محبت نى شوقى برلان ياشين سبار
ياشى آقماى رياضت ده سولسه بولماس

حقه عاشق درويش لارى سنك محك
بو عالمده مكان قيلماس جانی فلك
نفسى اولوك، کونكلى تيريك مثل ملك
مونداغ بولماى سردين بهره آلسه بولماس

جاندين کيچيب باش اويناماى خالص بولماس
تيريك اولماى مجازيغه راس سورلاماس
حقيقت نى شاهى برله راز ايتاماس
خالص بولماى دنيا عقبين سالسه بولماس

اخلاص کيراك ايا طالب عاشق بولسانك
جاندين کيچيب محنت تارتيب صادق بولسانك
آندين سونكره دركاهى کا لايق بولسانك
لايق بولماى ديدارينى کورسه بولماس

عاشق لارکا درد و بلا آفت کيراك
حقدين بيزارتن بيرورغه راحت كيراك
ملامت کا اهانت کا طاقت كيراك
طاقت قيلماق حقه عاشق بولسه بولماس

عشق سيزلارنى كوردوم دوستلار حيران يورار
مؤمن مين ديب ايمانلارى ويران يورور
روز محشر ديدار كورماى سرسان يورور
پير مغان نظر قيلماى کورسه بولماس

عاشق لارى محنت استاز جاندين بيزار
روزه، نماز تسبيح لارى پروردكار
تينماى كويار طاعت لارى حق سين ديدار
يار استماى بنده مينديب تورسه بولماس

طريقت نى شوقى ذوقى کويماك يانماق
حقدين قاجقان ناجنس لاردين قاجيب تانماق
يوز مينك تورلوك جفا تيكسه بويون سونماق
بويون سونماى عشق دوكانين قورسه بولماس

نادان کيم ديب سورسه ايتينك بيخبرلار
حقدين قورقماى ناجسن لارنى سوراب ايزلار
آيت حديث بيان قيلينك قاتيغ سوزلار
همدم بولوب نادان برله تورسه بولماس

زينهار - زينهار قاچيب يورکيل بولسه نادان
حق يادينى ايتسه هر کم اوشل مردان
جان نى جانغه پيوند قيلسه اوشل ايشان
اورسه سوکسه اول عزيزدين تانسه بولماس

تبرّك دور اول عزيزدين اولوش آلينك
ياستانيبان آستانه سين يولى سورينك
يول کورساتسه جان دل نى برباد بيرينك
برباد بيرماى عشق يوليغه كيرسه بولماس

عاشق لارنى خلق ايچينده سرّى پنهان
آهى سردی کوك كا يتار رنكى خزان
كوزى کريان، بغرى بريان خانه ويران
مونداغ بولماق حق يولى نى بيلسه بولماس

قول خواجه احمد زاهد بولمه عاشق بولكيل
بو يول لارده بى باك يورمه صادق بولكيل
ليلى - مجنون، فرهاد - شيرين، وامق بولكيل
عاشق بولماى حق ديدارين کورسه بولماس
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 15 Fevral 2010, 16:09:09
۷۵
حکمت

دوستلاريغه آچديم ايذيم كوهرى نى
آسان ليق برله او کوهردين السه بولماس
جفا چيكمار محنت تارتمار خذمت قيلمای
اوشبو پيرنی سرايی غه کيرسه نولماس

عاشق قول لار خله براق منار
حور و قصور اونك سونك فرشته لار
اول براققه باتيب آنده حيران قالار
عاشق بولماى اول براق قه مينيب بولماس

رحمان ايكام رحم قيليب کيرکوز يولغه
رحمتينكدين مژده بيرکيل عاصى قول غه
يولدين آزغان قول لارينكنى سالكيل يولغه
قلاوزسز اوشبو يولغه کيرسه بولماس

محبت نى درياسيغه جوموب باتقيل
عاشق لارنى صحبتى غه اوزونك قاتقيل
محبت نى بازاريغه اوزونك ساتقيل
عاثق لارنى معبتىتنه اوزونك قاتقيار
محبت نى بازاريغه اوزونك ساقيل
اوزين ساتماى حق رحمتين آلسه بولماس

ايرانلارنى ايزين ايزلاب يولغه کيرسنك
کيچكيل فانى دنيا سيدين چين قول بولسنك
قلاوزسيز اوشبو يولغه کيرار بولسنك
ايزلاب آنى تابماغونچه کيرسه بولماس

محبت نى درياسيغه آچكيل کوزنى
توبه قيليب حق يوليغه آلكيل اوزنى
محبت نى درياسيغه سال كيل اوزنى
تو به قيلماى بو سودانى قيلسه بولماس

شريعت نينك ميدانيغه ارزين سالماى
طريقت نينك بوستانيده جولان قيلماى
حقيقت نينك درياسيدين كوهر آلماى
معوفت آدابينى بيلسه بولماس

قول خواجه احمد حق يوليده تورغيل مدام
عاشق لاركا درمان بيركيل على الدوام
عاشق لارنى آرزوسيدور دار السّلام
عاشق بولماى دارالسّلام کيرسه بولماس
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 15 Fevral 2010, 16:09:27
۷۶
حکمت

کل من عليها فان آيتنده
بير خدادين اوزکا مخلوق اولار ايرميش
اسرافيل صورين آليب هورکاننده
کوردين ينه تير کوزوبانقويار ايرميش

ايليك مينك ييل باشنده تورکاننده
آندين کين عرصاتکا سورکاننده
ييلانك باش وييلانك اياغ يورکاننده
آدم اوغلى بيهوش ينكليغ بولار ايرميش

اوّل حساب ايلاکاى طهارت دين
ايکنچى حساب ايلار نمازينكدين
اوچونچى حساب ايلار حلال - حرامينك دين
مين مين ديكان حيران بولوب قالار ا يرميش

حاب ايلاب يوروتكايلار محشر سارى
خلايق لار قدم اورکاى ناجار بارى
معاينه انده کورکاى دوزخ نارى
الامان ديب اوكروشوبان تورار ايرميش

جمله امّت يوز يكرمه مينك صف بولغايلار
اطرافيدين فرشته لار صف توزكايلار
اَيْنَ المَفَرّ نداسينى ييتکورکايلار
قاجنب قوتولوب بولماس ديبان ايتار ايرميش

اول وقتده ندا کيلکاى وامْتَازُوا الْيَوم
اوشل كونده دستكير بولغاى نماز - صوم
عقل هوشينك کيتب اندر قالمكای فهم
تيل لال بولوب سوزلا يالمای قالار ايرميش

بارجه خلقلار آدم آتا سری بارکاى
اى اتاميز ايمدى بيزنى قوللانك ديكای
نافرمانليغ مينديب اوتى فرزند ديكاى
ابراهيم كا بارالوك ديب ايتار ايرميش

ابراهيم كا باريب ايتكاى آدم اتا
شفاعت قيل بولارنى سين باريب حالا
اول هم ايتور سيزده نوقرب آدم اتا
موسى سرى بارالوك ديب ايتار ايرميش

موسى ديكاى رَبّ اَرِني ديديم اولكون
خجالت دين چقانيم يوق تا اوشبو کون
بارالوك محثدكا بولوب واركون
بارجه لارى حضرت سارى بارار ايرميش

موسى ديكاى يا محمّد اورغيل قدم
امت لارينك دوزخ ايچره بولدى عدم
محمّد هم ابا قيليب توركاى اولدم
موسى قويماى ايكاولارى بارار ايرميش

تاجين آليب كيسو ساليب عرش آستنده
نعره تارتيب ييغلاب تورکاى او شل كونده
يا قادرا !، يا غفورا ! ديكاننده
يا حبيبيم باش کوتار ديب ايتار ايرميش

آليب كيلكيل امتينكنى دركاهمغه
باغشلايين بارجه سينى من سزلارغه
داخل قيلاى جمله سينى جنتيم غه
مونداغ ديبان حقدين ندا کيلار ايرميش

زافد، عابد، خاص قول لاردين علمانى
آليب کيلکان درکاهى غه اوشبولارنى
تنكريم ايغاى يا محمّد عاصى قانى
عاصى لايق ايماس ديبان ايتار ايرميش

عاصى، جافى لايق ديکای رحمتيم کا
داخل ايتار مين اولارنى حنتيم کا
کناه لارين باغشلايين بارين سنکا
رسول خرم بولوب يوکوروب کيلار ايرميش

مومى برلان رسول الله يوكوروب كيلکای
عاصى، جافى امت لاريم يورونك ديکای
کناه لارينك عفو ايلابدى قادر، حى
بهشت ايچره آلدين ساليب کرار ايرميش

قول خواجه احمد قيامت دين ايدى مونى
حكمت قيليب خلايقه يايدى مونى
اولوغ - اولوغ کتابلاردين ايدى مدنى
اوقوغاندين دعا طمع قيلار ايرميش
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 15 Fevral 2010, 16:09:43
۷۷
حکمت

شريعت كا مرشد بولغان عاشق قول لار
شريعت دين آلور منزن آلار ايرميش
نمازيغه شروع قيلغان مؤمن قول لار
اوجماخ اوين اميد توتوب تورار ايرميش

ملك الموت فرمان برله جانيم آلسه
اغا اينى بارجه ييغليب قويوب يانسه
ييتى قدم باسقان دين سونك خبب بيرسه
منكر نكير كيريب سؤال سورار ايرميش

منكر نكير سؤال سورور بولسه
اول اوتلوغ عمود برله اورور بولسه
ياشين ياشناب جان تنيم اوتعه يانسه
قياب جانيم تار لحدده کويار ايرميش

تورت يوز قرق پيغمبر مرسل نبی
قالملديلار بو دنيادين اوتی باری
کل نفسٍ ذا ئقة الموت آيتی
قرآن ايچره موتداغ خبر بيرور ايرميش

شريعت دين، طريقت دين بيان قيلدی
حقيقت دين قرآن سوزي کلام بولدی
بول جهان غه محمّد نی نوری تولدی
اول نوريلان ايکی جهان يارور ايرميش

خوش دولت دورولايتده پادشاه بولسه
عادل بولوب بير مؤمن نى قاضى تافى قيلسه
اوشل قاضى بارجه ايل نى راضى قيلسه
راضى ليق دين اوچماخ اوين آلار ايرميش

مؤمن قول لار نماز اوقوب بولسه فارغ
اول قول نى مونده بولغای رنکى ساريغ
اول خذمتدين حق قاشيده بولوب لايغ [لايق]
حور قيزلاری قرشو کيليب قوچار ايرميش

جاهل کيشى نماز قدرين قچان بيلور
هر نمازده ايمان باشدين تازه بولور
صلوة ديسه غافل باشين يورکاب اويور
غافل قول لار عمرين ييل کا ساتار ايرميش

قول خواجه احمد قول من - ديسنك طاعت قيلكيل
قيامت نى كونلارينى ياوق بيلکيل
حقه ياقين بولاى ديسنك جانينك بيرکيل
طاعت قيلكان حقه ياوق بولار ايرميش
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 15 Fevral 2010, 16:10:08
۷۸
حکمت

طريقت کا شريعت سيز کيركانلارنى
شيطان کيليب ايمانى نى آلور ايرميش
اوشبو يول نى پيرسيز دعوى قيلكانلارنى
سرسان بولوب ارا يولده قالور ايرميش

طريقت کا سياست ليغ مرشد کيراك
اول مرشدکا اعتقادليغ مريد کيراك
خذمت قيليب پير رضاسين تاپماق کيراك
مونداغ عاشق حق دين اولوش آلار ايرميش

پير رضاسى حق رضاسى بولور دوستلار
حق تعالى رحمتيندين آلور دوستلار
رياضت ده سر سوزيدين بيلور دوستلار
آنداغ قول لار حقّه ياوق بولور ايرميش

اوشبو يولغه اى برادر پيرسيز کيرمه
حق ياديدين لحظه غافل بولوب يورمه
ما سواکا عاقل ايرسنك كونكل بيرمه
شيطان لعين اوز يوليغه سالور ايرميش

ايا دوستلار هيچ بيلماديم مين يولوم نى
سعادت غه باغلامديم مين بيليم نى
ماسوادين هيچ ييغماديم مين تيليم نى
ندان ليقيم مينی رسوا قيلور ايرميش

شريعت نى طريقت نى بيلای ديسنك
طريقت نى حقيقت كا اولاى ديسنك
بو دريادين دُرّ وگوهر آلای ديسنك
جان دين کيچان خاص لاری آلور ايرميش

عاشق قول لار کيچه - کوندوز هرکز تينماس
بر ساعتى حق ياديدين غافل قويماس
انداغ قول نى سبحان ايكام ضايع ثتريما_ر
دعا قيلسه اجابت ليغ بولور ايرميش

وآه دريغا كيچتى عمروم غفلت بيلان
سين کيچورکيل کناه لاريم رحمت بيلان
قول خواجه احمد سنكا ياندى حسرت بيلان
اوز اوزيغه اوزى يانيب کويار ايرميش
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 15 Fevral 2010, 16:10:27
۷۹
حکمت

عارف عاشق شوقى برله قيامت كون
خدايى غه بحث و جواب قيلور ايرميش
بو عالمده تارتقان جور و جغالارين
کوکسين ياروب حق قاشيغه سالار ايرميش

بو عالمده قيلدينك مينى خلق غه رسوا
ديداريم نى کورساتاى ديب قيلدينك شيدا
عالم خلقين دشمن قيليب سالدينك غوغا
خدايى غه باريب عرضه بولار ايرميش

ديداريم نى آرزو قيلسنك كيچه ياتمه
بو دنيانينك طعمه سيدين ذرّه تاتمه
حالدين سورسه نادانلاركا سرنى ساتما
مونداغ ايرلار فيض فتوح آلار ايرميش

ديداريم نى طلب قيلسنك عرشقه باققيل
عرش اوستيده آهنك برله اوتلار ياققيل
امت بولسنك محمّدغه قپوق قاققيل
سبحان ايكام چين عاشق نى سنار ايرميش

ايشيتيب عاشق رقص و سماع اورغاى
ييتى کوکدين ملايك لار ييغليب کيلکاى
عرش کرسی لوح قلم داد ايلاکاى
يير تيبرانيب حقّه زارى قيلار ايرميش

اى يير و کوك! عاشق لاردين حذر قيلينك
اوتلوغ آهى چيقار بولسه حاضر بولينك
کوك کا باقيب نعره تارتسه قورقوب تورينك
بير آه اورسه عالم يكسان بولار ايرميش

چين عاشق لار ضعيف بولوب سلام قيلكاى
قدرت بيلان پرده ايچره عليك آلغاى
ديدار اوچون كويكان لاريم كيل كيل ديكاى
لطفين کوروب چين عاشق لار تيلار ايرميش

صفّاً - صفّاً عاشق لاركا ندا كيلکاى
يوز يكرمه مينك عاشق تيكين صفى بولكاى
جنّت كير ديب الهيم دين ندا كيلكاى
جنّت كيرماى ديدارينى كورار ايرميش

ندا كيلكاى ملايك كا زنجر سالكيل
زنجر ساليب محشرکاه ده آليب يوركيل
ديدار اوچون کويكان لاريم معلوم قيلكيل
عاشق لارى بيخود بولوب يورار ايرميش

ايتكان لارين قيلغان عاشق ديدار كوركاى
واصل بولوب محشر آرا دوران سوركاى
افغانى دين ييتى دوزخ اورناب يانغاى
مالك کيليب قاچغاى تعظيم قيلار ايرميش

عاشق لارنى هيبتى دين مالك قاچغاى
قورقوب باريب دوزخ ايچره اوتلار ساچقاى
وهم برله زهر زقوم تويا ايچكاى
قدرتى غه حيران بولوب قالار ايرميش

ملک لاردين عاشقی کوب ای بی خبر
بير آه اورسه عالم بولور زير و زبر
زاهد، عابد، سالنک لارين عشق بتر
عشق سيز آدم و الله يولده قالار ايرميش

قول خواجه احمد ديدار ايزلاب کدا بولکيل
کيچکيل اهل - عيالنکدين جدا بولکيل
الله حقی بولار دشمن رسوا بولکيل
جدا بولغان ديدارينی کورار ايرميش
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 15 Fevral 2010, 16:10:44
۸۰
حکمت

كيلينك، ييفلينك ذاکر قول لار ذکر ايتالوك
ذاكرلارنى خدا بيشك سويار ايرميش
عشق سيزلارنى ايمانى يوق ای يارانلار
دوزخ ايچره ثينماى دايم کويار ايرميش

محبت ليك عاشق لارنى خدا سو يدى
آنينك اوچون دنيا عقبين طلاق قويدی
جاندين کيچيب ياشين ساجيب عاشق بولدى
روز محشر ديدارينى کورار ايرميش

عاشق لارنى چين دوستيغه جانى قربان
شوقى برلان آنى ايزلاب قيلور افغان
عشق سوداسى باشه توشسه خانه ويران
شيدا بولوب آنى ايزلاب يورار ايرميش

عاشق بولسنك كيچه - کوندوز تينمای ييغلا
پير مغان خدمتى غه بيلينك باغلا
کويوب بيشيب دردی برله کوکسنك داغ لا
داغده كيتكان وصالينى کورار ايرميش

حقنى سويکان عاشق لاری تابتى مراد
يالغان عاشق بولوب يورمه تانکلا، اويات
قيليچ دين تيز قيل کفروك نى آتى صراط
يالغان دعوى قياغان اوتماى قالار ايرميش

عاشق بولسنك يالغان دعوی قيلمه زنهار
يالغان دعوی قيلغانلاردين خدا بيزار
قهار ايکام قهر ايلاسه آتى قهار
قيامت کون يوزی قرا قوبار ايرميش

عاشق لارى كيچه ييغلاب سحر قوپار
سر شرابين ايچكان عاشق سرنى ياپار
هر کيم سوكسه بلكه تبسه قولين اوپار
آنداغ ايرانلار فيض فتوح آلار ايرميش

محبت دين خبر آلغان خان نى بيلماس
باشين کيتسه تايارى يوق جان نى بيلماس
عشق كلامى ذوق طعامى نان نى بيلماس
هو - هو تيو ذکرين ايتيب يورار ايرميش

عاشق لارنى كوزى كريان، بغرى بريان
پرواسى يوق، ناموسى يوق، يورار عريان
ايل كوزيكا تفراق دين كم سرى پنهان
جانى برله يادين ايتيب يورار ايرميش

توغرى يورکان عاشق لاردين خدا راضى
عاشق لار ايشى آسان ايماس قيلمه بازى
يالغانچى لار عاشق مين دير الله قاضى
ايماننى پوچك پل غه ساثار ايرميش

عاشق ليق نى آسان ايشى باش بيرمك ليك
منصور صغت اوزدين کيچيب جان بيرمك ليك
موتوا قبل ان تموتوا خاك بولمك ليك
عاشق لارى اولماس بورون اولار ايرميش

سودا قيلسنک آخرت نی سوداسينی
باشقه آلمه بو دنيانی غوغاسينی
عمل قيلغيل جنت آلكيل ماسواسينى
جنت آلغان ديدارينى کورار ايرميش

قول خواجه احمد! عاشق بولسنك جاندين كيچكيل
آندين سونكره شوق شرابين تويا ايچکيل
کناهنكنى سبك قيليب مونده اوچكيل
عاشق لارى اوجماق ايچره اوچار ايرميش
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 16 Fevral 2010, 16:10:22
۸۱
حکمت

لَا اِلَهَ إلاَّ الله ديكان قول نى آغزيدين
بير ياشل قوش بولوبان اوچار ايرميش
قناتلارى توقوغلوق درّ ياقوت دين
پرواز قيليب عرشدين عرشکا اوچار ايرميش

اول قوشقه قدرت برلان مينك تيل بيرکای
بارچه تيلده اوشال قولنى حقدين قولكاى
ربانى غه چنكالى نى اوروب يولغاى
تونى — کونى يارلقه ديب ايتار ايرميش

ايا دوستلار اوشال قوشتى عيانى نى
مين ايتاين سيز تينكلانكير بيانی نی
کوب نادانلار بيلماس اولقوش پايانى نى
قولونك توتوب بهشت ايچره کرار ايرميش

اول قوش ايتور هركز تينمام مين بر زمان
تا بيرمسه قادر منكا دار الأمان
هيچ قالماكای بوکونكلده ذرّه كمان
آندين سونكره قرار تاپيب قونار ايرميش

روزه توتوب نماز اوقوب توبه قيلغان
سحر توروب الله تيو قرلوق قيلغان
مشايخ لار خدمتى نى تمام قيلغان
آنداغ قول لار حق ديدارين کورار ايرميش

بو يسوى مسكين احمد حيران قاليب
لاَ اِلَهَ اِلاَّ الله نى تيل كا آليب
حق ذکری نى جان دل غه واصل قيليب
اوچ قوشينى لامكانده كورار ايرميش
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 16 Fevral 2010, 16:10:44
۸۲
حکمت

محبت دين خبر بيلکان عاشق لارى
الله ديسه توقوز آسمان کويار ايرميش
عرش اوستيدا نعره تارتسه صادق لارى
فرشته لار عزيز جان دين تويار ايرميش

سين عاشق بول پرتو سالور عاشق لارغه
پرده آليب جلوه قيلور صادق لارغه
ديدارينى حق كورساتور لايق لارغه
حق تعالى لايق لارنى سريار ايرميش

عاشق بولسنك شونداغ بولغيل بير سون شراب
صديق صغت خلق غه ييتسون بوى کتاب
الله ديسنك لَبَّيْكَ ديب بيرمون جواب
آنداغ عاشق دنيا عقبين قويار ايرميش

عشقه قدم قويغان عاشق اوزين بيلماس
شيخ بايزيد مريد بولسه قولين آلماس
دنيا کيليب جلوه قيلسه کوزين سالماس
کوز قانندين ساچ و سقال بويار ايرميش

عاشق لارغه بير خدادين اوزکا حرام
رحمتی دين قظره تامسه ايشی تمام
رزق روزی ايزلاماس لار توکل تام
حق ذکرينى آيته آيته تويار ايرميش

عاشق لاری حق دين قورقوب بولور بيدار
حقيقت ليغ عاشق لارنى فكري ديدار
باش بير ديسه جان و ايمان آنکا طيار
جادين کيچيب حق يوليده اولار ايرميش

لاَ لاَ ديکيل عالم سيمى کافر ديسون
کافر ديبان منصور صفت دارغه آسون
باشينك بيرکيل ديدارينى حق کورساتسون
باشين بيرکان حق ديدارين کورار ايرميش

دروازه غه آسيب قويونك جمله کورسون
مونى کوروب خلق عالم عبرت آلسون
اولوغ کيچيك يول بارغوچى اوروب اوتسون
انا الحق ديب پنها سويونووب کولار ايرميش

خواجه ملا شاه آلديغه يغيليب باردى
کافر منصور اولمادى ديب عرضه قيلدى
رسول شرعى نه بويورسه قيلينك ديدى
ظاهر بين لر شاه غه تعظيم قيلار ايرميش

شريعت دور ديب عالم لاری بويورديلار
کافر منصور اولمادی ديب کويدورديلار
آخکر قيليب کلين کوککا ساورديلار
تاغ توزلار انا ااحق ديب تورار ايرميش

شرقى برلان اوت كويدوروب کوککا چيقتى
ملايك لار افغان قيليب حقه باقتى
جنت ايچره حور و غلمان قپوق قاقتى
ديوانه لار يا منصور ديب کويار ايرميش

کلين ييغيب دريا ايچره تاشلا آتی
زمستانده دريا تاشيب نعره تارتی
شهر خلقی يوکوروب بيليب باسی قاتی
جاندين قورقوب داد فرياد قيلار ايرميش

شيخ ذوالنّون شاه منصورنی پيری ايردی
پادشاه يوکوروب ولايت کا خبر بيردی
بر اولياء بارنوکين ديب زاری قيلدی
شيخ ذوالنّون پنها يوروب بارار ايرميش

غريب منصور قولاغيمغه بير سوز ديدی
خاکستردين بير کف آليب مينکا بيردی
دريا تاشسه ا منصور ديب سالينك ديدی
إنْ شَاء الله تاشقان دريا قيتار ايرميش

پادشاه ايدى حاضر پيريم بارا كورونك
خاکسترين دريا ايچره سالا كورونك
غريب يتيم ايلکين توتوب آلا کورونك
پادشاه وزير تعظيم ايتيب تورار ايرميش

شيخ ذوالنّون خوب بولورديب بيردين قوبتى
پادشاه وزير اخلاص قيليب ايزين اوبتى
شيخ ذوالنّون دريا سرى يوروب ييتى
خاکسترين دريا ايچره سالار ايرميش

خاکسترين يا منصور ديب سوغه سالدی
قدرت برله دريا قوروب خاموش بوادی
خواجه ملا مونى کوروب شاکر بولدى
ايلكين آچيب شيخ غه دعا قيلار ايرميش

پادشاه ايدی شهريم ير مين سين کا بارى
حضرت پيريم بر قيزيم بار چوری قيلای
اهل - عياليم، احبابلاريم خادم قيلاى
شيخ ذوالنّون قبول قيلماى تورار ايرميش

مين دنيادين سوی بولغان ايشتيب پادشاه
ظاهر پادشاه باطن ايچره مين شهنشاه
دنيا عتبين طلاق قويا بولغيل آکاه
کيلکان نذرين خلقه انعام قيلار ايرميش

اى بيخبر حقه اخالاص قيلماسموسين
مونده اخالاص آنده خلاص بولماسموسين
ايكى عالم خداينکنى بيلماسموسين
بيخبرنى دوزخ ايچره سالار ايرميش

باطل کوزلار خاص ولى نى تانومس لار
آندين يوز مينك سرلار کورسه اونامس لار
كيم يخشى دور، كيم يماندور، تانومس لار
اول سبب دين آرا يولده قالار ايرميش

تازه - تازه حكمت لاريم ثانى دفتر
ايسز سوزوم نادانلارغه قيلور ابتر
بهره آلماى كوندين کونكا بولور بتّر
سوزكا ييتماى اوزكا بنا قيلار ايرميش

لا مكاندين چيقتى روحوم الله ديدى
سلطان احمد ايشتيب مونى خلق غه يايدى
منكرلارى شك کيلتوردى کوزين اويدى
ناجنس لارنى حق جزاسين بيرار ايرميش

عاشق لارنى سرّين ايتيم يالغانى يوق
يالغان طالب بو يول لاركا كيركانى يوق
يالغانچيلار حقدين اولوش آلغانى يوق
اولوش آلغان فقر تونين كياو ايرميش

فقير تونين كيكان عاشق بولور تفراق
زار ييغلابان ديداريغه بولور مشتاق
ملايك لار آت قويارلار آنكا آفاق
آنداغ عاشق ايلدين قاچيب يورار ايرميش

نسيمی ديك حقنی ايتکيل، تيرينك سويسون
خواجه ملا سامان تيغيب آسيب قويسون
کوزينك يومکيل بو دنيادين نفسينك اولسونك
کوشت، پوستين حق سوزلاتيب قويار ايرميش

قول خواجه احمد روحونك ايدی قَالُوا بَلَی
وعده قيلدينك هيچ ايتمادينك حمد ثنا
غضب قيلسه، نه قيلغای سين؟ قادر خدا
يالغان بنده وعده سيدين تانار ايرميش
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 16 Fevral 2010, 16:11:02
۸۳
حکمت

کيلينك دوستلار بارچه توروب ايتالينك
يادی بيزنى ياروغلوققه تارتار ايرميش
يادى برلان شروع قيلغان عاشق لارني
نيازلارى کوندين کونكا آرتار ايرميش

کيم که ايتسه حق يادينى بغری كويوب
کوز ياشينى باران قيليب رنكى سولوب
اوز ياقاسين يانکلديم ديب اوزی توتوب
آنداغ عاشق سر شرابين تاتار ايرميش

اوشبو يول نى مزاسينى بيلماکانلار
اوز ياقاسين توتوب توبه قيلماکانلار
دنياسيغه مغرور بولوب يوروكانلار
حيوان ايرور بلكه آندين بتر ايرميش

عشق سوداسى کيمکا توشسه خانه ويران
کيچه - کوندوز ديدار تيلاب يورار حيران
عشق يوليده کوزی ياشليغ، بغرى بريان
شيدا بولوب اوزين ايزلاب يورار ايرميش

ايا دوستلار قبساب كيلدی قرانغولوق
اميديم بار اول ايزيم وين هم ياروغلوق
طريقت نى بازارى دور هم قوروغلوق
نيازليق قول کيريب سودا ايتار ايرميش

قول خواجه احمد عبرت آلغيل صد هزاردين
نيازسيزلار بهره آلماس اول بازاردين
فاضل ليق ده قروغ قالور اول نظردين
نادان عمرين پوچك پل غه ساتاز ايرميش
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 16 Fevral 2010, 16:11:21
۸۴
حکمت

عاشق کيشيلار کيچه لارى ياتمسه بهراق
هر درد و الم تيکسه فغان ايتمسه بهراق
باشينى ياريب قانغه بوياب قيلسه ستم لار
اوردى مينى ديب ظالمه سوز قاتمسه بهراق

درويش بولوبان خلق ايچيده تسبيح اوکوروب
صوفى بولوب عالم غه اوزين ساتمسه بهراق
اوتكان صوفى لار ايل کوزيدين يورماين قاچتى
حقنی تيلاکان خلق ايچيده يورمسه بهراق

هر ييرده خدا حاصر و ناظر كلدرولار
بيجا اوتوروب حقنى بلند ايتمسه بهراق
صوفى بولوبان صاف بول ای بندهء الله
صوفى بولوب اول يالغان دمى اوتمسه بهراق

الله ديسه قيلسه نهان بدعت بسيار
آنداغ صوفى لار روزه - نماز توتمسه بهراق
هر کيمنى اوز يوليده ايلاى شيدا
ديوانهء ژوليده نی عيب ايتمسه بهراق

حقنی تنوکان اوزکانی هرکز تانومسلار
الله ديماکان بولسه انی اولکانی بهراق
صوفی بوله سين های - هوس قيلماغيل اصلا
ايت نفسی اوچون بنده که قان توتمسه بهراق

رزاق ديدينك بيردی سينکا رزق فراوان
شيطان سوزيکا بنده قلاق سالمسه بهراق
حقدين ايشيتيب ايدی مونی احمد مسکين
چين بنده سينی سينه سيدين کيتمسه بهراق
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 16 Fevral 2010, 16:11:40
۸۵
حکمت

عاشق ليق نی دعوی سينی قيلغان کيشی
معشوقيدین ذره غافل بولغانی يوق
عشق کوهری توب سيز دريا ايچره مهمان
جاندين کيچامی اول کوهردين آلغانی يوق

کوهر آلور غواص اکر جاندين کيچسه
شيدا بولوب عشق شرابين هر کيم ايچسه
نيچه آيلار، نيچه کونلار اکر اوتسه
عشق نی کلی آچيليب هرکز سولغانی يوق

عاشق بولوب تاپای ديسنك حقنی يولين
اسراغين سين عشق باغيده اسرار کلين
محبت برلان سنار ايرميش يخشی قلين
چين عشق نی اندين کونکلی قالغانی يوق

محبت نی درياسيدا موج اورغوسی
علم - عمل، قيل - قال لار شوق اولکوسی
یو تنکزکا کيم کيريبان؟ کيم چيقغوسی
عاشق قول لار معشوقيدين قالغانی يوق

قول خواجه احمد قبول قيلدی ايماغليق نی
قبول قيلدی عشق اوتی غه کويماغليق نی
جانين بيريب ساتقون آلدی کويماغليق نی
چين سوزومدور هرکز آنی يلغانی يوق
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 16 Fevral 2010, 16:12:02
۸۶
حکمت

عشق سرينى بيان قيلسام بو عالمده
بی خبرلار ايشيتيب قولاق توتقانى يوق
حق يادينى کيمکا ايتاى همه غافل
مؤمن من ديب بو دنيادين اوتكانى يوق

ايشان شيخ خواجه ملا دنيا ايزلار
اول سبب دين پادشاه لارغه يالغان توزلار
آيت، حديث سوزين قويوب مال نىکوزلار
حق يوليده هرکز محنت تاتقانى يوق

دنيا يغيب حقنى سويكان تابتى مراد
شوق شرابين ايچکان عاشق شرقى زياد
قيامت کون کذابلارنى يوزی اويات
يالغانچيلار حق يادنى ايتكانى يوق

آخر زمان شيخ لار ايشى همه ريا
روز محشر ريالاری بولغاى کواه
شيخ مين تيو مونچه هوا، مونچه بنا
الله اوچون ذره ثواب ايتكانى يوق

ايشان مين ديب تورلوك طعام تيريب ييکای
يخشيلارنى کوزکا ايلماى مين مين ديکای
دنيا مالين آليب بارسه سويونوب آلكاى
والله، بالله مين - مين ليكدين اوتكانى يوق

محمّد ديك تفراق صفت حقير بولسون
رياضت ده رنكى، روى زهير بولسون
حق مصطفى ايل كا قاتيغ باققانى يوق

خلق لار قيليب خلايق غه سوزلار ايتى
يوز مينك کافر بت دين کيچب دين كاقيتى
خلق لاريدين عالم همه نوركا باتى
آندين سونكره ايمان اسلام كيتكانى يوق

بنده بولسنك خلق لار قيليب امّت بولغيل
آندين سونكره ايمان اسلام قولغه آلغيل
سحر وقتده حقه ييغلاب زارى قيلغيل
الله سخى هيچ كيم نوميد قايتغانى يوق

ايكى عالم شاهى تورور بير يخشی خلق
خلق لاريدين حق مصطفى بولدى اولوغ
حق تعالى آيت بيري مِمَّ خُلق
عافل آدم آيت ايشيتيب اوقغانى يوق

خلق مماء دافق قاتيب ايدى
مصطفى غه امت لاركا اوقوب بايدى
ييلغان امت وعده سيدين قايتيب تاپتى
سبحان ايكام گناهيدين اوتكانى يوق

ميخانه ديب ايشيتيب قولاق كركان ايماس
ايرانلارنينك خذمتى نى قيلغانى ايماس
پيرى كامل مكمّل نى كوركان ايماس
يالغانچى دور وحدت مى دين تاتقانى يوق

جاندين كيچكان چين ماشقلار دنيا ديماس
نفس اولوك آب طعام غمين ييماس
بو دنياده سود و زيان بولسه بيلماس
دنيا كيليب جلوه قيلسه باقانى يوق

محبت ليك ديوانه نينك نشانى بار
جان و دلده عشق دردى نينك بيانى بار
نى دردلارنى كيم نى کورسه کمانی بار
بايزيد ديك هر كون اوزين ساتقانى يوق

عاشق بولسنك بغرينكده يوق کوزنينك قانى
اى نارسا جبهنكده يوق عشق نشاى
خذمت قيلسنك پيرى مغان درنينك كانى
خدمت قيلماى دركانى غه باتقانى يوق

بولهوس لار عاشق مين ديب کوب لاف اورار
بى خبرلار قايدا بارسه دوكان توزار
يالغان سوزلاب بو دنيانى دورين سورار
دنيا ايزلاب تابانى غه تيكانى يوق

حقدين قورقماى مين مين ديكان شه لار قانى
آى - كون کا دعوى قيلغان مه لار قانى
كيچه ييغلاب سحر توركان خوبلار قانى
عبرت آليب قان زرداب توككانى يوق

قروق زاهد حق عشقى نى كوزكا ايلماس
جنت ايزلاب ديدارينى طلب قيلماس
عاشق لارنى ناله سيغه قولاق سالماس
بو دنيانى ارقه تاشلاب اتقانى يوق

قول خواجه احمد قول مين ديسه قولوم ديكيل
اندين كين بنده ليك كا مقبول بولكيل
محبت نى ميدانيده باش اويناغيل
باش اوينماى حق وصلى كا يتكانى يوق
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 16 Fevral 2010, 16:13:41
۸۷
حکمت

عشق دعوى سين منكا قيلمه يالغان عاشق
عاشق بولسنك بغرينك ايچره کوزقانى يوق
محبت نى شوقى برله جان بيرمسه
ضايع کيچار عمرى انى يالغانى يوق

عشق باغى نى محبت تارتيب کوکارتمسنك
خوارليق تارتسه شوم نفسينکى اولدورمسنك
الله ديوب ايچ کا نورنی تولدورمسنك
والله - بالله سينده عشق نى نشانى يوق

حق ذكرينى مغز جاندين چيقارمسنك
اوچ يوز التميش تمورلارينك تيبرانمسنك
تورت يوز قرق تورت سونكارلارينك كل قيلمسنك
يالغانچى دور حققه عاشق بولغانى يوق

نفسدين کيچيب قناعت نى پيشه قيلغان
هرکيم تپسه راضى بولوب بويون سونغان
يخشى لارغه خذمت قيليب دعا آلغان
انداغ عاشق محشر کونى آرمانى يوق

راحت تاشلاب جان محنتين خوشلاكانلار
سحرلارده جانين قيناب اشلاكانلار
هاى - هوس، ما و مين نى ثاشلاکانلار
چين عاشق دور هركز آنى يالغانى يوق

عشق دردينى بى دردلارکا ايتيب بولماس
بو يول لارنى عقبه سی كوب اوتوب بولماس
عشق کوهرين هر نامردکا ساتيب بولماسر
بى خبرلار عشق قدرينى بيلكانى يوق

عشقه توشتونك، اوتقه توشتونك کويوب اولدونك
پروانه ديك جاندين کيچيب اخکر بولدونك
دردکا تولدونك غم کا سولدونك تيلبه بولدونك
عشق دردنى سورسنك هرکز درمانی يوق

باشينك کيتار بو يول لارده حاضر بولغيل
عشق يوليده اولماس بورون زينهار اولغيل
پير ايتاکين محكم توتوب خدمت قيلغيل
خدمت قيلغان هرکز يولده قالغانى يوق

عاشق ايرماس جانانيکا جان بيرمسه
دهقان ايرماس كتمان چابيب نان بيرمسه
مونده ييغلاب آخرت ده جان بيرمسه
يولدا قالغان بوی خدا آلغانى يوق

اى بى خبر عشق اهليدين بيان سورمه
درد استاکيل عشق درديغه درمان سورمه
عاشق بولسنك زاهدلاردين نشان سورمه
بو يول لارده عاشق اولسه تاوانى يوق

زاهد بولمه، عابد بولمه، عاشق بولكيل
محنت تارتيب عشق يوليده صادق بولكيل
نفسنى تيغيب درکاهي غه لايق بولكيل
عشق سيزلارنى هم جانى يوق، ايمانى يوق

عشق سودامى کيمکا ثوشسه رسوا قيلور
پرتو سالب حق اوزيغه شيدا قيلور
مجنون صفت عقلين آليب ليلا قيلور
الله حقى بو سوزلارنى يالغانى يوق

قول خواجه احمد جاندين كيچيب يول غه كيركيل
آندين سونكره ايرانلارنى يولدن سوركيل
الله ديبان حق يوليده جانينك بيركيل
بو يول لارده جان بيرماسنك امكانى يوق
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 16 Fevral 2010, 16:13:57
۸۸
حکمت

حاجت ايرماس عشق درديغه دوا سورمق
ويران ايتيب کيتکان ايرميش دواسی يوق
جانينك قيناب، ياشنك اقيب، هوشينك کيتب
عشق درديدين دوستلار قاتيغ بلاسی يوق

هر کيم کويار جانغه آلار عشق نی اوتين
جانى کويسه اعضاسيدين چيقار توتون
بغری انى صد پاره دور يوقتور بوتون
خلق غه ظاهر کورونوب تورکان يراسی يوق

جاندين کيچماى تابماس هرکيم جانانه نى
کوروب همت قيلماق كراك پروانه نى
کوروب بيليب اوتقه اوردى اوز جانى نى
سود و زيان برله هرکز پرواسى يوق

انچه يوردونك انچه توردونك ای بى خبر
نفس شيطان ايشلاريدين قيلغيل حذر
بيزدين بورون تيليم كاروان قيلغان سفر
ايتا کيتكان بو دنيانينك وفاسى يوق

ايتيب اوتکان ايرانلاردين يول نى سورکيل
سحرلارده اوره قوبوب چار ضرب اورغيل
هو صحبتين قورغان ييرکا اوزونك اوركيل
يولغه کيركان ايرانلارنى هواسى يوق

قول خواجه احمد ايدى دوستلار ايشيتنك مونى
قاف ثاغى ديك تاشلار تيكسه چيقماس اونی
کيمكا ايتيب، کيمكا ييغلای عشق دردينى
واللو، بالله عشق دردينى دواسى يوق
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 16 Fevral 2010, 16:14:27
۸۹
حکمت

خوش غايب دين يتوشتى يخشى سوزوم تبرّك
عاشق بولسنك اى طالب رياضت ده بيلينك بوك
تون كيچه لار اوخلاماى ياش اورنى غه قانينك توك
ارسلان بابام سوزلارين ايشيتينکيز تبرّك

ارسلان بابام ايديلار طالب لارده> يوق اخلاص
پيرينك حاضر بولغانده نه حاجت حاضر و الياس
پيرغه قدم قويغانده يا ايتمه غوث الغياث
ارسلان بابام سوزلارين ايشيتينکيز تبرّك

طالب مين ديب ايتورلار والله بالله نا انصاف
نامحرم غه باقارلار كوزلاريده يوق انصاف
كيشى مالين ييورلار چون دل لاری ايماس صاف
ارسلان بابام سوزلارين ايشيتينکيز تبرّك

پير خدمتين قيلدوق ديب طالب مين ديب يورارلار
يييب حرام حريش نى کولباريغه اورارلار
کوزلاريده نمى يوق حلقه ايچره کيرارلار
ارسلان بابام سوزلارين ايشيتينکيز تبرّك

ذاكر مين ديب زور اورار چيقماس كوزيدين ياشی
دل لاريده غمى يوق ناکه آغريغای باشى
مكر و حيله قيلورلار معلوم خداغه ايشى
ارسلان بابام سوزلارين ايشيتينکيز تبرّك

طالب مين ديب ايتورلار کونکليده يوق ذره نور
چين طالب نى سورسنكيز ايچى تاشى کوهردور
حقه عيان سرلارى ييميش لاری صفا نور
ارسلان بابام سوزلارين ايشيتينکيز تبرّك

صورتلاری صوفی نقش قيامت دين قورقماس لار
فسق - فجور حاصلی کناه لاردين هورکماس لار
ايا تسبيح ايلکينده ييغلاب ياشين توکماس لار
ارسلان بابام سوزلارين ايشيتينکيز تبرّك

ايا تسبيح ايلکينده زنار يخشی بيلسنکيز
حق رضاسی بو تورور عشق سوداسين قيلسنکيز
عشقين آليب محشرده رسوا بولوب تورسنکيز
ارسلان بابام سوزلارين ايشيتينکيز تبرّك

عشقه قدم قويغانلار حق ديدارين كورارلار
موسى صفت محشرده حوق دين سؤال سورارلار
سر مست بولوب وصليده هو ذكرينى قورارلار
ارسلان بابام سوزلارين ايشيتينکيز تبرّك

انشاء الله ايشيتکان نى حقدين تيلاب آلور مين
شيطان يوليدين آليب حق يوليغه سالور مين
مدد قيلسه مصطفى کناه لارين تيلار مين
ارسلان بابام سوزلارين ايشيتينکيز تبرّك

ارسايادن باب نى سورسكيز پيغمبرغه اعتبار
صحابه لار اولوغى خاص بندهء كردگار
ياتقان ييرى ناهموار بر کازهء خوار زار
ارسلان بابام سوزلارين ايشيتينکيز تبرّك

چهار شنبه کون ايشيتيب ناکه حضرت بارديلار
ارسلان باب نى اوى غه اولكون مهمان بولديلار
ياتكان يرى ناهموار کوروب حيران قالديلار
ارسلان بابام سوزلارين ايشيتينکيز تبرّك

اول محمّد مصطفى توروب دعا قيلديلار
ملائك لار آمين ديب ايلکين آچيب تورديلار
شونداغ امت بيردينك ديب حق شکرينی قيلديلار
ارسلان بابام سوزلارين ايشيتينکيز تبرّك

صحابه لار ايديلار ارسلان بابا دور آتينکيز
عرب لارنی اولوغی پاکيزه دور ذاتينکيز
ترتيب تن فرص ديدی فرجه ساليب ياتينکيز
ارسلان بابام سوزلارين ايشيتينکيز تبرّك

آخر زمان امت لار نقش قيلور اويلارين
نفس هواغه قوانيب بوزار هر دم خويلارين
شان شوکت لار بيلان برپا قيلور بوی لارين
ارسلان بابام سوزلارين ايشيتينکيز تبرّك

آخر زمان امت لار دنيا فانی بيلماسلار
کيتکان لارنی کوروبان آندين عربت آلماسلار
ايرانلارنی قيلغانين کوروب کوزکا ايلماسلار
ارسلان بابام سوزلارين ايشيتينکيز تبرّك

يخشی يول لاردين آزيب يامان يولغه آوشقان
شيطان لعين پيريم ديب دامنی غه ياپوشقان
غزازيل نی پيريم ديب ايرته آخشام کوروشقان
ارسلان بابام سوزلارين ايشيتينکيز تبرّك

ايمان اسلامين آليب اولمايمن ديب کولوشکان
اولمايمن ديب دنياده موليم برلان اوروشکان
غافل ليق برله هر دم عمرينی برباد بيرکان
ارسلان بابام سوزلارين ايشيتينکيز تبرّك

وقتی ييتسه عزرائيل امانت نی بيردرکای
شيطن لعين پيريم ديب جان بيرارده کورمکای
ايمان اسلامين آلوب حال دلين سورمکای
ارسلان بابام سوزلارين ايشيتينکيز تبرّك

توبه قيلسه توبه سين موليم قبول قيلماکای
الله ديسه خواجه سى قولين توتوب آلماکای
جرم، عصيان کرهين پيركا باريب چچيماکای
ارسلان بابام سوزلارين ايشيتينکيز تبرّك

ييتی ياشده ارسلان باب ترکستانغه کيلديلار
باشيم قويب ييغلاديم حاليم کوروب کولديلار
مينك بير ذکرين اورکاتيب مهربان ليغ قيلديلار
ارسلان بابام سوزلارين ايشيتينکيز تبرّك

کليم قيلديم خرمادين مينکا وحشت قيلديلار
اى بى ادب کودك ديب عصا آليب سورديلار
وحشتى دين قورقماديم مينكا باقيب تورديلار
ارسلان بابام سوزلارين ايشيتينکيز تبرّك

آغزينك آچكيل اى كودك امانتينك بيرايين
مزاسينى يوتماديم آچ آغزينكغه سالايين
حق رسول نى بويروغين امت بولسام قيلاين
ارسلان بابام سوزلارين ايشيتينکيز تبرّك

اغزيم آجتيم سالديلار خرما ايسى قيلدى مست
ايكى عالمدين كيچيب والله بولدوم حق پرست
خواجه ملا ييغيلدى آليب يوردى دمت بدست
ارسلان بابام سوزلارين ايشيتينکيز تبرّك

بابام ايدى اى بلام تكليف قيلمادينك مينكا
بيش يوز ييلدور کاميمده سقلاب ايرديم من سينكا
مزاسينى سيز آليب تلقين بيردينكيز مينكا
ارسلان بابام سوزلارين ايشيتينکيز تبرّك

بابام ايدى اى بلام قاشيمده توراولاين
جنازيم نى اوقوب كوم جان تصدق قيلايين
مدد قيلسه مصطفى عليين غه كرايين
ارسلان بابام سوزلارين ايشيتينکيز تبرّك

ييغلاب ايديم اى بابا ياش کودك مين بيلماسمين
كورونكيزنى قزلار من كوتاريب سالالماس مين
حق مصطفى سنتين كودك مين بيلماس مين
ارسلان بابام سوزلارين ايشيتينکيز تبرّك

بابام ايدى ای بلام ملايك لار ييغيلكای
جبرائل امام بولوب اوزکالار تابع بولغای
ميکائيل و اسرافيل کوتاريب کوركا قويغای
ارسلان بابام سوزلارين ايشيتينکيز تبرّك

قول خواجه احمد سوزونکنی نادانلارکا ايتماکيل
سوزنی ايتيب نادان کا پوچك پلکا ساتماکيل
آجدين اولسنك نامرددين هرکز منت تارتماکيل
ارسلان بابام سوزلارين ايشيتينکيز تبرّك
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 16 Fevral 2010, 16:14:49
۹۰
حکمت

هر کيم قيلسه طريقت نی دعواسينى
اوّل قدم شريعت کا قويماق کيراك
شريعتنينك ايشلارنى ادا قيليب
آندين سونكره بو دعوانى قيلماق کيراك

شريعتسيز دم اورماسلار طريقتده
طريقتسيز دم اورماسلار حقيقتده
اوشبو يول لار ييرى بيلنور شريعتده
جمله سينى شريعتدين سورماق کيراك

آندين سونكره بر اير کيراك ارادت ليك
بولميش بولسه اول بر ايردين اجازت ليك
شريعتده راست موافق کرامت ليك
اوشال ايرنينك ايتاكنى توتماق كيراك

كيم بيلماين بو يول لارنى شيخ مين ديسه
كرامتدين ولايت غه خبر بيرسه
باطل ايرور اكر روح الأمين ايرسه
اوزين آنداغ باطل لاردين ساچماق كيراك

ارادت سيز، اجازت سيز مرشد بيلماس
طريقتنينك يول لارينى هرکز بيلماس
مبتدع دور ارادت كا لايق ايرماس
آنداغ لاردين ياراغ - ياراغ قاچماق كيراك

آندين سونكره مجاهده توتين کييوب
رياضت نينك بوته سنده ايريب آقيب
من منليك اوتوب اوزنى ياراق قيليب
عزت رختين ساتيب خوارليق آلماق كيراك

اوشبو يول دور ايرانلارنينك قيلغانلارى
طالب لارى بيلسون تيو ايغانلارى
حق دور بيلسنك بر ذره يوق يالغانلارى
جان قولاقى برله مونى اوقماق كيراك

صدقى برله هر کيم قبول قيلسه مونى
اعتقادى برله بولسه تونى - کونى
يادى برله مشغول بولسه تونى - کونى
ايرانلاردين ياری مدد قولماق كيراك

ارادت سيز اوشبو يولغه کيرماديلار
اجازت سيز يولغه قدم قويماديلار
اشارت سيز ياريم نفس اورماديلار
مريد بولغان بو صفتليغ بولماق كيراك

هركيم كيرسه اوشبو يولغه بيلين باغلاب
كيراك مخدوم، كيراك خادم اوزين بيليب
نيتى نى خداييغه درست قيليب
توجه نى عزيزلارکا قيلماق کيراك

هركيم ايرسه اوشبو يولغه کيرار بولسه
توبه قيليب حضرتيكا قدم قويسه
ذوالجلالنى جمالينى كورار بولسه
خواجه احمد نفسنى توتماق کيراك
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 18 Fevral 2010, 17:07:21
۹۱
حکمت

هر كيم قيلسه طريقت نی دعواسينى
اوّل قدم شريعت كا قويماق کيراك
شريعت نى ايشلارنى ادا قيليب
آندين سونکره بو دعوانى قيلماق كيراك

شريعتسيز دم اورماس لار طريقت ده
طريقتسيز دم اورماس لار حقيقت ده
معرفت سيز دم اورماس لار حقيقت ده
بارچه سينى شريعتدين سورماق كيراك

آندين سونکره برابر كيراك ارادت ليك
بولميش بولسه اول پيرى دين اجازت ليك
شريعت كا موافق راست كرامت ليك
شونداغ ايرنى ايتاكى نى توتماق کيراك

هركيم بيلماى بو اشلارنى شيخ مين ديسه
كرامتدين ولايت غه خبر بيرسه
باطل ايرور اكر روح الأمين ايرسه
آنداغ شيخ دين يراق - يراق قاچماق کيراك

ارادت سيز اجازت سيز مرشد بولماس
طريقت نى نشانه سين هرکز بيلماس
مونداغ كيشى ارادت غه لايق بولماس
اول کمراه دين يراق - يراق تورماق كيراك

ارادت نى بيرکيل اهل اجازت کا
قايم بولغيل تونى - كونى رياضت کا
سانيب آنى قوللوعى نى عبادت كا
قوللوغى ده بيل نى باغلاب تورماق كيراك

آندين سونكره مجاهده تونين کييوب
رياضت نى بوته سيده ايريب آقيب
من-من ليك دين اوتوب اوزی نى صاف قيليب
عزت رختين ساتيب خوارليق آلماق کيراك

اوشبو تورور ايرانلارنى قيلغانلارى
طالب لارغه بيلسون ديبان ايغانلاری
راست دور بو سوز بيلكيل يوقتور يالغانلارى
جان قلاقى برلان مونى بيلماك کيراك

صدقى برله هر كيم قبول قيلسه مونى
اعتقادى برله بولسه تونى - كونى
يادی برله مشغول بولسه يلدا تونى
ايرانلاردين همت يارى قولماق كيراك

ارادت سيز اوشبو يولغه کيرماديلار
انابت سيز يولغه قدم قويماديلار
اجازت سيز يريم نفس اورماديلار
مريد بولغان بو صفت ليغ بولماق کيراك

هر كيم كيرسه اوشبو يولغه بيلين باغلاب
قول خواجه احمد کيراك اوزنى خادم ايلاب
نيتى نى خدايى غه درست ايلاب
توجه نى عزيزلارکا قيلماق کيراك
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 18 Fevral 2010, 17:07:36
۹۲
حکمت

عزراييل بير کون تيلور سدت برلان
اسيغ تن دين عريز جان نى بيرماق كيراك
بيش کونلوك نقد عمرى نى قولدين بيريب
چاره تابماى آخر بير کون اولماق کيراك

اوغول - قيزينك ييغلاب قالسه فرياد اوروب
مال ملكينك مونده قالسه حيران بولوب
دشمن لارينك قوانوشور سينى كوروب
بويون سونوب اوزاليبان ياتماق کيراك

ميراث ديبان باش اياغينك باغلاكايلار
اسيغ سونى باشدين قويوب چايقه كايلار
تورت طرف دين آسته - آسته اوشلاکايلار
التى قرى بوزدين كفن قيلماق کيراك

جنازنك نى اولوغ كيچيك كوتارسه لار
كورستانغه قراب سينی يوروتسه لار
ييتميش ييرده سؤال سورسه فرشته لار
بر - بر آنى جوابى نى بيرماق كيراك

خلايق نى مزاريده عمارت نى
كورونك انده تورلوك-تورلوك علامت نى
لحد آتليغ دروازهء قيامت نى
سياست ليغ اويغه باريب کيرماك كيراك

كيريب كورسنك قرانغولوق يوقتور چراغ
ايچى توله حسرت ايرور اوتلوغ فراق
اولكون سينكا کيم قيلكوسى انده يراق
تا قيامت تانك آتقونچه ياتماق کيراك

عمرينك آخر بولغوسى دور بر کون تمام
بو ايش برلان بارسنك اكر دار السلام
حلال قويب يكان بولسنك دايم حرام
عذابى نى باريب آنده تارتماق کيراك

قول خواجه احمد توبه قيلغيل اولماس بورون
قيزيل يوزونك كورده ياتيب سولمامى بورون
ييلان چيان كورينك ايچره تولماس بورون
قضا كيلسه رضا بولوب تورماق کيراك
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 18 Fevral 2010, 17:07:53
۹۳
حکمت

قراکوندور اوشال ساعت که دنيادين سفر قيلسانك
زن - فرزند مال ملكنك بار سندين کذر قيلسانك
سنى قويماس اجل هرگز نيچه حكمنك روان بولسه
حكومت برله عالمنى اكر زير و زبر قيلسانك

محاصل دور خلايقنه اجل مثل سپاه لارديك
غضب برله آلور جاننك نچه مازاريلار قيلسانك
برلوبدور بارچه غه فرمان اولومنى شربتين ايچمك
قاچوب آندين قوتولمزسن نيچه آندين حذر قيلشانك

خلايقنينك مزاريغه باريب بر - بر تماشا قيل
اولوكلاردين آلوب عبرت كيراك بغرنك كباب قيلسانك
هميشه يخشيليق قيلغيل كيترسن اوشبو دنيادين
قيامت آب رويى غه كيراك خون چكر قيلسانك

خدا فرماننى توتغان بولور اول اوليالاردين
بولورسن اوليالاردين رياضت کوبراك قيلسانك
قونمه مال و ملكنك كا قورتور بو اجل آخر
قرا ييركا كيررسن اخر نيچه ما كرُّ وفر قيلسانك

خواجه احمد معصيت برله حياتنك قيلمغيل ضايع
بولورسن لايق حضرت اكر طاعت سحر قيلسانك
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 18 Fevral 2010, 17:08:11
۹۴
حکمت

ايا دوست لار آخر زمان بولدى كورونك
بى دين كافر بو عالمغه تولدى كورونك
حق قوللوغين قويوب بارجه فاسق بولدى
انينك اوچون قهار غضب قيلدى كورونك

اخر زمان نشانى اول خيرات کيتی
قهار ايكام قهر برله حکمين ايتى
خلايق لار فاسق بولوب دينين يوتى
اسلام ضعيف بولوب قولدين چيقتى كورونك

روره، نماز، ايمان، اسلام قولدين کيتی
کل يوم بتر ديبان حديث اوتی
اريغ رسول ايتقانلارى ايمدی ييتی
بو دنيانى قرانغولوق باستى كورونك

عالم لار بارچه علمين مالغه ساتى
بيليب كوروب اوزلارينى اوتقه اتى
اوزی عمل قيلماى خلقه علم اورکاتى
دنيا اوچون دين لارينى ساتى كورونك

والله حلال هيچ قالمدى بولدى حرام
اسير قيليب فرزندلارين سالدى كورونك

فعلميزدين بيزکا غضب قيلدى خالق
شکر ايتمادوك بيزكا جزا كوب نه جاغليق
خير احسان ايشيكين سلطان قيلدى باغليق
آنينك اوچون يوزمينك بلا تولدى کورونك

کون کورمكان ايسز محبوب مه پاره لار
يورك لارى قورقوب بولدر صد پاره لار
دردلاريغه دوا تابمای بيچاره لار
مونكلوع بولوب كافرغه خوار بولدى کورونك

جاندين آرتوق كورکان جانانه لار
يوزى آى کوزى چولپان مستانه لار
بويلارينى هيچ كورمكان بيكانه لار
کافرلارغه زار و حيران بولدى کورونك

ييغلايورلار فغان اوروب آى واى انام
کورمكايدوك مونداغ قاتيغ كونلارنى خام
بونه حسرت تيو زارين ايدى كورونك

اتام تيو کيچه - كوندوز ييغلايورلار
آريب قالغان بوته لاردك بوزلاريورلار
يتيم قالغان قوزى ينکليك منكرايورلار
نالشيغه تاشلار ايريب سوبولدى كورونك

نه مشكل دور کل نى اوزوب غنجه سيدين
اناسينى جدا قيليب بچه سيدين
کوندوزينى قرا قيليب كيچه سيدين
باشلاريغه قرانغونى سالدى كورونك

نه قيلغانچه سيزدين جدا بولدى انا
سونى سندين جدا قيلدى قادر خدا
قيامت نينك تانكى آنى وا حسرتا
جانميزکا مونداغ جغا سالدى كورونك

اتالارى قان ييغلايور تابماى علاج
باشلاريغه قرا کييب يوز يرتيب ساج
قالدی موکين بالالاريم آج يلالكاج
آه اوروب ايچ بوينى ايزدى كورونك

انالارى ترملوبان قالدى حيران
کل يوزلارين زعفرانديك سرعرتيبان
واى قلونوم بوتام ديبان آه اوروبان
يقا يرتيب ساج لارينى يولدى كورونك

جاندين عريز جان ايچينده مهربانم
نور ديدم، جكرينديم، غمكساريم
ايکی کوزوم ياروغلوغى، تنده جانم
قايده باردينك تيو فرياد قيلدى كورونك

كورکانميز قيتنب ينه سينى ايچان
اکر کورماى اولار بولسنك ده نه ارمان
ييغلاى - ييغلاى، كوزى کريان، بغرى بريان
نه قيلغوسين بيلماى حيران قالدى کورونك

حسرت داغين كونكلوميزه سالدى تمام
ايشينك بونه قدرت تورور اى خاص عام
قدرتين كورشنده اده لار بولدى علام
حق يانيب مونداغ جزا سالدى کورونك

قيزيل كل ديك نارسيده اول اوغلانلار
دنيا اولوب كيم كوروبدور مونداغ داغلار
مجنون يانكليغ ديوانه ديك بولدى ساغلار
عاجز بولوب مسلمانلار قالدى کورونك

ايركيم بولسه شاه مردان بولغاى ايرديم
بو ايلكيم كا آلماس قيليچ آلغاى ايرديم
بو كافرلار بارچه حرى سينى قيرغاى ايرديم
علاجيم يوق تيو ارمان قالدى کورونك

آق سينه منى بجل قيلديم اى فرزنديم
نه بازوق بير خدايم غه جكربنديم
اولومدين هم بتر بولدى مينينك درديم
بو دنياده هجران داغين سالدى کورونك

بارجه داغلار ايچره مشكل هجران داغى
هجراندين هم بتر ايرميش فرزند [او] داغى
بوراكيم دين سيريليب ايچيم كا قان تولدى كورونك

بلا كوبتور مونداغ هركز بلا يوقتور
ترملتوبان بيزدين كافر ايريب ايلتور
اجل يتيب كورمك نه دولت دور
مونداغ ديبان نوحه فرياده قيلدى کورونك

سين سيز منكا طعام يمك قبقزيل قان
سين سيز منكا ينكا كيراك بوتنده جان
سين سيز منكا قرانغودور اوشبو جهان
سينينك دردينك تيو حسرت قيلدى كورونك

انا فرزند بر بريغه چوغلاشتى لار
فرياد اوروب قوجاغلاشيب ييغلاشتى لار
حسرت ايتوب ارمان بيله ييغلاشتى لار
نه مشكل دور الوداع ديب قالدى كورونك

بيل بولارنى قرانغولوق باستى تمان
بيزكا غضب قيلدى بو كون قادر اوغان
كافر ييغيب آليب چيقتى شاد و خندان
مسلمانلار فرياد اوروب قالدى كورونك

توبه دينك لار نه قدرت دور خلقى جهان
آخر زمان نشانلارى بولدى عيان
غم داغينه يوز تسيلى قيلديم بيان
تانك عجايب كونلار ايمدى بولدى کورونك

ازل كونده ايذيم بيزكا قيلدى تقدير
بيزدين اوتوب آنچه خطا قيلدوق تقصير
آنينك اوچون نارسيده بولدى اسير
فعلميزدين بيزكا جفا سالدى كورونك

نه اناده رحم قالدى نه آتاده
اغا اينى بر بريغه ماجراده
مسلمانلار دعوى قيلور ايچار باده
مست ليق بيلان قرينداشدين تاندى كورونك

كورماسموسيز زمانه لار جوش ايلدى
بورونغى قدردانلار هيچ قالمادى
قدر بيلماس ناكس لاركا اورون تيكدى
عالم درويش يخشى لار خوار بولدى كورونك

ناکس، خسيس، بى ديانت قول لار حاكم
من - من ليك حددين اشيب بولدی ظالم
خلق ايچنده خوار بولدى لار درويش عالم
حمايتى خلق نى كافر بولدى كورونك

كونكل لارنى توتى تمن قرانغولوق
بيز کا يوقتور ايمدى كورماك بر ياروغلوق
يولدين آزيب شريعت نى پاس توتمادوق
دين قاليبان بل مسلمان بولدى کورونك

ديانت سيز، خسيس لارنينك خطرى يوق
دنيا مالين ييغيب هرکز تويارى يوق
پر زور بولوب اولوم دين هيچ خبرى يوق
او فردنينك دين دنيا بولدى كورونك

قول غريب نينك سوزى تقليد تحقيق ايماس
دردى يوقتور بو سوزلاركا قان يغلاماس
غيب علمين حقدين او كون کيمسه بيلماس
والله اعلم بالصواب ديب ايدى كورونك
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 18 Fevral 2010, 17:08:27
۹۵
حکمت

اى كونكل قيلدينك كناه هركز پشيمان بولمادين
صوفى مين ديب لاف اوروب طالب جانان بولمادينك
حيف عمرونك اوتى بير لحظه كريان بولمادينك
صوفى نقش بولدونك ولى هركز مسلمان بولمادينك

صوفى ليغ شونداغ مودور دايم ايشينك غفلت بيلان
دانهء تسبيح قولونكده تيل لارينك غيبت بيلان
سلهء چل پيچ اورارسين نفس بد عزت بيلان
صوفى نقش بولدونك ولى هركز مسلمان بولمادينك

صوفى بولسنك صاف بولغيل جرم عصيان بولماسون
طاعت تقوى قيليب کونكلونك پريشان بولماسون
جلنُ دلده ييغلاغيل محشرده يالغان بولماسون
صوفى نقش بولدونك ولى هركز مسلمان بولمادينك

صوفى ليق شرطى دورور تونلار قربوب قان ييغلاماق
هر جفاغه صبر ايتوبان بيلينى محكم باغلاماق
طالب الله بولوب هر يخشى سوزنى سوزلاماق
صوفى نقش بولدونك ولى هركز مسلمان بولمادينك

صوفيا طاعت قيلورسين بارچه سى عجب و ريا
جان و دل دنياغه مغرور تيل لارينكده آه و آه
جان بيرورده بولغونك نور ايماندين جدا
صوفى نقش بولدونك ولى هركز مسلمان بولمادينك

صوفى بولماى نيلاسون اويده قيلورغه ايشى يوق
صوفى ليغ دعوى قيلور خلق غه بيرورغه آشى يوق
آه و آه ديرلارينه كوزيده قطره ياشى يوق
صوفى نقش بولدونك ولى هركز مسلمان بولمادينك

صوفى بولوب نفس اوچون هردم ايشيك كا باقه سين
نذر آليب كيلديمو ديب هر دم كيشيكا باقه سين
لعنتى الله نى بوينونك كا هر دم تاقه سين
صوفى نقش بولدونك ولى هركز مسلمان بولمادينك

صوفى مين ديب لاغ اورارسين سوز اغانينك قانى
اشك سرخ و روى زرد و چشم خونبارينك قانى
مرشد كامل، مكمّل راه مردانينك قانى
صوفى نقش بولدونك ولى هركز مسلمان بولمادينك

صوفيا بى غم يورارسين دانهء تسبيح آليب
دنياغه مغرور بولوب دين ايشينى آرقه ساليب
قورققيل ايمدى قورققيل ايمدى خداغه يالباريب
صوفى نقش بولدونك ولى هركز مسلمان بولمادينك

صوفى بولوب مال كس آلماق اوچون قيلدينك جدل
ظاهرينك صوفى نمادور باطنينك دون و دغل
اى بى خبر اى بى خبر شرمنده سين روز ازل
صوفى نقش بولدونك ولى هركز مسلمان بولمادينك

دانهء تسبيح آليب ايل كوزيغه خوب صوفى سين
نفس بدنى آلديده ترسا جهودنى توفى سين
بنده ليغ قيلنك خداغه يوخسه سك كوفى سين
صوفى نقش بولدونك ولى هركز مسلمان بولمادينك

صوفيا اوز طورينكا يالغوز خداغه بنده سين
اصلينكا باقسنك اكر عالم ايچنده كنده سين
پر كناه و پر خطر هم عاصى و شرمنده سين
صوفى نقش بولدونك ولى هركز مسلمان بولمادينك

صوفيا قيلدينك محبت دعوى سين ديوانه بول
مال و ملك و خانماندين كيچكيل و بيكانه بول
كيم خدا ديب سوزلاسه مينك اوركولوب پروانه بول
صوفى نقش بولدونك ولى هركز مسلمان بولمادينك

صوفيا دعوى عشق قيل بارجه دين بيزار بول
اويقونى ايلاب حرام تونلار قوبوب بيدار برل
دردى يوق بيدردنى كورسنك قاچقيل و آزار بول
صوفى نقش بولدونك ولى هركز مسلمان بولمادينك

احمدا سين صوفى بولسنك صوفى ليغ آسان ايماس
حق رسول صوفى بولوب دنيا مالين سويكان ايماس
دنيانى سويكان كيشى بى شك بيلينك انسان ايماس
صوفى نقش بولدونك ولى هركز مسلمان بولمادينك
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 18 Fevral 2010, 17:08:46
۹۶
حکمت

حق تعالى پرتو سالدى جانيم كويدى
کيلينك ييغلينك ذاکر قول لار ذکر ايتاليك
سحر وقتده پير مغان باقيب سوردى
کيلينك ييغلينك ذاکر قول لار ذکر ايتاليك

ذاکرلارغه وعده قيلدى قادر خدا
کور ايچنده عطا قيلدى حورى لقا
ذاكرلارنى تورار جاى دارالبقا
کيلينك ييغلينك ذاکر قول لار ذکر ايتاليك

ذاكر بولسه شاكر بولسه ييرى جنت
قانلار آقسه کوزلاريدين قيلماس منت
امت بولسنك ذكرين ايتماك سيزکا سنت
کيلينك ييغلينك ذاکر قول لار ذکر ايتاليك

ذاکرلاركا خدا اوزى وعده قيلدى
فاذکرونى اذكركم آيت كيلدى
فردوس آتليغ جنتى دين محضر كيلدى
کيلينك ييغلينك ذاکر قول لار ذکر ايتاليك

ذاکرلارى هر نفس ده ذكرين ايتار
توبه قيليب ايکرى يولدين راست غه قيتار
ذکرين ايتسه آسته - آسته شوقى آرتار
کيلينك ييغلينك ذاکر قول لار ذکر ايتاليك

ذاکرلارى حلقه ايچره پرتو كورار
آنينك اوچون حلقه ايچره اوزين اورار
معشوقى نى کوركان زمان جانين بيرار
کيلينك ييغلينك ذاکر قول لار ذکر ايتاليك

يالغان عاشق معشوقيدين جانين ايار
عقبى يولين آرقه تاشلاب دنيا سويار
هو حلقه سين قورغان ييردين ايلار فرار
کيلينك ييغلينك ذاکر قول لار ذکر ايتاليك

الكذاب لا امتى ديدى سرور
بو سوزلاركا يول بير کوچى هادى رهبر
يالغانجى نى امت ديماس اول پيغمبر
کيلينك ييغلينك ذاکر قول لار ذکر ايتاليك

رحمن ايكام چين عاشق نى يولين آچار
محبت نى شوقى برله ياشين ساچار
الله تيو قايده بارسه شيطان قاچار
کيلينك ييغلينك ذاکر قول لار ذکر ايتاليك

ذاکرلارى ذکرين ايتيب ناله قيلور
كوز ياشينى سريغ يوزكا ژاله قيلور
بيابان لار كيزيب اوزن واله قيلور
کيلينك ييغلينك ذاکر قول لار ذکر ايتاليك

ذاکر قول لار حق فرمانين محكم توتار
اخلاص برلان الله تيو قانلار يوتار
حلقه ايچره كيركان وقتده جاندين اوتار
کيلينك ييغلينك ذاکر قول لار ذکر ايتاليك

بى طهارت ذکر ايكان كا لعنت ياغار
اوشل كونى بولغان فرزند شيطان توغار
اولار وقتده اوّل كيليب شيطان باقار
کيلينك ييغلينك ذاکر قول لار ذکر ايتاليك

بى طهارت ذكرين ايتكان ايمان ايتماس
اولار وقتده حق مصطفى قولين توتماس
سبحان ايكام کناهينى هرکز اوتماس
کيلينك ييغلينك ذاکر قول لار ذکر ايتاليك

مؤمن بولسنك بى طهارت ذكرين ايتمه
كرامت لار ايتيب حلقه دينينك ساتمه
مسلمانليغ دعوى قيليب کافر كيتمه
کيلينك ييغلينك ذاکر قول لار ذکر ايتاليك

ذاكر بولسنك ذكرين ايتماى هرکز ياتمه
نادان برله ناجنس لاركا هيچ سوز قاتمه
منافق لار حالدين سورسه بير سوز ايتمه
کيلينك ييغلينك ذاکر قول لار ذکر ايتاليك

قول خواجه احمد يامانلارنى يمانى سين
يارجه بغداى ايل توتماكان سمانى سين
يولدين آزغان كمراه لارنى نادانى سين
کيلينك ييغلينك ذاکر قول لار ذکر ايتاليك
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 18 Fevral 2010, 17:09:04
۹۷
حکمت

ايزيم يادى اولوغ ياددور ايتور بولسم
عسل ينكليغ سجوك بولور تيليم منينك
اوزوم فقير قيلديم مُقر بولدوم حقير
قنات قاقار اوجار قوشديك كونكلوم منينك

تورلوك عيشيم، تورلوك ايشيم، مونكلوغ باشيم
ايردى جانيم، كيتى هوشوم، آقتى ياشيم
يازوق بيلان تولدى توكال ايچى تاشيم
بى نيازيم آجا بيرسون يوليم منينك

كوزوم توشتى، كونكلوم اوجتى عرشقه آشتى
عمريم کيچتى، نفسيم قاچتى، بحريم ثاشتى
کاروان کوچتى، منزل آشتى، هاريب توشتى
سر اولاشتى نيتاك بولغان حاليم منينك

صورت مونده سيرت آنده قدرتينده
اوزون تونده، ياروق كونده، كونكلوم آنده
يورار تونده بولوب بنده بارى قانده
سورسه انده يازوق تورور تيليم منينك

ايچتيم شراب، بولديم خراب، اصليم تراب
کيلديم كوراب، كونكلوم سراب، عشقه پراب
حقدين خطاب كيلسه كورماس قول لار عذاب
بولاق ينكليغ آقار كوزدين ياشيم منينك

توشتيم اوزار، براق توزار، كيمسه بازار
دنيا بازار ايچره كيريب قول لار آزار
باشيم بيزار، ياشيم سيزار، قانيم توزار
آتيم احمد تركستاندور ايليم منينك
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 18 Fevral 2010, 17:09:22
۹۸
حکمت

ايا دوستلار مصطفى دين بيان ايلای
قولاق سالكيل خاص امتى بولاى ديسنك
اول رسول مجتبى نى عيان ايلای
قولاق سالكيل خاص امتى بولاى ديسنك

يوز مينك ندا حقدين كيلدى ايشيب آنكا
امت لارنينك حواله سين قيلغيل مينكا
جمله سينى باغشلايين آنده سينكا
قولاق سالكيل خاص امتى بولاى ديسنك

آتام - آنام ديماديلار ديدى امت
حمد ثنا تينماى ايتيب بولغيل الفت
قيامت ده كورمكاى سين حقدين کلفت
قولاق سالكيل خاص امتى بولاى ديسنك

وا دريغا اوتى عمروم قانى عشقيم
امت ايديم دنيا سرى بولدى ذوقيم
باطن کذاب ظاهريمده باردور دلقيم
قولاق سالكيل خاص امتى بولاى ديسنك

ييغلامايمو يولده قالديم عمليم يوق
امت ديدى آنينك سرى جدليم يوق
باشيم كيتسه بو يول لاردين تايريم يوق
قولاق سالكيل خاص امتى بولاى ديسنك

كوجوم ييتيب کعبه ساری بارماديم من
عالم لارنى نصيحتين آلماديم مين
حقدين قورقوب يخشى يولغه كيرماديم مين
قولاق سالكيل خاص امتى بولاى ديسنك

ياشيم ييتيب عمروم اوتوب توبه قيلماى
آخرت نى اسباب نى قولغه آلماى
يخشيلارنى خاك پاى بولوب يورماى
قولاق سالكيل خاص امتى بولاى ديسنك

امت بولسنك كيچه - كوندوز طاعت قيلغيل
عقبى سارى بارغل آنده راحت كورغيل
عاقل ايرسنك ييغلامقنى عادت قيلغيل
قولاق سالكيل خاص امتى بولاى ديسنك

چين امتى جاندين كيچيب دنيا قويدى
اولار وقتده امتيم ديب ناله قيلدى
واله بولوب بلبل صفت حقنى سويدى
قولاق سالكيل خاص امتى بولاى ديسنك

درود ايتكيل امت بولسنك اى بى خبر
رسول الله سوزين ايتديم كان كوهر
رسول ايدى دنيا بير كون قيلور ضرر
قولاق سالكيل خاص امتى بولاى ديسنك

واى امّتيم، واى امّتيم ديدى احمد
آنينك اوچون سبحان ايذيم قيلدی رحمت
آمين ديكيل قيامت كون قيلغاى شفقت
قولاق سالكيل خاص امتى بولاى ديسنك

قول خواجه احمد يولغه كيركيل حالا فرصت
الله ديكيل عمرونك اوتى دم غنيمت
قيدا بارسنك تكبير ايتيب قيلغيل صحبت
قولاق سالكيل خاص امتى بولاى ديسنك
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 18 Fevral 2010, 17:09:45
۹۹
حکمت

مينك تومن تورلوك خطالار ميندين اوتسه عفو قيل
كفتكوى ناروالار ميندين اوتسه عفو قيل
کر تلاوت قيلمشيم ده بو کلام الله نى
سهو، عصيان، خطالار ميندين اوتسه عفو قيل

اوقوغانده غافل اوتسه يا غلط نقصان بيله
هر نيچوك بيجا بجالار ميندين اوتسه عفو قيل
مدّ بيلان اعراب و تشديدلارنى تغير ايلاسام
بو كلامه هر خطالار ميندين اوتسه عفو قيل

فحش اوقوسام بير كلمه سينى يا بير حرفى نى
مونداغ ناتام دعالار ميندين اوتسه عفو قيل
آيت وعده وعيدنى قيلسام مين تفرقه
فهم قيلماى نارسالار ميندين اوتسه عفو قيل

عزت اكرام قرآن نى بجا کيلتورمسام
بى ادب ليك بى اباليغ ميندين اوتسه عفو قيل
خضر تينكده من كبى قولنى خطاسى کوب ايرور
رو سياه ليك هر خطالار ميندين اوتسه عغو قيل

خواجه احمد مسكينى نقصانى كوبتور دنياده
كرچه يا ربّ مينك خطالار ميندين اوتسه عغو قيل
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 18 Fevral 2010, 17:10:05
۱۰۰
حکمت

عقبى خبرين ايشيتيب دنيانى ساليب كيتارم
توشدوم ايرانلار بحريكا دنيانى ساليب كيتارم
ايرانلار دنيا ديمدى دنيا غمين يمادى
حقدين اوزكانى ديمادى دنيا ساليب كيتارم

موسى عمران قالمادى تختى سليمان قالمادى
مينك ياشليغ لقمان قالمادى دنيا ساليب كيتارم
دنيا ديكان آزار ايرميش عاقل قول لار بيزار ايرميش
جاهل لار برله يار ايرميش دنيانى ساليب كيتارم

سلطان خواجه احمد يسوى ايدى بو حكمتنى تمام
ايشيتسون ديب جمله جهان دنيانى ساليب كيتارم
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 19 Fevral 2010, 15:29:31
۱۰۱
حکمت

الله ديكان بنده نی جاين جنتده كوردوم
حور غلمان جمله سين قارشو آلديده کوردوم
فاذکرونى ذكرينى ايتكان قول لار دايما
جمله سين همراهى بهشت عدنيده كوردوم

تونى - كونى اوخلاماى هو ذكرينى ايتقانلار
ملائك لار همراهى عرشنى اوستيده كوردوم
خير سخا قيلغانلار يتيم کونکلين آلغانلار
چهار يارلار همراهى کوثر لبنده كوردوم

قاضى بولغان عالملار پاره رشوت ييكان لار
انداغ عالم جايى نى نار سقرده كوردوم
مفتى بولغان عالم لار ناحق فتوى بيركانلار
انداغ مغتى جايى نى صراط كوفروكده كوردوم

جماعت کا بارمايين ترك نماز قيلغانلار
شيطان برله بر ييرده درك اسفل ده كوردرم
ظالم بولوب ظلم ايتكان مؤمن لارنى آغريتكان
قرا يوزلوك محشرده قولين آرقه ده كوردوم

قول خواجه احمد كان آجتى در كوهرنى ساجتى
تينكلامكان بو سوزنى غفلت ايچنده كوردوم
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 19 Fevral 2010, 15:29:53
۱۰۲
حکمت

نيت قيلدوق كعبه کا رضا بولونك دوستلاريم
يا اولكايميز كيلكايميز رضا بولونك دوستلاريم
نيت قيلدوق كعبه کا حق مصطفى روضه کا
نصيب قيلغاى بارجه كا رضا بولونك دوستلاريم

رضا بولونك اوزوم دين يخشى يمان سوزوم دين
اوتونك مينى يوزم دين رضا بولونك دوستلاريم
دوستلار بيزنى يوقلاغاى فاسق لار كوب اوخلاكاى
مسجد سارى كيلماكاى رضا بولونك دوستلاريم

سردين بولدى اشارت مونده قيلدوق عمارت
دوستلار قيلغاى عبادت رضا بولونك دوستلاريم
کعبه سارى کوجالوك ظالم لاردين قاجالوك
اوغل - قيزدين کيچالوك رضا بولونك دوستلاريم

تيليم سورسام قرار يوق غريب اولسه سورار يوق
ييميشلارده حلال يوق رضا بولونك دوستلاريم
کيچتی قولنك جانيدين چيقتى خلقنى ساندين
دوستلار بارکاى سونكيدين رضا بولونك دوستلاريم

خواجه احمد يوم كوزونكنى رضا بولونك دوستلاريم
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 19 Fevral 2010, 15:30:08
۱۰۳
حکمت

نيچه ييليق مهربانيم جان ايديلار دوستلاريم
بو وجودوم شهرينى فانى قيلادور دوستلاريم
بو قفس نى طوطى سی پرواز ايتادور اوجكالى
بير قرانغو شعله سيز ييركا بارادور دوستلاريم

اى منى يارانلاريم همت توتونك ايمانيمه
دشمنيم ايمانيمه زحمت برادور دوممتك ريم
اوشبو جان بيزلار بيلان بير نيچه ييل لار بار ايدى
حق تعالى حكمى برلان عزم ايتادور دوستلاريم

بو منى اعضالاريم جانيم بيلان شادمان ايدى
جان چيقارغه كل اعضام تتراشادور دوستلاريم
امر حقه بارجه خلق عالمين بولدى رضا
اوا حقيقت بندلار دايم رضادور دوستلاريم

قول خواجه احمد طوطىسی پرواز ايتادور اوجكالى
نيلاسون مسکين حکم خدادور دوستلاريم
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 19 Fevral 2010, 15:30:25
۱۰۴
حکمت

يولغه كيركان ايرانلاردين يول نى سورماى
يغلامايمو اى دوستلاريم خطا قيلديم
حق ذكرينى کيچه - كوندوز ورد الاماى
ايا دوستلار اوز جانيمه جفا قيلديم

الله يادى كونكل لارنى روشن قيلغان
عاشق لارغه خدا اوزى وعده قيلغان
عشق نسيمى مصطفى غه تحفه كيلكان
اول سببدين كوز ياشيمنى كواه قيلديم

الله ايتور عاشق لاريم براق سوار
حق ذکرينى ايتكانلارکا رحمت ياغار
كوب ييغلاغان ديداريمنى بى شك كورار
روز محشر ديداريمنى عطا قيلديم

وعده قيلی عاشق لارغه يوز مينك براق
عالم خلقى ملامتى آنكا يراق
بو عالمده ايل كوزيكا ياتغان جراق
عقبى ايچره يوز مينك کوشك لار عطا قيلديم

دردسيز آدم، آدم ايرمس مونى آنكلانك
عشق سيز آدم حيوان جنسى مونى تينكلانك
کونكلونكيزده عشق بولمسه منكا ييغلانك
كريان لارغه خاص عشقيم نى تطا قيلديم

بنده بولسنك من - من ليك نى زينهار تاشلا
سحرلارده جانينك قيناب تينماى ايشلا
يولدين آزغان كمراه لارنى يولغه باشلا
بير نظرده دل لارينى صفا قيلديم

چين دردليك کا اوزوم دارو اوزوم درمان
هم عاشق مين، هم معشوق مين ازووم جانان
رحم ايلايم آتيم رحمن ذاتيم سبحان
بير نظرده باطن لارين صفا قيلديم

تانك آتقونچه حق يادينى آيغان كيشى
تاغ جول نى بوستان قيلور آقان ياشی
الله ايتور اوزكا برله يوقتور ايشى
اول عاشق نى خلايق دين جدا قيلديم

عشق بادينی ييرکا سالسام يير کوتارماس
دفتر قيلسام تا تريك سين بيتيب بولماس
حقنى بيلكان بيك و خان و خلقنى بيلماس
اول بنده م نى اوز يولومده دوتا قيلديم

مال و پلنى پروا قيلماس عاشق کيشی
يول اوسيده تفراق بولوب عزيز باشى
آندين سونكره نورغه تولور ايچى تاشى
تانكلا بارسه محشر آرا پادشاه قيلديم

حق دين قورقوب مال و پلنى سويماکان نى
حقنى ايتيب بير دم ياتيب اويماکان نى
ياتسه قويسه حق ذكرينى قويماکان نى
آچتيم باطن كوزلارينى بينا قيلديم

روزه توتوب خلق غه ريا قيلكانلارنى
نماز اوقوب تسبيح قولغه آلكانلارنى
شيخ مين تيو اوزكا بنا قويغانلارنى
آخر دمده ايمانى دين جدا قيلديم

حقه عاشق بولوب ايدى قول خواجه احمد
صدقى برلان ايشيتكانكا يوز مينك رحمت
دتا قيلاى کورمكايلار محنت زحمت
عاقل ايرسنك بير سوز برلان ادا قيلديم
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 19 Fevral 2010, 15:30:42
۱۰۵
حکمت

ايا دوستلار حسب حاليم بيان ايلاى
نه سبب دين حقدين قورقوب غاركا كيرديم
چين دردليك كا بو سوزلارنى عيان ايلاى
اول سبب دين حقدين قورقوب غاركا كيرديم

غار ايچنده کيچه - کوندوز طاعت قيلديم
تطوع نماز اوقوب عادت قيلديم
هر نه جفا تيكسه آنكا طاقت قيلديم
اول سبب دين حقدين قورقوب غاركا كيرديم

غار ايچنده مصطفى نى حاضر كوردوم
سلام قيليب ادب برله بيخود توردوم
عاصى، جافى امت لارنى حالين سوردوم
اول سبب دين حقدين قورقوب غاركا كيرديم

غاركا كيرماك رسول الله سنت لارى
طاعت قيلماق حق رسول نى عادتلارى
غريب لاركا رحم قيلماق شفقت لارى
اول سبب دين حقدين قورقوب غاركا كيرديم

امت بولسنك کيچه - کوندوز تينماى ييغلا
بغرينك بيشيب اوپكانك تيشيب يورك دغلا
اجل كيلسه مردانه وار بيلينك باغلا
اول سبب دين حقدين قورقوب غاركا كيرديم

بير كون سينى عمرونك بركى بولغاى خزان
اجل كيلماى توبه قيلغيل ايا نادان
شايد سينكا رحم ايلاكاى ايزيم يزدان
اول سبب دين حقدين قورقوب غاركا كيرديم

چين دردليكنى ايشى ايرور سوز و گداز
کوز ياشی دور حق قاشيده تحفه نياز
کيچه کوندوز تينماى قيلغيل روزه نماز
اول سبب دين حقدين قورقوب غاركا كيرديم

ايا فرزند امت لارنى دردى اورتار
فسق فجور كناه لارى تاغ دين آرتار
دين نى قويوب دنيا مالين اوزكا تارتار
اول سبب دين حقدين قورقوب غاركا كيرديم

قول خواجه احمد تكبير ايتيب صحبت باشلا
هاى هوس من - من ليك نى ياراق تاشلا
سحرلارده چار ضرب اوروب تينماى ايشلا
اول سبب دين حقدين قورقوب غاركا كيرديم
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 19 Fevral 2010, 15:31:01
۱۰۶
حکمت

محبت نى بازارينده جولان قيليب
آخرتنى سوداسينى باشلاسام مين
بو دنيانينك عزت لارين آرقه تشلاب
خارليق - زارليق يول لارينى خوشلاسم من

بو يول لارده خارليق - زارليق دركار ايرميش
تسبيح، تهليل، روزه، نماز بيكار ايرميش
يالغانچيدين خدا، رسول بيزار ايرميش
يالغان نماز ريالارنى تاشلاسام مين

چين كونكل ده نماز قيلغيل خدا بيلسون
خلق ايچنده رسوا بولغيل عالم کولسون
تفراق صفت خارليق تارتقيل نفسنك اولسون
همت بيرسنك نفسيم ييغيب يغلاسام مين

دوستلاريمنى رسوا قيلغان نفس هوا
آنينك اوچون شيطان لعين قيلور غوغا
لطف ايلاسنك من - من ليكنى قيلاى ادا
رياضت ده جانيم قيناب ايشلاسام مين

عشق يوليده قطره قطره قانلار يوتاى
رحمن آتليغ رحمتنكدين اميد توتاى
جام شراب تويا بيرسنك جاندين اوتاى
حسرتنكده ايكى كوزوم ياشلاسام مين

نفسيم مينى اوتديك يانيب يوليم اوردى
يوز مينك تورلوك طعام تيلاب دوكان قوردى
آغزين آچيب هر ايشك کا مينى سوردى
همت بيرسنك ايت نفسيم نى اوشلاسام مين

عشقيم تاشتى روحم قاچتى قايدين تاپاى
آرقاسيدين عشق آتنى مينيب چاپاى
كمى كورسام خضر بيلب قولين توتاى
خضر و الياس مدد قيليب اوشلاسام مين

كناهيم كوب يركا سيغماس كيم کا ايتاى
توبه قيليب ايكرى يولدين راست كا قايتاى
ندامت ده ايت لاريم نى اوزوب تارتای
صد دريغ ديب بارماق لاريم تيشلاسام مين

کناه قيليب توبه قيلماى حددين آشتيم
نفسيم مينى طغيان قيلدى طرفه شاشتيم
بحمد الله پيرى مغان ساى قاچتيم
قولغه آليب نفس بدنى اوشلاسام مين

قول خواجه هر بير سوزونك دردكا درمان
طالب لاركا بيان قيلسام قالماس آرمان
تورت مينك تورت يوز حكمت ايتم حقدين فرمان
فرمان بولسه تا اولكونچه سوزلاسام مين
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 19 Fevral 2010, 15:31:17
۱۰۷
حکمت

تينماين حضرتنكده الله ديسام
زار اينكرابان ذاكر بولوب ربى ديسام
قول بولونك قولليقينكده بويون سونسام
بو ايش برله يا ربّ سينى تابقايمومين

زكرياتيك بو باشيمغه ارّه قويسام
ايّوب تيكبو تنيمغه قورتنى قويسام
موسی تيك طور طاغيده طاعت قيلسام
بو ايش برله يا ربّ سينى تابقايمومين

يونس تيك دريا ايچره بالق بولسام
يوسف تيك قدق ايچره تون - كون بولسام
يعقوب تيك يوسف اوچون زار اينكراسام
بو ايش برله يا ربّ سينى تابقايمومين

شبلى تيك عاشق بولوب سماع اورسام
بايزيدتيك تون - كون تينماى کعبه بارسام
کعبه کا يوزم سورتيب زار اينكراسام
بو ايش برله يا ربّ سينى تابقايمومين

معروف تيك اوشبو يولغه قدم قويسام
منصورتيك جاندين كيچوب دارده قونسام
دار اوزره شوقلانيبان حقنى ايسام
بو ايش برله يا ربّ سينى تابقايمومين

قول خواجه احمد قول لوق ايچره ضابط بولسام
ذکر ايتيب ذاکر بولوب ربّى ديسام
ذكرنده شوقلانيب كويوب يانسام
بو ايش برله يا ربّ سينى تابقايمومين

اول ألَسْتُ بِرَبِّكُمْ ديكاننده
قَالُوا بَلَى ديكانيمنى بيلا آلماس مين
وَمَا دِيْنُكُمْ ديبان ينه سوركاننده
دينيم اسلام ديكانيمنى بيلا آلماس مين

الهيم دين ينه اوچ يول كيلدى خطاب
مؤمن ارواح ربّيم سين ديب بيردى جواب
جواب ايتمانى كافر قيلدى ايزيم وهّاب
مين هم جواب ايتكانيم نى بيلا آلماس مين

جمله روح كا شون ساتت ده فرمان ييتى
فرمان بولغاچ دم اوتماين صف قورولدى
كافر چبده مؤمن بنده اونكده توردى
قايسی طرف تورکانيمنى بيلا آلماس مين

سجده قيل ديب حقدين ينه فرمان بولدى
سجدد قيليب بارجه مؤمن اولوش آلدى
سجده قيلماى قالغانلارى كافر بولدى
مين هم سجده قيلغانيمنى بيلا آلماس مين

اى مؤمن لار وهمى برلان بولدوم كريان
بو غم برلان عقليم حيران يوراركيم قان
تندين اوتوب دلدين اوتوب اورتادى جان
نيچوك علاج ايتاريمنى بيلا آلماس مين

خدايم نى قدرتى غه ييتيب بولماس
شقى، سعيد امر قيلدى بيليب بولماس
طاقت قيليب خلق ايچنده توزوب بولماس
قايسى طرف كيتاريمنى بيلا آلماس مين
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 19 Fevral 2010, 15:31:36
۱۰۸
حکمت

اول ألَسْتُ بِرَبِّكُمْ ديكاننده
قَالُوا بَلَى ديكانيمنى بيلا آلماس مين
وَمَا دِيْنُكُمْ ديبان ينه سوركاننده
دينيم اسلام ديكانيمنى بيلا آلماس مين

الهيم دين ينه اوچ يول كيلدى خطاب
مؤمن ارواح ربّيم سين ديب بيردى جواب
جواب ايتمانى كافر قيلدى ايزيم وهّاب
مين هم جواب ايتكانيم نى بيلا آلماس مين

جمله روح كا شون ساتت ده فرمان ييتى
فرمان بولغاچ دم اوتماين صف قورولدى
كافر چبده مؤمن بنده اونكده توردى
قايسی طرف تورکانيمنى بيلا آلماس مين

سجده قيل ديب حقدين ينه فرمان بولدى
سجدد قيليب بارجه مؤمن اولوش آلدى
سجده قيلماى قالغانلارى كافر بولدى
مين هم سجده قيلغانيمنى بيلا آلماس مين

اى مؤمن لار وهمى برلان بولدوم كريان
بو غم برلان عقليم حيران يوراركيم قان
تندين اوتوب دلدين اوتوب اورتادى جان
نيچوك علاج ايتاريمنى بيلا آلماس مين

خدايم نى قدرتى غه ييتيب بولماس
شقى، سعيد امر قيلدى بيليب بولماس
طاقت قيليب خلق ايچنده توزوب بولماس
قايسى طرف كيتاريمنى بيلا آلماس مين

بيرنى گبر و بيرنى كافر يهود قيلدى
بيرنى مؤمن بيرنى كافو يهود قيلدى
عزازيل نى دركاهيدين مردود قيلدى
نه سبب دين قيلغانى نى بيلا آلماس مين

کناهيم كوب تاغ دين آغير طاعتيم آز
طاعت قيلماى عمروم اوتى قيش و هم ياز
دركاهى كا بارور بولسام يوقتور نياز
نه يوز برلان باراريمنى بيلا آلماس مين

جاندين كيچكان چين عاشق لار اوزين كوردى
روز ازل ينه بيرنى عاشق قيلدى
لطف كرم ايلاب آنكا عشقين سالدى
آنده ديدار كوراريمنى بيلا آلماس مين

زاهد قيلدى ينه بيرنى طاعت اوچون
زاهد ينه طاعت قيلمس راحت اوچون
حور غلمان طوبى ولدان جنت اوچون
زاهد ديدار كوراريمني بيلا آلماس مين

آخرت نى يراغى نى قيلا آلماديم
يول لار اوزاق يول آزوقين آلا آلماديم
جاندين كيچيب حق امرينى قيلا آلماديم
آزوق سزين بازاريمنى بيلا آلماس مين

تويماى قالديم دم اوتمايين عمريم اوتى
ملك الموت کيلماكى هم ياووق ييتى
ايا دوستلار عمل سيز مين ياشيم قاتى
نه حال برله كيتاريمنى بيلا آلماس مين

بير فرصتده ييتيب کيلماى اوتماى ساعت
هيبتى كا يير و كوكلار قيلماس طاقت
فرمان بولسه الهيم دين ملك الموت
نيچوك طاقت قيلاريمنى بيلا آلماس مين

جان آلورغه اول عزرائيل کيليب تورسه
جانينك بير ديب هيبت برله بير چنك اورسه
اوچ يوز التميش تامورلاريم تترار بولسه
نه حال برله باراريمنى بيلا آلماس مين

اهل عيال يوزونك سارى باقيب تورکای
باقيب توروب سوز ايتورغه تيلينك کيلماى
رحم ايتمسه يقين ايشينك يراق بولغاى
حيران بولوب نيتاريمنى بيلا آلماس مين

خدايم نى امرى برله جانيم آلسه
جانيم آنده باريب تنيم مونده قالسه
رنكيم مثل برك خزان ينكليغ سولسه
ايمان برله باراريمنى بيلا آلماس مين

اهل عيال قورشاب تورکای ييغلاب سينی
يوغوچی لار تخته اوزره آلغای سينی
سونى قويوب پاك ايلاكار ظاهريم نى
باطينيمنى يوغانى نى بيلا آلماس مين

آندين سونكره کفن تونين کيدورکايلار
پاك ناپاك مينى ساليب چولغاکايلار
باش آياغيم محكم توتوب باغلاکايلار
توبه تونين کيكانيمنى بيلا آلماس مين

تورت آياغ ليغ تابوتيمنى كيلتورکای لار
مينی ساليب تورت طرفدين کوتارکای لار
ثنا ايتيب جنازه م نى اوقوکای لار
مين هم ثنا ايتاريمنى بيلا آلماس مين

آندين سونكره مينى ساليب روان بولسه
ييتميش ايكى يرده مندين سؤال سورسه
جواب بير ديب فرشته لار وحشت قيلسه
نيچوك جواب بيراريمنى بيلا آلماس مين

تابوت برله آليب تورسه کور باشنده
يارانلاريم ييغلاب توركاى کوب قاشيمده
يالغوز ييغلاب قورغوم ايل باشنده
آنده نيچوك قيلاريمنى بيلا آلماس مين

بو حسرتده كور اوى كا كرار بولسام
الوداع ديب بارجه كيتيب يالغوز قالسام
مار كژدم اوفراب تورسه قاچا آلماسام
نه حال برله قاچاريمنى بيلا آلماس مين

اى مؤمن لار عجب اويدور قرانغو كور
پر وحشت ليك سياست ليك هيبتى زور
الله اوزى لطف ايلاسه بولور پرنور
لطف ايتماسه نه قيلاريمنى بيلا آلماس مين

مينى قويوب ييتى قدم كيتار بولسه
منكر نكير اوشال دمده كيريب كيلسه
مَنْ رَبُّكَ ديب فرشته لار باقيب تورسه
ربّيم الله ديكانيمنى بيلا آلماس مين

قول خواجه احمد منزل خطر يول لار يراق
بارور يرينك ياووق تورور بارمو يراق
توبه قيليب اوزين بيلكان آلدى يراق
مين هم توبه قيلغانيمنى بيلا آلماس مين
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 19 Fevral 2010, 15:31:52
۱۰۹
حکمت

عشقنك قيلدی شيدا مينی جمله عالم بيلدی مينی
قايغو سينسين تونی - کونی مينکا سينوق کرکسن
تعالی الله زهی معنی سين ياراتدنك جسم و جانی
قوللوق قيلام تونی - کونی مينکا سينوق کرکسن

كوزم آچديم سينى كورديم كل کونكلنى سنکا بيرديم
اوروغلاريم تركين قيلديم مينکا سينوق کرکسن
سوزلاسام مين تيليمده سين كوزلاسام مين كوزيمده سين
كونكليمده هم جانيمده سين مينكا سينوق کرکسن

فدا بولسون سينكا جانيم توكار بولسانك مينم قانم
مين قلنك مين سين سلطانم مينكا سينوق کرکسن
عالم لاركا كتاب کيراك صوفيلارغه مسجد کيراك
مجنون لارغه ليلى كيراك مينكا سينوق کرکسن

غافل لاركا دنيا كيراك عاقل لارغه عقبى کيراك
واعظ لارغه منبر كيراك مينكا سينوق کرکسن
عالم بارى اوجماخ بولسه جمله حورلار قارشو کيلسه
الله مينكا روزى قيلسه مينكا سينوق کرکسن

اوجماخ كرم جولان قيلام نه حورلازغه نظر قيلام
آنى - مونى مين نه قيلام مينكا سينوق کرکسن
خواجه احمد در منم آتم تونىکونی ينار اوتم
ايكى جهانده اميديم مينكا سينوق کرکسن
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 19 Fevral 2010, 15:32:10
۱۱۰
حکمت

سحرلارده قوپوب ييغلاب دعا قيلسام
دوستلار خواجم مينى بندم ديكايموکين
ياش اوزينغه قانيم توكوب دعا قيلسام
دوستلار خواجم مينى بندم ديكايموکين

دركاهيغه باشيم قويوب ناله قيلسام
كوز ياشيم نى آقوزوبان ژاله قيلسام
بيابانلار كيزيب اوزوم واله قيلسام
دوستلار خواجم مينى بندم ديكايموکين

قايدا بارسام يادين ايتب ييغلاسام مين
خدمتيدا بيليم محكم باغلاسام مين
حسرتيده يوراك بغريم داغلاسام مين
دوستلار خواجم مينى بندم ديكايموکين

هرکون يوز مينك قولوم آچيب أمين ديسام
موسى صفت طور تاغيدا رازين ايتسام
توقسان توقوز رازين اييتب جانيم بيرسام
دوستلار خواجم مينى بندم ديكايموکين

بايزيدديك ييتمش يولى اوزوم ساتسام
الله تيو دردى بيلان اولوب كيتسام
رياضت ده اريب ازيب اچيب قاتسام
دوستلار خواجم مينى بندم ديكايموکين

الله اوچون فرزندلاريم يتيم قيلسام
رياضتده سونكاك لاريم حليم قيلسام
اهل - عيال، خانمانيم غنيم قيلسام
دوستلار خواجم مينى بندم ديكايموکين

الله ديكان بنده لارنى قولى بولسام
عاشق لارنى کويوب اوچكان كلى بولسام
پول اوستيده تفراق صفت يولى بولسام
دوستلار خواجم مينى بندم ديكايموکين

الله - الله جانيم الله، دليم الله
سيندين اوزکا پناهيم يوق والله بالله
ييغلاب کيلديم دركاهينكا شىء لله
دوستلار خواجم مينى بندم ديكايموکين

يخشى لارنى صحبتمده ذاكر بولسام
هر نه جفا تيكسه مينكا شاكر بولسام
ايوب صفت بلاسيغه صابر بولسام
دوستلار خواجم مينى بندم ديكايموکين

آستانكغه باشيم قويوب توبه قيلسام
غيبت قيلغان تيل لاريم نى يوز مينك تيلسام
کنه قيلغان بندلاريمنى پاره قيلسام
دوستلار خواجم مينى بندم ديكايموكين

توبه قيلديم، توبه قيلديم قبول قيلغيل
توبم قبول قيلماس بولسانك جانيم آلغيل
يولده قالديم، يولده قالديم قوليم آلغيل
دوستلار خواجم مينى بندم ديكايموكين

الله اوچون مردانه وار جانيم بيرسام
اهل عيال خانمانيمى تاشلاب كيتسام
جان نه بولغاى ايمانيمدين بلكه اوتسام
دوستلار خواجم مينى بندم ديكايموكين

سحرلارده ايرته قوپوب حقه يانسم
اولوغ كيچيك كناه لاردين توبه قيلسم
زارى قيليب حضرتيكا بويون سونسم
دوستلار خواجم مينى بندم ديكايموكين

قهار ايكام سندين قورقوب اويغانسام مين
كناهيم غه اقرار قيليب اينكراسام مين
سحرلارده يقام اوشلاب يالبارسام مين
دوستلار خواجم مينى بندم ديكايموكين

تاشقين كيلكان دريالارده يوزلاسام مين
آزيب قالغان بوته لاردك بوزلاسام مين
اولار وقتده مينك بير آتينك سوزلاسام مين
دوستلار خواجم مينى بندم ديكايموكين

وا ويلنا ندامت ديب قورقوب قوپسام
پير مغان دركاهينى تينماى اوپسام
يخشى لارنى خاكپاى بولوب اولسام
دوستلار خواجم مينى بندم ديكايموكين

تانك آتقونچه ييغلاب تينمای قورقوب چقسام
سبحان دردين آيتيب دوام اينكراب چقسام
تفراق صفت عاجز بولوب خوارليق تارتسام
دوستلار خواجم مينى بندم ديكايموكين

قول خواجه احمد جانينك بيركيل مردانه وار
جاندين كيچيب يولغه كيرسنك كوركونك ديدار
مرادينكنى بيرور سينكا پروردکار
دوستلار خواجم مينى بندم ديكايموكين
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 22 Fevral 2010, 09:23:03
۱۱۱
حکمت

محبت نى كوچه سينى كيزكان عارف
يخشى بيلور خم كانلارنى علامتين
ارادت دين قول لاريغه حربه آليب
دفعين ايلار مضرت نى سلامتين

انداغ عاشق اياقيغه باشين قويسه
بنا قويماى نفس هوانى کوزين اويسه
شوق شرابين ايچيب تاکه روحى قانسه
هيچ آغزندين سالماس توبه ندامتين

يولين تابيب باطن كوزى آچيلكانلار
خار - خسديك اياغ آستى يانجيلكانايار
برك كلديك سولوب توزوب ساجيلكانلار
عار آلماس اول خالايق ننك ملامتين

صوفى کيراك قنيمزى نى قيلسه صافى
طاعت قيلسه مانندهء بشر حافى
آندين سونكره وعده سيغه بولار وافى
بيشك کورار هر كيم کشف کرامتين

رجال لا تلهيهم ديب ايدى خدا
اوشل مردان ماسوى دين بولور جدا
ذکرين ايتيب هر نفسده اولسه روا
تاپار هردم غوث الغياث جلالتين

لاهوت آرا مريد اكر مقام توتسه
درويش ليكده قرق تورت مقام آندين اوتسه
شيخ مين تيو بنا قيوب اوتنى يوتسة
بى مشقت تابماس ايمان حلاوتين

دور اياغى ييتيب كيلدى اى بى خبر
ايچرور قويماى نيچه اكر قيلسنك حذر
وا حسرتا ايمانينكده كوبتور خطر
قوتولماس سين بيرماى آنى امانتين

قول خواجه احمد ظاهر اعمى يول اداشتى
طالب لارنى صحبتى دين يراق قاچتى
قريب جوكوب حق يوليغه عقلى شاشتى
تانكلا بارسه كورماس کورنی فراغتين
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 22 Fevral 2010, 09:23:22
۱۱۲
حکمت

بو عالمده حقدين قورقوب زار اينكراسام
آخرت ده روحوم آرام آلارموكين
ايرانلارنى باسقان ايزين کوزکا سورسام
پير مغان مين يولغه سالارموكين

باشيم بيريب، بيليم باغلاب، قيلسام اخلاص
نفس شيطان چنكاليدين بولسام خلاص
جان بيرارده مدد قيلسه خضر الياس
غوث الغياث ختم يس قيلارموكين

تاغ جول لار کناهيم دين قيلماس طاقت
هر کون يوز مينك جرم عصيان مينكا عادت
بر ايش برلان آخرت ده بارمو راحت
توبه قيلسام عاديلاريم قالارموكين

آستانه کا باشيم قويوب زارى قيلسام
غريب يتيم باشين سيلاب دعا آلسام
حقدين قورقوب دنيا ايشين آرقه سالسام
خواجه م منى حال دليم سورارموكين

آدم صفى سنت لارين تيل كا آلسام
يا ربّانا ظلمنا ديب ناله قيلسام
بيابانده كوز ياشينى ژاله قيلسام
بير و باريم مينى يولغه سالارموكين

سحرلارده زارى قيليب ييغلاسام مين
جان بيرارده بيليم محكم بغلاسام مين
شوقى برلان يورك بغريم داغلاسام مين
حق چراغى قبريم ايچره يانارموکين

باشيم تنيم تفراق قيليب فنا بولسام
ديدار تيلاب حسرتيده ادا بولسام
اهل عيال خانمان دين جدا بولسام
دوستلار خواجه م مينكا رحمى كيلارموكين

شيطان لعين يولدين اوردی حاليم تباه
ييغلامايمو نفسيم مينى قيلدى هوا
عالم خلقى باسيب اوتسه مينى اوا
كافر نفسيم عزازيل دين تانارموكين

غريب جانيم حق يوليده نذر ايلاسام
شاه حسين ديك كربلاده سوساب اولسام
حق شرابين ايچر مين ديب تشنه کيتسام
آنده بارسام سوسون لاريم قاناموکين

اصحاب لارديك دين تلاشيب باشم بيرسام
شهربانو امام لارديك ييغلاب يورسام
الله اوچن كافرلاركا اسير بولسام
رحمن ايكام سينكا مقبول بولارموکين

شرمنده مين شرمنده مين قولوم آلکيل
يولدين آزغان درمانده مين يولغه سالكيل
الله ديبان فنا بولدوم رحم ايلاکين
عاصى لارغه فيض فتوح بيرارموكين

اى عاصى لار توبه قيلغيل حق اشتسون
ناله نكيزدين يير و كوك لار ناله قيلسون
ملائك لار حقدين تيلاب اولوش بيرسون
اولوش آلغان قول نى غمى بولارموكين

عقليم، حيران كوزوم کريان، خانه ويران
حق يولينى بيلالماس مين اوزوم نادان
اى طالب لار بى طاقت مين قايدا [قاندا] جانان
جانانيم دين هيچ كيم خبر بيلارموكين

جانانه نى تاپاى ديسنك سحر تورغيل
عاشق لارنينك مجلسى كا اوزونك اورغيل
حقنى ايزلاب ييغلاب يوروب ماتم قورغيل
ماتم قورماى طريقت كا كرارموکين

حق وصلى غه ييتاى ديسنك زارى قيلكيل
ذكرين ايتيب ايرانلارغه يارى بيرکيل
جفا تارتيب ايرانلاردين اولوش آلكيل
اولوش آلماى ديدارينى کورارموكين

قول خواجه احمد هرنه ديرسين بولهوس سين
حقدين قورقوب آخرت قه غم ييماس سين
باشينك برله تونلار قاتيب هو ديماس سن
بولهوس نى خواجه م قبول قيلارموکين
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 22 Fevral 2010, 09:23:41
۱۱۳
حکمت

سحر وقتده قوجوب ييغلاب ناله ايلا
نالشينك دين يير و كوکلار نوا قيلسون
حقه سيغنيب کوز ياشينكنى ژاله ايلا
آندين سونكره حق دردينك کا دوا قيلسون

چين دردليك نى الله سويوب بندم ديدى
اوچ يوز آلتميش باقيب آنى غمين يدى
ملايك لار ياشين آليب تحفه قيلدى
قان ييغلاغيل ياشينك آليب کواه قيلسون

يوز مينك کناد صادر بولدى بيلالمادينك
توبه قيليب دركاهى كا کيلالمادينك
خذمت قيليب يخشى دعا آلالمادينك
يازوق لاردين سينى نه ديب جدا قيلسون

بو عالمده رسوا بولوب قان يوتمسنك
شريعت ده طريقت ده پير توتمسنك
حقيقت ده جان تندين پاك اوتمسنك
غفلت لاردين سنى نه ديب جدا قيلسون

ايرانلارنى قيلغان لارينى قيلالمسنك
پيرسيز يوروب ورد اوراد بيلالماسنك
استعانت تيلاب دعا آلالمسنك
خاص بزرك لار سينى نه ديب دعا قيلسون

دام تزوير قويوب خلقنى يولدين اوردونك
شيخ ليغ قيليب ريا برله دوکان قوردونك
عشرت قيليب شيطان برله دوران سوردونك
ديداريغه سينی نه ديب روا قيلسوق

لطف كرم حق ياراتى سيزلار اوچون
جان و دلده خذمت قيلماى سيزلار زبون
الله اوچون بحث ايتارمين تبقون سخون
ناپاك لاركا نه ديب لطفين عطا قيلسون

كيچه ياتماى خواب غفلت حرام قيلسه
ذكر قلب و ذكر سرنى تمام قيلسه
مينك بير آتين تسبيح ايتيب كلام قيلسه
بنده نه ديب دركاه كا خطا قيلسون

امر معروف نهى منكر بيليب قيلسه
ياتسه قوبسه بير خداى نى حاضر بيلسه
تا اولكونچه خواجه سيغه خذمت قيلسه
قوت بيرور آنى نه ديب دوتا قيلسون

بى نماز و بى طاعت كا بيرماس قوت
فعلى ضعيف اوزى معيوب بيرماس همت
رزقى ناقص اوزى ناجنس كورماس دولت
اول فاسق نى دلين نه ديب صفا قيلسون

حيف آدم اوز قدرينى اوزى بيلماس
من ليك قيليب يخشى لارنى كوزکا ايلماس
هو صحبتين قوركان ييركا قاچيب كيلماس
اول بى وفا عهده نه ديب وفا قيلسون

آدم اول دور فقير بولوب يولده ياتسه
تفراق صفت عالم انى باسيب اوتسه
يوسف صفت برادرى قول ديب ساتسه
قول نى قولى اول قول نه ديب هوا قيلسون

شوقى ذوقى محبت دين عيان قيلغيل
عاشق لاركا عشق اوتى دين بيان قيلغيل
خوارليق زارليق مشقت نى نشان قيلغيل
چين عاشق لار اوتدين نه ديب حذر قيلسون

الله ديبان اوتقه كيردى خليل الله
اوشل اوتنى بستان قيلدى كورونك الله
بوينين قسيب ييغلاب ايدى شيئاً لله
فقير مسكين اونده نه ديب هوا قيلسون

حقه عاشق صادقلارى يورور خلوت
تانكلا بارسه حق قاشيده كورار عزّت
جنت كيريب ديدار كورار عيش راحت
پنهان يورار خلقه نه ديب ريا قيلسون

قول خواجه احمد درد حالت پيدا قيلغيل
جان و دل نى حق يوليده شيدا قيلغيل
دردين تارتيب روز محشر غوغا قيلغيل
درد بولمسه موليم كيمكا شفا قيلسون
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 22 Fevral 2010, 09:23:58
۱۱۴
حکمت

بير كون كيلدى ابو بكر سلمان بيلان
حق مصطفى رازين آجتى رحمن بيلان
بارجه بارور بو دنيادين ارمان بيلان
ايلكين بولوب حقه واصل بولماق اوجون

عزرائل بير كون كيلدى فرمان بيلان
فاطمه سلام بيردى اكرام بيلان
حق مصطفى مشغول بولدى ايمان ييلان
اسيغ تن دين عزيز جان نى بيرماق اوجون

رسول ايدى صحابه لار بحيل بولونك
آخرت قه اولاندوق سيزانوق بيلينك
روزه توتونك، نماز اوقونك، زكوة بيرينك
جهنمدين اوزنى آزاد قيلماق اوجون

دوشنبه كون حق مصطفی دنيا قويدى
حق تعالى فرمانى غه بويون سوندى
ابن عبّاس سونى قويدی على يودى
اوچماق ايجره حله تونين كيماق اوجون

الله ديبان صحابه لار تبرانديلار
پيغمبرنى جنازه سين کوتارديلار
اول سدرة المنتهى غه اشورديلار
عرش اوستيغه تيكوروبان قويماق اوجون

آسمانده كی فرشته لار ييركا ايندى
پيعمبرنى نورى برلان عالم تولدى
بابام تيو فاطمه کريان قالدى
باباسيدين يتيم بولوب قالماق اوجون

قول خواجه احمد كوهرينكليغ حكمت ايدى
ايرانلاركا خذمت قيليب نظر تابدى
توقسان توقوز مينك حكمت ايتيب داستان قيلدی
داستان قيليب بوستان ايچره يورماق اوچون
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 22 Fevral 2010, 09:24:14
۱۱۵
حکمت

قُل هُو الله، صُبْحَان الله ورد ايلاسام
بير و باريم ديدارينكنى كورار مين مو
باشدين آياغ حسرتينكده درد ايلاسام
بير و باريم ديدارينكنى كورار مين مو

ايليك بيرده چول لار گيزيب کياه يديم
تاغ لار چيقيب طاعت قيليب کوزوم اويديم
ديدارينكنى كورالماديم جاندين تويديم
بير و باريم ديدارينكنى كورار مين مو

ايليك ايكى ياشده كيچتيم خانمان دين
خانمانيم نه كورونكاى بلكه جان دين
باش دين كيجتيم، جان دين كيچتيم، هم ايمان دين
بير و باريم ديدارينكنى كورار مين مو

ايليك اوجده وحدت مى دين روزى قيلدى
يولدين آزكان گمراه ايديم يولغه سالدى
الله ديديم لَبَّيْكَ ديبان قولوم آلدى
بير و باريم ديدارينكنى كورار مين مو

ايليك تورتده وجودلاريم نالان قيلدى
معرفت نى ميدانيده جولان قيلدى
اسماغيل ديك عزيز جانين قربان قيلدى
بير و باريم ديدارينكنى كورار مين مو

ايليك بيش ده ديدار اوجون كدا بولدوم
كويدوم، ياندوم كل ديك تقى فنا بولدوم
بِحَمْدِ الله ديدار ايزلاب ادا بولدوم
بير و باريم ديدارينكنى كورار مين مو

ايليك ألتى ياشقه ييتى موكلوغ باشيم
توبه قيلديم آقارموكين كوزده ياشيم
ايرانلاردين بهره آلماى كونكلى تاشيم
بير و باريم ديدارينكنى كورار مين مو

ايليك ييتى ياشده عمروم ييلديك اوتى
ايا دوستلار عمل سيز مين باشيم قاتى
بِحَمْدِ الله پير مغان قولوم توتى
بير و باريم ديدارينكنى كورار مين مو

ايليك سيكز ياشقه کيرديم مين بى خبر
قهار ايكان نفسمنی قيل زير و زبر
همت بيرسنك شوم نفسمکا اورسام
بير و باريم ديدارينكنى كورار مين مو

ايليك توقوز ياشقه يتيم داد و فرياد
جان بيرارده جانانيمى قلماديم ياد
نه يوز برله سينكا ايتاى قيلكيل آزاد
بير و باريم ديدارينكنى كورار مين مو

كوزوم يوموب تا آجقونچه يتی آلتميش
بيليم باغلاب مين قيلماديم بير يخشى ايش
كيچه كوندوز بى غم يوردوم مين ياز و قيش
بير و باريم ديدارينكنى كورار مين مو

آلتميش برده شرمنده مين کناهيم دين
ايا دوستلار کوب قورقه مين الهيم دين
جاندين كيچيب پناه تيلاى خدايم دين
بير و باريم ديدارينكنى كورار مين مو

آلتميش ايكي ياشده الله پرتو سالدى
باشدين - آياغ غفلت لاريم رها قيلدى
جانيم، دليم، عقليم، هوشيم ، الله ديدى
بير و باريم ديدارينكنى كورار مين مو

آلتميش اوچده ندا كيلدى قول ييرکا کير
هم جانينك مين ، جانانينك مين جانينكنى بير
هو شمشيرين قولغه آليب نفسينكنى قير
بير و باريم ديدارينكنى كورار مين مو

قول خواجه احمد نفس نى تيفتيم نفس نى تيفتيم
آندين كين جانانيمنى ايزلاب تابتيم
اولماس بورون جان بيرماك نى دردين تارتيم
بير و باريم ديدارينكنى كورار مين مو
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 22 Fevral 2010, 09:24:31
۱۱۶
حکمت

نور خدا، دوست خدا، اول مصطفى
كيم لار اوچون کيلدی رسول بيلكدينكز مو
درود خدا، ورد خدا، حق مصطفى
كيم لار اوچون کيلدی رسول بيلكدينكز مو

كيم لار اوچون كريان قيلدى کوزلارينى
امت اوچون بريان قيلدى اوزلارينى
امت بولسانك آنكلا اوشبو سوزلارينى
كيم لار اوچون کيلدی رسول بيلكدينكز مو

ييغلای - ييغلاى يوز كوزلارى ششتى كورينك
قيام توروب اياغلارى ششتى كورينك
امت اوچون قايغو محنت چيكتى كورينك
كيم لار اوچون کيلدی رسول بيلكدينكز مو

ايا دوستلار مونى بيلور امت قانى
اكر بيلسنك آندين ارتوق نعمت قانى
قيامت کون آندين اوزا شفقت قانى
كيم لار اوچون کيلدی رسول بيلكدينكز مو

امت بولوب رسول قدرين بيلدينكزمو
تن جان برله سنت لارين قيلدينكزمو
رسول اوچون زار اينکرابان اوتدينكزمو
كيم لار اوچون کيلدی رسول بيلكدينكز مو

هيهات هيهات سعادت دور اول مصطفى
هيهات هيهات عنيمت دور اول مصطفى
هيهات هيهات عنايت دور اول مصطفى
كيم لار اوچون کيلدی رسول بيلكدينكز مو

قول خواجه احمد سوزلار سوزونك تليم قفا
امت لاريم قيلغيل وفا، قيلمه جفا
امتى كا مونداغ ديدى حق مصطفى
كيم لار اوچون کيلدی رسول بيلكدينكز مو
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 22 Fevral 2010, 09:24:50
۱۱۷
حکمت

بيدار بولغيل اى مؤمن سحر وقتى ايچنده
قوتقار اوزونكنى اوتدين سحر وقتى ايچنده
سحرلاردا اول كل لار ثنا ايتور بلبل لار
كيم ايتور كيم بير و بار سحر وقتى ايچنده

سحر وقتيدا كوك دين ملك كلور مؤمن غه
يازوق لاردين يانورغه سحر وقتى ايچنده
سحر وقتيدا كوك دين جنت قوغى احارلار
بيدار قلغه سنجارلار سحر وقتى ايچنده

سحر وقتيدا قوپغا اولومنى ياد قيلغاى
قورقونچه دين كوككه اوچقاى سحر وقتى ايچنده
سحر لذتى نى عاشق قول لار بيلورلار
حق نى حاضر كورارلار سحر وقتى ايچنده

سحر وقتی خوش ساعت هم جنت ايرور راحت
تنکرينکه قيل عبادت سحر وقتى ايچنده
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 22 Fevral 2010, 09:25:07
۱۱۸
حکمت

كناهم باره باره حدين آشتى
قيامت كون مينى شرمنده قيلمه

باسيم ياستوقده و جانيمکيترده
تنيم باريب لحد ايچره يتارده
صراط التيغ کذارکاه دين اوتارده
قيامت كون مينى شرمنده قيلمه

يوزوم قراسنى آق ايلاکاى سين
محمّدنى مينكا يار ايلاکاى سين
سورار وقتده اوزونك بندم ديکار سين
قيامت كون مينى شرمنده قيلمه

کناهيم نينك حسابين يوق بليب مين
سينى درکاهينكه يالغوز كيليب مين
اوزونك رحم ايلاکيل بيچار قول مين
قيامت كون مينى شرمنده قيلمه

سينينك امرينك بلان ايش قيلماديم مين
بو دنيادين كيتاريم بيلماديم مين
لحد ايچره يتاريم بيلماديم مين
قيامت كون مينى شرمنده قيلمه

بو ياتغانلاردين عبرت آلماديم مين
كوزوم ياشين توكوب يالبارماديم مين
کتاب سوزين قولاقغه آلماديم مين
قيامت كون مينى شرمنده قيلمه

يولوم نى باشقاره آلماى يولدا قالديم
ايكام قوللوغينى مين آرقه سالديم
کناهيم نى ييغيب مين قولغه آلديم
قيامت كون مينى شرمنده قيلمه

خداوندا عجب حيران ده بولدوم
کناهيم نى كوروب شرمنده بولدوم
حسابين تاپمايين درمانده بولدوم
قيامت كون مينى شرمنده قيلمه

غريب ليقدا يوروب مين زار حيران
خواجه م سين مينكا بير کيل نور ايمان
منينك مشكل لاريم نى ايله آسان
قيامت كون مينى شرمنده قيلمه

غريبنك ني وصالينك كا يتورکيل
صراط آتليق كذركاه دين اوتورکيل
خواجه! سين جرم - عصيانم کچوركيل
قيامت كون مينى شرمنده قيلمه
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 22 Fevral 2010, 09:25:22
۱۱۹
حکمت

دم بو دم دور اوزکا دم نى دم ديمه
دنيادين بى غم اوتارسين غم ديمه
کويمسه جان دلينك هم استخوان
كوز ياشينك آقان بيله سين نم ديمه

خواه کولسه ييغلاسه عاشق ايلى
چهرهء سرخين كوروب بى غم ديمه
اصل نسلينك قطرهء آب مينى
خس نى کورسنك سين اوزونكدين كم ديمه

آدميده ذره معنی بولماسه
سين آني آدم كوروب آدم ديمه
تويماسه سر معنى دين آدم ايماس
سين آنى صورت کوروب محرم ديمه

کر يوركده بولماسه يور داغ درد
زينهار قاجقيل آنی همدم ديمه
تيکسه بيلكان آبدار خنجری
جان بيرور جانانه غه مرهم ديمه

دوستلار ديوانه ايرماس هر کيشی
غر و جاه دين کيچماسه آدم ديمه
مثل دنيا يوزيده يورکان خسی
های - هوی ديکان بيلان محکم ديمه

احمدا توتقيل غنيمت هر نفس
يارسيز اوتكان بو دم نى دم ديمه
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 22 Fevral 2010, 09:25:39
۱۲۰
حکمت

ايا شاهى دو عالم پادشاهى
ايرورسن بنده نى پشت پناهی
تيلاب دايم سينى اول ذات پاكينك
شياطين شريدين بيركيل پناهی

 بو شيطان شريدين كيمكا قاجار مين
سينى آلدينكده دور سرى کماهی
خداوندا سينكا مين يانديم ايمدى
اوزونك سين بارجه كا رازق الهی

كِرَاماً كَاتِبِين آتليغ فرشته
بيابان قم لاريدين كوب كناهى
محمّد کيم ايرور هادى عالم
اوشال كونده بولادور دادخواهى

اوقوب نامم نى کورسام هيچ عمل يوق
باشيم قويى ساليب يولغوم تباهى
که مين ديرمين: بو ايش نى قيلغانيم يرق
تمام اعضالاريم بولغای كواهى

اولوم نى دستيدين هيچكيم قوتولماس
قلنكدر بول باشينكا کى کلاهى
جهنم اوستيده تارتيغ صراطى
كوروب بنده اورار افسوس آهى

خواجه احمد يسوى! سين ييغلا دايم
اسيغ قيلماس سينکا تنکلاکى آهى
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 23 Fevral 2010, 17:02:15
۱۲۱
حکمت

ناکهان توروريمده کونكلوم ايچره
حق موليم نى نظركاهى توشتى بولغاى
قرق ييليق زنكار باسقان كونكلوم ملكين
حق يادينى نورى برله آجتى بولغاى

ذاكرلارى جمع بولوب توزولميشده
ذكر سماع ديز توسونى قورولميشده
برين عقبى دنياسيدين اوردلميشده
کونكل قوشى حضرت تبا اوجتى بولغاى

هيچ بيلماس مين نيچوك بولغاى مين ايشيم
آنينك اوچون آقار دايم کوزده ياشيم
سحرلارده قوپوب حقدين تيلامشيم
فرشته لار آمينى غه توثشی بولغای

مونكلوغ جانغه يقين تورور حق درکاهى
ندامتده يتارموكين برار اهى
قايسى كونكل بولسه حق نى نظركاهى
حق نظرى ايچكا تولوب تاشتى بولغاى

حق ايشين حق ليق اوچون بيورديلار
اوزلارينى خلق لار ارا يتورديلار
محنت لارين نعمت ينکليغ کوتارديلار
بغرى قانليغ كوزی ياشليغ تولدى بولغاى

محب قول لار محبوبى غه قايرديلار
دنيا قويوب دين ايشى غه اوکورديلار
عاشق قول لار الله تيو تبرانديلار
شيطان نى زهرى ياريليب قاچتى بولغاى

الله ديكيل اى قول احمد! اوزونك بيلكيل
اوزونك بيلميش علمينك برله عمل قيلكيل
اولوغ کيچيك يارانلاردين عذر قيلكيل
سين بيلماسده سيندين خطا كيچتى بولفاى
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 23 Fevral 2010, 17:02:30
۱۲۲
حکمت

ايا دوستلار يورك، بغريم بولدى کباب
حقيقت ليغ عاشق جاندين اوتى بولغاى
عشق پرتوى كونكل ملكين قيلدى خراب
اول سبب دين عقل هوشوم كيتى بولغاى

عشق سيز کيشى آدم ايرماس انكلاسنكيز
بى محبت شيطان قومى تينكلاسنكيز
عشق دين اوزكا سوزنى اکر سوزلاسنكيز
ايلكينزدين ايمان اسلام کيتی بولغاى

ميخانه غه كيركان عاشق سرّى عيان
بغرى بيشيب ياشى آقيب قيلور افغان
بيخود يورار قايده بارسه خانه ويران
بيشك بيلنك وحدت مى دين تانى بولغاى

عشق توشتى بو باشيمغه حيران بولدوم
خانماندين كيچيب تقى سرسان بولدوم
ايكى عالم برباد اوروب عريان بولدوم
جيقان آهيم نه فلك كا يتى بولغاى

عاقل ايرسنك حقدين اوزکا سوزلار حرام
تا تريك سين پير خذمتين قيلغيل مدام
الله ديسنك شيطان لعين سينكا غلام
الله ديماس دين لارينى سانى بولغاى

عمرى ضايع اوتكانلار عشق نى بيلماس
جاندين کيچکان ديوانه نى كوزکا ايلماس
هو صحبتين قورغان ييركا قاجيب کيلماس
جانى كونكلنى تاشدين بتر قاتى بولغاى

الله سويکان بنده دايم ييغلاب يورار
حقدين قورقوب رازين ايتيب سحر تورار
يحيى صفت تينماى ييغلاب ماتم قورار
بو دنيانى آرقه تاشلاب آنى بولغاى

عاشق لارنى ايشى ايرور سوز و كداز
عاشق لارنى حاجت لارى روزه نماز
روز محشر كوز ياشى دور حقه نياز
عارف عاشق درد و الم تارتى بولغاى

عاشق لارنى آغزى خندان دلى لرزان
الله اوجون کوزده ياشى، بغرى بريان
جانى ذاکر، كونكلى شاكر، فكرى جانان
انشاء الله قيل كوفروكى اوتى بولغاى

عاشق لارى خلق ايچنده كويوب ييغلار
ظاهر خنده باطن لارى يورك داغلار
اجل استاب اولماك اوچون بيلين باغلار
معشوقى غه عرض حالين ايتى بولغاى

عاشق لارى ملامت دين قاچماس بولور
نادانلاركا باطن سرين آچماس بولور
هر نامردكا درّ و گوهر ساچماس بولور
اوزى اوقوب خون زرداب يوتى بولغاى

پير مغان سويكان عاشق هواسى يوق
يوز مينك تورلوك طاعت قيلسه بناسى يوق
اى دوستلاريم عشق دردينى دواسى يوق
تونلار قوبوب پير ايتاکين توتى بولغاى

پير مغان نظر قيلسه بيركاى دوا
هاى - هوس، ما و من ليك بولغاى ادا
آندين سونكره شيطان لعين سيندين جدا
تار لحدده ايمان برلان ياتى بولغاى

قول خواجه احمد حق سوزينى سوزلار مدام
حق دين اوزكا سوزلار بارى ايرميش حرام
روزى قيلسه اورنونك بولغاى دارالسّلام
مغفرت نى درياسيغه باتى بولغاى
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 23 Fevral 2010, 17:03:05
۱۲۳
حکمت

شريعت ده مرشد بولغان غالب قول لار
شريعت دين آلار منزل آلور بولغاى
نمازيغه شروع قيلكان مؤمن قول لار
اوجماخ اويين اميد توتوب تورور بولغاى

ملك الموت فرمان برله جانيم آلسه
اغا اينى بارچه ييغليب قويوب يانسه
ييتى قدم باسقاندين سونك قالور بولسه
منكر نكير كيريب سؤال سورار بولغاى

منكر نكير كيريب سؤال سورار بولسه
اول عمود اوتلوغ برله اورار بولسه
باشيم كويوب جانيم، تنيم اوتقه يانسه
قيناب جانيم تار لحدده كويار بولغاى

تورت ووز قرق تورت پيغمبر مرمل نبی
قالمادى بو جهاندين اوتی باری
کلُّ نفس ذائقة الموت ايتى
قرآن ايچره آندين خبر بيرور بولغای

شريعت دين طريقت دين بيان بولدی
حقيقت دين قرآن سوزی کلام بولدی
بو جهانغه محمّدنى نورى تولدق
اول نور برلان ايكى جهان يارور برلغاى

خوش دولت دور ولايت ده پادشاه بولسه
عادل بولوب بير مؤمن نى قاضى قيلسه
اوشال قاضى بارچه خلقنى راضى قيلسه
راضى ليق دين اوجماخ اويين آلور بولغاى

مؤمن قول لار نماز اوقوب بولسه فارغ
اوشال قولنى رنكى بولغاى مونداغ سارغ
اول خذمت حق قاشيده بولسه لايغ
حور قيزلارى قرشو كيليب قوچار بولغاى

بعضى كيشى نماز قدرين قاچان بيلور
هر نمازده ايمان باشدين تازه بولور
صلوة ديسه غافل باشين بورکاب اويور
غافل ليق دين عمرين ييل کا ساتار بولغاى

قول خواجه احمد قول مين ديسنك طاعت قيلغيل
قيامت نى كيلماكى نى ياقين بيلكيل
حقه ياووق بولای ديسنك طاعت قيلغيل
طاعت قيلغان حقه ياووق بولور بولغاى
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 23 Fevral 2010, 17:03:24
۱۲۴
حکمت

محبت نى شوقى برله يا راستاکيل
روزه نماز اوغانيم نى فرضى بولغاى
محشركاه ده عدلى برله سورار بوله
عاشق لارنى بير خداى غه عرضى بولغاى

عرضى شولدور خدايى غه مينك داد ايتار
حاليم کور ديب ياشين ساچيب فرياد ايتار
نعره تارتيب محشرکاه نى آباد ايتار
عاشق لارنى بير خداى غه عرضى بولغاى

چين عاشق لار دايم تبريك اولکان ايماس
ارواح لارى يير آستيغه كيركان ايماس
زاهد عابد بو معنى نى بيلكان ايماس
چين عاشق لار خلايق نى خضرى بولغاى

يازوق لاردين قورقوب اوزى ييغلاب تورار
روز محشر نتار مين ديب قانلار يوتار
صراط آتليغ كذركاهده ياشى قاتار
خواجه سيغه شكست ليغ عرضى بولغاى

ذره عشقى كيمكا توشسه نالان قيلور
كوز ياشين آقوزوبان عمان قيلور
هر نه تابسه حق يوليده احسان قيلور
بخيل لارنى عداوتى بغضى بولغاى

عاشق لارنى ياش اورنى غه قانى آققاى
ملايك لار هر طرفدين نورلار ياققاى
غافل بولسه حاضر بول ديب اوزى باققاى
چين عاشق لار بو دنيانى جغذى بولغاى

اهل دنيا آخرت دين پرواسى يوق
روحى تنها ايمان اسلام همراسى يوق
طريقت يول اداشقان هيچ پرواسى يوق
بنده مين دير تيلى برله آغزی بولغاى

کيچه الله، کوندوز الله، تينماى يورار
الله شمعى پروانه ديك اوزين اورار
ليلى مجنون فرهاد شرين دورين سورار
حق تعالى عاشق لارنى سوزق بولغاى

عاشق كويسه خاص معشوقى بركا کويكاى
مجازيلار کويماى تورور جاندين تويكاى
چين عاشق لار کويكان سرى پرنور بولكاى
اول سببدين معشوقى غه نازى بولغاى

اوتقه يانماس سالسه اوتدين عاشق کيشى
يير و كوكنى بوستان قيلغاى آققان ياشى
الله ديسه بيشك يارور ايچى تاشى
کويماق يانماق عاشق لاركا بازى بولغاى

جمله عاشق ييغليب باركاى درکاهى غه
ياشين ساجيب افغان قيليب بارکاهى غه
ييتى دوزخ طاقت قيلماس بير آهى غه
رحمن ايكان عاشق لارکا قاضى بولغاى

عاشق لارنى ييتى كوك کا ييتار آهى
الله ديسه يكسان بولور هر كناهى
عاشق لارنى رحمن ايكام تكيه کاهى
عزيز باشى خلايق نى ايدی بولغاى

عاشق لارنى کوب کويدورکان حق ديدارى
آنينك اوچون تينماى ييغلاب قيلور زارى
وعده قيلغان عاشق لارى كورار آنى
حق جمالی كوز ياشينى مزدى بولغاى

عاشق لارى حقه باقيب نعره تارتار
ملايك لار تحفه قيليب حقه ايتار
شوق شرابين ايچكان عاشق شوقى آرتار
شور افغان خلايق نى توزی بولغاى

مى جان بخش ايچكان عاشق آنده سلطان
آنينك اوجون حق يوليده جانى قربان
تانكلا بارسه ديداريغه قيلور مهمان
زمستانده مى ايچورسه يازى بولغاى

پنهان يورور کيمنى كورسه عاشق قيلور
لطف ايلاسه كذاب لارنى صادق قيلور
حقدين قورقان درکاهى غه لايق قيلور
ظاهر اعمى باطن ايچره كوزى بولغاى

عاشق يانار خلقدين تانار الله راضى
عاشق ليق نى آرزو قيلغان شهيد غازى
حاجت ايرماس عاشق لاركا کوب و آزى
قطره ياشى حق موليم نى نذرى بولغاى

جنون ايچره باشين يارغان قانى جارى
ذكرين ايتسه الله اوزی بير و بارى
سحرلارده قان ييغلاماق كار وبارى
عاشق لارى هركون يوز مينك غازى بولغاى

قول خواجه احمد مالى يوقتور نذرى باشى
تانكلا بارسه خواجه سيغه تحفه ياشی
عجز و نياز شکسته ليغ قيلغان ايشی
اشك سرخی روی زردی عذری بولغاى
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 23 Fevral 2010, 17:03:39
۱۲۵
حکمت

سبحان ايذيم فرمان قيلسه قدرت بيله
عاشق لارى غوغا قيليب يورور بولغاى
محشركاهده افغان قيليب ياشين توكوب
ايلكا اوزين كمراه قيليب يورور بولغاى

عاشق لارنى حق قاشيده يوز نازى بار
نعره تارتسه ذره هركز قالماس ينار
روزه نماز تسبيح لارى پروردكار
باطن لارى كويا قيليب يورور بولغاى

حقنى ايزلاب همراه لارى زاغ و زغن
حاجت ايرماس عاشق لاركا باغ چمن
رحلت قيلسه جوروك ايكنى آنكا كفن
خضر والياس همراه قيليب يورور بولغاى

عاشق لارنى كوز ياشيدور باغ و بوستان
آنده سيرار على الدوام هزار داستان
ظاهرلارين بوزوب يورار خانه ويران
حق قدرتين انشا قيليب يورور بولغاى

بيخود بولوب كويوب يورار مست و حيران
الله تيو کوزده ياشى بغرى بريان
نعره اوروب فرياد ايتيب قيلور افغان
الله يادين ثنا قيليب يورور بولغاى

قادر ايكام قدرت بيله صلح ايلاسه
جنت ايچره كيرار عاشق امر ايلاسه
نعره تارتيب فرياد ايتيب ورد ايلاسه
مى نوش ايتيب سماع قيليب يورور بولغاى

كيچه - کوندوز ييغلا دايم بردم تينماى
تيلدين الله يادين ايتيب هارب تالمای
کوزده ياشى آقماس هرکز بغری کويمای
ياشين آليب كواه قيليب يورور بولغاى

محبت نى براقى نى مينيب يوركان
آندار عاشق طريقت ده جولان قيلكان
سر شرابين ايچيب ازل روحى قانغان
عشق بابنده ندا قيليب يورور بولغاى

دوزخ ايچره كيرسه عاشق پروا قيلماس
كوروب بيليب مال ملكنى قولغا آلماس
حور و قصور غلمان لارنى کوزكا ايلماس
فرياد ايتيب غوغا قيليب يورور بولغاى

قهار ايكام قدرت بيله ندا قيلسه
ديدار اوچون كويكانلاريم کيل کيل ديسه
كوز ياشينى آقوزوبان فرياد قيلسه
عقل هوشين دانا قيليب يورور بولغاى

رحمن ايكام رحمى برله ندا قيلكاى
حزين ندا ايشتيب عاشق جانى كيركای
صفّاً صفّاً بولوب عاشق باس کوتارکاى
عسق اوزين يكتا قيلسه يورور بولغاى

عاشق بولوب حكمت ايدى قول خواجه احمد
صدقى برلان ايشيتكانكا يوز مينك رحمت
ايمان عطا قيلغاى تنكريم تاج دولت
عاشق دلين صفا قيليب يورور بولغاى
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 23 Fevral 2010, 17:03:59
۱۲۶
حکمت

اوّل هو، آخر هو ديب بيخود بولکيل
حق جمالين کورساتمسه ضامن بولای
ظاهر هو، باطن هو ديب يوليغه کيرکيل
حق جمالين کورساتمسه ضامن بولای

لا إله إلاَّ الله ديب زارى قيلكيل
حق ذکرينى هركيم ايتسه ياری بيركيل
پير مغان خذمتينه يوکوروب يوركيل
حق جمالين کورساتمسه ضامن بولای

تيلده آلكيل لا إله إلاَّ الله
ايچكا سالغيل هر نفسده بولكيل آگار
پير مغان نظر قيلكاى سنكا ناکاه
حق جمالين کورساتمسه ضامن بولای

ادهم صفت سوا بولوب دنيا تيبكيل
كيمنى کورسنك خضر بيليب قولين اوپكيل
جمالنى كوراى ديسنك سحر قوپ غيل
حق جمالين کورساتمسه ضامن بولای

الله ديكان بنده لارنى قولى بولكيل
تفراق صفت يول اوستيده يولى بولكيل
عاشق لارنى كويوب اوچكان كلى بولكيل
حق جمالين کورساتمسه ضامن بولای

ذاکر بولوب شاكر بولوب حقنى سويكيل
سحر وقتده قوپوب نفسنك کوزين اويكيل
بايزيدديك عاشق بولوب دنيا قويكيل
حق جمالين کورساتمسه ضامن بولای

سورسنك، تورسنك، ياتسنك، قوبسنك، حقنی ايتسنك
ذاكر بولوب شاكر بولوب جاندين اوتسنك
والله بالله دنيا حرام تاشلاب آتسنك
حق جمالين کورساتمسه ضامن بولای

حق وصلى غه يتاى ديسنك سحر ييغلا
الله تيو يورك بغرينك اوتقه داغلا
همت قورين جان بيلى كا محكم باغلا
حق جمالين کورساتمسه ضامن بولای

ادهم صفت بو دنيادين كونكل اوزكيل
حرص هوا تكبّرنى اوين بوزكيل
محبت نى درياسيغه جوموب يوزكيل
حق جمالين کورساتمسه ضامن بولای

كيچه - کوندوز آخرت نى غمين ييكيل
توت اويقونى حرام قيليب طاعت قيلكيل
محبت نى شرقى برلان کوکسونك ياركيل
حق جمالين کورساتمسه ضامن بولای

اهل هوا من - من ليكدين قاچيب يوركيل
اهلين تابسنك كوزده ياشنك ساچب يورکيل
محبت نى شرابى دين ايچيب يوركيل
حق جمالين کورساتمسه ضامن بولای

ايا دوستلار بو دنيادين ييغلاب اوتينك
فانى تورور بو دنيادين كيچيب كيتينك
محبّت نينك جامين آليب مى نوش ايتينك
حق جمالين کورساتمسه ضامن بولای

کيچه الله، كوندوز الله تينماى ايتكيل
کيچه لارى بيدار بولوب قانلار يوتكيل
بو دنيانى عرت لارين تاشلاب اوتكيل
حق جمالين کورساتمسه ضامن بولای

پير مغان ايتاکى نی محکم توتقيل
معرفت نی بازاريده اوزونك ساتقيل
مى نوش ايتيب سماع قيليب ذکرين ايتقيل
حق جمالين کورساتمسه ضامن بولای

يا ربّنا ظلمنا ديب ناله قيلغيل
کوز ياشينكنى هر طرفقه ژاله قيلغيل
حق يادينی ايتيب اوزونك واله قيلغيل
حق جمالين کورساتمسه ضامن بولای

درد حالت پيدا قيليب يولغه کيرکيل
پروانه ديك شمع نی کوروب اوزونك اوركيل
قايدا بارسنك ذکرين ايتيب دوكان قورکيل
حق جمالين کورساتمسه ضامن بولای

محبّت نى ميدانيده باش اويناسنك
هو هو تيو ذكرين ايتيب جان قيناسنك
ديدار تيلاب قان ياش توكوب زار اينكراسنك
حق جمالين کورساتمسه ضامن بولای

ايرانلارنى آستانه سين سقلاب ياتقيل
سحرلارده چار ضرب اوروب ايرته قوپقيل
زارى قيليب فنا بولوب جاندين اوتقيل
حق جمالين کورساتمسه ضامن بولای

تفراق صفت خوارليق تارتقيل نفسنك اولسون
خلق ايچنده رسوا بولكيل عالم كولسون
چين كونكلده ييغلار كوركيل خدا بيلسون
حق جمالين کورساتمسه ضامن بولای

کوز ياشينكنى دريا قيلغيل رحمى كيلسون
غريب بولوب يولدا ياتقيل قولونك آلسون
پنهان يوروب طاعت قيلغيل تنكری بيلسون
حق جمالين کورساتمسه ضامن بولای

هجران تونى آهينك برلان اوتلار ياققيل
كوز ياشينكنى برقى بيرلان چيقماق چاققيل
ايرانلارنى صحبتيده ايريب آققيل
حق جمالين کورساتمسه ضامن بولای

اى نا انصاف دنيا فانى، حقه يانغيل
بنده بولسنك حق ذکرينى تينماى آيتغيل
پير مغان خذمتيدا جفا تارتقيل
حق جمالين کورساتمسه ضامن بولای

الله تيو فنا بولكيل بغرينك کويسون
تونلارقوپيب طاعت قيلكيل تنكری سويسون
آندين سونكره خاص بزرك لار نظر قيلسون
حق جمالين کورساتمسه ضامن بولای

تون سحرلار بيدار بولوب سحر توركيل
عاشق بولسنك اسماعيل ديك جاندين اوتكيل
قول آياغينك محكم بوغوب امرين توتكيل
حق جمالين کورساتمسه ضامن بولای

رياضت نى قنيغ تارتيب جانلار قينا
ميدان ايچره باشنك بريب باشينك اوينا
عيش دين كيچيب مال اورنيغه زقوم چينا
حق جمالين کورساتمسه ضامن بولای

فوهاد صفت محنت تارتيب تاغلار كسكيل
بايزيد ديك تونلار قوپوب اوزونك آسكيل
جنيد ديك جول کزيب خارلار باسكيل
حق جمالين کورساتمسه ضامن بولای

حق رحمتى اولوغ دريا بير قطره بس
قطره سيدين بهره آلغان قيلماس هوس
ما و من ليك سيندين كيتار مثل مكس
حق جمالين کورساتمسه ضامن بولای

حق رحمتى اولوغ دريا قابل بولغيل
طالب ايسنك حق ساريغه مايل بولغيل
زهد تقوى دايم قيليب نايل بولغيل
حق جمالين کورساتمسه ضامن بولای

لالا ايتيب الاَّ الله غه شيدا بولغيل
منصور صفت اناالحقّ ديب غوغا قيلغيل
كريان بولوب کوز ياشينكنى دريا قيلغيل
حق جمالين کورساتمسه ضامن بولای

اى بى خبر غفلت بيلان اويقوده سين
دنيا تيلاب كيچه - كوندوز قايغوده سين
طاعت قيلماى سوزلار سوز لب بيهوده سين
حق جمالين کورساتمسه ضامن بولای

تاشدين توشك - يستوق قيليب طاعت قيلسنك
حق امريغه راضى بولوب بويون سونسنك
اولار وقتده ايمان آريغ قولغه آلسون
حق جمالين کورساتمسه ضامن بولای

قول خواجه احمد نصيحت نى اوزونكا قيل
اى بى خبر خلقنى قويوب اوزونكنى بيل
تاغ دين آغير كناهينك بار اوزونكا كيل
حق جمالين کورساتمسه ضامن بولای
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 23 Fevral 2010, 17:04:14
۱۲۷
حکمت

تطوع روزه توتار خلقلارغه شيخ ليق ساتار
علمى يوق عاميدين بتر آخر زمان شيخ لارى
بيلى كا فوطه چالوب اوزنى کيشى سانور
ترصاتده اوفتانور آخر زمان شيخ لارى

باشيغه دستار اورار علمى يوق نيكا يرار
اوقى يوق ياسين قورار آخر زمان شيخ لارى
الاين دين آل قيلور معمله نى مال قيلور
ايسسز عمرين ييل قيلور آخر زمان شيخ لارى

شيخ ليق اولوغ تورور حضرتكا ايلتكان اش تورور
آش بيرماس بغرى تاش تورور آخر زمان شيخ لارى
مسكين احمد قنده سين حق يولنده نيده سين
علمينك يوق نه سانده سين آخر زمان شيخ لارى
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 23 Fevral 2010, 17:04:32
۱۲۸
حکمت

عاصى، جافى، قلونك کيلدى دركاهنك كا
قولوم توتوب يولغه مالكيل انت الهادى
ايرك ليك قادر ييغلاب کيلديم باركاهنك كا
قولوم توتوب يولغه سالكيل انت الهادى

تون كيچه لار تانك آتقونچه ياتماق ايشيم
سحر توروب راز ايتمادى مونكلو باشيم
ندامت ده آقارموکين كوزده ياشيم
قولوم توتوب يولغه سالكيل انت الهادى

يولسيز يولغه كيرديم دوستلار حاليم خراب
خلقدين سورسام هيچ كيم بيرماس منكا جواب
خالقيم سين يول كورساتكيل عاليجناب
قولوم توتوب يولغه سالكيل انت الهادى

خجالت ده قورقوب كيلديم کناهيمدين
ذاتى اولوغ پروردكار الهيم دين
ندا کيلدى نوميد قويماى درگاهيمدين
قولوم توتوب يولغه سالكيل انت الهادى

ييغلاب كيلديم حضرتينك کا ايا شاهيم
قبساب كيلديم قرانغولوق چيقيل ماهيم
پادشاهيم، سين بير و باريم، تكيه كافيم
قولوم توتوب يولغه سالكيل انت الهادى

باشدين اياغ بولدى كنه قايده باراى
يول اداشكان ايتديك بولوب کيمدين سوراى
بو حال برلان ديداريكنى قايدين كوراى
قولوم توتوب يولغه سالكيل انت الهادى

مين بر كيتسام ايلييك اياق جمله کواه
رحمت ايتيب سين كيچماسنك حاليم تباه
شرمنده مين، درمانده مين كوبتور كناه
قولوم توتوب يولغه سالكيل انت الهادى

كنه دردى بيمار قيلدى طبيبم سين
محبوبم سين، درمانيم سين، حبيبم سين
يولده قالديم حاليم سورار رفيقم سين
قولوم توتوب يولغه سالكيل انت الهادى

فاسق، فاجر رحمتينكدين نوميد ايماس
سيندين اوزكا هيجكيم مينى يولغه سالماس
لطف ايتمسنك مشكل لاريم آسان بولماس
قولوم توتوب يولغه سالكيل انت الهادى

هيچ كيشى يوق ييرده، كوكده سين سين قادر
شكم يوقتور بو سوزوم ده اوزوينك ناظر
هم يكه سين، يكانه سين بيشك حاضر
قولوم توتوب يولغه سالكيل انت الهادى

مين يولونكده باش بيرماديم قادر خدا
باش نه بولغاى غريب جانيم يوز مينك فدا
درد هم اوزونك، درمان اوزونك لطفونك دوا
قولوم توتوب يولغه سالكيل انت الهادى

جان وايمان غذاسيدور سنينك ذرقينك
جانيم بيريب ساتقون آلاى سينى عشقينك
روز محشر شفيع بولغاى سينى شوقينك
قولوم توتوب يولغه مالكيل انت الهادى

قُلْ هُوَ الله، سُبْحَانَ الله دين قمچى سى
روزه، نماز، تسبيح، تهليل حق ايلچى سى
پير مغان طالب لارى يول باشچى مى
قولوم توتوب يولغه مالكيل انت الهادى

انت الهادى، انت الحق نى ذکرين ايتسام
هادى بولسنك ايدى يولدين راستقه قيتسام
هر ذكرينى تيل كا آليب نعره تارسام
قولوم توتوب يولغه مالكيل انت الهادى

انت الهادى انت الحق نى ذكرى قوى
پير مغان سوزلاريدين آلسه فتوى
باطن لارى روشن بولوب بولور يخشى
قولوم توتوب يولغه مالكيل انت الهادى

قول خواجه احمد رحمتينكدين اميد توتاى
خواجم منى بندم ديسه شكرين ايتاى
بندم ديماى يوز اوكورسه نيچوك ايتاى
قولوم توتوب يولغه مالكيل انت الهادى
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 23 Fevral 2010, 17:04:48
۱۲۹
حکمت

خوش قدرتليغ پروردكار بير و باريم
قولوم توتوب يولغه سالكيل انت الهادى
ذاتى اولوغ رحمن ايكام هم جبّاريم
قولوم توتوب يولغه سالكيل انت الهادى

سحر وقتده ييغلاب توكسام قانلار کوزدين
کونكلم آچيب آکاه بولاى يخثى سوزدين
قدرتيغه محو بوليب کيتاى اوزدين
قولوم توتوب يولغه سالكيل انت الهادى

اجابت نى اندين تيلاب قيل مناجات
حاجتينكنى روا قيلغای قاضى حاجات
رحمت دريا تولوب تاشار ييتسه فرات
قولوم توتوب يولغه سالكيل انت الهادى

اى داد ايكام هيچ يتمادى سينكا داديم
يير و كوك نى نالان قيلدى بول فرياديم
روز محشر قيچقيرغايمو کيل آزاديم
قولوم توتوب يولغه سالكيل انت الهادى

بنده بولسنك ذکرين ايغيل قولونك آلسون
يولدين آزسنك رهبر بولوب يولغه سالسون
سحرلارده زارى قيلغيل رحمى کلسون
قولوم توتوب يولغه سالكيل انت الهادى

انت الهادى، انت الحق نى ذکرى الله
حق ذکرينى ايغيل تينماى بولغونك آكاه
رحيم موليم نظر قيلسه اولور ناكاه
قولوم توتوب يولغه سالكيل انت الهادى

انت الهادى، انت الحق نى ذكرى دلده
بيلماس نادان ذكرين ايتيب ظاهر تيلده
مين - مين ديكان شيخ زمان آب و گيلده
قولوم توتوب يولغه سالكيل انت الهادى

انت الهادى، انت الحق نى ذكرى اولوغ
حق ذكرينى ورد ايلاكان كونكلى سنوغ
ورد ايلاماى شيخ مين ديسه جايى تموغ
قولوم توتوب يولغه سالكيل انت الهادى

اى يرانلار نفس ايلكيدين آرمانده مين
عصيان يوكی دوتا قيلدى درمانده مين
عاجز قولونك هر نه قيلسه فرمانده مين
قولوم توتوب يولغه سالكيل انت الهادى

قول خواجه احمد نفس دين اولوغ بلا بولماس
يول اوستيندا تفراق بولسام كافر اولماس
يير وکوك دين طعمه بيرسام هركز تويماس
قولوم توتوب يولغه سالكيل انت الهادى
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 23 Fevral 2010, 17:05:06
۱۳۰
حکمت

مركب لاغر، يوکوم آغير، اوزوم غمكين
حسرت بيلان عقل هوشيم کيتی تمكدن
اوتوب کاروان كوزدين غايب بولدى ساكن
بارور جايم بيلالماس مين قيان ايمدى

عبث اوتى ايسز عمروم رسواليقده
هيچ بولماديم زمان ترس خداليقده
دايم يوردوم نفسيم اوجون كداليقده
هر نه قيلغان سودالاريم زيان ايمدى

بو حالت ده اول عزرائيل كيلسه ناکاه
اسيغ تندين جان نى آلسه بيركيل پناه
شيطان آليب ايمانيمنى قيلسه رسرا
برادرلار آرا يولده من قالغان ايمدى

بو حالت ده سوز ايتورغه يوقتور فرمان
اوجوب قالغاى وجود ايچره شمع ايمان
قزيل كل ديك اوشبو يوزونك بولور سامان
يقين بولغونك يير آستيغه نهان ايمدى

زن - فرزند اغا اينينك ييغلاب توركاى
ميراث ديبان مال - ملكونك بولوب آلكاى
ايلتيب سنى قرا ييركا تيغيب کومكاى
طعمه قيلكار قريش آتليغ ييلان ايمدى

كيل اى خائف بو ايشلاردين خبر آلكيل
توبه قيليب دنيا قويوب حقنى سويكيل
قول خواجه احمد بو دنيادين اوتوب يانكيل
شايد قيلغاى نظر پير مغان ايمدى
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 24 Fevral 2010, 07:19:49
۱۳۱
حکمت

خوشلامايدور عالم لار سزنی ايغان تورکينی
عارف لاردين ايشتسنك آجار کونکل ملکی نی
آيت حديث معنى سى توركى بولسه موافق
معنى سى کا يتكانلار ييرکا قويار بورکى نى

قاضى، مفتى، ملالار شريعت درکاهنى
عارف، عاشق آليب دور طريقت نى اركى نى
عمل قيلغان عالم لار دينميزنى چراغى
براق مينار محشرده ايگرى قويار بورکى نى

عمل قيلسه عالم لار دين و آيين ياروقى
كورسه بولور الارنى رنك رويى کورکى نى
عمل قيلماى قال علمين اوقوى بيلماى قالغانلار
آرقه سيغه كوتارور قرق ايشك يوکی نى

خو اجه من ديب لاف اورمه اوشبو دنيا بی پايان
بيلامين ديب ايتماسين کونکلداکی چرکی نی
رهنمادور خواجه احمد کلستان مغرفت
سوزلار سوزى حقيقت آجار کونكل ملكى نى

مسكين ضعيف خواجه احمد يتى پشتينك کا رحمت
فارسى تيل نى بيليبان خوب ايتادور ترکينی
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 24 Fevral 2010, 07:20:12
۱۳۲
حکمت

کونكلوم قوشى اوجار دايم قنات توقوب
ايكى كوزوم ندامتده قانلار توکوب
تن اولتروب رياضتده تيزين چوکوب
يا الهى عفو قيلغيل کتاهيم نى

نادان ليقده قيلغان ايشيم بارچه خطا
توبه تقصير ايلاماديم يقام توتا
كردنيمكا طوق ينكليغ سالب فوطا
يا الهى عفو قيلغيل کتاهيم نى

دنيا سويوب دين سوداسين اوتكاريب مين
يازوق يوکين ايا دوستلار بتكاريب مين
دركاهنا معصيت لار كيلتوروب مين
يا الهى عفو قيلغيل کتاهيم نى

شوم دنياغه کونكل باغلاب کاهل بولدوم
عشرت بيلان وا دريغا جاهل بولدوم
بو دنيانى اوتارينى ايمدى بيلديم
يا الهى عفو قيلغيل کتاهيم نى

كونكل ملكين توتمش اوخشار ظلمت تونى
من ليك ايچره پيدا بولور ما و منى
پير خدمتى يراق قيلور بيزدين آنى
يا الهى عفو قيلغيل کتاهيم نى

قول خواجه احمد كناهى کا قايل ايرور
هر کيم الله ديسه آنكا يارى بيرور
ايرانلارنى صحبتى كا مايل ايرور
يا الهى عغو قيلغيل کناهيم نی
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 24 Fevral 2010, 07:23:02
۱۳۳
حکمت

قدرت برلان فرمان قيلدى موليم بيزغه
ييرده، كوکده يانليق مخلوق قالماس ايرميش
قبض قيلدى عزرائيل نى عالم اوزرا
عزيز جانين آلماقونچه قويماس ايرميش

ياشيم مينى ياش بولور ديب آيتور ايرديم
هر نه خالص بولسا آز ديب آيتور ايرديم
تورلوك - تورلوك دعا ايشلر قيلور ايرديم
ايمدى بيلديم مين آيتكانديك بولماس ايرميش

دنيا مينى ملكوم ديكان سلطانلارغه
عالم مالين سانسيز ييغيب آلغانلارغه
عيش و عشرت برله مشغول بولغانلارغه
اولم كيلسه بيرى وفا قيلماس ايرميش

مغرور بولمان، اى دوستلاريم! عشرت ايتيب
كيچه - كوندوز يالغان آيتيب بيخود ياتيب
جان آلغونچى كيلور ايرميش بير كون ايتيب
مونداغ يرده غافل يورسه بولماس ايرميش

قول خواجه احمد اولارينى بيلا كورقيل
آخرتنى يراقنى قيلا كورقيل
بارورمن ديب يول باشيده تورا كورقيل
ملك الموت كيلسه فرصت قويماس ايريش
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 24 Fevral 2010, 07:23:22
۱۳۴
حکمت

سبحان ايذيم اوزی دور اول مصطفى بيوردى
بابام آرسلان تيكوردى شيخم احمد يسوى
مصطفى نينك خرقه سين كيدى، ييدى لقمه سين
توتدى کعبه حلقه سين شيخم احمد يسوى

باقسه كعبه كورونكان باسسه ييرلار تورولكان
لدن علمى بيرلكان شيخم احمد يسوى
اصلى ايرور خاندان بيلماس آنى کوب نادان
بيلور آنى حق يزدان شيخم احمد يسوى

اسحاق بابا يريغى شيخ ابراهيم قولنى
مشايخ لار اولوغى شيخم احمد يسوى
ياسى سونينك اراسى ياتور کوهر پاره سى
مشايخ لار سراسى شيخم احمد يسوى

قرچيغنى قوشلاغان شونقار لاچين اوشلاغان
سانسز مريد باشلاغان شيخم احمد يسوى
شريعتى آراسته طريقتى پيوسته
حقيقتده شايسته شيخم احمد يسوى

شريعتنى سوزلاكان طريقتنى ايزلاكان
حقيقتنى بيلدوركان شيخم احمد يسوى
كون توغاندين باتارغه ترسه، جهود، تاتارغه
قوللوق قيليب سانارغه شيخم احمد يسوى

اون سيكز مينك عالمده آتى مشهور كلامده
اورنى دار السلامده شيخم احمد يسوى
باب لار بابى خراسان سانسز تومان هندوستان
بابالار باشى [بابا] آرسلان شيخم احمد يسوى

آتام آتى ازغوسى يپار بولوب توزغوسی
ايكى جهان کوزکوسی شيخم احمد يسوی
خضر برله صحبتليك الياس برله الفت ليك
حق قاشنده حرمت ليك شيحم احمد يسوى

ترکستانغه بارالنك خدمتنده بولالنك
اولوش بيرسه الالنك شيخم احمد يسوی
بابا ماچين اول سلطان مريد بولدى بيگمان
حكيم خواجه سليمان شيخم احمد يسوی
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 24 Fevral 2010, 07:24:19
مناجات بدركاه قاضى الحاجات جل جلاله

مناجات ايلدی مسكين خواجه احمد
الهى قيل همه بنده نك نى رحمت
غريب احمد سوزى هرکز قوريماس
اكر يير آستيغه کيرسه چوروماس

ينه منسوخ بولوب اول خوار بولماس
اوقوغان بنده لار بيمار بولماس
اوقوغانغه قيلور مين آنده شفقت
قيامت كونيده قيلغوم شفاعت

خدايم قيلسه انعام مينكا جنت
اوقوغان نى قيلور مين مين شفاعت
تيلاکی هر نه بولسه تنکرى بيركاى
محبت شوقى نى کوکسيکا سالكاى

جمالين کورساتيب پروردکاريم
اوزين يوليغه سالسون بير و باريم
خدايم ايلاسون محشرده خرّم
قيامت كون اريغ ذاتى غه مَحْرَم

دعاغه ياری بيرسه هر مسلمان
اولار وقتيده ايلتكاى نور ايمان
مينى حكمت لاريم عالمغه تولغان
ايشيتماى هر كيم اولسه قيلغاى ارمان

مينى حكمت لاريم دردليككا درمان
کيشى بوی ايلتمسه اول يولده قالغان
مينى حكمت لاريم عالمده داستان
روحوم کيلسه قيلور صحبت نى بوستان

مينى حكمت لاريم كان حديث دور
كيشى بوى ايلتمسه بيلكيل خبيث دور
مينى حكمت لاريم طالب نى رزقى
اكر چنديكه بولسه جرم و فسقى

مينى حكمت لاريم فرمان سبحان
اوقوب بيلسنك همه معنى قرآن
مينى حكمت لاريم عالمده سلطان
قيلور بير لحظه ده چول نى كلستان

مينى حكمت لاريم شوق محبت
كوزينى ياشيغه قيلغاى طهارت
نمازيغه رمول الله امامی
آنى قومى ملائك لار تمامی

شكسته ليك بيله قيلغان نمازی
قبول بولغاى آنی حقه نيازی
مينى حكمت لاريم عاشق غه ايتينك
دلى آيينه ديك صادق غه ايتينك

همه کور و کر و باطنى کذاف
نمام اقليم نی گيزديم تابماديم صاف
مينى حكمت لاريم صرّاف کا ايتينك
خدای باکرم وهّاب کا ايتينك

عدالت پادشاه بر آتى صادق
قيلور بير لحظه ده وصلى غه لايق
مينى حكمت لاريم نادادن ايشتماس
دلى، کونكلى قارا پنديم نى آلماس

خطى دين بيخبر الله غه منكر
ادب سيز بى ادب دنياده بى پير
خطى نى بتسه هر كيم نثر بتسون
ولى نثرى بتيب مقصودغه يتسون

دينى ايمانى يوق اسلامى ويران
قيامت تانكى آتسه يولده قالغان
پير كامل نى كورماى شيخ صنعان
خدا قيلماس قبول اوقوسه قرآن

اوزينى شيخ آلور كولبارى حالى
يكرمه بيش كا ييتماى آنى سالى
نصيحت لار قيلور پير و جوان نى
اوزى فهم ايمايين يخشى يمان نى

آلارنى سوزلارى ضال مضل دور
شريعت اهلى بو ايل دين خجل دور
اينانسون ديب مونى بير نيچه بى عقل
قيلورلار اوليالاردين مونى نقل

قويوب دامين کذركاه لارغه بى پير
تيلى مكر و حيله قيلغانى تزوير
آنى مكرى ايرور شيطاندين اعلا
قوپار يوزی قرا محشرده تانكلا

الارنى كورمنكيز يوزينى هرکيز
انينكديك لعنتى دين ايلانك پرهيز
زبانى حال ايله اعمى نى ايتيم
حقيقت سوز بيله جاهل نى سوكتيم

اکر عالم بولسه جانيم تصدق
دُرّ و کوهر سوزوم نى ايشيتيب اوق
دُرّ و کوهر سوزين عالمغه ساچسه
اوقوب اوقوسه کلام حقنى آچسه

اوشال عالم غه جان قربان قيلورمين
تمامى خانمان احسان قيلور مين
قانى عالم قانى عامل ياران لار
خدادين سوزلاسه سيز جان برينك لار

چين عالِم يستوقين تاشدين ياراتى
نيمه اوقدى آن عالَم غه ايتی
اوزينى بيلدى ايرسه حقنى بيلدى
خدادين قورقتى و انصاف غه كيلدى

مينى حكمت لاريم دانا يشيتسون
سوزوم داستان قيليب مقصدغه ييتسون
مينى حكمت لاريم فعلی وقولی
دلى كونكليده بولسه ذکر مولى

مينى حكمت لاريم بير پير کامل
قايو بنده خداغه بولسه مايل
مينى حكمت لاريم خوبلارغه ايتينك
دعا تكبير قيليب رحمت کا باتينك

مينى حكمت لاريم پير زبزدست
ايشيتكانلار بولور بيهوش ر سرمست
تيريك بولسه جهانده خوار بولماس
اوقوغان بنده لار بيمار بولماس

قيامتده آنكا هادى بولور مين
اکر دردليك بولسه دارو بولورمين
اكر يوز ييل عمر کورسه قوريماس
اكر يير آستيغه كيرسه چوروماس

خدا قيلغاى آنى دوزخدين آزاد
بهشت جاودانده ايلاکاى شاد
اكر حكمت اوقوسه أيُّهَا النَّاس
ايرور فرزند مينكا اول طالب خاص

ايشيتيب حكمتيم نى گوشه آلغان
عطا قيلغاى اولار وقتيده ايمان
يسوى حكمتين دانا ايشتسون
ايشيتكانلار همه مقصودغه يتسون

جواهر كانيدن بير نكته آلسون
ايشيتماكان بارى حسرتده قالسون
كيشى حكمت ايشيتسه جانى برلان
چيقار جانى آنى ايمانى برلان

قلاقغه آلماغاى بو سوزنى نادان
آنى آدم ديمه اول جنس حيوان
خدانى سوزيدين چيقان بو حكمت
ايشيتكان كا ياغار باران رحمت

مينى حكمت لاريم حقنى ثناسى
محبت اهلی نى دردين دواسى
مينى حكمت لاريم قند و عسال دور
همه سوزلار ايچنده بى بدل دور

مينى حکمت لاريم انعام الله
سحر وقتده ديسه استفغر الله
آنى شيطان لعين توتماس يولى نى
محمّد مصطفى آلغاى قولى نى

پيغمبر امتيم ديب مهرى تاولار
عزازيل نى خدايم اوزن قاولار
مينى حكمت لاريم دردسيزكا ايتمنك
بهاسيز گوهريم نادانغه ساتمنك

يسوى حكمتين قدريغه ياتقيل
خم عشقدين ميى بر قطره تاتقين
خم عشقدين كيثى بير قطره تاتقاى
خدانى وصلى كا بر يولى ياتقاى
 


تمت الكتاب بعون الله الملك الوهّاب

Nashrga tayyorlagan: Tyulemissov Madi: [email protected]
Nom: Re: DEVONI HIKMAT (turkiy yozuvida). Ahmad Yassaviy خواجه احمد يسوى - ديوان حكمت
Yuborildi: AbdulAziz 24 Fevral 2010, 07:30:14
Devoni hikmat (eski o'zbek yozuvida)

(http://ziyouz.com/images/books/devoni_hikmat.jpg) (http://www.ziyouz.com/index.php?option=com_remository&Itemid=57&func=fileinfo&id=646)

Muallif: Xoja Ahmad Yassaviy
Hajmi: 830 Kb
Fayl tipi: pdf, zip
(http://www.ziyouz.com/components/com_remository/images/download_trans.gif) Saqlab olish (http://www.ziyouz.com/index.php?option=com_remository&Itemid=57&func=fileinfo&id=646)
Online o'qish (http://forum.ziyouz.com/index.php?topic=4359.0)