Munojot
Ey, ismidan atir taratgan,
Ey, dunyoni ishqdan yaratgan.
G'uncha kabi ochdim ko'zimni,
G'arib holda ko'rdim o'zimni.
Neki bildim - mudhish... Uyaldim,
Behush bo'lib, gulga suyandim.
Yuragimga tegdi tikani,
Qonim oqdi yaproqqa... Ani -
Chumolilar ichib berdi jon,
Qanday maxluq bo'ldim, Xudojon?!
Tomirimga sancharkan nishin,
Chayonlar ham yiqilar shishib.
Nahot boshdin oyoq zaharman,
O'z-o'zimni tinmay chaqarman.
Holbuki, bol isini tuyib,
Kelgandim gul ishqida kuyib.
Bilmam, qachon, ne deb chalg'idim,
Adashdimmi turmush changidin...
O'zing - mayoq, o'zingsan habib,
O'zing - tiryoq, o'zingsan tabib.
Kasalimni tuzatsang zora,
Sendan o'zga topolmas chora.
Ki, sensan bor olam maqsudi,
Senga yetmas tubanlig' dudi.
Arshingdasan, oliysan, poksan,
Va hammadan ham yaqinroqsan.
Yaqindirsan hatto o'zimdan,
Olissan-u ojiz ko'zimdan.
Har hujayram sezar taftingni,
Osmonlarga sig'mas taxtingni -
Yuragimga qo'ndirgan o'zing,
Isyonimni so'ndirgan - so'zing.
Sokinman-u ruhimda to'lg'oq,
Sening otash shavqingga to'lmoq -
Qanday azob, qanday shirin, xush,
Go'yoki tush ichidagi tush.
Jilvalanar eng toza ranglar,
Go'zal, nafis saslar, ohanglar...
Jimirlaydi har bitta tolam -
Menga singib yo'qolar olam.
Men qaydaman? Vujudim qayda?
Mast bo'ldimmi gul tutgan maydan?
Eslolmayman nega ismimni?
Topshirdimmi butkul izmimni?
Hayotimni o'zing qilgin hal,
Ey, nafasi - mushk, ismi - zarhal...
Sendan o'zga yo'qdir yupanchim,
Sen boqmasang, bu dunyo yanchib -
Ko'kka eltar xas-somonimni,
Bir qop qoldig'-u yomonimni.
Holbuki dur, marvaridlarim -
Sochiladi tuproqqa bari...
Hech kim sezmas, hech kimsa termas,
Tersa hamki, birovga bermas.
Ular faqat senga atalgan,
Ruhimga tugmaday qadalgan.
Sen deb tunlar berganman oro,
Zahmatimdan topganman orom.
Ey, ismidan atir taratgan,
Meni ishqqa qorib yaratgan.
Gardim bo'lsa - artib qo'y sekin,
Tanobimni tortib qo'y, lekin
Qahhor isming talabin tutma,
Parvardigor, meni unutma!
Bir uyum go'ng kabi tashlandiq
Sasib yotmay bir chetda... Sandiq
Ichidagi zanglagan tig'day
Ruhim ado bo'lmasin... Tinmay
Yod etaman nurli zotingni,
Rahmon, Rahim, Karim otingni.
Netay, faqat shunga qodirman,
Bechoralar ichra nodirman.
Yuragimga kuch ber, ilohi,
Yetib borsin senga dil ohi.
Toki jannat yuzin qaratsin,
Toki ismim atir taratsin...
2006