Ichim g‘urmishlab, uyga yetib kelsam, eshik yuziga yopiq, qulf tushmabdi. Demak, oyim tiq etgan tovushga quloq tutib o‘tiribdilar. Kirishimdan urishib berishlari aniq. Shuning uchun ham oyoq uchida kirib borib, derazadagi qulfni ola boshladim. Ammo ichkaridan... qanaqadir piq-piq yig‘i tovushi kelar, tovush ham tanishdek edi...
— Shunaqa, kichigoyujon, dardum ichimda. Chiroq yoqsa, yorumaydu. Bu balo qaydun yopushdu, qay gunohlarumga tutdu, — deb siqtanardi kennoyim... Qotib qopman.
— Hammadan yashirsangiz ham o‘zimga aytavermaysizmi? — dedilar oyim.
Kennoyim yig‘isini yutolmay, hiqilladi:
— Koshki... aytub bo‘lsa, kichigoyujon.
— Men kimman, kelinposhsha? Nega onangiz o‘rniga onadek ko‘ravurmaysiz? Bir chekkasi kelinim bo‘lsangiz, bir chekkasi shu yoqdan ketgan kishilarning tirnog‘isiz, chirog‘isiz, — deb tergay ketdilar oyim.— Alloh otalarizga buyurmagan yurtni sizga buyuribdi, shukr qiling. Birovlarnimas, bizni bag‘rimizda o‘tiribsiz. Bizga suyanmay, kimga suyanasiz?! Sultonmurodimizning taqdirida ahli ayoliyu Yodgorini bizga qoldirib, o‘zi darbadar ketishi borakan, ne qilayluk?! Ko‘namiz-da Xudoning yozug‘iga. Dardizni olay, unday qilmang. Hammasini ichingizga solavermang. Anavi Yodgorizzi o‘ylang. Erta birisi kun uni uylashingiz, orzu-havasini ko‘rishingiz kerak. Kelin tushirsangiz, qo‘lidan bir piyola choy ichganingizda bu kunlar unut bo‘lib ketadi, aylanay. Zimmangizga ham ota, ham ona bo‘lish tushibdi, hali ajrini ham ko‘rasiz. Tirnog‘ingiz er yetib qoldi, har odamlar borki, tirnoqqa zor, chirog‘bonga zor. Hech siqilmang, Allohning va’dasi bor, men shukr qilgan bandam bilanman, degan. To‘g‘rimi?