U chindan ham imom tarixini bilmasligini shu savoli ila ayon etib qo‘ygan, endi jindek xijolatga tushib, qo‘lidagi bo‘sh piyolani o‘ynar edi. Axiyri uni Olimga uzatib, To‘ramga qaradi:
— Uzr, siz imom Xamzatning shogirdlari imom Shomilni aytasizmi, yo...
— O‘sha ikkinchi imomni aytaman, tutqunlikka qayt¬moqdan, loshi Payg‘ambar alayhissalom yurtlarida qolmog‘ini avlo ko‘rgan buyuk mujohidni. Ul zot Nabiy sollallohu alayhi vasallam masjidlarida qolib, Allohdan yolg‘iz bir narsani — loshlari o‘shal yurtda qolmog‘ini surunkasiga uch kun namozda so‘rgan ekanlar.
To‘ram taqsir bu voqealarni so‘zlar ekanlar, o‘zlari shu tarixlardan ruh olib, bir necha o‘n yillar avvalgi chin To‘ramga aylanib bormoqda edilar. Ovozlari ham, so‘zlarining zalvori ham bo‘lakcha edi. Muftiy hazratlari esa, u kishiga tan bermoqdan o‘zga ilojlari yo‘q bir alpozda ham havaslanib, ham kemtik bir hislar qorishig‘ida o‘tirar edilar. Niyatlari esa, tashriflarining boisini aytmoq bo‘lsa-da, buning mavridini bilolmay, — qariyaning armoniga hamohang tebranar edilar.
Nihoyat ular bu mavzularni bir chetga surib, iltifotu manziratlar bilan qaymoqxo‘rlikka tutindilar. Boya to‘g‘ralgan non satta moyga aylanib, endi og‘izda erib borar, arzimas vaqtda jannat taomiga aylanib ulgurgan edi. Qariyalar o‘zlari qolib, Olimni qistashar:
— Oling, bu dunyoning ne’mati bo‘lmabdi, keyin bunaqasini topolmay yurasiz. Topganingizda ham o‘xshatolmaysiz, — deyishar edi.
Olim esa, ularga atalgan ne’matga o‘zi ham sherik bo‘layotganidan tobora qisinib borardi. Hozir bu dunyo ko‘rgan qariyalar bilan o‘tirish bir gashtli bo‘lsa-da, o‘rtadagi taomdan ko‘ra suhbatlari shirinroq tuyulmoqda edi. Xizmatlarida o‘tirganidan, bu kunlarga yetib kelganidan boshi osmonda edi.