11. Yig‘lasim keladir, ey yoronlar!
«Akam o‘rnida akajonim, Chaman aka!
Eng og‘ir, eng mushkul damlarda har kimning bir ishonimli, suyansa suyangulik kishisi bo‘lsin ekan! Bunday qarasam, dardimni to‘kib, ichimni yorgudek yaqinlarim ko‘p. Oyim borlar, maslahat solsa solgudek, ayolim bor, ichimni yorsam yorgudek. Akamning ukasi — Olim akam bor, borsam borgudek. Yodgorning ayasi — kennoyim bor, meni yeru ko‘kka ishonmagudek. Lekin bu gapni, keyingi kunlarda dardi-dunyomni ostin-ustin qilib tashlagan bu voqealarni men ularga qanday ham aytay?! Ularni ham o‘zimdan battar kuydirmoqqa, tashvishga qoldirmoqqa haqqim bormi?! Ochig‘i, bu dardni ularga to‘kmoq tugul, uchini chiqarmoqqa haddim sig‘may keladir. O‘ylab ko‘rsam, hali ham bo‘lsa bu gapni sizdan bo‘lakka yorilolmas ekanman, maslahat sololmas ekanman. Shu umidda (ichimga sig‘dirolmay) qidirib borsam, yo‘q ekansiz. Sabrim chidamay, bir vaqtlar Yodgorlar turgan boloxonaga chiqib, shu xatni yozib, qoldira qoldim.
Ayting, nima qilay? Boshlig‘imga ariza ko‘tarib kiraveraymi, yo chaqirgunlaricha, kuta turaymi?
Shunday bo‘ldiki, men umrimda birinchi marta bosh muharrirning topshirig‘ini rad etdim. «Men bu xildagi yumushlarni ado eta olmayman. Kim o‘ziga ep ko‘rsa qilaversin», debman kotiblariga. Yo‘q, men ishsiz qolishdan qo‘rqmayman. Bir amallab kunimni ko‘rib ketarman. Lekin Yodgorlarga nima bo‘ladi? Tekshir-tekshir bo‘lib qolmasmikan?
Tushuntiribroq aytsam, Toshkentdagi o‘sha Osiyo, Afrika mamlakatlari kinochilari fetivalidan so‘ng shunday voqealar sodir bo‘lib ketdiki, ularni bir og‘iz so‘z bilan aytishga til, tasvirlashga qalam ojiz. Bizda qo‘li-qo‘liga tegmay, hatto harf-klavishlariga qaramay shatillatib yozib tashlaydigan mashinkachi opoy — Gulsuma opa borlar. Shu kishiga biron ta’sirli voqeani yozdirib qolsak, «Iy, yig‘lasim kela!..» deb kaftlari bilan mijjalarini artaveradilar. Biz buni qarichilikka yo‘yib, miyig‘imizda kulib qo‘ya qolardik.