214-BOB
Qadr kechasida ibodat ila bedor bo‘lmoqning fazilati hamda Ramazon kechalarining savobi eng umidli ekani bayoni
Alloh taolo:
«Albatta Biz u (Qur’on)ni qadr kechasida nozil qildik. (Ey Muhammad), qadr kechasi nima ekanligini siz qaerdan bilar edingiz. Qadr kechasi ming oydan yaxshiroqdir. U (kecha)da farishtalar va Ruh (ya’ni Jabroil alayhissalom) Parvardigorlarining izni-ixtiyorila (yil davomida qilinadigan) barcha ishlar bilan (osmondan zaminga) tushurlar. U (kecha) to tong otgunicha tinchlik-omonlikdir». (Qadr surasi, 1-5-oyatlar).
«Albatta biz uni bir muborak — barokatli kechada nozil qildik» (Duxon surasi, 3-oyat), deb aytgan.
1188/1. Abu Hurayradan (r.a.) rivoyat qilinadi. Rasululloh (s.a.v.) «Kimki Qadr kechasi uning fazilatiga ishonib, savob umidida kechani bedor o‘tkazsa, oldingi gunohlari kechiriladi», dedilar. Imom Buxoriy va Muslim rivoyatlari.
1189/1. Ibn Umardan (r.a.) rivoyat qilinadi. Rasululloh (s.a.v.) sahobalaridan bo‘lgan kishilar Ramazonning oxirgi o‘n kunligining yetinchisida Laylatul-qadrni tushlarida ko‘rishdi. Rasululloh (s.a.v.) «Men sizlarning tushingizda Ramazon oyi oxirgi o‘n kunligining yettinchisida Qadr kechasiga muvofiq bo‘lganingizni ko‘rdim. Bas, kim bu muborak kechani topmoqchi bo‘lsa, Ramazon oyi oxirgi o‘n kunligining yettinchisidan axtarsin», dedilar. Imom Buxoriy va Muslim rivoyatlari.