Va, albatta, hech bir badiiy film(baynalminal atama aniqroq chiqarkan - sinema filmi) "Aleksandr"ga teng kelmaydi.
Albatta, uning ba`zi tomonlari faqatgina G`arb odamiga, ba`zi tomonlari esa faqatgina qadimgi yunon qalbiga tushunarli bo`lishi mumkin, ammo unda insoniyat tarixidagi eng buyuk shaxslardan birining faoliyati hamda umuminsoniy manfaatlarni aks ettirgan fikrlari shu qadar teran va badiiy mukammal ifodalanganki, alohida sahnalarda hatto qo`pol materialistlar ham ko`z yoshini tutib tura olmaydilar.
Film nafaqat ssenariysi bilan ma`qul, u kinoga qo`yiladigan barcha talablarga javob beradi. Film ijodkorlari o`z badiiy konsepsiyasini ifodalash uchun barcha vositalardan - operatorlik mahoratidan, maxsus effektlardan, tarixiy muhit hamda tarixiy voqealarni tasvirlashga yondashuvdan foydalanishgan.
Jumladan, Gavgamela jangi tasvirlangan kadrlarni ko`rar ekansiz, Kurtsiy Ruf hamda Arrianning satrlari ko`z oldingizdan yugurib o`tadi. Hech bir tarixiy filmda tarixiy voqea(jang) bu qadar bilimdonlik bilan, haqqoniy, hujjatli va masshtabli tasvirlanmagan.
Aleksandrning filga tashlanishi esa go`yoki butun kinoning qaymog`ini tashkil etadi. Bu sahnada Aleksandrning butun umri, kurashi va muvaffaqiyatsizligi ko`rsatilgan. Bu chinakamiga tarixiy reallikka ijodkorona yondashishdir.
Qolaversa, Bobil, Aleksandriya, Samarqandning maketlari shu qadar ta`sirli va masshtabli chiqqanki, men bu kadrlarni ko`rar ekanman, armonim ro`yobga chiqqani - ushbu afsonaviy shaharlarni ko`rganim va hozirlikda ko`z oldimga bemalol keltira olishim uchun film ijodkorlaridan umrbod minnatdorman.