* * *
Bir kuni shahar sayriga chiqqan podshoh ro‘baro‘sida gado paydo bo‘lib tilanibdi. Podshoh unga bitta oltin tanga berib, o‘zining saxiyligidan o‘zi mamnun holda jilmayibdi. Gado esa, norozi ohangda:
— Ey podshohim, hisobsiz xazinang bo‘lgani holda o‘z ukangga bittagina tanga berishdan uyalmadingmi? — debdi.
Bu gapdan podshoh ajablanibdi:
— Ie, qachondan beri sen mening ukam bo‘lib qolding?
— Nechun hayronu lolsan podshohim, axir sening nasabing Odam Ato bilan Momo Havvodan boshlanmaydimi? — debdi gado.
— Ori-ori, so‘zlaring rost, — debdi podshoh.
— Mening nasabim ham shunday: ikkovimizning ota-onamiz Odam Ato bilan Momo Havvo bo‘lgach, og‘a-ini hisoblanmaymizmi?
Bayon qilganim tilanchining gapi latifanamo rivoyatga o‘xshagani bilan isbot talab etilmaydigan haqiqatdir. Buni ilm tilida «aksioma» deydilar.
Hazrat Bilol roziyollohu anhudan «Sening otang kim?» deb so‘rashganida u zot «Mening otamga maloikalar sajda qilishgan», deb javob qaytargan ekanlar.
Alqissa, dunyoda yashab turgan odam bolalari vatanlari, millatlari, irqlaridan qat’i nazar, og‘a-inidurlar. Bu haqiqatni barcha idrok qilar, deb o‘ylayman. Meni ajablantirgan narsa: asli nasablari bir ekanini bilganlari holda odamlar o‘zaro yovlashadilar. Katta-kichik urushlarni boshlashdan charchamaydilar. Ajablanarlisi shuki, jang maydonining u tomonidagisi ham, bu tomonidagisi ham Xudoga bir xilda munojot etadi: o‘ziga omonlik, ro‘parasidagilarga esa o‘lim tilaydi. U dushman deb hisoblab, o‘lim tilayotgan odamining kim ekanligini bilmaydi. Uning ham oilasi, farzandi taqdirini o‘ylab, ruhan azob chekayotgani ham noma’lum. Urush qaysi bir tomon uchun G’alaba bilan yakun topadi, ammo jonini garovga tikkan, muhoraba azoblarini totgan jangchi uchun hech qanday manfaat yo‘q. U qiyomat janglardan omon chiqqaniga shukr qiladi, xalos.
Alloh «urushmanglar, bir-birlaringga zulm qilmanglar», deb buyurgani bilan urushaveradilar, urusha turib Yaratgandan panoh so‘raydilar, qiradilar, qiriladilar.
Makkai mukarramada, Baytullohda, hajarul-asvad qarshisida ikki hoji yonma-yon ibodat qilishardi. Ularning birlari eronlik, ikkinchisi Iroqdan edi. Bir din, hatto bir mazhabdagi bu ikki odam necha yil avval o‘z mamlakatlari manfaatlari uchun qo‘lga qurol olgan edilar. Jang maydonining ikki tomonidan turib olib bir-birlarini o‘ldirmoq qasdida o‘q uzgan edilar. Ulug‘ marhamatli Alloh ularning jonini saqlab qolib, bu muqaddas uyda ularni uchrashtirdi. Ibodatdan so‘ng ular bir-birlariga salom berib, tug‘ishgan birodarlar kabi quchoqlashib ko‘rishdilar.
Odam bolalari hamisha shunday yashasalar bo‘lmasmi ekan?
Donishmandlardan biri «biz bu dunyoga bir parcha kafanlik ishlab topish uchun kelganmiz», degan ekan. Topganimiz, oqibat bizga nasib etuvchi shu narsa ekan, talashmoqdan, zulm qilmoqdan, zulm ko‘rmoqdan qanday naf bor?
Demoqchimanki, tarixga yoki qiyomat kunidagi vaqt o‘lchoviga nisbat qilib olganda bir necha soniyaga teng keladigan umrimizda mehr-muhabbat bilan yashamoqliq saodatiga yetishmoqlik barchamizga nasib etsin. g’iyomatda, hisob-kitob kunida bir-birimizga ko‘rsatgan shu mehr-oqibat o‘zimizga shafoat bo‘lar, insha Alloh!