Kecha kechki payt adashmasam, TV-Markaz orqali
"Boyvachcha" filmi namoyish etildi. "Navro'z" munosabati bilan deyarli hammaga dam olish kuni berilgan. Ko'pchilik bu filmni maqtagandi, hatto forumning o'zida ham bunday fikrlar bor. Shu tufayli, qolaversa, qiziqishim sababli shu filmni tomosha qilishga ahd qildim. (Axir dam olish dam olishdek bo'lsin-de
)
Filmni ko'rib bo'lib, kelgan xulosam esa....... faqatgina inflatsiyaga borib taqaldi. Mamlakatimizda inflatsiya darajasi keyingi yillarda ancha pasayib barqaror ko'rinish olgan bo'lsa-da, aynan inflatsiya tufayli tiyinlarimiz u yoqda tursin, hatto ba'zi so'mlarimiz ham muomaladan chiqib ketdi. Endilikda eng katta kupyura 1000 so'mlik ham bozorlarda pachka-pachka ishlatilyapti. Hozirda eng kichik qiymatli pul birligimiz "5 so'm"lik kupyura ekan, bu filmni "5 so'mlik film" deb atagan bo'lardim. Agar tiyinlarimiz hali muomalada bo'lganda, shubhasiz, 1 tiyin eng yaxshi baho bo'lardi.
Nega??
Sayoz va hech qanday ahmaiyatga ega bo'lmagan ssenariy + Har qanday mahoratdan yiroq ijro + Bachkanalik + Havaskorlik + Madaniyatning noto'g'ri namoyish etilishi + .... (bu ro'yxatni ancha davom ettirish mumkin) = "Boyvachcha" filmi.
Faqatgina achinganim - Rajab Adashev singari mahoratli aktyorning va Nigora, Ziyoda kabi qo'shiqchilarning bu filmda suratga tushgani. Chunki ularning ijodiga befarq emasdim
Filmning yomon tomonlarini sanab o'tirishga hojat ham yo'q, chunki yaxshi tomonini men umuman ko'rganim yo'q. Agar film tomoshabinga hech narsa bera olmasligini uning "yengil komediya" ekani bilan oqlash mumkin bo'lganda ham... bu omil film bahosini 5 so'mdan yuqoriga ko'tara olmaydi.
Ketgan bir yarim soatga achinish hissi uyg'onadi. Lekin bu bir yarim soat bekor ketsa mayli, aksincha, zararga ishlasa-chi???
Oddiy element - filmdagi o'zbek qizlari bilan hayotdagi o'zbek qizlari bir xilmi?
Agar mabodo ba'zi hollarda shunday bo'lganda ham, buni komediya tarzida bo'lsa ham, "bunday bo'lishi kerak emas" qabilida film olish mumkin-ku...
Shuni esda tutish kerakki, filmdagi qahramonlardan auditoriya (ayniqsa yoshlar) o'zlari uchun "namuna" qahramonlarni ajratib oladilar. Bu ongli ravishda bo'lmasa ham, ong ostida kechuvchijarayon bo'lishi mumkin. Endi xolisona aytsak, qaysi qahramon "namuna" bo'lishga arziydi?
Xulosa qilib aytadigan bo'lsam, bunday filmlar tomoshabinga "moslashtiriladi". Muhim muammolar nozik tarzda yoritib berilgan filmlarni esa hozirgi o'zbek auditoriyasi hazm qila olmaydi. Biroq film oluvchi jamoa har doim tomoshabindan bir qadam oldinda yurishi kerak emasmi? Tomoshabinga xuddi o'sha muammolarni sekin-astalik bilan "hazm qildirib" yubora olish qobiliyatiga ega bo'lishi kerak emasmi?? Bilmadim???
Sal jiddiyroq filmlar esa, katta ekranda o'zini oqlay olmagani sababli, olingandan hech qancha vaqt o'tmasdan, TVda namoyish etilyapti. Masalan, o'sha kuni "Chavandoz" filmi TV yuzini ko'rdi.
Albatta bu hammasi mening fikrim, balki sal, balki ancha oshirib yuborgandirman. Biroq bundan yuqori baho bera olmadim.
P.S. O'sha vaqtning o'zida boshqa kanalda hind filmi berildi. Bitta sahnasi esimda qolib ketdi: Qizning fotihasi bo'lish arafasida, kuyov tomon kelib, qiz bilan yigit ilk suhbatdan o'tishgan. Mehmonlar ketgach, qizning amakisi (dadasi yo'q ekan) yuqoriga chiqib jiyanidan fikrini so'radi, ya'ni: "Rozimisan?" Bunga javoban, qiz uyalib teskari o'girilib oldi, shu payt yonida turgan singlisi (jiyani) amakisiga opasi rozi ekanini, yigit ma'qul kelganini tushuntirdi. Parallell ketayotgan "Boyvachcha"da esa....Taxmina (Nigora obrazi) TV ko'rib o'tirgan dadasining yoniga kelib, men o'sha yigitga (Jahongir obrazi) tegishga roziman deb o'tiribdi.
E'tibor bering: hindlar o'zida yo'q qadriyatni (balki bordir, bor bo'lsa uzr) olib kirishga uning yaxshiligini ko'rsatishga urinyapti, o'zbegim esa....o'zida bor yuksak ahloqni (menimcha, o'zbek qizlari hech qachon Taxmina obrazidek ish tutishmaydi) buzib ko'rsatyapti