Musallambonu




*  *  *

O‘ttizimda o‘tin bo‘lmadim,
Tafti  samoni kuydirguvchi,
Tugalmas Dardga aylandim,
Qop-qora bag‘irdan
oppoq she’rlar tug‘dim
Umri bilan bergan bo‘lsin.

*  *  *

G‘amlar yuragimni uvadadek
titdi bearmon.
Har yonga uloqtirilgan
ko‘ngil parchalaridan,
Yalanglab kelmoqda
She’rning ovozi.

*  *  *

Sevgimning taxti buzildi,
Quladi ming yillik imorat.
O‘zimni qayon urishni bilmadim,
To‘rt tomonga yugurdim zir, zir.
Tovonimni qonatdi,
Toshoynaning sinig‘i.
Yuragimga yiqildi
Yetti osmon devori.

*  *  *

Uchqizda uch mingga hajr tosh yasab,
Uch mingta gulimni chopding beshafqat.
Tongdek ko‘zlaringda uyg‘ongan edim,
Bugun quchog‘ingda o‘lmoqligim shart!

*  *  *

Bu sovuq simlarda
armon  mixlangan
Uyg‘onmay jon bergan
Oliy tuyg‘ular.
Anavu ming yillik
Temir tirqishlar
Hech qachon totmagan
Ozodlik ta’min.

*  *  *

Yuzimda tabassum, ko‘zlarim chaqnoq,
Hech qachon sezmaysiz jarohatlarim.
Balki o‘lgandirman, balki hayotman,
Unsiz aytib ketdim Haqiqatlarim!

"Yoshlik" jurnalidan olindi.