Muxammaslar!
Navoiy g'azaliga muxammas
Shirinsuxan laylivashim vaqteki qohir bo'lg'usi,
Tig'i siyosat tortibon qatlimg'a hozir bo'lg'usi,
Tan chirkidin jonim menin ul lahza tohir bo'lg'usi,
Ishq ahli go'ristonida qabrim chu zohir bo'lg'usi,
Farhod oning toshin yo'nub, Majnun mujovir bo'lg'usi.
Fatton ko'zung mardumlari xunxora ikki jodudur,
Mehri jamoling ollida xurshedi raxshon ko'zgudir,
Qilsam anga nazzoraye, men zorg'a bu qayg'udir,
Dersen yuzum sori ko'zung ko'p boqmasun, gar yuz budur,
Ul mehri tobidin erib oqg'uncha nozir bo'lg'usi.
Kofir ko'zungning xizmatin ixlos ila qilmish ajal,
Xanjar mijangdin aylabon el bag'rini tilmish ajal,
Qotillig'ingni, ey pari paykar, magar bilmish ajal,
G'amzangdin o'lturmak ishin ta'lim ola kelmish ajal,
Bu nav' ustod o'lsa, ul oz chog'da mohir bo'lg'usi.
To g'ayr ila majlis tutub mayl etti ul mah jomg'a,
Har kecha ohim o't solur garduni nofarjong'a,
Hamkesglik qilmay dame men zori beoromg'a,
Ul g'amza kufridin ko'ngul nav'e kelur islomg'a
Kim, tarki islom aylabon go'yoki kofir bo'lg'usi.
Bordur manga zolim iki: gardun biri, dilbar biri,
Ashkim bila ohim erur Jayhun biri, sarsar biri,
Behad g'amim bor, o'lsa sabt, o'lg'usi ming daftar biri,
Ko'nglumdog'i har neshdin gar bo'lsa biri til har biri,
Yuz til bila o'z holining sharhida qosir bo'lg'usi.
Dildor vaslin istasang, o'zdin anosir daf'in et,
Boru yo'qing tarkin tutub, pinhonu zohir daf'in et,
Har ishki maqsad nuriga bo'lg'usi sotir daf'in et,
Xotirin jam' istar esang, avval xavotir daf'in et,
Kimda xavotir bo'lmasa, osuda xotir bo'lg'usi.
Husn ichra aql aylab sanga Kan'on shahi tashbehini,
Ko'nglum qilib ruxsoringa gardun mahi tashbehini,
Ko'yunga Munis ravzaning aylab gahi tashbehini,
Qildi Navoiy qadding sarvi sihi tashbehini,
Bu tab'i nomavzun ila bechora shoir bo'lg'usi.