Seriallar haqida serial
Seriallarning biz bo‘ydoqlar hayotiga ham ta’siri kuchli bo‘ldi. Masalan, sevib yurgan qizingiz birdan serial qahramoniga o‘xshab qolsa...
Shu o‘rinda bir ma’lumot: aytishlaricha, kechagina Esmeralda kabi paypaslab yurishni «moda» qilgan qizlar, so‘ngra Gvadalupega o‘xshab oqsab yurgisi kelib qolibdi.
— «O‘sha» ham yostiqday yumshoq, muloyim qiz edi. «Pavula» boshlanib, cho‘rtkesar bo‘lib qoldi. Demak qizlarning xarakteri o‘zgarishini «programma»ga qarab bilsa bo‘lar ekan-da.
Bir kuni Nayzagulni, ya’ni «o‘sha»ni ko‘rib qoldim. Qaysidir serial qahramoniga o‘xshab, sochlarini sariqqa bo‘yab olibdi. Xuddi temir zanglaganday shoirligim tutib ketdi:
Sochlaringni sariqqa bo‘yab nima qilasan?
Soch ostida iljayib, qarab nima qilasan?
Qilg‘ilikni qilib qo‘yib, tirjaymagin Sanamjon.
Nima emish, men ham sochimni sariqqa bo‘yab, bo‘ynimga sharf osib yursam, Junsanga o‘xsharmishman. He, o‘rgildim Junsan-Punsaningdan. Ko‘zimni qisib yursam qanday bo‘ladi?
Vaqtida shu Junsang ham boshga bitgan balo bo‘lgan. Bir kuni kechasi, shu deng, Nayzagulni kutaman, hech chiqmaydi. Derazani chertaman, hech chiqmaydi. Keyin bilsam, «Junsang»ni ko‘rib o‘tirgan ekan. Shartta bir parcha qog‘ozga she’r yozdim-da, qoldirib ketdim.
Kelsam agar chiqmagin,
Kino ko‘rib o‘ltirgin.
Menga emas, Junsangga
Chap yuzingni o‘ptirgin.
Ha, darddosh, bemaza qovunning urug‘day ko‘p seriallari ancha-muncha narsaga ta’sir qilayapti. Hatto vaqtga hukmini o‘tkazmoqda.
Dardisar JIZZAXIY
Farruh JABBOROV
