540/4. Abu Muso al-Ash’ariy (r.a.) rivoyat qilib aytdilar: «Rasululloh sollallohu alayhi vasallam bilan birga bo‘lganimizda, agar biror vodiyga ko‘tarilsak, tahlil va takbir aytardik. Shunda ovozimizni baland qilib ko‘tarar edik. Buni eshitgan Rasululloh sollallohu alayhi vasallam: «Ey insonlar, nafslaringizni muloyim tutinglar. Chunki sizlar kar yoki bu yerda yo‘q bo‘lgan Zotga duo qilmayapsizlar. Zero, U zot sizlar bilan birgadir. Albatta U eshitguvchi va yaqinda turuvchi Zotdir», dedilar». Imom Buxoriy va Muslim rivoyatlari.

Imom Termiziy qilgan rivoyatda keltirilishicha, Rasululloh sollallohu alayhi vasallam: «Allohga taqvo etishni va har qanday tepalikka ko‘tarilishda takbir aytishni lozim tut», deb aytdilar.

541/5. Anasdan (r.a.) rivoyat qilinadi. Rasululloh sollallohu alayhi vasallam agar yerning baland qismiga ko‘tarilsalar,

«Allohumma lakash sharafu ‘ala kulli sharafin va lakal hamdu ‘ala kulli hol», deb aytardilar. ( Ma’nosi: «Har balandlikda Seni ulug‘lash va har holatda Senga hamd aytish bor».) Ibn Sunniy rivoyatlari.

177-bob Takbir va shunga o‘xshash  narsalarda ovozni balandlatib, mubolag‘a etishdan man qilish haqida

Yuqoridagi bobdagi Abu Muso al-Ash’ariydan (r.a.) qilingan rivoyat mana shu bobimizga ham dalil bo‘ladi.

178-bob Tuya tez yurishi va rohatlanishi hamda yo‘li ravon bo‘lishi uchun xirgoyi qilib haydab borish to‘g‘risida

Bu haqda ham mashhur hadislar ko‘pdir.

179-bob Hayvon qochib ketganda aytiladigan narsalar

542/1. Abdulloh ibn Mas’uddan (r.a.) rivoyat qilinadi. Rasululloh sollallohu alayhi vasallam: «Agar sizlardan biringizning ulovi cho‘lda yechilib qochib ketsa,
«Ya ibadalloh ahbisu ya ibadalloh ahbisu» (ya’ni, ey Allohning bandalari, ushlanglar), deb aytsin. Chunki Allohning yerda to‘suvchilari bordir. Ushalar uni ushlab berishadi», dedilar. Ibn Sunniy rivoyatlari.

Ilmdagi ba’zi ulug‘ shayxlarimizning menga hikoya qilishlaricha, ularning xachirlari qochib ketdi. Bu hadisni bilishar edi. Shu hadisdagi so‘zni aytishganida, o‘sha zahoti Alloh taolo uni hibs ettirdi.

Men ham bir jamoa bilan ketayotgan edim. Ulardan birining hayvoni qochib ketdi. Uni tutishdan ojiz qolganda mana shu duoni o‘qidim. Shu duoim sababli haligi hayvon o‘sha zahoti to‘xtab qoldi.

180-bob (Minilishi) qiyin bo‘lgan ulovda aytiladigan duo

543/1. Mashhur tobe’inlardan Abu Abdulloh Yunus ibn Ubayd ibn Dinor al-Basriy aytdilar: «Kishi (minilishi) qiyin bo‘lgan ulovning qulog‘iga
«Afag‘oyra diynillohi yabg‘una valahu aslama man fissamavati val arzi tov’an va karhan va ilayhi yurja’un», desa, Allohning izni bilan to‘xtab qoladi». Ibn Sunniy rivoyatlari.

181-bob Biror qishloqni ko‘rib, kirish yoki kirmaslikni xohlaganda aytiladigan zikrlar

544/1. Suhaybdan (r.a.) rivoyat qilinadi. Rasululloh sollallohu alayhi vasallam biror qishloqni ko‘rib, unga kirishni xohlasalar,

«Allohumma robbas samavatis sab’i vama azlalna, val arziynas sab’i vama aqlalna, va robbish shayotiyni vama azlalna va robbar riyohi vama zarayna, as’aluka xoyra hazihil qoryati va xoyra ahliha va xoyra ma fiyha, va na’uzu bika min sharriha va sharri ahliha va sharri ma fiyha», deb aytardilar. (Ma’nosi: «Allohim, Sen yetti osmon va uni soyalantiradigan narsalarning Parvardigorisan, yetti yer va u ko‘tarib turgan narsalarning Parvardigorisan, shayton va u adashtirgan narsalarning Parvardigorisan, shamol va u uchirgan narsalarning Parvardigorisan. Allohim, bu qishloqning yaxshisini, ahlining yaxshisini va undagi yaxshiliklarni so‘rayman. Allohim, bu qishloqning yomonidan, ahlining yomonidan va undagi yomonliklardan Sening noming ila panoh tilayman».) Nasaiy va Ibn Sunniy rivoyatlari.

545/2. Oishadan (r.a.) rivoyat qilinadi. Rasululloh sollallohu alayhi vasallam agar biror yerga tashrif buyurib, u yerga kirishni xohlasalar,
«Allohumma inniy as’ aluka min xoyri hazihi va xoyri ma jama’ta fiyha va a’uzu bika min sharriha va sharri ma jama’ta fiyha. Allohummarzuqna hayoho, va a’izna min vabaho, va habbibna ila ahliha va habbib solihiy ahliha ilayna», deb aytardilar. (Ma’nosi: «Allohim, Sendan bu shaharning yaxshisini va unda jamlagan narsalaringning yaxshisini so‘rayman. Allohim, Sendan bu shaharning yomoni va unda jamlagan narsalaringning yomonidan panoh tilayman. Allohim, undagi hayodan bizni rizqlantir. Vabosidan bizga panoh ber. U yer ahliga bizni do‘st ayla. Va solih ahllarini bizga do‘st et».) Ibn Sunniy rivoyatlari.

182-bob Kishilardan yoki boshqa narsadan xavfga tushganda aytiladigan zikr

546/1. Abu Muso al-Ash’ariydan (r.a.) rivoyat qilinadi. Rasululloh sollallohu alayhi vasallam agar biror qavmdan qo‘rqsalar,

«Allohumma  inna  naj’aluka  fiy  nuhurihim  va  na’uzu  bika  min  shururihim»,   deb aytardilar.  (Ma’nosi:  «Allohim,  biz Seni ularga ro‘baro‘ qo‘yamiz va Sening noming ila yomonligidan panoh tilaymiz».) Abu Dovud va boshqalar rivoyatlari.

183-bob Musofirga jin yoki shayton turli suratda zohir bo‘lsa aytiladigan zikrlar

547/1. Jobirdan (r.a.) rivoyat qilinadi. Rasululloh sollallohu alayhi vasallam: «Agar sizlarga jin yoki shayton biror suratda ko‘rinsa, azon aytinglar», dedilar. Ibn Sunniy rivoyatlari.

Bundan maqsad uning yomonligini azon aytish bilan daf etishdir. Chunki shayton agar azon ovozini eshitgudek bo‘lsa, orqa o‘girib ketadi. Biz bunga o‘xshash zikrlarni «Favquloddagi holatlarda qilinadigan duo va zikrlar kitobi»ning avvalida zikr etganmiz. Va yana shu holat yuzaga kelsa, jin va shaytonlarni daf etishga taalluqli Qur’ondagi oyatlarni o‘qish lozim bo‘ladi.