Rhaq joyida harakatsiz turib qoldi. «Bu odam nimalarni valdiraydi, — deb o‘yladi u, — Asadov xalq dushmani? Asadov otilgan? Axir, Asadov amir zamonidagi bahslarda shunday jamiyatni orzu qilardi, eng odil jamiyat shunday bo‘ladi, deb tortishardi-ku? Hamisha kambag‘alga qayishar edi-ku? Uni nima uchun otdilar, nima uchun xalqning dushmani deyaptilar? Nima uchun nomini tilga olishdan cho‘chiyaptilar? Mana bu odam dilida: «Asadov xalqparvar odam, yashab turgan bu uyini yigirmanchi yilda bolalarga topshirib o‘zi kulbasifat uyga chiqib ketgan, bor mol-mulkini o‘z ixtiyori bilan so‘nggi tangasigacha topshirgan», deyapti. Tilida esa o‘zga gap. Bu nimadan darak beryapti? Luknning bashorati tasdiqlanyaptimi? Tili boshqa, dili boshqa xalq taraqqiyot yo‘liga o‘ta oladimi? Hozir birmuncha ilgarilaganday tuyulyapti. Lekin qo‘rquvga asir bo‘lgan bu odamlar xasdan tiklangan uychani qasr deb faraz qilsalar, yaqin kelajak davrning ayovsiz shamoli bu xaslarni uchirib, uychani vayron qilsa-chi? Bu odamlar jar sari borayotganlarini anglab yeta olarmikinlar? Anglab yetgan onlari vaqt yonib ado bo‘lmasmikin?»
Rhaq shu savollarga javob axtarardi. Uning ongi oliy darajada bo‘lsa-da, hozir javobga ojiz edi. Sahroda suvsab, holdan toygan, o‘lim haq ekaniga ishonayozgan odam ko‘ziga layli sochlarini yoyib olgan majnuntol, uning poyida esa suvga lim-lim to‘lgan hovuz ko‘rinsa, bechoraga g‘oyibdan kuch-quvvat qaytadi. Yer tirnab emaklaydi, necha bor hushdan ketadi, o‘ziga kelib yana tirishib emaklayveradi. So‘ng... o‘sha laylisochli majnuntol, o‘sha suvga lim-lim to‘la hovuz sarob ekanini anglaydi-yu... Rhaq hozir o‘sha tashna odam, o‘sha sarobga qarab borgan bechora ahvolida edi. U umidi darz ketgan holda iziga qayta boshladi. Hovuzga yetmay, o‘ngga burilib, Shoazizning uyini qoralab ketdi.
Eshik ichkaridan tambalangan ekan, Shoazizning o‘zi ochdi. U ancha to‘lishgan, qorin qo‘ygan, ustida oq ko‘ylak, oq shim (Rhaq shaharda yurib, shu kiyimning rasm bo‘lganini sezgan edi), soqol-mo‘ylovini esa qirdirib tashlagan edi. U «Tabib afandi»ni tanisa ham, tanimaganga oldi.
— Keling, ota? — dedi u hadik bilan.
— Sizni bir ko‘rib ketay deb keldim. — Rhaq Shoazizga qattiq tikildi.
— Tanimayroq turibman? — dedi Shoaziz undan ko‘zini olib qochib.
— Men... Tabib afandiman. Uyingizda turar edim...