Men dunyoga aslida
sevmoq uchun kelganman,
Ishqsiz o‘tgan har lahza
tushdir menga, Xudoyim.
Sevilmasam, sevmasam,
evoh, nechun kelganman,
Jon kirsin bu yurakka,
ishq ber menga, Xudoyim.
Yaqinlarim yiroqdan
tinmay meni yomonlar,
Ko‘ngil tashna, to‘lg‘onar,
tushunmaydi nodonlar,
Ishqsiz holimni xarob
ko‘rdim allaqachonlar,
Rahm et, joni halakka,
ishq ber menga, Xudoyim.
Abdulaziz Muborak